1 Timɔte 6 - Cebaara Bible 2010

¹ Bele myɛ be nyɛ lè púlobèle, ki n yɛlɛ paa be tiimaa kàfɔbèle córo bi cán pe n yɛlɛ ní kpɔ́ʔɔri myɛ ní, koro ga pye Kolocɔlɔɔ mɛ́ɛgi ní wi tamani a kɔ́ ba kálagi í.

² Bele kàfɔɔlɔ be nyɛ lè tágafɔɔlɔ, ki ga yɛlɛ paa be faari si pwɔɔ pe i nyɛ senyɛnnɛgɛ í, kàjáa ki n yɛlɛ paa báara be ma gbanʔama, níì cán be tágafɔnyɛ̀nnɛ, ní be senyɛn-nidaanmabéle má be falicanw bee kpéʔele. Da be tama kérigèle bee ni, máā be kɛɛlɛ.

Tama-váanagèle ní lɔ́ri wodelere

³ Syɔɔnwaa ga ni syɛ́ɛnbèle tama tamalaa nikwɔɔ ni, lee li fàli wolo Kàfɔw Zyezu Kirisi tamajanni na lè, ní wɔ́ɔ̀ fàli Kolocɔlɔɔ yɛ́ɛgi fyáara tamana na,

⁴ syɔ́ɔnw bee n nyìn wi tiimaa kpɔ́ɔmi na, wi i nyɛ kanaa-sìnjáɔn. Nyùngo fun yíbeyi ní kàkabalayi syɛɛnjóonɛʔɛrɛ n wi yákiriw kálagi. Kérigèle bee ge maa ní nyabɛɛnni ní n fàra kàsiiw, ní tɛʔɛlɛyi syɛ́ɛnrɛ, ní sɔ̀ngubeeri na.

⁵ Bele yákirii wi kálagi lè, poro má kàkabalabeeyi yìrigí, kányɛʔɛ o nyɛ be ma í, pe i gi sɔ̀ngí n jo Kolocɔlɔɔ yɛ́ɛgi fyáara i nyɛ dulunyanw tɔ̀nɔtaara kólogo.

⁶ Kányɛʔɛ ni Kolocɔlɔɔ yɛ́ɛgi fyáara si di nyɛ tɔ̀nɔkpɔɔw kólogo, ní syɔɔn ga ni gi córo n jo gee woro taa n kwɔ́ɔ lè, gee bee n yɛlɛ ní woro ní.

⁷ Níì cán lǎli ni wo pan dulunyanw ni lè, wo ga pan ní yarigaa ní í, wo ga wɔ́ɔ baa lúru ni syée, wolo a gbǎn kári ní yafyɛn ní í.

⁸ Koro na lìíli ní fànilew ga tɛ́nɛ̀ pye wolo ma, dee bee a wolo yɛlɛ.

⁹ Kàjáa bele be caa lè bi pye lɔrɔfɔɔlɔ, bele bee i có lɛ́ɛlɛ-mí-cǒli karinyanya na, sícilimɛ fun ki laànitaagi ní péemi ki laànitaʔa kérigèle saʔa láa i be taagi, gele ge syɛ́ɛnbèle nii lè kálagili ní naakpɔɔgi ni.

¹⁰ Níì cán wáliw tàmaga gi nyɛ kapeegèle myɛ nìnre, á pèle si kòro wi caali na, níì pùuni n léeli tágali na, níì kayaaya saʔa tɛ́ʔɛ n peyɛɛ fúnyi kálagi.

Láliiw wi joo n kaan Timɔte ma lè

¹¹ Mɔ wee si wi nyɛ lè Kolocɔlɔɔ syɔ́ɔn, ki n yɛlɛ maa fé kérigèle bee na, mí miyɛɛ daʔa sínni na, ní Kolocɔlɔɔ yɛ́ɛgi fyáara ní, n fàra tágali, ní tàmagi, ní kpàracogi, ní funjǎngi na.

¹² Da tágali kapɛɛnjànna kpúmɔn, mí sìibangwɔɔw cò wi lè mɔ kayeli nyúngo, woro wee kéele na mɔ séeracǎnw joo lè séerafɔbèle saʔa nyɛ́nɛ na.

¹³ Kolocɔlɔɔ wi yáriri myɛ wéege lè, ní Kirisi Zyezu wi séeracǎnw kpéʔele lè Pɔnsi Pilati yɛ́ʔɛ ma, mii a gi joo bi gbàn mɔ ma poro nyɛ́nɛ na si jo,

¹⁴ kajooli naa cò mí pye tɛɛlɛ fun, ní dìgire fun bi taa wolo Kàfɔw Zyezu Kirisi làridɛ̀ɛ́nni í ba nan,

¹⁵ wee Kolocɔlɔɔ a ba tɛ̀ɛn lè wi làridɛɛnni ni, woro wee nibin wi nyɛ lè dùbaw, ní séew myɛ Kàfɔlɔ, ní i nyɛ fànʔafɔbèle myɛ Fànʔafɔlɔ, ní wɔ́ɔ i nyɛ kàfɔbèle myɛ Kàfɔlɔ,

¹⁶ woro wee nibin wi nyɛ lè bànguu, woro wee wi nyɛ lè gbɛ̀ɛ́nmi ni bee bi lè syɔɔn a gbǎn nùuni bi na í, syɔɔnwaa faala si ga kɔ́ɔ̀ wi nyaa í, pe wàa a wɔ́ɔ gbǎn wi nyaa í, woro na kpɔ̀ʔɔrɔli ní séew yɛlɛ làla o làla! Amiina.

¹⁷ Ki joo mi gbàn dulunyanw naa lɔrɔfɔɔlɔ ma mí be pye, pe a kɔ́ ra peyɛɛ gbɔ́ʔɔgi í, mí wɔ́ɔ gi joo be ma pe a kɔ́ be sɔ̀ngumi taʔa lɔ́ri na í, níì cán ti i nyɛ yakwɔʔɔ, fwɔɔ pe be sɔ̀ngumi taʔa Kolocɔlɔɔ na, woro wee wi yáriri myɛ kaangi wolo ma lè wonɛʔɛrɛ ní, koro ga pye wolo í da fundaanra kpéʔele.

¹⁸ Ki n yɛlɛ paa kacàngēle kpéʔele, pe a náa pye lɔrɔfɔɔlɔ kapyejǎngèle báriga ni, ki n yɛlɛ paa syɛ́ɛnbèle kaangi ŋàʔanaga fun, ní funjànya ní,

¹⁹ koro ga pye pe a lɔnɛʔɛrɛ kɔn peyɛɛ ma nyɛ̀ʔɛna yɛ́ʔɛ na, dee bee a pye be ma kàpɔɔncàɔn, koro ga pye sìíwee wi nyɛ lè wodelew, pé wee bee sámaga be cò.

²⁰ Ee Timɔte, kàlifawee wi nyɛ mɔ ma lè, maa wi kɔ̀rɔsíi, kàjáa Kolocɔlɔɔ yɛ́ʔɛnaa-sìnvyaari gbanzan syɛ́ɛnrɛ, ní kàkabalayi yi taagi lè sícili-váanami ni, mi toro yaʔa,

²¹ sícilimi bee bi nyɛ pèle ma, á be jo poro i nyɛ sícilibēle, níì fala n tágali kólogo yaʔa. Kolocɔlɔɔ í kpɔ́ʔɔri kaan yele ma!