1 Fànʔafɔbèle 9 - Cebaara Bible 2010

Yawe n wiyɛɛ dɛ̀ɛn Salomɔn na tɔziin

¹ Lǎli ni Salomɔn kwɔ́ɔ lè Yawe kpáagi faanna na, ní fànʔafɔw kpaʔa faanna, ní yáriri myɛ faanna na, dee wi da ni tímana bi faan lè,

² a Yawe níì wiyɛɛ dɛ̀ɛn Salomɔn na tɔziin àmɛɛ wi da wiyɛɛ dɛ̀ɛn wi na Gabaɔn ma lè.

³ A Yawe wi pye: «Mii n mɔ nyɛ́ɛrigi ní mɔ nyɛ́ɛrigbɔɔgi lóʔo. Kpáagi naa mɔ faan lè, mii n gi yaʔa kɔlɔ̀ na niyɛɛ ma, koro gee na mɔ mii mɛ́ɛgi taʔa lè gi kòro gi na làla o làla. Mii nyɛ́nɛ ní mii fúngi a pye gi na làla o làla.

⁴ Mɔ si na, mɔ ga ni táanri mii yɛ́ʔɛ ma funviire ní sínnɛ na àmɛɛ mɔ tóow Davidi da ni táanri lè, ní i gi kpéʔele, gee myɛ mii joo n gbàn mɔ ma lè, mɔ ga mii làlwaw kèlē ní mii kajoodɛɛngèle sámaga n cò,

⁵ mii a mɔ fangoli télege Isirayɛli ni li kòro beè làla o làla bi yɛlɛ ní gi ní àmɛɛ mii da gi joo lè mɔ tóow Davidi ma níì jo: ‹Mɔ a tée fɔ̀n syɔɔn ni, wee wi a tɛ́ɛn Isirayɛli fàngoli na mɔ sindɛɛgi ni lè í.›

⁶ Kàjáa yele ga gi kɔ̀rirɔ n lúru mii kurugo, yele ní yele pìíbèle ní, yele ga pye yele ga mii kajoodɛɛngèle ní mii làlwaw kèlē sámaga n cò í, koro gele mii tɛ́ʔɛ yele yɛ́ʔɛ ma lè, yele ga wàli n kári n sa ni báara kolocɔlɔbèle pèle nikwɔɔlɔ ma ní i tíri ni tuun pe yɛʔɛ̀ ma,

⁷ mii a Isirayɛli ye kwɔ́ɔ láʔa tásaligi na mii kaan be ma lè. Kpáagee mii yaʔa kɔlɔ̀ na niyɛɛ mɛ́ɛgi na lè, mii a gee bee núngo niyɛɛ taana bi wáa léelige. Isirayɛli a pye kàseele yáriga, ní yafaʔala,

⁸ Kpáagi naa gi sámaga n pye lè gee ǹjoʔo ma, bele pe a ba ra sɔ̀lɔ́ gi taana lè, pe a ra káama sáā féfeegèle wíi, sáā gi nyuu si jo: ‹Nyàʔá na Yawe gee naa kpéʔele tári naa, ní kpáagi naa na?›

⁹ Pe a be yari: ‹Koro n kpéʔele níì cán pe n baa Yawe be Kolocɔlɔw yaʔa, woro wee wi be toolɛɛbèle yirige Ezyipiti tári ni lè. Pe n baa peyɛɛ daʔa kolocɔlɔbèle pèle nikwɔɔ na ní i tíri ni tuun pe yɛʔɛ̀ ma. Koro na Yawe wɔʔɔgi bee myɛ cáan be na.› »

Salomɔn kapyegèle kèle

¹⁰ Kpáayi siin yi lè Yawe kpáagi, ní fànʔafɔw kpaʔa, Salomɔn n yi faan n kwɔ́ɔ yɛ̀ʔɛlɛ toko fúngo ni.

¹¹ Amɛɛ Tiiri fànʔafɔw Hirami da sɛdiri tíiri, ní siipirɛ tíiri, ní tɛ́ɛw kaan Salomɔn ma n yɛlɛ ní dee ní wi da ni caa lè, a fànʔafɔw Salomɔn Galile tári kèyaa toko kaan Hirami ma.

¹² A Hirami yiri Tiiri ni bi kári sa kěyi wéle, yee Salomɔn kaan woro ma lè. Kàjáa yi da wi dɛ́nɛ í.

¹³ A wi jo: «Kèyìí félege mɔ kaan mii ma yee ni senyɛnnɛ?» A wi i yi yiri, Kabuli Tári. Anbée be yi yiri fwɔɔ n baa nan níjanʔa na.

¹⁴ Hirami maa tɛɛ̀ tɔ́nibéle taanri ní tíla tórigo fànʔafɔw ma.

¹⁵ Pɔ́rɔtɔɔri fáli na fànʔafɔw Salomɔn da syɛ́ɛnbèle kɔ́ri n cáan lè, woro wi nyɛ wee naa. Wi n be kɔ́ri a be Yawe kpáagi ní woro tiimaa kpáagi faan, ní Milo, ní Zyerusalɛmi tǒw, ní Hasɔɔri, ní Megido n fàra Gezɛɛri na.

¹⁶ Faraɔnw, gee bee n jo Ezyipiti fànʔafɔw, woro maa kári n sáà too Gezɛɛri na n gi jáa níì gi sórigo. Kanaan ye be pye wodɛ́ɛnbéle ní kěgi ni lè a wi poro kpóo, níì gi kaan wi pìíw ma wi pye lè Salomɔn céw, gi pye cèpɔrigi yakanʔa.

¹⁷ A Salomɔn Gezɛɛri ní táàma Bɛti-Horɔn faan,

¹⁸ n fàra Baalati ní Tadimɔri na fìími tára ni, tári ni,

¹⁹ ní kěyee myɛ yi pye lè Salomɔn kɔlɔ̀ yáriri tɛɛkɔnyɔ keye n fàra kapɛɛnkpumɔn-wòtorobèle tɛɛ̀tɛʔɛyɛ keye, ní wi syɔ́ɔnyi tɛɛkòroyo kèye na, n náà fàra yariga o yariga na Salomɔn da ni caa bi faan lè Zyerusalɛmi ni, ní Liban, ní tári myɛ ni, dee wi da ni kàragí lè.

²⁰ Bele myɛ pe da kòro lè, Amɔri ye, ní Hɛti ye, ní Perezi ye, ní Hɛvi ye ni n fàra Yebusi ye na, gee bee n jo bele myɛ be lè pe o nyɛ Isirayɛli syɛ̀ɛnnɛ í,

²¹ poro bele yòdaʔaya yi da kòro lè tári ni pe kàdoʔo ma, níì cán Isirayɛli da gbàn n be kálagi n kwɔ́ɔ péw í, a Salomɔn bele bee pèle kɔ́ri, a be pye pɔrɔtɔɔri fáli púlobéle fwɔɔ n baa nan níjanʔa na.

²² Kàjáa Salomɔn da Isirayɛli syɔ́ɔnwaa faala kpéʔele puloo í. Níì cán pe maa pye kapɛɛnkpumɔn-nànbēle, ní wi falipyebèlē, ní wi kùndigibéle, ní wi kapɛɛnkpumɔn-wòtorofanbēle, ní wi kapɛɛnkpumɔn-wòtorobèle kùndigibéle.

²³ Salomɔn fáliw kùndigi-kpolobéle maa pye saala siin ní togoye kɔrɔsiin ní kpɔrigɔ. A bele bee i fǎngi kpéʔele syɛ́ɛnbèle na be pye fáliw na lè.

²⁴ A Faraɔnw jáa yiri Davidi kěgi ni n kári wi kpáagi ma, gee Salomɔn da faan wi ma lè. Lǎli bee ni Salomɔn Milo faan.

²⁵ A Salomɔn i sáriga-sórigoo, ní pínɛnyɛnnɛgɛ sáriga wóo tɔlɔyɔ taanri yɛ́ɛli fúngo ni sáriga-wòlo-yafaangi na wi da faan Yawe ma lè, ní i nùndaanni yárira sórogi gee na ki da pye Yawe yɛ́ʔɛ ma lè àmɛɛ wi kwɔ́ɔ kpáagi faanna na lè.

²⁶ A fànʔafɔw Salomɔn bàtobéle sámaga Esyɔn-Gebɛɛri ma, Eyilati taana Nyɛ́nɛri solomɔ lɔ́ʔɔ nyɔ́ɔ na Edɔmi tári ni.

²⁷ A Hirami wi tiimaa falipyebèle tórigo bàtobèle bee ni Salomɔn falipyebèle kurugo. Pe n pye bàto-falipyebèlē bele be sólomi lɔ̀ʔɔ cán lè.

²⁸ A be kári Ofiiri ma n sáà tɛɛ̀ tɔ́nibéle kɛɛ ní siin láa yaà beè n pan fànʔafɔw Salomɔn ma.