1 Samyɛli 18 - Cebaara Bible 2010

¹ Lǎli ni Davidi tɛ́nɛ̀ joo n kwɔ́ɔ ní Sawuli ní lè, a Davidi kéeli fala n kpɔ́ʔɔ Zyonatan ma, a wi kéeli tɔ̀nɔ n Zyonatan dɛ́nɛ àmɛɛ woro tiimaa wiyɛɛ dɛ́nɛ lè.

² A Sawuli tan Davidi na cángi bee wonijanga, wi ga wi yaʔa a wi lúru n sáà kòro wi tóow kpaʔa ni í.

³ A Zyonatan joogaanna kpéʔele ní Davidi ní, níì cán wi kéeli maa wi dɛ́nɛ àmɛɛ woro tiimaa wiyɛɛ dɛ́nɛ lè.

⁴ Burogbɔɔgi gi pye wi na lè a wi koro wòlo n kaan Davidi ma n fàra wi yaleree na. Alí wi maa wi ŋɔséew, ní wi sedegi, ní wi sɛntiiriw kaan wi ma.

⁵ Sawuli ga Davidi tun tɛ́ɛgee faala ni lè, wi n kári yaà, kólogi n sáà tɛ́nɛ. A Sawuli wi télege kapɛɛnkpumɔnbèle nyúngo na. A wi kéeli syɛ́ɛnbèle myɛ dɛ́nɛ, àlí n Sawuli falipyebèle myɛ dɛ́nɛ.

Sawuli i kanmaa caa bi Davidi kpóo

⁶ Syɛ́ɛnbèle lúru n ba ni jǐn lè, lǎli ni Davidi Filisitini ye wów kpóo n kwɔ́ɔ níì lúru ni maa lè, a cébèle yiri Isirayɛli kěyi myɛ ni ni ŋúu, ní i yóo ni fànʔafɔw Sawuli fàrá tàmábèle kpúmɔnnɔ ní fundaanra yákpowáara, ní kɔ̀ríw kpúmɔnmɔ ni.

⁷ Cébèle maa ni yóo ní i ŋúnugi naa ŋúu níì jo: «Sawuli n wi saala kagunɔbèle kpóo, á Davidi wi selebingèle kagunɔbèlē kpóo.»

⁸ A Sawuli fúngi tɔ̀nɔ n tanʔa gbanʔama àmɛɛ kéeli bee wi bɛɛn lè, a wi jo: «Pe n Davidi wógi pye selebingéle kagunɔbèlē, si mii wógi pye saala kagunɔbèlē! Yafyɛn ga níì wi fɔ̀n kapye fǎngi ban í.»

⁹ Nlaa cángi bee na a Sawuli kòro ni Davidi wéle ní nyapiikagbɛɛnnɛ ní.

¹⁰ Ki nyǐndaligi na a pìipeele yìri Kolocɔlɔɔ ma n baa Sawuli yìrige n cúromɔ wáa wi na kpáagi ni. Davidi si maa ni kɔ̀ríw kpúmɔn àmɛɛ ki da pye cányee ni lè, tàbaaw si i nyɛ Sawuli kɔ́gi ni.

¹¹ A Sawuli tàbaaw wáa níì jo: «Mii a Davidi kóri táriga gúngi na.» Kàjáa a Davidi lɛ̀ɛlɛ n yiri wi taana tɔlɔyɔ siin.

¹² A Sawuli fyáa Davidi na, níì cán Yawe maa pye ní Davidi ní níì láʔa woro na.

¹³ A Sawuli wi núngo wiyɛɛ daana, níì wi kpéʔele saala kagunɔ kùndigi. Davidi maa ni syɛ́ɛnbèle yɛ́ʔɛ kínigi, a be i syée ní i maa.

¹⁴ Davidi kapyegèle myɛ maa ni nyɔɔgi, Yawe si i nyɛ ní wi ní.

¹⁵ A Sawuli ga gi nyaa wi kérigèle myɛ i nyɔɔgi gbanʔama, a wi fyáa wi na.

¹⁶ Kàjáa Davidi kéeli maa Isirayɛli ye ní Zyuda ye myɛw dɛ́nɛ. Níì cán wi maa ni kínigi be yɛ́ɛgi na a be i syée ní i maa.

Davidi n Sawuli jáaw Mikali pɔri

¹⁷ A Sawuli Davidi pye: «Mii calipiilɛɛli Merabi wi wee, mii a wi kaan mɔ ma mɔ cɔ́ɔ. Mɔ mi tɛ́nɛ mi nìrimɛ le maa báara mii ma, máā Yawe kapɛɛngèle kpúmɔn.» Sawuli si maa ni gi nyuu wiyɛɛ ma níì jo: «Mii kɔ́gi ban gi yɛlɛ bi wi kpóo í, fwɔɔ Filisitini ye kɔ́yi.»

¹⁸ A Davidi Sawuli yari: «Wìí syɔ́ɔn wi nyɛ mii, ba mii sìíw wi nyɛ nyàʔá, ba mii tóow túlugo gi nyɛ nyàʔá Isirayɛli ni, mii si kɔ́ ba pye fànʔafɔw jáa nàɔn?»

¹⁹ Lǎli ni si Sawuli jáaw Merabi baa nan be wi kaan Davidi ma lè, a be wi fíige n kaan Mehola ye Adiriyɛli ma wi cɔɔ̀.

²⁰ Davidi kéeli si maa Sawuli jáaw Mikali dɛ́nɛ. A be baa koro joo Sawuli ma, a wi gi nyaa a gi yɛlɛ.

²¹ Sawuli si maa ni gi nyuu wiyɛɛ ma níì jo: «Mii a wi kaan wi ma wi cɔɔ̀, jàngó wi pye wi na karinyanga koro ga pye Filisitini ye kɔ́yi í wi kpóo.» A Sawuli níì gi joo Davidi ma tɔziin níì jo: «Mɔ a pye mii jáaw nàɔn níjanʔa.»

²² A Sawuli syɛ́ɛnri naa joo n gbàn wi falipyebèle ma níì jo: «Ye sa joo ní Davidi ní làrama ni ye wi pye: ‹Wéle, mɔ kéeli n fànʔafɔw ní wi falipyebèle myɛ dɛ́nɛ. Ki n yɛlɛ mi pye tɔ́ɔliw ni fànʔafɔw jáa nàɔn.› »

²³ A Sawuli falipyebèle sáà syɛ́ɛnri bee joo n le Davidi líiweegèle ni. A Davidi be yari: «Bi pye fànʔafɔw jáa nàɔn, a yele i gee bee córo lé kapiipiile? Mii i nyɛ fɔ̀ngɔfɔlɔ, mii mɛ́ʔɛ ga cán í.»

²⁴ A Sawuli falipyebèle lúru n baa wi pye: «Dee si Davidi joo lè toro di dee bee.»

²⁵ A Sawuli jo: «Ye sa Davidi pye: ‹Fànʔafɔw o cèpɔrilɔrɔ caa í, fwɔɔ Filisitini ye wóbèle pèle jɔ́nyɔɔ sáliya dabata, koro ga pye bi gɔ̀lɔ́w wòlo wi nigoobèle na.› » Sawuli maa gi tímana bi Davidi kaan wi too Filisitini ye kɔ́yi ni.

²⁶ A Sawuli falipyebèle sáà syɛ́ɛnri bee joo Davidi ma, a Davidi gi nyaa a gi yɛlɛ woro í ba pye fànʔafɔw jáa nàɔn. Lǎlee li da tɛ̀ɛn lè n li yaʔa sìnvoro ni,

²⁷ a Davidi yìri n kári ní wi nǎnbèle ní n sáà nànbēle sirakele kpóo Filisitini ye ni. A Davidi be jɔnyɔɔ sáliyi cɛnɛ n pan, a be baa yi kaan fànʔafɔw ma, a yi foro, koro ga pye woro í pye fànʔafɔw jáa nàɔn. A Sawuli wi jáaw Mikali kaan Davidi ma wi cɔɔ̀.

²⁸ A Sawuli gi nyaa ní wɔ́ɔ̀ gi cán ncan Yawe n pye ní Davidi ní. Davidi kéeli si maa Sawuli jáaw Mikali dɛ́nɛ.

²⁹ Kàa maa ni fàrá Sawuli ma Davidi fyáari na ni syée, a wi pye nigooro na ní Davidi ní làla o làla.

³⁰ Filisitini ye fànʔafɔbèle maa ni yirigi ni maa. Pe ga yìri n pan lǎli ni lè, Davidi i gáà fànʔa taa n sɔ̀lɔ Sawuli falipyebèle bele myɛ na. A wi mɛ́ɛgi tɔ̀nɔ n yiri.