1 Samyɛli 13 - Cebaara Bible 2010

Pe n Filisitini ye cée. Sawuli kolomi kéele

¹ Sawuli maa yɛ̀ʔɛlɛ kánmaa taa lǎli ni wi baa pye lè fànʔafɔlɔ. Yɛ̀ʔɛlɛ siin wi da kwɔ́ɔ fǎngi na Isirayɛli ye nyúngi na.

² A Sawuli Isirayɛli nǎnbèle pèle selebinnɛ ní saala kagunɔ nyɛ́nɛ n wòlo. Pe pèle selebinnɛ maa pye ní wi ní Mikimasyi ni, ní Betɛli nyanbeleyi kúlo ni, á saala kagunɔ pye ní Zyonatan ní Gibeya ma, ki lè Bɛnzyamɛ wógi. A wi syɛɛnsanbèle lúrugo n tórigo pe myɛ nibin nibin pe kèye ma.

³ Filisitini ye kabigi wòolo be pye lè Geba ni, a Zyonatan poro kpóo. A Filisitini ye koro lóʔo. A Sawuli be pye a be tòmaagi wìi tári myɛ ni níì jo: «Heburubèle myɛ n yɛlɛ bi gi lóʔo.»

⁴ A Isirayɛli ye myɛw gi lóʔo pe i gi nyuu níì jo: «Sawuli n Filisitini ye kabigi wòolo kpóo, Isirayɛli ye n gi kaan a poro kéeli Filisitini ye bɛɛn.» A be syɛ́ɛnbèle yeri n kpóʔoro Sawuli ma Giiligali ma.

⁵ A Filisitini ye peyɛɛ gbóʔoro bi sa kapɛɛnni kpúmɔn ní Isirayɛli ní. Kapɛɛnkpumɔn-wòtorobéle sirakama ní selebingéle kagunɔ maa pye be ma n fàra syɔɔnyɔ fɔ̀ɔlɔ selebingéle taanri ní syɛɛnnɛʔɛmɛ na, bee pi da pye àmɛɛ sólomi lɔ́ʔɔ nyɔ́ɔ táminyɔɔ nyɛ lè. A be pan n baa tɛ́ɛn Mikimasyi taana, Bɛti-Avɛn canʔafolomɔ ma.

⁶ A Isirayɛli nǎnbèle peyɛɛ nyaa kálagili ni, níì cán pe maa syɛ́ɛnbèle kpɛnʔɛri n sɔ̀lɔ, a be i làrá nyanbeweeyi, ní kákpoyi, ní fálaweeyi, ní weekpoloyi, ní kɔ̀lɔ́weeyi ni.

⁷ Heburubèle pèle maa wɔ́ɔ̀ Zyuridɛnw jeli n kári Gadi ní Galaadi tári ma. Sawuli si maa sèʔê pye Giiligali ni. Syɛ́ɛnbèle bele myɛ si pe da pye wi taana lè pe maa ni cɛ̀lɛ́.

⁸ A wi canya kɔrɔsiin sige n yɛlɛ ní lǎli ní Samyɛli da tɛ̀ɛn lè. Kàjáa Samyɛli da pan yaà Giiligali ma í, á syɛ́ɛnbèle si i caragi wi na ni syée.

⁹ Lǎli bee ni a Sawuli jo: «Yaa maa mii ma ní sáriga-sórigow, ní pínɛnyɛnnɛgi sáriga ní.» A wi baa sáriga-sórigow wòlo.

¹⁰ Amɛɛ wi kwɔ́ɔ sáriga-sórigow wòlolo na lè, wéle, a Samyɛli kàri n nan. A Sawuli yiri n wi fàra bi sa wi syáanri.

¹¹ A Samyɛli jo: «Nyàʔá mɔ kpéʔele?» A Sawuli wi yari: «Amɛɛ mii da gi nyaa lè syɛ́ɛnbèle i caragi mii na ni syée, ní wɔ́ɔ̀ gi nyaa mɔ ga pan làridɛ̀ɛ́nni ni í, á Filisitini ye si peyɛɛ gbóʔoro Mikimasyi ma,

¹² a mii si gi joo niyɛɛ ma níì jo: ‹Filisitini ye a tìgí pan mii kurugo Giiligali ma bi mii yaʔa Yawe sìnnyɛɛri ni í.› Koro na si mii da gi nyaa niyɛɛ ma ŋàʔanaga kéele mii í sáriga-sórigow wòlo.»

¹³ A Samyɛli Sawuli pye: «Mɔ n nidoli-fáli kpéʔele. Tundunree Yawe mɔ Kolocɔlɔw da joo n gbàn mɔ ma lè, mɔ ga maa di cò, Yawe mǎà dée mɔ fangi sámaga télege Isirayɛli ye nyúngi na ki pye kwɔ́ɔmɔ fun wóʔo.

¹⁴ Kàjáa tɔ́ɔliw ni doò, mɔ fangi a ní kòro beè í. Yawe n nànwaa nyɛ́nɛ n wòlo, wee wi yɛlɛ ní woro fúngi sɔ̀ngumɔ ní lè. Yawe n wi télege wi pye woro syɛ́ɛnbèle yɛɛ̀kinio. Níì cán gee Yawe da joo n gbàn mɔ ma lè, mɔ ga gi cò í.»

¹⁵ Koro kàdoʔo ma a Samyɛli yìri Giiligali ni n lúgu n kári Gibeya ma ki lè Bɛnzyamɛ wógi. Syɛ́ɛnbèle bele pe da pye ní Sawuli ní lè, a wi be córo, a be pye nànbēle saala taanri félege.

¹⁶ Sawuli ní wi jáaw Zyonatan, n fàra syɛ́ɛnbèle bele na pe da pye ní be ní lè, pe maa tɛ́ɛn Geba ni, ki lè Bɛnzyamɛ wógi, á Filisitini ye si tɛ́ɛn Mikimasyi ni.

¹⁷ A kabiya taanri yiri Filisitini ye tɛɛ̀tɛ́ɛngi ni bi sa ra gàlagíw kpéʔele. Kabigaa maa wàli n fala Ofira kàbangi na, wi lè Syuwali tári ni,

¹⁸ á kabigaa wàli n fala Bɛti-Horɔn ma, á kabigee wàli n fala láʔagologi kólogo ni ki tìgi Seboyimi jǐnlɔgi kàbaan na lè fìími tára kabaan na.

¹⁹ Fɔ̀nɔɔ si da pye Isirayɛli tári tɛ́ɛgaa faala ni í. Níì cán Filisitini ye maa jo: «Ki ga yɛlɛ Heburubèle í kɔ́ ŋɔsée wàlá tàbaa sámaga í.»

²⁰ Filisitini má Isirayɛli nǎnbèle myɛ nibin nibin da ni syée n sa ni be nìtěyi, ní be yatuguyi, ní be kpanayi, ní be těyi nyɔ́ɔyɔ sámagi.

²¹ Tègaa, wàlá yatugugaa, wàlá ŋáayi yárigaa, wàlá kpanagaa nyɔ́ɔ ga pɛɛn lǎli ni lè, Filisitini ye má pe gáà kári pe n sáà gi sámaga, ní wɔ́ɔ i be yaweenaʔa-kpèégèle ŋáaya fìrigí. Pe maa ni di sámagi be ma lɔgbanra na.

²² A koro gi kaan kapɛɛnni canʔa na, ŋɔsée wàlá tàbaa ga pye Sawuli ní Zyonatan taʔafɔwaa faala kɔ́lɔ ni í, fwɔɔ Sawuli ní wi jáaw Zyonatan má tàa da pye.

²³ A Filisitini ye kabigaa kári n sáà tɛ́ɛn Mikimasyi tɛɛmarigi nyɔ́ɔ na.