1 Samyɛli 20 - Cebaara Bible 2010

Zyonatan n Davidi syɔɔ

¹ A Davidi fàn n yiri Nayɔti ni, ki lè Arama wógi n kári Zyonatan ma n sáà jo: «Nyàʔá mii pye? Gìí gi nyɛ mii kolomi, ní mii kapeeli, lee mii kpéʔele lè mɔ tóow na á wi si i mii sìikwɔɔri caa?»

² A Zyonatan wi yari: «Koro yaʔa! Mɔ a kùu í. Mii tóow o kakpɔɔlɔ wàlá kapiipiile kpéʔele, kapye wi ga gi joo n tɛ̀ɛn mii na í. Nyàʔá si na mii tóow a lee naa làriga mii na? Gee bee a pye í.»

³ A Davidi kàligi naa kàli níì jo: «Mɔ tóow n gi cán kányɛʔɛ na ncan mii kéeli n kpɔ́ʔɔ mɔ ma, koro na wi a jo: ‹Zyonatan ga yɛlɛ wi gi cán í, gee bee a pye wi ma funbɛɛnrɛ.› Mii si a tɔ̀nɔ́ gi joo mɔ ma àmɛɛ Yawe nyɛ lè sìi na, ní àmɛɛ mɔ nyɛ lè sii na, nyɔ̌nlaala nibin li kòro mii ní kùúw nínge ni.»

⁴ A Zyonatan Davidi pye: «Gee mɔ caa lè mii a gi kpéʔele mɔ ma.»

⁵ A Davidi wi yari: «Nyɛ̀ʔɛna wi nyɛ yevɔngi, mii n yɛlɛ bi sa tɛ́ɛn lìi ní fànʔafɔw ní. Ki si n yɛlɛ mɔ í mii yaʔa mii í sa làra sìnbirigi ni fwɔɔ bi taa ba nan candaanri wógi cângwɔʔɔ nyɔ́ɔ na.

⁶ Mɔ tóow ga baa gi kɔ̀rɔsíi n gi nyaa mii o yaà í, mi wi pye: ‹Davidi n mii nyɛ́ɛri gbanʔama níì jo mii í woro yaʔa woro í yiri yaà fáraw woro kěgi ma ki lè Bɛtilehɛmi. Níì cán woro túlugi wòolo myɛ i yaà ni sáriga wóo, wee be wóo lè yɛɛlɛ o yɛɛlɛ.›

⁷ Wi ga jo: ‹Ki n yɛlɛ,› mɔ falipyew n syɔɔ. Kàjáa wi fúngi ga yìri, mi gi cán wi n gi tímana n kwɔ́ɔ bi kapeʔe kpéʔele.

⁸ Koro na nyɔɔ mɔ falipyew na, níì cán mɔ n mɔ falipyew lége ní miyɛɛ ní joogaanna ni Yawe yɛ́ʔɛ ma. Kapye mii n kolo keelaa ni, ki n yɛlɛ mɔ tiimaa í mii kpóo. Nyàʔá na mɔ a náa mii kɔ́ri kári mɔ tóow ma?»

⁹ A Zyonatan wi pye: «Sɔ̀nguri bee yaʔa. Mii ga gi cán ncan mii tóow n gi tímana n kwɔ́ɔ bi kapeʔe kpéʔele mɔ na, mii a gi yaʔa sìnjoo ni mɔ ma í!»

¹⁰ A Davidi Zyonatan pye: «Mɔ tóow ga sáà tanʔa ní mɔ ní, wìí wi a ba koro joo mii ma?»

¹¹ A Zyonatan Davidi pye: «Da maa wo yiri sìnbirigi ni.» A pe myɛ siinw yiri sìnbirigi ni.

¹² A Zyonatan sáà Davidi pye: «Yawe Isirayɛli ye Kolocɔlɔw mɛ́ʔɛ na, nyɛ̀ʔɛna wàlá nyɛ̀ʔɛnagwɔɔ níbeena nyɔʔɔmɔ na, mii a mii tóow sɛʔɛ wéle. Mii ga sáà wodaanna taa wi ma mɔ Davidi kàbangi na, mii ga pye mii ga wàa tun wi ba koro joo mɔ ma í,

¹³ wɔʔɔgi gi pee lè, ki n yɛlɛ Yawe í koro taʔa mii Zyonatan na bi ní kàa fàra gi na. Mii tóow si ga gi nyaa ki n yɛlɛ woro í kapeʔe kpéʔele mɔ na, mii a wɔ́ɔ koro tɛ̀ɛn mɔ na, si mɔ yaʔa mɔ í da syée yɛɛ̀nyinge na, Yawe si pye ní mɔ ní àmɛɛ wi da pye ní mii tóow ní lè.

¹⁴ Mii ga sèʔê pye beè sìi na, mi Yawe funjǎngi kpéʔele mii kàbangi na jàngó mii a kɔ́ kùu í.

¹⁵ Mɔ a kɔ́ mɔ funjǎngi yaʔa gi kwɔ́ɔ mii kpáagi wòolo kabaan na nyáana í, àlí lǎli ni Yawe ga baa mɔ Davidi nigoobèle myɛ nibin nibin kwɔ́ɔ n yirige tásaligi ni lè.»

¹⁶ A Zyonatan joogaanna kpéʔele ní Davidi kpáagi wòolo ní níì jo: «Ki n yɛlɛ Yawe í gɔ̀lɔ́w wòlo Davidi nígoobèle na.»

¹⁷ A Zyonatan níì Davidi pye a wi kàli woro tàmagi kéele na, níì cán wi kéeli maa wi dɛ́nɛ àmɛɛ woro tiimaa kéeli wiyɛɛ dɛ́nɛ lè.

¹⁸ A Zyonatan wi pye: «Nyɛ̀ʔɛna wi nyɛ yevɔngi. Pe a ba gi kɔ̀rɔsíi bi gi nyaa mɔ ga pan í. Níì cán mɔ tɛɛ̀tɛ́ɛngi a pye wowaʔa ní.

¹⁹ Ki ga baa pye candaanri wógi na, mi tìgi táàma mi sa nan tɛ́ɛgi na beè mɔ da sáà làra lè kéeli canʔa na, mi sa kòro kàdɛnɛgi taana ki lè Ezɛli.

²⁰ Mii a ba ŋaaya taanri kíle wáa gi kàbangi na, ki pye mɔ a jo yarigaa mii ŋɔɔgi.

²¹ Koro kàdoʔo ma mii a mii falipye-nìgɔcariw tun si wi pye: ‹Da syée mi sa ŋáayi láa.› Mii ga wi pye: ‹Ŋáayi yi yaà yee mɔ kabangi na, yi láa.› Lǎli bee ni da maa, mɔ a ba pye yɛɛ̀nyinge na. Amɛɛ Yawe nyɛ lè sìi na yafyɛn o yaà í.

²² Mii si ga nìgɔcariw pye: ‹Ŋáayi i yaà yee mɔ yɛ́ʔɛ ma,› lǎli bee ni ki n yɛlɛ mɔ í da syée, níì cán Yawe wi mɔ tórigo.

²³ Toro si di nyɛ syɛ́ɛnri, dee na mii ní mɔ joo n bɛ̀ɛ lè. Wéle, Yawe i nyɛ mii ní mɔ níngi ni làla o làla.»

²⁴ A Davidi sáà làra sìnbirigi ni. Ki si maa pye yevɔngi na, a fànʔafɔw sáà tɛ́ɛn lìigbɔɔli taana bi lìi.

²⁵ Fànʔafɔw maa tɛ́ɛn wi kanlɛɛmi na wi kǒli na n télege gúngi na. Zyonatan maa yìri n yére, á Abinɛɛri tɛ́ɛn Sawuli taana, á Davidi tɛɛ̀tɛ́ɛngi si kòro wowaʔa ní.

²⁶ Sawuli ga yafyɛn joo cángi bee í. Níì cán wi maa ni gi sɔ̀ngí n jo keelaa li pàla n too wi na, a wi nɔ́nʔɔ wii. Kàkabalaga o nyɛ gi na í, a wi nɔ́nʔɔ wii.

²⁷ Koro nyǐndaligi na yevɔngi canziin wóʔo na, a Davidi tɛɛ̀tɛ́ɛngi sèʔé koro wowaʔa ní. A Sawuli wi jáaw Zyonatan pye: «Mɛ̀ɛ́ gi nyɛ Izayi jáaw si ga pan tɛɛliigi ni cànʔaniw wàlá níjanʔa í?»

²⁸ A Zyonatan Sawuli yari: «Davidi n mii nyɛ́ɛri gbanʔama níì jo mii í woro yaʔa woro í kári Bɛtilehɛmi ma.

²⁹ Wi n jo: ‹Mii i mɔ nyɛ́ɛri, mii yaʔa mii í kári. Níì cán sáriga-wòloro i yaà wolo túlugi wòolo ma kěgi ni, a mii yɛʔɛfɔw si mii yeri yaà. Kapye mii kéeli n kpɔ́ʔɔ mɔ ma, mi mii yaʔa mii í kári sa mii senyɛnbèle wéle.› Koro na wi ga pan tɛɛliigi ni í, fànʔafɔw.»

³⁰ Lǎli bee ni a Sawuli fúngi tanʔa gbanʔama Zyonatan kurugo, a wi wi pye: «Cêkalagiga, ní cêjamaga pya wi nyɛ mɔ. Mii i nyɛ lé mii ga gi cán ncan mɔ n bɛ̀ɛ ní Izayi jáaw ní jàngó bi fɛ̀ɛrɛ wáa miyɛɛ na si wɔ́ɔ di wáa mɔ nɔ́ɔw níborigo na í?

³¹ Bi Izayi jáaw yaʔa beè sìi na tásaligi na, mɔ ní mɔ fangi a tée yɛɛ̀nyinge taa í. Tun tɔ́ɔliw ni pe pan ní wi ní, pan ní wi ní mii ma. Níì cán wi n yɛlɛ ní kùu ní.»

³² A Zyonatan wi tóow Sawuli yari: «Nyàʔá na gi yɛlɛ be wi kpóo? Nyàʔá wi pye?»

³³ A Sawuli wi tàbaaw tɛ́ʔɛ n wi wáa jàngó bi wi kpóo. A Zyonatan gi cán ncan woro tóow n gi kɔ̀rirɔ n tímana n kwɔ́ɔ bi Davidi kpóo.

³⁴ A wi yìri lìíli taana ní fundanʔagbɔɔrɔ ní, wi ga lìi yevɔngi lìigbɔɔlɔ canziin wóʔo na í. Níì cán Davidi kéeli maa pye wi ma funbɛɛnrɛ àmɛɛ woro tóow wi faʔa lè.

³⁵ Ki nyǐndaligi nyɛ̀ʔɛ nyɔ́ɔ na, a Zyonatan yiri n kári sìnbirigi ni Davidi kurugo tɛ́ɛgi ma, gee na pe da bɛ̀ɛ bi peyɛɛ vàra yaà lè. Nìgɔcariwaa si maa kári ní wi ní.

³⁶ A wi sáà wi pye: «Da fé maa syée mi sa ŋáayi láa, yee mii a ŋɔɔ lè.» A nìgɔcariw fàn n kári, á Zyonatan ŋaagaa ŋɔɔ a gi sáà wi sɔ́lɔgɔ.

³⁷ Lǎli ni nìgɔcariw sáà nan lè tɛ́ɛgi na, beè ŋáagi pye gee Zyonatan da ŋɔɔ lè, a Zyonatan yákpoli wáa wi kurugo níì jo: «Ŋáagi ban yaà gee léelige mɔ yɛ́ʔɛ ma ì?»

³⁸ A wi níì yákpoli wáa wi kurugo níì jo: «Kɔlɔ̀ wári, da fyàalá, mɔ a kɔ́ yére í.» A nìgɔcariw ŋáayi jóo n lúru n pan wi kàfɔw Zyonatan ma.

³⁹ Nìgɔcariw si da yafyɛn cán í, Zyonatan ní Davidi yagana pe da gi cán.

⁴⁰ A Zyonatan wi kapɛɛnkpumɔn-yáriri kaan nìgɔcariw ma wi da pye ní wi ní lè níì wi pye: «Da syée ní di ní kàʔa ma.»

⁴¹ A nìgɔcariw ga kári, a Davidi yìri yaà wòrogulo kàbangi na, níì wiyɛɛ do n cáan n yɛ́ɛgi cíbele tári na, níì kpùmɔnɔ n yɛ́ɛgi cíbele tɔlɔyɔ taanri. A pe baa peyɛɛ zyɔɔnri, níì pínɛ ni nyaan, á Davidi wógi si tóro.

⁴² A Zyonatan Davidi pye: «Da syée yɛɛ̀nyinge na, àmɛɛ wolo kàli woyɛɛ ma n kwɔ́ɔ Yawe mɛ́ɛgi na lè níì jo: ‹Yawe a pye mii ní mɔ níngi ni, si wɔ́ɔ pye mii yòdaʔayi ní mɔ wóyi nínge ni làla o làla kwɔ́ɔmɔ fun.› »