1 Samyɛli 2 - Cebaara Bible 2010

Ani n bariga kaan Yawe ma

¹ A Ani nyɛ́ɛri níì jo: «Mii fúngi i muguri Yawe ni, mii fǎngi n kpɔ́ʔɔ Yawe bárigaw ni. Mii nyɔ́ɔgi n múgu mii nigoobèle kánma na, níì cán syɔɔli mɔ kaan lè, mii i fundaanra kpéʔele li kéeli na.

² Wàa o wojaɔn ní àmɛɛ Yawe nyɛ lè í, wàa o yaà kapye mɔ ban í, fálagaa o yaà àmɛɛ wolo Kolocɔlɔw nyɛ lè í.

³ Yele a kɔ́ kòro bàā yele kpɔɔmɔ jóomi nyuu í. Nɛ̀ɛnyɛnɛgi jóomɔ ga yɛlɛ paa yirigi yele nyɔ́ɔyi ni í. Níì cán Yawe wi nyɛ Kolocɔlɔɔ, wee wi ki myɛ cán lè, woro wi kapyegèle cáan cúlo na.

⁴ Syɛɛnniribèle sedeye n kabagi. Bele si pe da ni fági lè, á fǎngi pye poro sɛntiiriw.

⁵ Bele pe da lìi n tín lè, poro n jée fali ni ni lìile caa. Bele si na kateegi da pye lè, á poro ŋɔ́n n daa. Alí cenaa-sìnzeew n see n taa kɔrɔsiin. Céwee si wi da nànbiinɛʔɛri see lè, á woro fána.

⁶ Yawe i syɔɔn kúu ní wɔ́ɔ i sìíw kaangi syɔɔn ma. Wi i syɔɔn légi kúbèle tɛɛkòrogo ni ní wɔ́ɔ i syɔɔn yirigi gi ni.

⁷ Yawe i fɔ̌ngi cáan ní wɔ́ɔ i lɔ́ri kaangi. Wi i syɔɔn tìrigí táàma, ní wɔ́ɔ i syɔɔn yìrigí ǹjoʔo ma.

⁸ Wi i foomɔfɔw yìrigí ni yirigi támiigi ni, ní i fɔ̀ngɔfɔw yìrigí kábogi na, jàngó bi be télege ní mɛ́ɛyi fɔ̀ɔlɔ ní, si nìjanra fàngolo kaan be ma li pye be kɔ́rigi. Níì cán Yawe ma tári gàángéle nyɛ, gele na wi dulunyanw yérige lè.

⁹ Wi i wi tágala syɛ́ɛnbèle nyɔ̌ngéle kpáa wéle, kàjáa syɛɛnpeebèle a kwɔ́ɔ yébilimi ni. Níì cán syɔɔn a fànʔa taa sulii-fǎngi báriga ni í.

¹⁰ Bele be túngu ní Yawe ní lè, wi a be tɔ́nʔɔnɔ, bi wi yaʔa yaà nyɛ̀ʔɛni na, wi a folo kabagi be na. Yawe a kútiiw ceri tápow na. Wi a séew kaan wi fànʔafɔw ma. Wi a wi wonyɛnɛ-wòlow fànʔa kpɔ́ʔɔ.»

¹¹ A Elikana kári Arama ma wi kpaʔa ma, á pìíw kòro yaà ni báara Yawe ma sáriga-wòlow Helii yɛ́ʔɛ ma.

Helii jáabèle kéele

¹² Helii jáabèle si maa pye nifaʔaya, pe da Yawe cán í.

¹³ Kánmee sáriga-wòlobèle bee da ni kpéʔele syɛ́ɛnbèle na lè, poro bi nyɛ bee naa: ki maa pye wàa ga baa sáriga wòlo ní i káari soori lǎli ni lè, sáriga-wòlow falipyeo n pan ní gànʔana taanri singànaga ní kɔ́gi ni.

¹⁴ Wi n ba ni káari síbele ni máari kodogèle, ní nɛ̀ʔɛdaʔayi, ní kpàtɛɛbèle, wàlá pɛ́ɛyi ni. Singànagi ga káaree súu n yirige lè, sáriga-wòlow n kòro ní toro ní. Isirayɛli wóbèle myɛ pe da ni maa Silo ma lè, koro pe da ni kpéʔele be na yaà.

¹⁵ Alí kaasǐnmi a pye sìnzorigo ni, sáriga-wòlow falipyeo n si kàri n nan si ba gi joo sárigaw wòlofɔlɔ ma si jo: «Kaaraa kaan naa wo sa di fwɔ́ɔ sáriga-wòlow ma. Wi a fɔ̀lɔ́ wozɔʔɔri syɔɔ mɔ ma í, fwɔɔ ti wobiridi.»

¹⁶ Syɔ́ɔnw si ga wi pye: «Kaasǐnmi a sórigo gbɛnʔɛnɛ, koro kàdoʔo ma dee ga mɔ dɛ́nɛ lè, mɔ a náa toro wolo.» Falipyew n si wi yari: «Mii n cée! Mɔ a di kaan wii tɔ́ɔliw ni, kapye koro ban í, mii a di wòlo fànʔa na.»

¹⁷ Nìgɔcaribèle bee kapeele maa tɔ̀nɔ n kpɔ́ʔɔ Yawe yɛ́ʔɛ ma. Níì cán yakaangi ki da ni kaangi Yawe ma lè, pe maa ni gi faari.

¹⁸ Samyɛli maa ni báara Yawe yɛ́ʔɛ ma. Wi maa pye nìgɔcaripile, lɛn efɔdi búrogo si i nyɛ wi na.

Samyɛli narigbaagi kéele

¹⁹ Wi nɔ́ɔw maa ni burobile sámagi ni maa yɛɛlɛ o yɛɛlɛ n ba ni kaangi wi ma lǎli ni wi ní wi nǎnw ga pan lè bi ba sárigaw wòlo wi lè yɛ́ɛli fúngo wóo.

²⁰ A Helii dùba kpéʔele Elikana ní wi céw ma níì jo: «Ki n yɛlɛ Yawe í yòdaʔaga kaan mɔ ma céw naa báriga ni pìíw sìndɛʔɛ ni, woro wee wi nyɛ́ɛri Yawe ma lè.» Koro kàdoʔo ma a be lúru n kári be kàʔa ma.

²¹ A Yawe baa wéle Ani ma, a wi fícɛnnɛ taa n nànbiigéle taanri ní calipiigèlē siin see. Pìíw Samyɛli si maa ni leegi Yawe yɛ́ʔɛ ma.

Helii n fúlo wi jáabèle na

²² Helii maa lɛɛ gbanʔama. Gee wi jáabèle da ni téeri Isirayɛli ye na lè, a wi koro lóʔo. A wi wɔ́ɔ̀ gi lóʔo cébèle bele be báara Syɛ́ɛnmi Tɛɛfaraga fànikpaʔa nyɔ́ɔ na lè, pe i sìnɛ́ ní poro ní.

²³ A wi be pye: «Nyàʔá na yele kérigèle bee félege kpéʔele? Níì cán mii i yele nàʔabeemi kéele lúro syɛ́ɛnbèle myɛ ma.

²⁴ Eʔe dɛ, ni pìibēle, gee be nyuu a mii i lúro lè, ki ga nyɔɔ í. Yele i Yawe syɛ́ɛnbèle ŋɔrɔgi ni légi céemi ni.

²⁵ Syɔɔn ga kapeele pye wi syɛɛnnyɛnnɛ na, Kolocɔlɔɔ wi a wee bee kútii ceri. Syɔɔn si ga kapeele pye Yawe na, wìí wi a kùsulugi kpéʔele wi kéeli na?» Kàjáa pe ga be tóow jóomɔ lóʔo í. Níì cán Yawe maa ni caa bi be kpóo wii.

²⁶ Pìíw Samyɛli si maa ni leegi ni syée, a wi kéeli i Yawe dàán, n wɔ́ɔ ni syɛ́ɛnbèle dàán.

Wɔʔɔgɔ kéele n joo Helii ní wi kpáagi wòolo ma

²⁷ A Kolocɔlɔɔ syɔ́ɔnwaa pan Helii ma n baa wi pye: «Yawe n jo: ‹Mii da niyɛɛ dɛ̀ɛn mɔ tóolɛɛw kpaʔa wòolo na lǎli ni be pye lè Ezyipiti ni, Faraɔnw kpaʔa wòolo kɔ́yɔ ni lè ì?

²⁸ Mii n wi nyɛ́nɛ n wòlo Isirayɛli syɛɛnfeleyi myɛ nínge ni jàngó wi pye sáriga-wòlori fáli na mii ma, bàā lúru mii sáriga-wólo-yafaangi na, sáā nùndaanni yáriga sórogi, sáā efɔdiw nii mii yɛ́ʔɛ ma. Sárigaw myɛ Isirayɛli ye kaangi lè, wee náagi sórogi lè, mii n wi kaan mɔ tóow kpaʔa wòolo ma.

²⁹ Nyàʔá na yele sárigaw, ní yakaangi tánʔana ní tɔ́lɔyi ní, dee kéele mii joo n gbàn lè níì jo taa kpéʔele mii tɛɛkòrogi ni? Nyàʔá na mɔ mɔ jáabèle kéele kpɔ́ʔɔ n sɔ̀lɔ mii wóli na àmɛɛ yele mii syɛ́ɛnbèle Isirayɛli ye sárigacǎnw líi ni tíngi lè ni sìnmɛ nii?

³⁰ Awá mii maa tɔ̀nɔ n gi joo níì jo mɔ kpáagi wòolo ní mɔ tóow kpaʔa wòolo a kòro mii fáliw na làla o làla.› Yawe wi lè Isirayɛli Kolocɔlɔw, woro wi jo nya. ‹Kàjáa tɔ́ɔliw ni koro a ní kpéʔele í.› Yawe wi jo nya. ‹Níì cán bele be mii kpɔ́ʔɔgi lè, mii a bele bee kpɔ́ʔɔ, bele si be mii faari lè, pe a faʔa.

³¹ Wéle, canyaa i maa, yee ni mii a ba mɔ kɔ́gi ceri lè n fàra mɔ tóow kpaʔa kɔ́lɔ na, jàngó nànlɛɛɔ a ní kɔ́ pye mɔ kpáagi ni í.

³² Mɔ a ba kàsiitun-nyɛ́nnɛ nyaa mii tɛɛkòrogi ni kacǎnyi myɛ nínge ni yi a kpéʔele Isirayɛli ye na lè. Nànlɛɛɔ a ní ba pye mɔ kpáagi ni í.

³³ Mii a ba mɔ wówaa yaʔa mii sáriga-wòlo-yafaangi taana sìngalagi ni, jàngó bi mɔ nyapiigèle kálagi nyatinmi báriga ni, si wɔ́ɔ mɔ fúngi kálagi. Bele myɛ si pe ga baa yìri bi mɔ kpáagi báriga lè pe a kùu sìnlɛɛ ni.

³⁴ Gee ki a kpéʔele mɔ jáabèle siin na lè, pe lè Hofinii ní Fineyasi, koro a pye mɔ ma fɛ̀ɛ. Pe myɛ siinw a ba kùu cannijanga.

³⁵ Mii a sáriga-wòlowaa télege niyɛɛ wóo, wi a pye tágala syɔ́ɔn, wee wi a ra kérigèle kpéʔele lè mii fúngo, bi yɛlɛ ní mii fúngi sɔ̀ngumɔ ní. Mii a kpaʔa faan wi ma, gee gi lè ki a too bi nyaa í. Wi a ra báara mii wonyɛnɛ-wòlow yɛ́ʔɛ ma làla o làla.

³⁶ Wee faala wi ga kòro mɔ kpáagi ni lè, woro a ra maa bi ba ra kpùmɔnɔ́ wi taana bàā wi nyɛ́ɛri wálifiio támapiige ní búrukurugo na, si jo: Mii i mɔ nyɛ́ɛri, sáriga-wòlori fáliwaa kaan mii ma jàngó mii í ra búru cɛɛri taagi bàā líi.› »