1 Samyɛli 22 - Cebaara Bible 2010

Davidi n baa pye kabigaa nyúngo na

¹ A Davidi yiri yaà beè n fàn n sáà kòro Adulami nyanbeweegi ni. A wi senyɛnbèle ní wi kpaʔa wóbèle myɛ gi lóʔo, níì tìgi n kári yaà wi ma.

² Bele myɛ be pye lè wɔʔɔgi ni, ní bele na fwɔɔgéle pye lè, n fàra funbɛɛnri fɔ̀ɔlɔ na, a poro peyɛɛ gbóʔoro yaà wi ma, a wi pye be nyúngi na. Nànbēle saala siin félege be pye ní wi ní.

³ A Davidi yiri yaà beè n kári Misipe ma ki lè Mowabi wógi, ní sáà Mowabi fànʔafɔw pye: «Mii i mɔ nyɛ́ɛri, ki yaʔa mii tóow ní mii nɔ́ɔw í ba tɛ́ɛn ní yele ní fwɔɔ bi taa mii í ba gi cán gee Kolocɔlɔɔ a kpéʔele mii ma lè.»

⁴ A wi be kɔ́ri n kári Mowabi fànʔafɔw ma, a be sáà kòro yaà ní wi ní n lǎli myɛ kwɔ́ɔ, lee Davidi kwɔ́ɔ tɛɛnirigi ni lè.

⁵ A kanyaajoow Gadi Davidi pye: «Mɔ a kɔ́ kòro tɛɛnirigi ni í. Yiri mi lúru mi sa jée Zyuda tári ni.» A Davidi yiri yaà beè n kári n sáà nan Herɛti kɔ́ligi na.

Sawuli n be pye a be Nɔbi sáriga-wòlobèle kpóo

⁶ A Sawuli gi lóʔo pe n kàa cán Davidi kéeli ni n fàra nǎnbèle na be nyɛ ní wi ní lè. Sawuli si maa pye wodɛ́ɛɔn ní Gibeya ni, tamariisi tíigi láara ni, dǎndamagi na, wi tàbaaw si i nyɛ wi ma kɔ́gi ni, á wi falipyebèle si i nyɛ woyérebéle ní wi taana.

⁷ A Sawuli gi joo wi falipyebèle ma be pye woyérebéle ní wi taana lè níì jo: «Yele Bɛnzyamɛ ye, ye lóʔo! A Izayi jáaw a seye ní ɛrɛzɛn séye kaan lé yele myɛ nibin nibin ma? A wi a yele myɛ kpéʔele lé saala kagunɔ kagunɔ kùndigibéle, ní dabata-da kùndigibéle?

⁸ A yele myɛ si nyɔɔ kúun mii na. Joogaanni mii jáaw kpéʔele lè ní Izayi jáaw ní, syɔɔn faala ga gi joo n tɛ̀ɛn mii na í. Yele wàa o mii kéeli yáa í. Yele wàa ga gi joo n tɛ̀ɛn mii na ncan mii jáaw i mii falipyew sɔ́ɔn mii na níì jo wi làra wi mii sige í, àmɛɛ wi gi kpéʔele lè níjanʔa.»

⁹ Dowegi wi pye lè Edɔmi ye wów ní i nyɛ Sawuli falipyebèle ni, a woro wi yari: «Mii n Izayi jáaw nyaa a wi pan yaà Nɔbi ma, Ahitubi jáaw Ahimelɛki ma.

¹⁰ A Ahimelɛki sáà Yawe yíbe wi ma níì yaliire kaan wi ma, níì Filisitini ye Goliyati ŋɔséew kaan wi ma.»

¹¹ A fànʔafɔw tun, a be sáà sáriga-wòlow Ahimelɛki yeri wi lè Ahitubi jáaw n fàra wi kpaʔa wóbèle myɛ na, gee bee n jo sáriga-wòlobèle be pye Nɔbi ni lè. A be myɛ pan fànʔafɔw ma.

¹² A Sawuli baa jo: «Lóʔo, Ahitubi jáaw.» A wi wi yari: «Mii wi wee, ni kàfɔlɔ.»

¹³ A Sawuli wi pye: «Nyàʔá na yele nyɔɔ kúun mii na, mɔ ní Izayi jáaw ní? Nyàʔá na mɔ yaliire ní ŋɔsée kaan wi ma, níì Kolocɔlɔɔ yíbe wi ma koro ga pye wi yìri mii kánmi na bi làra bàā mii sige àmɛɛ wi gi kpéʔele lè níjanʔa?»

¹⁴ A Ahimelɛki fànʔafɔw yari: «Mɔ falipyebèle myɛ nínge ni, wìí wi nyɛ tágala syɔ́ɔn àmɛɛ Davidi nyɛ lè, ní i nyɛ fànʔafɔw pyà nàɔn, ní ní i nyɛ sùlasiibèle nyúngo na bele be mɔ kpáaw wéle lè, á wi mɛ́ɛgi kpɔ́ʔɔ mɔ kpáagi ni?

¹⁵ Níjanʔa lé mii náà gi séli ni Kolocɔlɔɔ yíbe wi ma? Eʔe dɛ. Fànʔafɔw ga yɛlɛ wi keelaa taʔa wi falipyew na í wàlá mii tóow kpaʔa wówaa faala na í. Níì cán mɔ falipyew ga kàa cán kéeli bee ni í, kapiipiile wàlá kakpɔɔlɔ í.»

¹⁶ A fànʔafɔw jo: «Ahimelɛki, a mɔ a kpóo wii, mɔ ní mɔ kpáagi wòolo myɛ ní.»

¹⁷ A fànʔafɔw gi joo wi kpaàwelebèle ma be pye wi taana lè woyérebéle ní níì jo: «Ye kàri ye Yawe sáriga-wòlobèle kpóo, níì cán poro n wɔ́ɔ̀ kɔlɔ̀ wáa Davidi ma. Pe n gi cán ncan a wi da ni fé wii, pe si ga gi joo mii ma í.» Kàjáa fànʔafɔw falipyebèlē ga fɔ̀lɔ n kɔ́yi sánʔa bi Yawe sáriga-wòlobèle kpóo í.

¹⁸ Lǎli bee ni a fànʔafɔw Dowegi pye: «Kàri mi sáriga-wòlobèle kpóo.» A Edɔmi ye Dowegi fíige n too sáriga-wòlobèle na. Cángi bee na a wi nànbēle togoye sicɛrɛ ní kagunɔ kpóo, poro bele pe da ni lɛn efɔdiw búrogo nii lè.

¹⁹ A Sawuli Nɔbi jaa ní ŋɔséew ní, ki lè sáriga-wòlobèle kàʔa. Wi n nǎnbèle ní cébèle, ní pìiyilibèle, ní yireŋɔribèle, ní nǐyi, ní jòfanibèle, ní yaweeyiligèle kpóo ní ŋɔséew ní.

²⁰ Ahitubi jáaw Ahimelɛki jáawaa si maa fàn n syɔɔ n kári Davidi kurugo. Pe i wi yiri Abyatari.

²¹ A Abyatari sáà Davidi pye Sawuli n Yawe sáriga-wòlobèle kpóo.

²² A Davidi Abyatari pye: «Cángi bee tiimaa na àmɛɛ Edɔmi ye Dowegi pye yaà lè, mii maa gi cán wi a sa kéeli bee yaʔa sìnjoo ni Sawuli ma í. Mii wi pye sábabu á mɔ kpaʔa wóbèle myɛ kùu.

²³ Kòro naa ní mii ní, mɔ a kɔ́ ra fɛ̀ɛgí í. Wee wi mii siikwɔɔri caa lè, woro wi wɔ́ɔ̄ mɔ wóri caa. Bi mɔ yaʔa naa ní mii ní, mɔ a pye yɛɛ̀nyinge na.»