1 Timɔte 2 - Cebaara Bible 2010

Tamana nyɛ́ɛrigi kéele na

¹ Gee gi nyɛ mii ma lè bi joo wozeligi, koro gi nyɛ syɔɔn í da Kolocɔlɔɔ nyɛ́ɛri, sáā wi kpɔ̀ʔɔrɔ́, sáā nyɛ́ɛri syɛ́ɛnbèle myɛ kéele na, si wɔ́ɔ ra bariga kaangi wi ma pe myɛ kéele na,

² gee bee í pye fànʔafɔbèle ní syɛɛnkpolobèle myɛ kéele na koro ga pye wolo si kòro ŋɔ́ndaala ní yɛɛ̀nyinge na, sáā fɛ̀ɛgí Kolocɔlɔɔ na, si wɔ́ɔ ra kasingèle myɛ kpéʔele.

³ Gee bee n nyɔɔ wolo Syɔɔfɔw Kolocɔlɔɔ ma, níì wi dɛ́nɛ.

⁴ Wi i caa syɛ́ɛnbèle myɛ í syɔɔ, si kányɛɛgi myɛ cán.

⁵ Níì cán Kolocɔlɔɔ nibin wi yaà, kùsuluo nibin si wɔ́ɔ i yaà Kolocɔlɔɔ ní syɛ́ɛnbèle nínge ni, wi i nyɛ syɔɔn, woro wi nyɛ Kirisi Zyezu,

⁶ wee wi wiyɛɛ gaan lè syɛ́ɛnbèle myɛ nyùnzyɔɔrɔ kéele na, séeraw bee n kpéʔele làrijǎnni ni.

⁷ Gee bee na Kolocɔlɔɔ mii télege mii í pye wi kanyaajooo, ní wi pìituɔn mii i kányɛɛgi nyuu, mii o finɛ í, mii i nyɛ syɛɛnfeleyi wozanya tamafɔlɔ tágali, ní kányɛɛgi ni.

⁸ Koro na mii caa nǎnbèle í da Kolocɔlɔɔ nyɛ́ɛri tɛ́ɛyi myɛ ni, páā fɔɔnrɔ fun kɔ́yi yìrigí fundanʔara, ní kàkabalaga fun.

⁹ Kánmi bee na cébèle wɔ́ɔ̀ yɛlɛ paa peyɛɛ vèré ní fànibèle ní kɔ̀rɔsíi na, sáā gee bee kpéʔele ní fɛ̀ɛrɛ, ní màama ní, pe a kɔ́ ra peyɛɛ vèré ní nyùnbwɔɔfeleraa ní í, wàlá tɛ́ɛw lele yoo, lɔgbanri kɔ́nɔtiriye yoo, lɔgbanri fànibēle yoo,

¹⁰ fwɔɔ kacànbyeri di yɛlɛ bi pye be fèredi, gee bee gi yɛlɛ cébèle í da kpéʔele, poro bele be jo lè pe i fɛ̀ɛgí Kolocɔlɔɔ na.

¹¹ Ki n yɛlɛ cɔlɔɔ í da tamani lúro pyèrio, sáā lúro tamafɔbèle ma kányɛʔɛ ni.

¹² Mii a fɔ̀lɔ cɔlɔɔ í da nàɔn tama í, koro ga jáa wi pye nàɔn nyúngo na í, fwɔɔ wi kòro pyèrio.

¹³ Níì cán Adami be sélì faan, ní náà Ɛvi faan.

¹⁴ Adami si ban Sutanaw da fáana n pùuni í, céw wi da fáana n pùuni a wi Kolocɔlɔɔ kajooli kálagi.

¹⁵ Koro ní ki myɛ ní cɔlɔɔ a syɔɔ pìiseeri báriga ni, ní wi ga tɛ́nɛ̀ kòro tágali, ní tàmagi ni, ní wɔ́ɔ̀ kòro funviire na, ní i màama kpéʔele.