1 Timɔte 4 - Cebaara Bible 2010

Bele be jànvaaw tamagéle kaangi lè

¹ Pìicǎnni n gi joo n fílige níì jo: «Làlaa a kɔ́ ba pye syɛ́ɛnbèle pèle a yiri tágali ni si tan jànvaaw pìigēle na, si wɔ́ɔ taʔa màdebèle tamana na.

² Jànvaaw tamana i taagi syɛɛnjóotɛɛyi siin joofɔɔlɔ ma, poro bele fúnyo yi gbàn lè mɔ a jo namisógugo fɛɛ wii.

³ Pe i gi nyuu níì jo cèpɔrigɔ a kɔ́ ra kpéʔele í, páā yaliiraa féleye fúun, dee Kolocɔlɔɔ sámaga lè koro ga pye tágafɔbèle pe kányɛɛgi cán lè, paa di líi sáā bariga kaangi woro ma.

⁴ Kolocɔlɔɔ yasamagari myɛ n nyɔɔ, syɔɔn ga yɛlɛ wi tàa faala cée í, ki n yɛlɛ waa fɔ̀lɔ́ di na, wáā bariga kaangi Kolocɔlɔɔ ma.

⁵ Níì cán yáriri myɛ i nyɛ fɔɔnrɔ fun, Kolocɔlɔɔ syɛ́ɛnri ní nyɛ́ɛrigi báriga ni.»

Kirisi Zyezu falipyecǎnw kéele

⁶ Mɔ ga ni wo senyɛnbèle tama kérigèle bee na, mɔ a pye Kirisi Zyezu falipyecàɔn, àmɛɛ mɔ fànʔa taagi lè tágali, ní tamajanni syɛ́ɛnrɛ báriga ni, dee na mɔ taʔa lè.

⁷ Kàjáa mi Kolocɔlɔɔ yɛ́ʔɛnaa-sìnvyaabèle kèlē ní celɛɛbèle tánlɛɛyɛ cée, mí miyɛɛ dama mi tàli Kolocɔlɔɔ yɛ́ɛgi fyáara kele na.

⁸ Níì cán syɔɔn ga wi yasɛɛyi tàli kérigèle kèle na, gee bee n wi dɛ̀ɛmɛ kèlē cɛɛri ni, kàjáa Kolocɔlɔɔ yɛ́ɛgi fyáara a gbǎn syɔɔn dɛ̀ɛmɛ kérigèle myɛ ni, níì cán syɔɔn ga ni fɛ̀ɛgí Kolocɔlɔɔ na, sìíw nyɔɔfaliga i nyɛ wee bee wóʔo tɔ́ɔliw ni, ní dulunyanwee ni wi maa lè.

⁹ Syɛ́ɛnri naa mii a joo lè di i nyɛ kányɛʔɛ, ti myɛ n yɛlɛ pe di cò, toro di nyɛ:

¹⁰ Kolocɔlɔɔ woweew wi nyɛ wolo sɔ̀ngumi tɛɛtaʔaga, woro wee wi nyɛ lè syɛ́ɛnbèle myɛ syɔɔfɔlɔ n náa kɔ́ɔ̀ yére tágafɔbèle na, gee bee na wolo báara ní i kapɛɛnni kpúmɔn.

¹¹ Da kérigèle bee nyuu maa gbàngí, máā syɛ́ɛnbèle tama ge na.

¹² Ki ga yɛlɛ mɔ í kɔ́ syɔɔnwaa faala yaʔa wi mɔ faʔa si pwɔɔ mɔ piimi na í. Fwɔɔ mɔ í pye fɛ̀ɛ tágafɔbèle ma mɔ nyɔɔsyɛɛnri ni, ní mɔ tánʔaganmi, ní mɔ tamagi, ní mɔ tágali ni n fàra kasingèle myɛ na.

¹³ Mi kòro Kolocɔlɔɔ syɛ́ɛnri wélejoolo na, ní syɛ́ɛnbèle kɛɛlɛlɛ, ní be tamani na, sáni mii í nan yaà lè.

¹⁴ Fundoori Pìicǎnni kaan mɔ ma lè, ki ga yɛlɛ mɔ í di faʔa í. Mɔ n di taa kanyaajoori báriga ni, lǎlee ni yɛɛ̀kinibèle da kɔ́yi taʔa mɔ nyúngi na lè.

¹⁵ Mi gbèé pye kérigèle bee na, mi miyɛɛ gaan ge ma koro ga pye syɛ́ɛnbèle myɛ í gi nyaa àmɛɛ mɔ syée lè yɛʔɛ̀ ma tágali ni.

¹⁶ Maa miyɛɛ kɔ̀rɔsíi, mí wɔ́ɔ maa mɔ tamani kɔ̀rɔsíi. Níì cán mɔ ga ni gi kpéʔele, kánmi bee na mɔ a miyɛɛ zyɔɔ, si wɔ́ɔ be syɔɔ, bele be lúro mɔ ma lè.