1 Samyɛli 19 - Cebaara Bible 2010

Zyonatan n Davidi syɔɔ kùúw ma

¹ A Sawuli gi joo wi jáaw Zyonatan ní wi falipyebèle myɛ ma níì jo pe Davidi kpóo. Kàjáa Davidi kéeli maa Sawuli jáaw Zyonatan dɛ́nɛ gbanʔama.

² A Zyonatan sáà gi joo Davidi ma níì wi pye: «Mii tóow Sawuli i caa bi mɔ kpóo. Koro na da miyɛɛ kɔ̀rɔsíi. Nyɛ̀ʔɛna nyǐngi nyɔ́ɔ na mi tɛɛlarala caa mi làra.

³ Sìnbirigee ni mɔ ga sáà làra lè, mii a yiri kári ní mii tóow ní sa yére wi taana yaà beè si joo ní wi ní mɔ kéeli na. Mii a gi nyaa kánmee na wi nyɛ lè si ba koro joo mɔ ma.»

⁴ A Zyonatan sáà Davidi mɛ́ɛtaangi yeri wi tóow Sawuli ma níì jo: «Fànʔafɔw, mɔ ga yɛlɛ bi kapeele pye mɔ falipyew Davidi na í, níì cán wi ga kapeele pye mɔ na í, wi n tɔ̀nɔ n sámaga n nàʔa ní mɔ ní.

⁵ Wi n wiyɛɛ gaan kùu ma, wi n sáà Filisitini ye wów kpóo, a Yawe syɔɔgbɔɔlɔ kaan Isirayɛli ye myɛ ma, a mɔ gi nyaa níì fundaanra kpéʔele gi kéeli na. Nyàʔá na si mɔ caa bi kapeele pye bi tɛɛlɛ fun sìsyaan wo àmɛɛ mɔ caa bi Davidi kpóo lè nyùngo fun?»

⁶ A Sawuli Zyonatan jóomi lóʔo níì kàli níì jo: «Yawe woweew mɛ́ʔɛ na, Davidi a ní kùu í.»

⁷ A Zyonatan Davidi yeri ní baa syɛ́ɛnri bee myɛ joo n tɛ̀ɛn wi na. Koro kàdoʔo ma a wi wi kɔ́ri n kári Sawuli ma, a Davidi ní sáà pye wi yɛʔɛ̀ ma àmɛɛ ki da sélì pye lè.

Mikali n Davidi syɔɔ

⁸ A kapɛɛnni ga ní baa yìri, a Davidi yiri bi sa kapɛɛnni kpúmɔn ní Filisitini ye ní, a wi tɔ̀nɔ n saʔa kpóo be ni, a wozanbèle fàn wi na.

⁹ N Sawuli yaʔa wodɛ́ɛɔn ní wi kpáagi ni, wi tàbaaw si i nyɛ wi ma kɔ́gi ni, pìipeeli li yìri Yawe ma lè a loro wi yìrige. Davidi si i kɔ̀ríw kpúmɔn.

¹⁰ A Sawuli i caa woro a wi kóri táriga gúngi na ní woro tàbaaw ní, kàjáa Davidi maa lɛ̀ɛlɛ n yiri Sawuli taana, a tàbaaw kári n sáà kóri gúngi na. A Davidi fàn n léeli yébiligi bee ni.

¹¹ A Sawuli syɛ̀ɛnnɛ tórigo Davidi kpaʔa ma níì jo pe sa ra wi kɔ̀rɔsíi pé wi kpóo nyǐngi nyɔ́ɔ na. Kàjáa Mikali wi pye lè Davidi céw, a woro gi joo Davidi ma níì jo: «Mɔ ga pye mɔ ga fàn yébiligi naa ni í, mɔ a kùu nyɛ̀ʔɛna.»

¹² A Mikali Davidi yirige fɛ̀nɛtiriw na n tìrige, a wi fàn n kári n taa n syɔɔ.

¹³ A Mikali terafiimi láa n sínɛgɛ yasinɛgi na níì sike-siire tɛ́ʔɛ wi nyúngi ma, níì làgogo tɛ́ʔɛ n wi tɔ́n.

¹⁴ Lǎli ni Sawuli syɛ́ɛnbèle pèle tun lè níì jo pe sa Davidi cò paa maa, a wi sáà jo: «Wi i yáa.»

¹⁵ A Sawuli be lúrugo n tórigo yaà pe sa Davidi nyaa. Níì jo: «Ye sa wi pínɛ ye láa ní wi yasinɛgi ní yaa maa mii ma koro ga pye mii í ba wi kpóo.»

¹⁶ A tundunbèle lúru n kári n sáà gi nyaa terafiimi wi nyɛ yasinɛgi na, sike-siire si i nyɛ wi nyúngi ma.

¹⁷ A Sawuli Mikali pye: «Nyàʔá na mɔ mii jànváa kánmi naa na níì mii nigoow yaʔa a wi fàn n syɔɔ n kári?» A Mikali Sawuli yari: «Woro wi mii pye: ‹Mii yaʔa mii í kári, kapye koro ban í, mii a mɔ kpóo.› »

Davidi ní Sawuli Nayɔti ma

¹⁸ Kánmi bee na Davidi taa n fàn n syɔɔ, níì kári Samyɛli kurugo Arama ma. Gee myɛ Sawuli kpéʔele wi na lè, a wi koro joo n tɛ̀ɛn wi na. A woro ní Samyɛli kári n sáà tɛ́ɛn Nayɔti ni.

¹⁹ A pe baa gi joo Sawuli ma níì jo: «Davidi wi yaà wee Nayɔti ni, Arama ma.»

²⁰ A Sawuli tundunbéle tun pe sa Davidi cò. A be sáà kanyaajoobèle gboolo nyaa pe i kérigèle nyaagi ni nyuu, Samyɛli si i nyɛ be nyúngi na. A Kolocɔlɔɔ Pǐli Sawuli tundunbèle yìrige, a poro wɔ́ɔ i kérigèle nyaagi ni nyuu.

²¹ A pe baa koro joo Sawuli ma, a wi tundunbèle pèle nikwɔɔlɔ tun, a poro wɔ́ɔ sa ni kérigèle nyaagi ni nyuu. A Sawuli níì pèle tun tɔdaanri wógi na, a poro wɔ́ɔ sa ni kérigèle nyaagi ni nyuu.

²² Lǎli bee ni a Sawuli tiimaa kári Arama ma. A wi ga sáà nan lǒgi wéekpɔʔɔ na gi nyɛ lè Seku ni, a wi yíbege kpéʔele níì jo: «Sán Samyɛli ní Davidi nyɛ?» A be wi yari: «Pe i yaà Nayɔti ni, Arama ma.»

²³ A wi yiri nɛɛ bee ni syée Nayɔti ma, Arama ma. A Kolocɔlɔɔ Pǐli wɔ́ɔ̀ wi yìrige, a wi i kérigèle nyaagi ni nyuu ni syée wi kólogi na fwɔɔ n taa n sáà nan Nayɔti na, Arama ma.

²⁴ A woro wɔ́ɔ̀ wi yaleri wòlo, á woro tiimaa wɔ́ɔ i kérigèle nyaagi ni nyuu Samyɛli yɛ́ʔɛ ma. A wi too n kòro tári na cépya cángi bee myɛ, ní yébiligi myɛ ni. Koro na be kòro ni li wáa kàseele ni gi nyuu níì jo: «Ba Sawuli wɔ́ɔ i nyɛ lé kanyaajoobèle ni?»