1 Timɔte 1 - Cebaara Bible 2010

Fòów kéele

¹ Mii Pɔli i nyɛ Kirisi Zyezu pìituɔn n yɛlɛ ní tundunri ní dee wolo Syɔɔfɔw Kolocɔlɔɔ ní Kirisi Zyezu kaan mii ma lè, woro wee wi lè wolo sɔ̀ngumi tɛɛtaʔaga.

² Mii a sɛ́bɛw naa tórigo mɔ ma, Timɔte, mɔ wi lè mii pìiseew tágali ni, ki n yɛlɛ Tofɔw Kolocɔlɔɔ ní wolo Kàfɔw Kirisi Zyezu í kpɔ́ʔɔri, ní nyínimi, ní fûnnyingi kaan mɔ ma.

Bàā kɔ̀rɔsíi jànvaa tamagèle na

³ Amɛɛ mii da mɔ nyɛ́ɛri lè mii làrigárili ni Maseduwani ma níì jo mɔ í kòro Efɛzi ni, ki n yɛlɛ mɔ í kòro yaà, koro ga pye bele be syɛ́ɛnbèle tama lè tamalaa nikwɔɔ na, mɔ í da gi nyuu da gbàngí bele bee ma si be pye pe a ní kɔ́ ra gee bee kpéʔele í,

⁴ pe si a wɔ́ɔ kɔ́ taʔa tanlɛɛyi ní narigbaayi sélimɛ na í bi lè láʔala fun, níì cán kérigèle bee félege i kàkabalayi yìrigí, níì Kolocɔlɔɔ fáliw kaan wi o syée yɛʔɛ ma tágali báriga ni í.

⁵ Joogbanni naa nyúngo i nyɛ tàmagi, gee gi yìri lè zɔ̀njǎnw, ní funviiri, ní tágadeeli ma.

⁶ Syɛ́ɛnbèle pèle n pùuni kérigèle bee ni, níì kòro nyùngo fun syɛ́ɛnri na ni nyuu.

⁷ Pe i caa bàā syɛ́ɛnbèle tama Mowizi làlwaw na, bi si gi taa dee be nyuu lè, ní gee be joo poro n fílige n cán lè, pe ga dee bee kɔ́rɔ cán í.

⁸ Wolo n gi cán ncan Mowizi làlwaw n nyɔɔ, ní syɔɔn ga ni wi táanri wi tánʔaganmi na,

⁹ àmɛɛ wo gi cán lè ncan làlwaw ga tɛ́ʔɛ syɛɛnsiɔn kéele na í, fwɔɔ kakolobyebèle, ní syɛɛnjamabèle, ní Kolocɔlɔɔ yɛ́ʔɛnaa-sìnvyaabèle, ní kapeebyebèle, ní Kolocɔlɔɔ céefɔbèle, ní Kolocɔlɔɔ kólogi yaʔafɔɔlɔ, ní bele pe be seefɔbèle kúu lè, ní syɛɛnkpoobèle,

¹⁰ ní cecaabèle, ní nànjaabèle, ní nànjaananbèle, ní bele be syɛ́ɛnbèle yúu ni pára lè, ní jànvaafɔbèle, ní bele be kɛ̀ɛ́ lè jànvaaw na, ní kérigèle myɛ ní gele ke a gbǎn tamajanni kábala lè.

¹¹ Tamajanni bee n yɛlɛ ní nìjanri syɛɛnjóocànra ní, ti nyɛ lè dùbaw Kolocɔlɔɔ wóri, dee wi kàlifáa mii ma lè.

Bariga kaanna Kolocɔlɔɔ funjǎngi kéele na

¹² Mii i bariga kaangi wolo Kàfɔw Kirisi Zyezu ma, woro wee wi fǎngi kaangi mii ma lè níì mii córo tágala syɔ́ɔn, níì mii lége wi fáliw ni,

¹³ mii wee wi pye lè Kolocɔlɔɔ mɛ́ɛkalagiɔ booma ni, níì pye syɛɛnwɔʔɔɔ, ní wɔ́ɔ̀ pye kateerefɔlɔ. Kàjáa Kolocɔlɔɔ n nyinimɛ taa mii na, níì cán mii maa ni gee bee kpéʔele kateemɛ na mii sìndagali làla ni.

¹⁴ Wolo Kàfɔw n tɔ̀nɔ n kpɔʔɔrɔ kaan mii ma saʔa, n fàra tágali, ní tàmagi na, dee wo taagi lè Kirisi Zyezu ni.

¹⁵ Syɛ́ɛnri naa mii a joo lè ti i nyɛ kányɛʔɛ syɛ́ɛnrɛ, syɛ́ɛnbèle myɛ n yɛlɛ pe di cò, toro di nyɛ Kirisi Zyezu n pan dulunyanw ni bi ba kapeebyebèle syɔɔ, mii si wi nyɛ pe myɛ yɛ́ʔɛ na kapeebyeri ni.

¹⁶ Kàjáa wi n nyinimɛ taa mii na, koro ga pye mii wee wi nyɛ lè pe myɛ yɛ́ʔɛ na kapeebyeri ni, mii kéeli í pye fɛ̀ɛ jàngó bele pe a tága lè Zyezu Kirisi na bi sìibangwɔɔw taa lè, bele bee í gi cán wi kpàracogi n nɛʔɛ.

¹⁷ Bàngwɔɔ Fànʔafɔw, woro wee wi nyɛ lè wi a kùu bi nyaa í, syɔɔn si o wi nyaagi í, woro nibin wi lè Kolocɔlɔɔ, woro na kpɔ̀ʔɔrɔli ní nìjangbɔɔri yɛlɛ làla o làla! Amiina!

¹⁸ Mii pìíw Timɔte, mii n tundunri naa kàlifáa mɔ ma n yɛlɛ ní syɛ́ɛnri ní dee pe da sélì joo mɔ kéeli na lè, koro ga pye mɔ í da kapɛɛnjǎnni kpúmɔn ti bárigaw ni,

¹⁹ mí tágali cò ní funviire ní. Syɛ́ɛnbèle pèle n funviiri bee cée níì pùuni tágali kàbaan na, mɔ a jo àmɛɛ kɔ́rɔ gáà kéle lɔ̀ʔɔ ni lè.

²⁰ Poro pèle be nyɛ Himene ní Alɛkisandiri, mii si n be kaan Sutanaw ma koro ga pye gee bee í pye be ma tamana pe gi cán ki ga yɛlɛ poro í da Kolocɔlɔɔ mɛ́ɛgi kálagi í.