1 Samyɛli 21 - Cebaara Bible 2010

¹ A Davidi yìri n kári, á Zyonatan lúru n jée kěgi ni.

Davidi n kári Nɔbi ma sáriga-wòlow Ahimelɛki tɛ́ʔɛ ma

² A Davidi kári Nɔbi ma sáriga-wòlow Ahimelɛki ma, a woro i cɛ̀lɛ́ ni maa n baa wi fàra, níì wi pye: «Mɛ̀ɛ́ gi nyɛ mɔ si i nyɛ mɔ nibin, syɔɔn faala o nyɛ ní mɔ ní í?»

³ A Davidi sáriga-wòlow Ahimelɛki yari: «Fànʔafɔw n tundunro joo n gbàn mii ma níì mii pye: ‹Kéelee na mii mɔ tun lè, ní tundunri mii joo n gbàn mɔ ma lè, syɔɔn faala ga yɛlɛ bi yafyɛn cán di ni í.› Mii n tɛɛgaa tɛ̀ɛn mii nìgɔcaribèle na, beè wo a woyɛɛ vàra lè.

⁴ Nyàʔá gi naa mɔ kɔ́gi ni tɔ́ɔliw ni? Búrubéle kagunɔ kaan mii ma wàlá gee faala mɔ ga taa lè.»

⁵ A sáriga-wòlow Davidi yari: «Búruteleo o naa mii kɔ́lɔ ni í fwɔɔ búruw be kaan Kolocɔlɔɔ ma lè, ki ga tɛ́nɛ̀ pye mɔ nigɔcaribèle ga pínɛ càbala ni í.»

⁶ A Davidi sáriga-wòlow yari: «Wolo ní cébèle myɛ n ceri woyɛɛ na àmɛɛ ki da pye mii ma lè booma ni, lǎli ni mii ga ni syée kapɛɛnni ma lè. Mii nìgɔcaribèle kapɛɛnkpumɔn-yárira i nyɛ fɔɔnrɔ fun. Ki si ga pye nɔ́nʔɔrɔ kéele i yaà, li pyefɔw kapɛɛnkpumɔn-yárira a wi sámaga nyɔɔ níjanʔa.»

⁷ Lǎli bee ni a sáriga-wòlow búruw kaan wi ma, wee be kaan Kolocɔlɔɔ ma lè. Níì cán búruwaa nikwɔɔ da níì pye yaà n fàra wee na be kaan Kolocɔlɔɔ ma lè í. Woro pe da láa n yirige Yawe yɛ́ʔɛ ma, níì búrufuuo tɛ́ʔɛ wi sìndɛɛgi ni cángee na be wee láa lè.

⁸ Sawuli falipyewaa si maa pye yaà cángi bee wonijanga na, ni sige Yawe yɛ́ʔɛ ma, Edɔmi ye wóo wi pye, pe maa ni wi yiri Dowegi. Woro wi da pye Sawuli bànaʔabèle nyúngo na.

⁹ A Davidi Ahimelɛki pye: «Tàbaa wàlá ŋɔsée o naa mɔ kɔ́gi ni ì? Níì cán mii ga mii ŋɔséew wàlá mii kapɛɛnkpumɔn-yárigaa láa í, àmɛɛ fànʔafɔw tundunro da wári lè.»

¹⁰ A sáriga-wòlow wi yari: «Filisitini ye wów Goliyati mɔ kpóo lè Terebɛnti jǐnlɔgi ni, woro ŋɔséew wi yaà wee womigi-dɛ́ʔɛɔ ní fàni ni, efɔdiw kàdoʔo ma. Mɔ ga ni caa bi woro láa, mi wi láa. Níì cán wàa nikwɔɔ o naa kapye woro ban í.» A Davidi jo: «Wi félege o beè í, wi kaan mii ma.»

Davidi n kári Filisitini ye ma pe lè Gati wóbèle

¹¹ A Davidi yiri cángi bee wonijanga n fàn Sawuli na n kári Gati fànʔafɔw Akisyi ma.

¹² A Akisyi falipyebèle wi pye: «Davidiw naa ban wi nyɛ tári fànʔafɔlɔ ì? Woro kéeli na ban pe da ŋúnugi kúun ì, ní i yóo, níì jo: ‹Sawuli n wi saala kagunɔbèle kpóo, á Davidi wi selebingèle kagunɔbèlē kpóo?› »

¹³ A Davidi syɛ́ɛnri bee cò fúngi ni níì fyáa Gati fànʔafɔw Akisyi na gbanʔama.

¹⁴ A wi wiyɛɛ kàriga kanmaa na pe nyɛnɛ na n wiyɛɛ bye nicuroo, ní i kpàánweeli kɔ̀riyɔ kàarí, níì tɛ́ɛkabɔlɔgi yaʔa ki i fóo ni tíri wi bàʔajɔɔw na.

¹⁵ A Akisyi wi falipyebèle pye: «Yele tiimaa n gi nyaa ncan nǎnw naa n cúro. Nyàʔá na si yele wi kɔ́ri n pan mii ma?

¹⁶ Nicurobèle lé be fɔ̀n naa mii ma, koro na yele wee naa kɔ́ri n pan mii ma wi ba ra wi nicuro-gérigèle kpéʔele mii yɛ́ʔɛ ma? Wee naa si jée lé mii kpáagi ni?»