1 Timɔte 3 - Cebaara Bible 2010

Egiliziw yɛɛ̀kinibéle

¹ Syɛ́ɛnri naa i nyɛ kányɛʔɛ syɛ́ɛnrɛ àmɛɛ di joo lè syɔɔnwaa ga ni caa bi pye yɛɛ̀kinio, wi i falicaɔn caa.

² Gee bee na yɛɛ̀kinio n yɛlɛ wi pye dìgire fun, si pye cɔlɔɔ nibin fɔ́lɔ, wí wiyɛɛ cǒmi cán, si wɔ́ɔ pye yákirifɔlɔ, wi kérigèle myɛ n yɛlɛ ge sín, wí wɔ́ɔ pye nibɔnbèle tìrigefɔlɔ, si gbàn syɛ́ɛnbèle tamana na,

³ ki ga yɛlɛ wi wiyɛɛ gaan sínmi ma í, wi a kɔ́ pye syɛɛntanʔaɔ í, fwɔɔ wi pye fûnnyingefɔlɔ, wi a kɔ́ pye kàsiikuuɔn í, wi si a wɔ́ɔ kɔ́ wiyɛɛ daʔa wáliw na í.

⁴ Ki n yɛlɛ waa wi tiimaa kpáagi kàragí gbanʔama, sáā wi pìíbèle kɔ̀rɔsíi jàngó paa lúro, wáā be tama kasingèle myɛ na.

⁵ Syɔɔn ga pye wi ga gbàn ni wi tiimaa kpáagi kàragí í, mɛ̀ɛ́ wi a gbǎn ra Kolocɔlɔɔ Egiliziw kpáa wéle bi sɛ́ɛ?

⁶ Ki ga yɛlɛ wi pye tágafɔvɔɔn í, kapye koro ban í dɔ̀ʔɔ́ wi a kɔ́ ra wiyɛɛ nyɛ́nɛ, kútiiw wi da too Dàzɔɔnw na lè wee bee félege si kɔ́ too wi na.

⁷ Ki n wɔ́ɔ̀ yɛlɛ kàfugi syɛ̀ɛnnɛ í da wi mɛ́ɛtaangi yiri jàngó faʔara a kɔ́ too wi na wi kɔ́ cò Dàzɔɔnw karinyanga na í.

Dyakiribèle

⁸ Kánmi bee na dyakiribèle wɔ́ɔ̀ yɛlɛ paa síngi paa táanri, ki n yɛlɛ paa còʔoró syɛɛnjóotɛɛyi siin joolo na, ní dùvɛɛn-gbaabeegi, ní tɔ̀nɔpeew myɛ na,

⁹ pé tágali kalarala cò ní funviire ní.

¹⁰ Ki si n yɛlɛ pe be sɛʔɛ wéle gbɛnʔɛnɛ, pe ga be nyaa tɛɛpùunugo fun, pe a náa ra fáliw kpéʔele.

¹¹ Kánmi bee na cébèle wɔ́ɔ̀ yɛlɛ paa síngi paa táanri, ki ga yɛlɛ be pye mɛ́ɛkalagibéle í, fwɔɔ be peyɛɛ cǒmi cán, si pye tágala syɛɛnnɛ kérigèle myɛ ni.

¹² Dyakiribèle n yɛlɛ be pye càbala nibin nibin fɔ̀ɔlɔ, páā be pìíbèle ní be tiimaa kpáayi sámagi da kàragí.

¹³ Níì cán bele be falicaɔn kpéʔele lè, bele bee i kpɔɔmɔ, ní nànzorodo taagi àmɛɛ be tága lè Kirisi Zyezu na.

Kalaragbɔ́ɔli

¹⁴ Mii i syɛ́ɛnri naa sɛ́bɛ bi tórigo mɔ ma ní i sɔ̀ngí cɛɛri ga pye mii í kári yaà mɔ ma.

¹⁵ Koro ga pye mii ga mɔn naa yoo, mɔ í gi cán, gee syɔɔn yɛlɛ wi kpéʔele lè Kolocɔlɔɔ kpáagi ni, ki lè Kolocɔlɔɔ Woweew Egilizi, wi lè kányɛɛgi tiipɔlɔ ní gi kàpɔɔnw.

¹⁶ Kolocɔlɔɔ yɛ́ɛgi fyáara kalarala n kpɔ́ʔɔ gbanʔama, kàkabalaga o nyɛ gi ni í, wi maa wiyɛɛ dɛ̀ɛn syɔɔn, wi maa tànʔa taa Pìicǎnni báriga ni, nyɛ̀ʔɛni tundunbéle maa wi nyaa, syɛ́ɛnbèle pèle maa sa ni wi kéeli nyuu syɛɛnfeleyaa nínge ni, pèle maa tága wi na dulunyanw ni, Kolocɔlɔɔ maa wi yìrige n lúrugo ǹjogi ni nìjangbɔɔri tɛ́ʔɛ ma.