1 Pyɛri 2 - Cebaara Bible 2010

Kàdɛnɛweegi ní Kolocɔlɔɔ syɛɛncanbèle kéele

¹ Koro na ye funbeeyi féleye myɛ yaʔa, yé wɔ́ɔ ye jànvaaw, ní syɛɛnjóotɛɛyi siin joolo, ní nyabɛɛnni myɛ yaʔa n fàra mɛ́ɛkalagiri myɛ na.

² Ye pye àmɛɛ sàánnyɛɛngēle nyɛ lè bi yirejanmi láa yaʔa paa yele taagi pi lè pìígèle wómɔ, koro ga pye yele í da leegi syɔɔli kánma na pi bárigaw ni,

³ àmɛɛ yele gi laala n wéle lè níì gi cán Kàfɔw n nyɔɔ.

⁴ Yaa maa wi ma, woro wee wi nyɛ lè kàdɛnɛweegi, gee syɛ́ɛnbèle da cée lè, á Kolocɔlɔɔ si gi nyɛ́nɛ n wòlo n gi córo lɔgbanra wóʔo,

⁵ yele tiimaa si wɔ́ɔ i nyɛ mɔ a jo kàdɛnɛweeye yii, ye gi yaʔa waa yele téeri waa Pìicǎnni kpaʔa faanri, gee ni yele a pye lè sáriga-wòlocànbēle kabigaa bàā sárigaw wóo pǐli kàbaan na, sárigawee wi Kolocɔlɔɔ dɛ́nɛ lè, Zyezu Kirisi bárigaw ni.

⁶ Níì cán ki n sɛ́bɛ Kolocɔlɔɔ syɛɛnsɛbɛri ni níì jo: «Ye wéle, mii n jɛ̀ɛ́nni kàdɛnɛzelige tɛ́ʔɛ Siyɔn kěgi fúngo ni, gee mii nyɛ́nɛ n wòlo n córo lɔgbanra wóʔo lè, syɔ́ɔnwee wi tága gi na lè, fɛ̀ɛrɛ a tée wee bee taa bi nyaa nyáana í.»

⁷ Koro na yele bele ye tága lè, ki i nyɛ yele ma lɔgbanra wóʔo. Bele si be nyɛ lè pe ga tága í, ki i nyuu bele bee kéele na níì jo: «Kàdɛnɛgee kpaafaanbèle cée lè, gee bee ki baa pye kpáagi jɛ̀ɛnnɛ kadɛnɛzelige,»

⁸ ní i nyɛ: «Kàdɛnɛgɛ, gee na syɛ́ɛnbèle kpírigi lè, ní fálaga, gee gi syɛ́ɛnbèle cáan lè.» Amɛɛ gi nyɛ lè pe ga fɔ̀lɔ ni yèré Kolocɔlɔɔ syɛ́ɛnri ni í, koro na be kpírigi, gee bee si ki da kɔ̀rirɔ n kpéʔele be kánmi na.

⁹ Yele si i nyɛ syɛɛnfelegaa, gee Kolocɔlɔɔ nyɛ́nɛ n wòlo lè, ní i nyɛ wi fǎngi sáriga-wòlobēle, ní ní i nyɛ syɛɛncanbéle, bele Kolocɔlɔɔ sámaga n yaʔa wiyɛɛ ma lè, ní wɔ́ɔ i nyɛ wi tiimaa syɛ̀ɛnnɛ, koro ga pye yele í da woro nyɔɔ-mí-foroli kèlē nyuu, woro wee wi yele yeri n yirige lè yébilimi ni n lége wi bìngaari gbɛ̀ɛnmɛ ni lè.

¹⁰ Booma ni yele da pye syɛɛnfelege nibin í, kàjáa tɔ́ɔliw ni yele i nyɛ Kolocɔlɔɔ syɛ̀ɛnnɛ. Wi da wɔ́ɔ ni nyinimɛ taagi yele na í, kàjáa tɔ́ɔliw ni wi n nyinimɛ taa yele na.

Bàā táanri Kolocɔlɔɔ púlo tánʔaganma na

¹¹ Mii syɛɛn-nidaanmabèle, àmɛɛ yele nyɛ lè kùsɛɛbéle ní nibɔɔnnɔ, mii i yele nyɛ́ɛri níì jo yele í da còʔoró céri ki laànitaʔa kele na ge kapɛɛnni kpúmɔn ní syɔɔn pǐli ní lè.

¹² Ki n yɛlɛ yele í da nàʔajànma náari syɛɛnfeleyi nínge ni, koro ga pye, àmɛɛ be yele mɛ́ɛpɛɛnyi yiri lè níì jo yele i nyɛ kapeebyebèlē, pe ga ni yele kapyejǎngèle nyaagi, pe a nìjangbɔɔri taʔa Kolocɔlɔɔ na wi canbangi na.

¹³ Yaa lúro syɛ́ɛnbèle fànya myɛ ma Kàfɔw kéele na, àlí ki ga pye tári fɔ́lɔ wi lè pe myɛ nyúngo na yoo,

¹⁴ wàlá fànʔafɔbèle wi tungu lè pe sa ra kapeebyebèle yɛ́ɛyɛ wáragi lè sáā kacànbyebèle sòoló lè yoo, ki n yɛlɛ yaa lúro pe myɛ ma.

¹⁵ Níì cán gee gi nyɛ lè Kolocɔlɔɔ nyɛ́nɛ kéeli, koro gi nyɛ yele í da kapyejàngèle kpéʔele bàā nilabalabèle nyɔ́ɔyɔ tɔ́ngi, poro bele be kanaa-sìnjánmi jóomɔ nyuu lè,

¹⁶ àmɛɛ yele nyɛ lè wɔ́rɔbéle, ki ga yɛlɛ yele í kɔ́ kapeebyeri yaʔa di tɛɛlaraga taa yele wɔ́rɔdi fúngo ni í, fwɔɔ ye pye Kolocɔlɔɔ púlobéle.

¹⁷ Yaa syɛ́ɛnbèle myɛ kpɔ́ʔɔgi, yé tàmaga le ní senyɛnnɛgi ní, yáā fɛ̀ɛgí Kolocɔlɔɔ na, yáā tári fɔ́lɔ kpɔ́ʔɔgi.

Kirisi wɔʔɔli fɛ̀ɛ kéele

¹⁸ Yele falipyebèle, ki n yɛlɛ yaa lúro yele kàfɔbèle ma kányɛʔɛ na ní fyáara ní, bele be nyɛ lè funjǎnyi fɔ̀ɔlɔ, ní fûnnyinyi fɔ̀ɔlɔ, poro yagana má ban yele a ra lúro í, fwɔɔ yele í wɔ́ɔ ra lúro fungbanyi fɔ̀ɔlɔ ma,

¹⁹ níì cán kapye syɔɔn i wɔʔɔyi kpàracó Kolocɔlɔɔ yɛ́ɛgi fyáara kéele na, bi gi taa wi da yɛlɛ ní wɔʔɔyi bee ní í, gee bee gi nyɔɔ.

²⁰ Pe ga ni yele kpúmɔn yele kapeebyeri kéele na, á yele gi kpàraco, wìí wi a yele sòolo gee bee na? Kàjáa yele ga ni wɔʔɔ yele kapyejǎngèle kéele na ní i gi kpàracó, gee bee gi nyɔɔ Kolocɔlɔɔ nyɛ́nɛ na.

²¹ Gee bee kánma na Kolocɔlɔɔ da yele yeri, níì cán Kirisi n wɔ́ɔ̀ wɔʔɔ yele sìndɛɛgi ni jàngó gee bee í pye yele ma fɛ̀ɛ, koro ga pye yele í da táanri wi tùluyi ni.

²² Wi da kapeelaa faala kpéʔele í, jànvaa da wɔ́ɔ̀ yiri wi nyɔ́ɔgi ni nyáana í.

²³ Lǎli ni pe da ni wi teeri lè, wi da ni gi sìndɛɛgi lúrugu be ma í. Lǎli ni pe da ni wi wɔʔɔ lè, wi da syɛɛngbanra joo n kaan be ma í, fwɔɔ wee wi kútiiw kúunri ni yɛlɛgi ní sínni ní lè, a wi wiyɛɛ yaʔa wee bee kɔ́yɔ ni.

²⁴ Wi tiimaa maa wolo kapeegèle túgoro tugo wiyɛɛ na tiiparigi na, koro ga pye wolo í kùu kapeegèle kàbaan na si pye sìi na sínni kàbaan na. Yele n pɔʔɔ wi kpúmɔnri námiya báriga ni.

²⁵ Níì cán yele maa ni curugu ni máari àmɛɛ bàala nyɛ lè, kàjáa tɔ́ɔliw ni yele n lúru n pan yele pìígèle Nàʔafɔlɔ, ní ge Kɔ̀rɔsiifɔw ma.