1 Pyɛri 5 - Cebaara Bible 2010

Kolocɔlɔɔ bàtogi nàʔafɔɔlɔ

¹ Egiliziw wólɛɛbéle be nyɛ lè yele níngi ni, bele bee ní mii nyuu tɔ́ɔliw ni, mii wee wi wɔ́ɔ̄ nyɛ lè wolɛɛwaa àmɛɛ poro nyɛ lè, ní Kirisi wɔʔɔyi séera, á mii wɔ́ɔ̀ lɛɛlɛ taa nìjanri ni, dee wi a kɔ́ ba tɛ̀ɛn wo na lè, mii i yele nyɛ́ɛri níì jo:

² Kolocɔlɔɔ bàtogi gi nyɛ yele níngi ni lè, yaa gee bee nàʔá. Ki si ga yɛlɛ gi pye mɔ a jo a be yele kpɛ̀ɛn wii í, fwɔɔ ki yiri yele tiimaa fúnyi ni n yɛlɛ ní Kolocɔlɔɔ nyɛ́nɛ kéeli ní. Ki ga wɔ́ɔ̀ yɛlɛ gi pye wálicaari kéele na í, fwɔɔ gi pye kínidɛnɛgi kéele na.

³ Bele Kolocɔlɔɔ kàlifáa yele ma lè yele a kɔ́ ra fànʔa cáan be na í, fwɔɔ yele í pye fɛ̀ɛ bàtogi ma.

⁴ Lǎli ni bànaʔabèle Kàfɔlɔ ga baa wiyɛɛ dɛ̀ɛn lè, wi a bàngwɔɔ nìjangbɔɔrɔ taʔa yele na, ti pye yele ma kpɔʔɔrɔ.

⁵ Kánmi bee wonijanma na, yele wojáribèle, ki n yɛlɛ yaa lúro wolɛɛbèle ma. Ye myɛ ye màámi le yeyɛɛ na burogo, yáā bi kpéʔele yeyɛɛ ma, níì cán «Bele be peyɛɛ nyɛ́nɛ lè, Kolocɔlɔɔ i nyɛ nigooro na ní bele bee ní, bele si be nyɛ lè, màabyebèle, wi i nyɔɔgi bele bee na.»

⁶ Gee bee na gi yɛlɛ yaa màama kpéʔele Kolocɔlɔɔ séekpɔɔw kɔ́lɔ láara ni, koro ga pye wi yele kpólo wi nyɛnɛ lǎli ni.

⁷ Ye yele funjurugori kèlē myɛ le wi kɔ́yi ni, níì cán yele kéeli n kpɔ́ʔɔ wi ma.

⁸ Ki n yɛlɛ ye yeyɛɛ cǒmi cán, yé kòro nyɛ̀nɛ na! Níì cán yele kàsiitun-nyɛ́nw wi lè Dàzɔɔnw, wi i nyaari ni máari àmɛɛ càaraɔ nyɛ, wee wi kaana lè, syɔ́ɔnwee wi a taa káa lè, wee bee wi caa.

⁹ Ye tágali sámaga ye cò, yé yére ye tún ní wi ní, yé gi cán wɔʔɔyi bee wonijanya i kpéʔele yele senyɛnbèle na be nyɛ lè dulunyanw ni.

¹⁰ Kolocɔlɔɔ wi lè kpɔ́ʔɔri myɛ kaanfɔlɔ, woro wee wi yele yeri lè koro ga pye yele í lɛɛlɛ taa wi kwɔ́ɔmɔ fun nijangbɔɔri ni Kirisi ni, yele ga wɔʔɔ n làla cɛɛri kwɔ́ɔ, wi tiimaa a yele sámaga foro, si nìrimɛ lége yele ni, si fànʔa kaan yele ma yele í sámaga yére.

¹¹ Woro na séekpɔɔw yɛlɛ làla o làla kwɔ́ɔmɔ fun! Amiina!

Fòosanw kéele

¹² Silivɛn wi nyɛ lè mii ma tágala senyɛnnɛ, woro wi mii dɛ̀ɛmɛ n syɛ́ɛnri naa cɛɛri sɛ́bɛ mii ma mii í di tórigo yele ma, jàngó bi lòmaana lége yele ni, si gi séeraw kpéʔele yele ma si jo: dee naa di nyɛ Kolocɔlɔɔ kpɔ́ʔɔri wodelere. Ye di sámaga ye cò.

¹³ Egiliziwee wi nyɛ lè Babilɔni ni, wee Kolocɔlɔɔ nyɛ́nɛ n wòlo àmɛɛ yele nyɛ lè, wi n yele syáanri yaà, a mii pìíw Mariki wɔ́ɔ̀ yele syáanri.

¹⁴ Yaa yeyɛɛ syáanri, yáā yeyɛɛ syɔɔnri ní tàmaga ní. Yele bele ye nyɛ lè Kirisi ni, ki n yɛlɛ Kolocɔlɔɔ í fûnnyingi kaan yele myɛ ma!