1 Samyɛli 10 - Cebaara Bible 2010

¹ A Samyɛli sìngboli láa n wo Sawuli nyúngi ni níì wi wáa n mígi, níì jo: «Yawe n sǐnmi wo mɔ na jàngó mɔ í pye woro kɔ́rigi nyúngo na.

² Mɔ ga láʔa mii na níjanʔa, mɔ a sa fàra ní nànbēle siin ní Arasyɛli kɔ̀ɔ́nni taana, Bɛnzyamɛ tári láʔala na, Sɛlisa ma, pe a mɔ pye: ‹Jòfanicaayi mɔ da kári sa caa lè, yi n nyaa. Tɔ́ɔliw ni mɔ tóow n jòfanicaayi kéele yaʔa kɔlɔ̀ na, yele kéeli wi kòro ni sɔ̀ngí, ní i gi nyuu níì jo: Nyàʔá mii yɛlɛ bi kpéʔele mii jáaw kéele na?›

³ Mɔ a yiri yaà beè bàā syée yɛʔɛ̀ ma bi sa nan Tabɔɔri syɛni tíigi na si fàra yaà beè ní nànbēle taanri ní paa lúru Kolocɔlɔɔ tɛɛkpɔʔɔrɔgi ma Betɛli ma. Kapiiye taanri a pye wàa ma, búrukuruyo taanri si pye wàa ma, dùvɛɛn kpàbi-nyɛ́nnɛ si pye wàa ma.

⁴ Pe a mɔ syáanri si búrubéle siin kaan mɔ ma, mi be syɔɔ be ma.

⁵ Koro kàdoʔo ma mɔ a nan Gibeya-Elohimi na, beè Filisitini ye sùlasiibèle tɛɛ̀tɛ́ɛnnaa nyɛ lè. Mɔ ga ni jǐn kěgi ni mɔ a fàra ní kanyaajoobèle kabiga ní pe yìri sáriga-wòlo-tɛ́ɛgi ma bàā tíri da maa. Dǎngbolo, ní tàmábéle, ní maagéle, ní kɔ̀rí fɔ̀ɔlɔ si kíni yɛʔɛ̀ ma, páā kérigèle nyaagi da nyuu.

⁶ Yawe Pǐli si a mɔ yìrige, mɔ í da kérigèle nyaagi da nyuu ní be ní. Mɔ a kàri bi pye nànwaa félege.

⁷ Fɛ̀ɛ́bèle bee ga baa kpéʔele n foro mɔ na lǎli ni lè, gee ki ga pye mɔ ma bi kpéʔele lè, ki kpéʔele. Níì cán Kolocɔlɔɔ i nyɛ ní mɔ ní.

⁸ Koro kàdoʔo ma mɔ a tìgi Giiligali ma mii yɛ́ʔɛ na. Mii a kɔ́ tìgi yaà mɔ kurugo bi sa sáriga-sórigoo, ní pínɛnyɛnnɛgɛ sáriga wòlo. Mɔ a sa sige canya kɔrɔsiin bi taa mii í nan yaà mɔ na bi sa gi tɛ̀ɛn mɔ na, gee mɔ yɛlɛ bi kpéʔele lè.»

⁹ Sawuli tɛ́nɛ̀ kàdoʔo kaan n núngo Samyɛli taana lè, a Kolocɔlɔɔ fungaa nikwɔɔ kaan wi ma, a fɛ̀ɛ́bèle bee myɛ kpéʔele cannijangi.

¹⁰ Pe sáà nan Gibeya na lè, a be fàra ní kanyaajoobèle kabiga ní. A Kolocɔlɔɔ Pǐli wi yìrige, a wi i kérigèle nyaagi ni nyuu be níngi ni.

¹¹ Bele myɛ pe da wi cán lè booma ni níì wi nyaa wi i kérigèle nyaagi ni nyuu ní kanyaajoobèle ní, a pe i gi nyuu peyɛɛ ma syɛ́ɛnbèle nínge ni níì jo: «Nyàʔá gi kpéʔele Kisyi jáaw na? A Sawuli wɔ́ɔ i nyɛ lé kanyaajoobèle ní?»

¹² A tɛ́ɛgi bee wówaa be yari: «Wìí syɔ́ɔn wi nyɛ be tóow?» A loro kòro kàseele, a pe i gi nyuu níì jo: «A Sawuli wɔ́ɔ i nyɛ lé kanyaajoobèle ni?»

¹³ Lǎli ni wi kwɔ́ɔ kérigèle nyaa-mí-joolo na lè, a wi kári sáriga-wòlo-tɛ́ɛgi ma.

¹⁴ A Sawuli tóow senyɛnnɛ baa Sawuli ní wi falipyew yíbe níì jo: «Sán yele da kári?» A Sawuli wi yari: «Jòfanicaayi tɛɛcaʔa ni, kàjáa wo ga sáà yafyɛn nyaa í, a wolo si kári Samyɛli ma.»

¹⁵ A Sawuli tóow senyɛnnɛ níì jo: «Gee Samyɛli sáà joo yele ma lè, ki joo mi tɛ̀ɛn mii na.»

¹⁶ A Sawuli wi tóow senyɛnnɛ yari: «Wi n tɔ̀nɔ n gi joo wolo ma níì jo jòfanicaayi n nyaa.» Kàjáa fǎngi kéele Samyɛli joo wi ma lè, wi ga yafyɛn joo wi ma kéeli bee ni í.

Gɔ̌nwáari n Sawuli tɛ̀ɛn fànʔafɔlɔ

¹⁷ A Samyɛli Isirayɛli syɛ́ɛnbèle yeri n kpóʔoro Yawe yɛ́ʔɛ ma Misipa ma,

¹⁸ ní baa be pye: «Yawe wi lè Isirayɛli ye Kolocɔlɔw, wi n jo: ‹Mii wi Isirayɛli yirige Ezyipiti ni. Mii n yele yirige Ezyipiti ye kɔ́yi ni, ní wɔ́ɔ̀ yele yirige fǎnyi myɛ kɔ́yɔ ni yi da ni yele wɔʔɔ lè.›

¹⁹ Yele si ye baa yele Kolocɔlɔw cée wee níjanʔa, woro wee wi yele syɔɔ lè yele wɔʔɔyi ní yele fɔ̀rɔyi myɛ ma. Yele n wi pye: ‹Fànʔafɔlɔ télege wolo nyúngi na!› Tɔ́ɔliw ni ki n yɛlɛ ye kpóʔoro Yawe yɛ́ʔɛ ma bi yɛlɛ ní yele syɛɛnfeleyi ní, bi wɔ́ɔ yɛlɛ ní yele túluyi ní.»

²⁰ A Samyɛli Isirayɛli syɛɛnfeleyi myɛ pye yi nùuni yaà, a Bɛnzyamɛ syɛɛnfelegi baa tɛ̀ɛn.

²¹ A wi Bɛnzyamɛ syɛɛnfelegi woolo pye pe i nùuni yaà tùluyo tùluyo, a Matirii túlugi baa tɛ̀ɛn, á Kisyi jáaw Sawuli baa tɛ̀ɛn. A be wi caa kàjáa pe ga wi nyaa í.

²² A be níì Yawe yíbe níì jo: «A nànwaa nikwɔɔ ní i yaà lé, wee wi yɛlɛ lè bi pan nɛɛ naa?» A Yawe jo: «Wi i yaà wee n làra túgori taana.»

²³ A be fàn n kári yaà n sáà wi yirige n pan. A wi baa yére syɛ́ɛnbèle nínge ni. Syɛɛnsanbèle myɛ ni, wàa faala da tɔnɔ n yiri wi fókaannyunyi ni í.

²⁴ A Samyɛli syɛ́ɛnmi myɛ pye: «Wee Yawe nyɛ́nɛ n wòlo lè, yele ga wi nyaa wee ì? Wàa o naa wi felege syɛ́ɛnmi myɛ ni í.» A syɛ́ɛnmi myɛ fundaanra yákpogéle wáa n gi joo níì jo: «Ki n yɛlɛ fànʔafɔw í kòro sìi na làla o làla.»

²⁵ A Samyɛli fǎngi kánma tɛ̀ɛn syɛ́ɛnmi na, níì gi sɛ́bɛ sɛ́bɛ ni n tɛ́ʔɛ Yawe yɛ́ʔɛ ma. Koro kàdoʔo ma a Samyɛli syɛ́ɛnmi myɛ lúrugo n tórigo, a pe myɛ nibin nibin kári pe kèye ma.

²⁶ A Sawuli wɔ́ɔ̀ kári wi kpaʔa ma Gibeya ma. Báriga syɛ́ɛnbèle pèle maa pínɛ n kári ní wi ní, poro bele fúnyo ni Kolocɔlɔɔ báara lè.

²⁷ Kàjáa nifaʔayaa maa jo: «Kanmìí na nǎnw naa a wolo syɔɔ bi sɛ́ɛ?» A be wi faʔa, pe ga kpɔʔɔrɔ faala kaan wi ma í. Kàjáa Sawuli ga joo í.