1 Pyɛri 4 - Cebaara Bible 2010

Tánʔaganvɔnmi kéele

¹ Koro na àmɛɛ Kirisi da wɔʔɔ lè céri ni, ki n yɛlɛ yele í sɔ̀nguri bee wonijanra yaʔa di pye yele kapɛɛnkpumɔn-yáriri. Níì cán syɔ́ɔnwee wi wɔʔɔ lè céri ni, wee bee n láʔa kapeegèle na,

² koro ga pye lǎlee li kòro wi kwɔ́ɔ lè sìi na dulunyanw ni, wi a ní kɔ́ kòro bàā syɛ́ɛnbèle ki laànitaʔa kele kpéʔele lǎli bee ni í, fwɔɔ Kolocɔlɔɔ nyɛ́nɛ kérigèle.

³ Làrigèle gele yele kwɔ́ɔ n kwɔ́ɔ lè syɛɛnfeleyi nyɛ́nɛ kèlē ni, gele bee n nɛʔɛ n yɛlɛ n kwɔ́ɔ, àmɛɛ yele da ni kanɔnʔɔbeeri, ní yele ki laànitaagi kèlē, ní singbaadinri, ní kakolobyeri, ní singbaari fɛ́tiibéle kpéʔele lè n fàra yasunzunbeeri na.

⁴ Tɔ́ɔliw ni àmɛɛ gi nyɛ lè yele ní o pìnɛ́ ni fé ni syée ní be ní kanɔnʔɔnɛʔɛri bee kurugo lè í, a be i káama gi na, ní i yele mɛ́ɛyi kálagi.

⁵ Wee wi wiyɛɛ zámaga n kwɔ́ɔ bi ba kútiiw kúun niweebèle ní kúbèle na lè, woro wi a ba be yíbe kérigèle bee na.

⁶ Koro gi gi kaan a wi Syɛɛnjóocǎnri joo kúbèle ma, koro ga pye wi kútiiw kúun be na céri kàbaan na bi yɛlɛ ní syɛ́ɛnbèle kánma ní, jàngó pe wéege pǐli kàbaan na bi yɛlɛ ní Kolocɔlɔɔ kánmi ní.

Kolocɔlɔɔ kpɔ́ʔɔri kɔ̀rɔsiifɔ-jànbēle kéele

⁷ Yáriri myɛ làrigwɔɔlɔ n nùuni. Koro na gi yɛlɛ ye pye yákirifɔɔlɔ, yé yeyɛɛ cǒmi cán, yáā Kolocɔlɔɔ nyɛ́ɛri.

⁸ Gee gi kpɔ́ʔɔ n sɔ̀lɔ kérigèle myɛ na lè, koro gi nyɛ yele í tàmaga le ní yeyɛɛ ní gbanʔama, níì cán tàmagi i kapeegèle saʔa tɔ́ngi.

⁹ Ki n yɛlɛ yele í da fɔ̀lɔ́ yeyɛɛ na bi pye yeyɛɛ jàtigibéle sànʔara fun.

¹⁰ Amɛɛ Kolocɔlɔɔ fundooro kaan yele myɛ nibin nibin ma lè, yaa yeyɛɛ màkow nyɔɔgi ní dee bee ní jàngó yele í pye Kolocɔlɔɔ kpɔ́ʔɔri féleye saʔa kɔrɔsiifɔ-jànbēle.

¹¹ Wàa ga ni nyuu, ki n yɛlɛ waa nyuu Kolocɔlɔɔ syɛ́ɛnrɛ jooganma na. Wàa ga ni pèle dɛ̀ɛmɛ́, ki n yɛlɛ waa gi kpéʔele ní bárigaw ní Kolocɔlɔɔ kaangi wi ma lè, koro ga pye nìjangbɔɔri í da taari Kolocɔlɔɔ na kérigèle myɛ ni, Zyezu Kirisi bárigaw ni, woro wee má nìjangbɔɔri, ní séekpɔɔw nyɛ lè làla o làla kwɔ́ɔmɔ fun. Amiina!

Bàā wɔʔɔ àmɛɛ mɔ nyɛ lè Kiretyɛɔn

¹² Mii syɛɛn-nidaanmabèle, kagbanyi yi nyɛ yele na àmɛɛ naà nyɛ lè jàngó bàā yele sɛʔɛ da wéle, yele a kɔ́ gee bee yaʔa gi yele fúnyi wɔ́ɔ si jo ki n pari yele na í.

¹³ Fwɔɔ yele í da fundaanra kpéʔele àmɛɛ yele lɛɛlɛ taa lè Kirisi wɔʔɔli ni, koro ga pye yele í wɔ́ɔ ba ra muguri fundaanri báriga ni lǎli ni wi a ba wi nìjangbɔɔri tɛ̀ɛn lè.

¹⁴ Pe ga ni yele teeri Kirisi mɛ́ɛgi kéele na, yele i nyɛ dùba pìibēle, níì cán nìjangbɔɔri Pìle li lè Kolocɔlɔɔ wóli, loro li baa tɛ́ɛn yele na!

¹⁵ Kapye yele wàa faala i wɔʔɔ, ki ga yɛlɛ ki kɔ pye mɔ a jo syɛɛnkpóō wi nyɛ í, wàlá kàyuuo, wàlá kakolobyeo, wàlá wee wi wi nyɔ́ɔgi nii wi syɛɛnnyɛnbèle kèlē ni lè í.

¹⁶ Wàa si ga ni wɔʔɔ àmɛɛ wi nyɛ lè Kiretyɛɔn, ki ga yɛlɛ gi pye wee bee na fɛ̀ɛrɛ í. Fwɔɔ waa Kolocɔlɔɔ kpɔ̀ʔɔrɔ́ mɛ́ɛgi bee kéele na.

¹⁷ Níì cán lǎli n nan, lee ni kútiiw a séli lè Kolocɔlɔɔ kpáagi* wòolo na. Wi si ga séli wolo na, mɛ̀ɛ́ si Kolocɔlɔɔ Syɛɛnjóocǎnri céefɔɔlɔ kwɔ́ɔganma a ba pye bi sɛ́ɛ?

¹⁸ Kapye syɛɛnsinbèle syɔɔganma n gbàn, mɛ̀ɛ́ si Kolocɔlɔɔ yɛ́ʔɛnaa-sìnvyaaw ní kapeebyew kéele a ba pye bi sɛ́ɛ?

¹⁹ Gee bee na bele be wɔʔɔ lè n yɛlɛ ní Kolocɔlɔɔ nyɛ́nɛ kéeli ní, ki n yɛlɛ pe be pìígèle kàlifáa yáriri myɛ Faanfɔlɔ ma, wi lè tágala syɔ́ɔn, páā kacǎngèle kpéʔele.