1 Samyɛli 1 - Cebaara Bible 2010

Ani, Silo tɛɛcǎngi ni

¹ Nànwaa maa pye Aramatayimi-Sofimi ni, ki lè Efirayimi nyanbeleyi kúlo ni, pe maa ni wi yiri Elikana, wi pye lè Yerohami jáaw, Yerohami wi lè Elihu jáaw, Elihu wi lè Tohu jáaw, Tohu wi lè Efirayimi ye Sufi jáaw.

² Càbala siin maa pye wi ma. Pe maa ni wàa yiri Ani, ní i siin wów yiri Penina. Pìibēle maa pye Penina ma, kàjáa pyà da pye Ani ma í.

³ Yɛɛlɛ o yɛɛlɛ nǎnw bee maa ni yìrigí wi kěgi ma ni lúru ni syée Silo ma bi sa Nyɛ̀ʔɛni Sùlasiibéle Kafɔlɔ Yawe kpɔ̀ʔɔrɔ, si sáriga wòlo wi ma. Beè Helii jáabèle siin da pye, pe lè Hofinii, ní Fineyasi. Pe maa pye Yawe sáriga-wòlobēle.

⁴ Cángee na Elikana ga wi sárigaw wòlo lè, wi n lɛɛgéle kaan wi céw Penina, ní wi nànbiigèle myɛ, ní calipiigèle myɛ ma.

⁵ Wi si maa ni gi tɛɛyɛ siin kaangi Ani ma. Níì cán Ani kéeli maa wi dɛ́nɛ, woro wee Yawe da pye lè cenaa-sìnzeeo.

⁶ Wi yejaaw si maa kòro ni kayaagi légi wi ni, koro ga pye bi wi fúngi tanʔa, àmɛɛ Yawe wi pye lè cenaa-sìnzeeo.

⁷ Kánmi bee na ki da ni kpéʔele yɛɛlɛ o yɛɛlɛ, Ani ga lúgu n kári Yawe kpáagi ma, Penina n sa ni kayaagi légi wi ni kannijanmi na, Ani n ni nyaan, wi a fɔ̀lɔ́ lìi í.

⁸ Wi nǎnw Elikana n si wi pye: «Ani, nyàʔá na mɔ nyaan? Nyàʔá na mɔ ga fɔ̀lɔ bi lìi í? Nyàʔá na mɔ fúngi tanʔa? Mii ga sɔ̀lɔ mɔ ma nànbiigéle kɛɛ na ì?»

⁹ Lǎli ni be lìi níì gbaa n kwɔ́ɔ Silo ni lè, a Ani yìri. Helii wi pye lè sáriga-wòlow, woro maa pye wodɛ́ɛɔn ní kòlo na Yawe kpɔ̀ʔɔrɔli kpaʔa kpaaweele taana.

¹⁰ N wi yaʔa funbɛɛnw ni, a wi i Yawe nyɛ́ɛri ní i nyaan gbanʔama.

¹¹ A wi nyɔ́ɔgi fàli níì jo: «Yawe, mɔ wi lè Nyɛ̀ʔɛni Sùlasiibéle Kafɔlɔ, mɔ ga mɔ falipyecew fɔ̀rɔgɔ kéele wéle, wi lè mii, mɔ ga sɔ̀ngi n taa mii na, mɔ ga pye mɔ ga fɛ̀ʔɛ mɔ falipyecew na í, mɔ ga nànbile kaan mii ma, mii a li kaan mɔ Yawe ma li sìíw canya myɛ ni. Nyùngunu-ŋɔ́nɔ a jée wi nyǔngi ni í.»

¹² Amɛɛ si wi kòro wi nyɛ́ɛrigi na Yawe yɛ́ʔɛ ma lè, a Helii i wi nyɔ́ɔgi kɔ̀rɔsíi.

¹³ Ani si maa ni nyuu wiyɛɛ fúngi ni, wi nyɔɔsaliyi yagana yi da ni nyɛ́ʔɛ. Kàjáa wàa da ni wi joomi lúro í. A Helii i sɔ̀ngí sinmɛ wi gbaa n tín.

¹⁴ A wi wi pye: «Làla jòorí mɔ a kwɔ́ɔ nya singbaadinri ni? Mɔ dùvɛɛnw yaʔa wi cèlege nya mɔ ni.»

¹⁵ A Ani wi yari: «Eʔe ni kàfɔlɔ, ncan mii i nyɛ cewaa wee fúngo gi nyáʔami lè. Mii ga dùvɛɛn wàlá sinmaa gbaa í. Mii fúngi kèlē myɛ mii da ni nyuu ni tèé Yawe yɛ́ʔɛ ma.

¹⁶ Mɔ a kɔ́ ra mɔ falipyecew sɔ̀ngí cefaʔaga í. Níì cán mii fúngi wɔʔɔgbɔʔɔ, ní mii kayaagi mii da ni nyuu n baa nan níbeena na.»

¹⁷ A Helii wi yari: «Da syée yɛɛ̀nyinge na. Gee mɔ nyɛ́ɛri Isirayɛli ye Kolocɔlɔw ma lè, ki n yɛlɛ wi gi kaan mɔ ma.»

¹⁸ A wi jo: «Ki n yɛlɛ mɔ falipyecew í kacànna taa mɔ ma. Koro kàdoʔo ma a céw kári ní sáà fɔ̀lɔ n lìi, wi yɛ́ɛgi ga níì pye kanlɛɛmi na í.»

Samyɛli seeli ní wi pìími làla kéele

¹⁹ A be sɔ̀li n yìri nyǐngi nyɔ́ɔ na, a pe ga sáà Yawe kpɔ̀ʔɔrɔ n kwɔ́ɔ, a be lúru n kári be kpaʔa ma, Arama ma. A Elikana baa sínɛ ní wi céw Ani ní, a Yawe wi nyɛ́ɛrigi lóʔo.

²⁰ A Ani yére fícɛnnɛ na, a wi làrizeeli ga baa nan, a wi nànbile see, níì li mɛ́ɛgi le ni li yiri Samyɛli, wi maa jo: «Níì cán Yawe má mii li nyɛ́ɛri.»

²¹ Koro kàdoʔo ma a wi nǎnw Elikana lúgu n kári ní wi kpaʔa wóbèle myɛ ní sa sárigaw wòlo Yawe ma, wi lè yɛ́ɛli fúngo wóo, si wi nyɔɔfaligi foro.

²² Kàjáa Ani da lúgu n kári í. Níì cán wi maa wi nǎnw pye: «Lǎli ni pìíw ga láʔa yíremi na lè, mii a kári ní wi ní bi sa wi tɛ̀ɛn Yawe na, wí kòro yaà làla o làla.»

²³ A wi nǎnw Elikana wi pye: «Gee mɔ nyaa a gi nyɔɔ lè, koro kpéʔele. Kòro naa bi taa mɔ í ba wi láʔa yíremi na. Ki n yɛlɛ Yawe í tɛ́nɛ wi syɛ́ɛnri foro.» A céw kòro beè, ní i wi pìíw kaangi wi i ŋɔri fwɔɔ bi taa wi ba wi láʔa yíremi na.

²⁴ Lǎli ni wi wi láʔa yíremi na lè, a wi kári ní wi ní Yawe kpáagi ma Silo ma. Wi si maa yɛ̀ʔɛlɛ taanri náapɛɛlɛ cò n kári n fàra míimɛ gɔnvaʔa-nyɛ́nnɛ, ní dùvɛɛn kpàbi-nyɛ́nnɛ na. Pìíw si maa cɛ́rɛ.

²⁵ A be náapeli kɔni, níì pan ní pìíw ní Helii ma.

²⁶ A Ani jo: «Kàfári, ni kàfɔlɔ, bi mɔ yaʔa sìi na, céwee wi da baa yére mɔ taana lè nɛɛ naa n Yawe nyɛ́ɛri, woro wi nyɛ mii.

²⁷ Nànbili naa kéele na mii da ni nyɛ́ɛri. Gee mii da ni nyɛ́ɛri Yawe ma lè, wi n gi kaan mii ma.

²⁸ Mii si wɔ́ɔ i caa bi wi kàlifáa Yawe ma, wi a pye Yawe kɔ́lɔ na wi sìíw canya myɛ ni.» A be Yawe kpɔ̀ʔɔrɔ yaà.