1 Samyɛli 16 - Cebaara Bible 2010

Kolocɔlɔɔ n Davidi nyɛ́nɛ n wòlo fànʔafɔvɔɔn

¹ A Yawe Samyɛli pye: «Làlìí ni mɔ a láʔa nya kùu káyaagi na Sawuli kéeli na? Mii n tɔ̀nɔ n wi cée jàngó wi a ní kɔ́ pye fànʔafɔlɔ Isirayɛli ye nyúngi na í. Mɔ nyɛ́nni nyìn sǐnmi na maa syée, mii a mɔ tun Bɛtilehɛmi ye Izayi ma, níì cán mii n fànʔafɔlɔ nyɛ́nɛ n wòlo niyɛɛ wóo wi jáabèle nínge ni.»

² A Samyɛli jo: «Kanmìí na mii a kári bi sɛ́ɛ? Sawuli a gi lóʔo si mii kpóo.» A Yawe jo: «Mɔ a kári ní náapyaʔa ní, si sa jo: ‹Mii n pan ba sáriga wòlo Yawe ma.›

³ Mɔ a sa Izayi yeri sárigaw na. Gee mɔ yɛlɛ bi kpéʔele lè, mii tiimaa a gi tɛ̀ɛn mɔ na. Wee kéele mii ga joo mɔ ma lè, sǐnmi wo wi na mii ma.»

⁴ A Samyɛli gi kpéʔele gee Yawe joo lè, níì kári Bɛtilehɛmi ma. A kěgi wólɛɛbéle sáà yiri ni cɛ̀lɛ́ ni wi fàrá níì jo: «Wodaanna na lé mɔ pan?»

⁵ A wi be yari: «Li n tɛ́nɛ. Sáriga mii pan ba wòlo Yawe ma. Ki n yɛlɛ ye yeyɛɛ jéemununi fáli kpéʔele, yáā maa ní mii ní sárigaw ma.» A wi wɔ́ɔ̀ Izayi ní wi jáabèle jéemununɔ fáli kpéʔele níì be yeri sárigaw na.

⁶ Lǎli ni be pan lè, a wi ga Eliyabi nyaa, a wi jo: «Wee naa wi tɔ̀nɔ́ nyɛ Yawe wonyɛnɛ-wòlow.»

⁷ Kàjáa a Yawe Samyɛli pye: «Mɔ a kɔ́ ra wi céri kánma wàlá wi tɔnɔri wéle í, níì cán mii o caa wi na í. Gee syɔɔn córo lè, koro ban gi córo í. Syɔɔn i kàfugi nìjanra wéle, Yawe si i wéle fúngi ni.»

⁸ A Izayi Abinadabi yeri ní baa wi pye a wi sɔ̀lɔ Samyɛli yɛ́ʔɛ ma. A Samyɛli jo: «Yawe ga wɔ́ɔ̀ wee naa nyɛ́nɛ n wòlo í.»

⁹ A Izayi Syama pye a wi sɔ̀lɔ. A Samyɛli jo: «Yawe ga wɔ́ɔ̀ wee naa nyɛ́nɛ n wòlo í.»

¹⁰ A Izayi wi jáabèle kɔrɔsiin pye a be sɔ̀lɔ Samyɛli yɛ́ʔɛ ma. A Samyɛli Izayi pye: «Yawe ga bele naa wàa faala nyɛ́nɛ n wòlo í.»

¹¹ Koro kàdoʔo ma a Samyɛli Izayi pye: «Mɔ nanbiigèle lé ge kwɔ́ɔ gele?» A wi wi yari: «Wobili li kòro, li si i yaà ni yaweeyiligèle nàʔá.» A Samyɛli Izayi pye: «Tun be sa wi yeri, níì cán wolo a tɛ́ɛn í fwɔɔ bi taa wi nan naa.»

¹² A Izayi tun a be sáà wi yeri. Wi si maa pye nànbii-nyɛ̀ɛnnɛ, wi nyapiigèle maa nyɔɔ, a wi tɔ̀nɔ n wɔ́ɔ̀ nyɔɔ céri na. A Yawe Samyɛli pye: «Yìri mi sǐnmi wo wi na, níì cán woro wii.»

¹³ A Samyɛli nyɛ́nni láa, lee ni sǐnmi pye lè n bi wo wi na wi senyɛnbèle nínge ni. A Yawe Pǐli gi séli cángi bee na ni Davidi yìrigí. A Samyɛli yìri n kári Arama ma.

¹⁴ A Yawe Pǐli Sawuli yaʔa, á pìipeele yìri Yawe ma n ba ni fyáakpɔɔrɔ wáa wi na.

¹⁵ A Sawuli falipyebèle wi pye: «Wéle, àmɛɛ pìipeele yìri Kolocɔlɔɔ ma n ba ni fyáakpɔɔrɔ wáa mɔ na lè,

¹⁶ wolo kàfɔw, ki n yɛlɛ mɔ í tɛ́nɛ joo, mɔ falipyebèle i naa mɔ tɛ́ʔɛmɛ ni, pe a sa nànwaa caa, wee wi kɔ̀ríw kpúmɔnmɔ cán lè gbanʔama. Lǎli ni pìipeele ga yìri Kolocɔlɔɔ ma n baa mɔ cò lè, wi a ra kɔ̀ríw kpúmɔn, ki a pɔ́rɔ mɔ ma.»

¹⁷ A Sawuli wi falipyebèle yari: «Ye sa nànwaa caa mii ma, wee wi gbàn kɔ̀ríw na lè gbanʔama, yaa maa ní wi ní mii ma.»

¹⁸ A falipye-nìgɔcariwaa syɛ́ɛnri láa n gi joo níì jo: «Izayi wi lè Bɛtilehɛmi ye wów, mii n wi jaawaa nyaa, wee wi gbàn kɔ̀ríw na lè gbanʔama ní wɔ́ɔ i nyɛ nànniri-sànbaliɔ, ní kapɛɛnkpumɔɔn. Wi n joomi cán, ní i nyɛ nìjàɔn, Yawe si i nyɛ ní wi ní.»

¹⁹ A Sawuli tundunbéle tun Izayi ma pe sa wi pye: «Mɔ jáaw Davidi wi yaà ní yaweeyiligèle ní lè, wi tórigo naa mii ma.»

²⁰ A Izayi jòfaniwaa cò n búru tugo wi na n fàra dùvɛɛn kpàbi-nyɛ́nnɛ, ní kapiige na n kaan wi jáaw Davidi ma wi sa kaan Sawuli ma.

²¹ A Davidi pan Sawuli ma n ba ni báara wi ma, a wi kéeli tɔ̀nɔ n wi dɛ́nɛ, a wi wi kpéʔele woro kapɛɛnkpumɔn-yáriri tugofɔlɔ.

²² A Sawuli tun pe sa Izayi pye: «Mii i mɔ nyɛ́ɛri mɔ í Davidi yaʔa mii ma, níì cán wi kéeli n mii dɛ́nɛ.»

²³ A gi pye lǎli ni pìipeeli ga yìri Kolocɔlɔɔ ma n baa Sawuli cò lè, Davidi n kɔ̀ríw láa ni kpúmɔn, Sawuli n ŋɔ́n n tìgi lǎli bee ni, ki n si pɔ́rɔ wi ma, pìipeeli n wi yaʔa.