1 Timɔte 5 - Cebaara Bible 2010

Gee gi yɛlɛ kaa kpéʔele tágala syɛ́ɛnbèle ma lè

¹ Ki ga yɛlɛ mɔ í kɔ́ fúlo nànlɛɛɔ na ní fungbanga ní í, fwɔɔ maa nyuu ní wi ní fûnnyinge na àmɛɛ mɔ tóo nyɛ lè, máā nyuu ní nìgɔcaribèle ní àmɛɛ mɔ senyɛ̀nnɛ nyɛ lè,

² mí wɔ́ɔ maa nyuu ní celɛɛbèle ní àmɛɛ mɔ nafɔɔlɔ nyɛ lè, máā nyuu ní cepiibèle ní funviire na àmɛɛ mɔ senyɛ̀nnɛ nyɛ lè.

³ Bele be nyɛ lè lɔgucetelebèle, ki n yɛlɛ maa bele bee kpɔ́ʔɔgi.

⁴ Pìibēle si ga pye pe wàa ma, koro ga jáa wi pìíbèle pìibēle yoo, ki n yɛlɛ bele bee í da Kolocɔlɔɔ yɛ́ɛgi fyáara kele tama pe tiimaa narigbaagi wólɛɛbéle kabaan na, níì cán pe ga ni pe seefɔbèle gɔ̀lɔbéle wóo be ma, gee bee gi Kolocɔlɔɔ dɛ́nɛ.

⁵ Wee wi ga pye lè lɔgucaateleo ní i nyɛ wi nibin, wee bee n wi sɔ̀ngumi taʔa Kolocɔlɔɔ na, níì kòro ni wi nyɛ́ɛri, ní i wi kpɔ̀ʔɔrɔ́ canʔa ní yébilige.

⁶ Kàjáa wee wi ga kòro wi nyɛnɛ kérigèle na ni kpéʔele lè, wee bee n kùu n kwɔ́ɔ àlí n gi yaʔa wi i nyɛ sìi na.

⁷ Da kérigèle bee nyuu maa gbàngí be ma jàngó be pye dìgire fun.

⁸ Syɔ́ɔnwee ga pye lè wi o wi syɛ́ɛnbèle màko nyɔɔgi í, àlí gee gi caà wi tiimaa kpáagi wòolo kéele kwɔ́ɔ lè, wee bee n tágali cée, ní wɔ́ɔ̀ pee n sɔ̀lɔ sìndagaɔ na.

⁹ Ki ga yɛlɛ mɔ í lɔgucewaa faala mɛ́ʔɛ sɛ́bɛ í, fwɔɔ wi ga yɛ̀ʔɛlɛ togoye taanri taa, kapye wi maa tɛ́nɛ̀ pye nàɔn nibin fɔ́lɔ,

¹⁰ á be si wɔ́ɔ i wi mɛ́ɛtaangi yiri wi kacànbyeri kéele na, gee bee n jo àmɛɛ wi pìíbèle gbóo lè, ní i nibɔnbèle tìrigí, ní i Kolocɔlɔɔ syɛɛncanbèle tɔ́lɔyɔ jée, ní i fɔ̀rɔgɔfɔbèle dɛ̀ɛmɛ́, ní i kacǎngèle féleye myɛ kpéʔele lè.

¹¹ Kàjáa lɔgucebèle be nyɛ lè, pe ga kɔ́ɔ̀ lɛɛ í, ki ga yɛlɛ mɔ í bele bee wàa mɛ́ʔɛ sɛ́bɛ í, níì cán cèpɔrigi láa ga baa yìri be ma, pe n láʔa Kirisi na,

¹² pe n kolo, níì cán pe n be nyɔɔfaligi wozelige kálagi.

¹³ N fàra gee bee na, pe i sàlagi kèlē tama, ní i kpáayi sɔ̀lɔ́ ni máari. Alí pe ga gi yérige sàlagi yagana na í, pe wɔ́ɔ i nyɛ lóʔonjoobéle, pe i be nyɔ́ɔyi nii syɛ́ɛnbèle kèlē ni, ní i syɛɛnnaa-sìnjoori nyuu.

¹⁴ Koro na lɔgucebèle be nyɛ lè pe ga kɔ́ɔ̀ lɛɛ í, mii i caa poro í da cèpɔrigi kpéʔele, koro ga pye paa pìibēle sii, sáā be kpáayi kèlē sámagi da cɔɔnri, jàngó pe a kɔ́ tɛɛ̀jeʔe kaan wolo nigoobèle ma paa syɛɛnpeeri nyuu poro kéeli na í.

¹⁵ Níì cán lɔgucebèle bee pèle n kàri n taʔa Sutanaw na n kwɔ́ɔ.

¹⁶ Kapye lɔgucebèle pèle i yaà tágafɔjewaa kpaʔa ni, ki n yɛlɛ waa be dɛ̀ɛmɛ́. Ki ga yɛlɛ be pye Egiliziw túgoro í, jàngó Egiliziw í gbǎn ra lɔgucaatelebèle dɛ̀ɛmɛ́.

¹⁷ Wolɛɛbèle be Egiliziw sámagi ni kàragí lè, bele bee n yɛlɛ ní kpɔʔɔdɛɛyɛ siin-ziin ní, bele si be Kolocɔlɔɔ syɛ́ɛnri nyuu ní i syɛ́ɛnbèle tama lè, a poro wógi si tóro.

¹⁸ Níì cán Kolocɔlɔɔ syɛɛnsɛbɛri n gi joo níì jo: «Nìfalaw wi yaliiri sàngí lè, mɔ a kɔ́ cɔ̀ɔ pwɔɔ wi nyɔ́ɔgi na í,» ní níì jo: «Falipyeo n yɛlɛ ní wi sàraw ní.»

¹⁹ Pe ga keelaa joo n taʔa wolɛɛwaa na, ki ga yɛlɛ mɔ í yére gi ni í kapye mɔ ga gi lóʔo séerafɔɔlɔ siin wàlá taanri ma í.

²⁰ Bele si be kapeegèle kpéʔele lè, ki n yɛlɛ mɔ í da fúlo be na syɛ́ɛnbèle myɛ nyɛ́nɛ na, koro ga pye wozanbèle í wɔ́ɔ fyáa.

²¹ Mii a gi joo bi gbàn mɔ ma, Kolocɔlɔɔ ní Kirisi Zyezu, ní nyɛ̀ʔɛni tundunnyɛnɛ-wòlobēle nyɛ́nɛ na, ki n yɛlɛ mɔ í syɛ́ɛnri naa cò, ki ga yɛlɛ mɔ í kɔ́ keelaa joo ceri li sìnvilige sìnján ni í, sáā syɛ́ɛnbèle pèle yirigi pèle ni í.

²² Mɔ a wári kɔ́ mɔ kɔ́yi taʔa syɔɔnwaa faala na í, ki ga wɔ́ɔ̀ yɛlɛ mɔ í pínɛ ní pèle ní kapeebyeri na í. Ki n yɛlɛ mɔ tíimaa í kòro wojaɔn ní.

²³ Mɔ a kɔ́ kòro bàā lǒgi yagana gbo í, kàjáa ki n yɛlɛ maa dùvɛɛn cɛɛri gbo mɔ láayi ní mɔ yáami kéele na bee bi mɔ taagi lè tɔlɔyɔ saʔa.

²⁴ Syɛ́ɛnbèle pèle kapeegéle n yiri kàfugi na sáni kútiiw canʔa í nan lè. Pèle wòʔolo si a gbǎn cán í, kapye kàdoʔo ma ban í.

²⁵ Kánmi bee na kacànbyeri wɔ́ɔ i yirigi kàfugi na, dee si di nyɛ lè làrama ni, ti a gbǎn ba kòro wolarada ni í.