1 Samyɛli 12 - Cebaara Bible 2010

Samyɛli n joo n tɛ̀ɛn Isirayɛli ye na

¹ A Samyɛli Isirayɛli ye myɛ pye: «Ye wéle, gee myɛ yele joo mii ma lè, mii n yele jóomi lóʔo, níì fànʔafɔlɔ télege yele nyúngi na.

² Tɔ́ɔliw ni fànʔafɔw wi a ra kínigi yele yɛ́ɛgi na lè woro wi wee naa. Mii na, mii n lɛɛ n bàra n kwɔ́ɔ. Mii jáabèle si be bele ní yele ní. Mii n kíni yele yɛ́ɛgi na nlaa yaà mii cárimi làla ni fwɔɔ n baa nan níjanʔa na.

³ Mii wéle wee! Ye syɛɛnlurugoro kaan mii ma Yawe nyɛ́nɛ na, ní wi wonyɛnɛ-wòlow nyɛ́nɛ na. Syɔɔnwìí má mii nɔ̀ɔ syɔɔ, wàlá wìí má mii jòfani syɔɔ? Ba wìí na mii fǎngi gbàn, wàlá wìí yárira mii ŋàʔana n syɔɔ? Ba wìí syɔɔn ma mii námara kpɔ́ʔɔrɔ syɔɔ níì nɔ́gi tɔ́n wi na? Mii a gi sìndɛɛgi lúrugo yele ma.»

⁴ A be jo: «Mɔ ga fǎngi gbàn wolo na í. Mɔ ga yárira ŋàʔana n syɔɔ wolo ma í. Mɔ ga yafyɛn syɔɔ syɔɔn faala ma í.»

⁵ A wi níì be pye: «Yawe i nyɛ seera yele kánmi na, a wi wonyɛnɛ-wòlow i nyɛ seera cángi naa ni, ncan yele ga yarigaa faala nyaa mii na í.» A be jo: «Wi i nyɛ séera.»

⁶ Lǎli bee ni a Samyɛli syɛ́ɛnbèle pye: «Yawe wi Mowizi ní Aarɔn télege, níì yele tóolɛɛbèle yirige Ezyipiti tári ni.

⁷ Tɔ́ɔliw ni doò, ye ba yére, mii si pye kútii na ní yele ní Yawe yɛ́ʔɛ ma sínni kapyegèlē myɛ kéele na Yawe kpéʔele yele ní yele tóolɛɛbèle ma lè.

⁸ Zyakɔbi panni kàdoʔo ma Ezyipiti ma, a yele tóolɛɛbèle kɔ́ ba ni yákpogèle wáa Yawe kurugo. A Yawe Mowizi ní Aarɔn tun, a poro yele tóolɛɛbèle yirige Ezyipiti ni n baa télege tɛ́ɛgi naa ni.

⁹ Kàjáa pe maa baa fɛ̀ʔɛ Yawe be Kolocɔlɔw na. A wi be le Sisera kɔ́yi ni, wi pye lè Hasɔɔri kapɛɛnkpumɔnbèle kàfɔlɔ, ní Filisitini ye kɔ́yi ni, ní Mowabi fànʔafɔw kɔ́yɔ ni, a poro kapɛɛnni kpúmɔn ní be ní.

¹⁰ A be i yákpogèle wáa Yawe kurugo níì jo: ‹Wolo n kapeele pye, níì cán wolo n Yawe yaʔa ní i báara Baalibèle, ní Asitaritebèle ma. Tɔ́ɔliw ni wolo yirige wolo nigoobèle kɔ́yɔ ni, wolo a ra báara mɔ ma.›

¹¹ A Yawe Yerubaali tun n Bedan, ní Zyefite, ní mii Samyɛli tun. Wi n yele yirige yele nigoobèle kɔ́yɔ ni pe yele màʔa lè. A yele gbàn n tɛ́ɛn yɛɛ̀nyinge na.

¹² A yele ga baa gi nyaa a Amɔn ye fànʔafɔw Nahasyi pan yele kánmi na, a yele mii pye: ‹Eʔe, fwɔɔ fànʔafɔlɔ í tɛ́ɛn wolo nyǔngi na›, bi gi taa Yawe yele Kolocɔlɔw wi nyɛ yele fànʔafɔw.

¹³ Koro na fànʔafɔw wi wee, wee yele nyɛ́nɛ n wòlo lè, woro wee yele da ni caa lè. Ye wéle, Yawe n fànʔafɔlɔ télege yele nyúngi na.

¹⁴ Yele ga ni fɛ̀ɛgí Yawe na ní i báara wi ma, ní i wi jóomi lúro, yele ga pye yele ga Yawe syɛ́ɛnri cée í, yele ní fànʔafɔw wi tɛ́ɛn fǎngi na yele nyúngi na lè yele a tan Yawe yele Kolocɔlɔw na.

¹⁵ Kàjáa yele ga pye yele o Yawe jóomi lúro í, yele ga Yawe syɛ́ɛnri cée Yawe a kɔlɔ̀ taʔa yele na àmɛɛ wi da kɔlɔ̀ taʔa yele tóolɛɛbèle na lè.

¹⁶ Tɔ́ɔliw ni doò, ye ba yére, yé kakpɔɔgi naa wéle, gee Yawe a kpéʔele lè yele nyɛ́nɛ na.

¹⁷ Bilew làrilaala ban li nyɛ lee naa ì? Mii a Yawe nyɛ́ɛri wi nyɛ̀ʔɛni yaʔa laa tìngí, si zàʔá cáan. Lǎli bee ni yele a gi cán àmɛɛ yele fànʔafɔlɔ nyɛ́ɛri yeyɛɛ ma lè kapeekpɔʔɔ yele kpéʔele Yawe nyɛ́nɛ na.»

¹⁸ A Samyɛli Yawe nyɛ́ɛri, a Yawe nyɛ̀ʔɛni yaʔa li i tìngí níì zàʔá cáan cángi bee tiimaa na. A syɛ́ɛnbèle myɛ fyáa gbanʔama Yawe ní Samyɛli na.

¹⁹ A syɛ́ɛnbèle myɛ Samyɛli pye: «Yawe mɔ Kolocɔlɔw nyɛ́ɛri mɔ falipyebèle kéele na pe lè wolo, jàngó wolo a kɔ́ kùu í. Amɛɛ wolo fànʔafɔlɔ nyɛ́ɛri woyɛɛ kéeli na lè wolo n kapeeli bee fàra wolo kapeegèle gele myɛ na.»

²⁰ A Samyɛli syɛ́ɛnbèle pye: «Ki ga yɛlɛ yaa fɛ̀ɛgí í. Yele n kapeegi bee myɛ kpéʔele, koro i nyɛ kányɛʔɛ. Kàjáa ki ga yɛlɛ ye wàli ye láʔa Yawe na í. Ki n yɛlɛ yaa báara Yawe ma ní yele fúnyi myɛ ní.

²¹ Yele a kɔ́ wàli bi láʔa wi na í. Kapye koro ban í yele a yeyɛɛ daʔa gbanzan yáriyi na, yee yi lè yi a tɔ̀nɔ kaan syɔɔn ma wàlá bi wi syɔɔ í, níì cán yi i nyɛ gbanzan yáriya.

²² Yawe a wi syɛ́ɛnbèle yaʔa í wi mɛ́ɛkpɔɔgi kéele na. Níì cán ki n Yawe dɛ́nɛ a wi yele kpéʔele woro syɛ̀ɛnnɛ.

²³ Bi láʔa mii a kɔ́ ra nyɛ́ɛri yele kéeli na í, gee bee a pye kapeele mii kpéʔele Yawe na. Ki n yɛlɛ sɔ̀nguri bee í léeli mii na. Kólogee gi nyɔɔ lè níì sín, koro na mii a ra yele tama.

²⁴ Ye tɛ́nɛ yaa fɛ̀ɛgí Yawe na, yáā báara wi ma kányɛɛgi na ní yele fúnyi myɛ ní. Níì cán kakpoloyee Yawe kpéʔele yele ma lè, yele nyɛ́nɛ i yi na.

²⁵ Kàjáa yele ga ni kapeeyi kpéʔele, yele ní yele fànʔafɔw a kálagi yiri yaà.»