1 Fànʔafɔbèle 7 - Cebaara Bible 2010

Fànʔafɔ-gbaagi faanna kéele

¹ Salomɔn si n wiyɛɛ kpáagi faan yɛ̀ʔɛlɛ kɛɛ ní taanri fúngo ni n gi myɛ kwɔ́ɔ péw.

² Wi n Liban-kɔligi-kpaʔa faan gbɛ́nʔɛnɛ. Ki tɔnɔganmi maa pye mɛ́tiribéle togoye siin ní kpɔrigɔ, ki yɛ́ɛgi kpɔ́ʔɔganma si i nyɛ mɛ́tiribéle toko ní kagunɔ, ki ǹjogi tɔnɔganma si i nyɛ mɛ́tiribéle kɛɛ ní kagunɔ, á gi taʔa sɛdiri tíire gaangéle kóloyo sicɛrɛ na. Sɛdiri tíingéle maa pye gàángèle na.

³ Pe maa gi tɔ́n ní sɛdiri tíire ní dee di pye lè tiikpakpaayi na yi pye lè gàángèle ǹjoʔo ni, yi n pye togoye siin ní kagunɔ. Kologo o kologo n pye kɛɛ ní kagunɔ.

⁴ Fɛ̀nɛtiribéle koloyo taanri maa pye gi na n sín ní peyɛɛ ní. Nyɔ̌nlaagéle taanri ge pye pe ní peyɛɛ nínyi ni.

⁵ Kɔ̀riyi myɛ, ní kɔriteliyi myɛ maa sámaga n yɛlɛ ní jɛ̀ɛ́ngèle tíiye sicɛrɛ tɔnɔganma ní. Yi fɛnɛtiribèle si i nyɛ peyɛɛ zǐnmi na koloyo taanri.

⁶ A wi gàángéle nikpanʔa sámaga, ki tɔnɔganmi maa pye mɛ́tiribéle toko ní kagunɔ, ki yɛ́ɛgi kpɔ́ʔɔganma si i nyɛ mɛ́tiribéle kɛɛ ní kagunɔ. Gàángèle ní nìkpaangaa si i nyɛ yɛʔɛ̀ ma n fàra tinbadɔʔɔlɔ na.

⁷ A wi nìkpaangaa sámaga fàngoli kéele na, ni kútiiw nyuu yaà beè, a koro pye wi kútiijoo-tɛ́ɛgi nìkpanʔa. Wi maa sɛdiri tíire tɛ́ʔɛ n gi tɔ́n n séli kpaadaali na fwɔɔ n sáà nan láʔali na.

⁸ Kpáagee ni si wi da pye lè, koro maa faan kanijanmi na kadàalaa nikwɔɔ na, nìkpaangi kàdoʔo ma. A Salomɔn kpaagaa nikwɔɔ sámaga nìkpaangi bee sámagaganma na Faraɔnw jáa ma wi da láa lè wi cɔɔ̀.

⁹ Pe maa gee bee myɛ kpéʔele ní kàdɛnɛgbolo-cànya ní, yee yi pye lè tímanama na. Pe maa yi cɛnɛ ní síi ní fungo ma, ní kàdoʔo ma, nlaa yaà kàpɔɔnw na fwɔɔ n sáà nan gungabiri na, ní níì láa kàfugo ma n sáà nan kàcookpɔɔli na.

¹⁰ Kàpɔɔnbèle maa pye kàdɛnɛgbolo-cànya wòolo. Yi tɔnɔganmi maa pye mɛ́tiribéle kagunɔ kagunɔ, ní sicɛrɛ-jɛrɛ.

¹¹ Kàdɛnɛgbolo-cànya maa níì pye yaà ǹjogi ni, yee yi pye lè tímanama na n fàra sɛdiri tíire na.

¹² Kàcookpɔɔli myɛ maa faan n sùlu ní kàdɛnɛgboloyo kóloyo taanri ní n fàra sɛdiri tíingéle kólogo nibin na, àmɛɛ Yawe kpáagi fungoma kàcoolo nyɛ lè ní àmɛɛ kpáagi nìkpanʔa nyɛ lè.

Fáliw wi kàlifáa Hirami ma lè

¹³ A fànʔafɔw Salomɔn tun Tiiri ma pe sa Hirami yeri paa maa.

¹⁴ Nɛfitalii syɛɛnfelegi lɔgucewaa pyà wi pye, wi tóow si i nyɛ Tiiri ye wóo. Wi maa kanyɛɛnri fáli cán. Sícilimi, ní cánni, ní kérigèle cánna maa wi nyìn n foro jàngó waa kanyɛɛnri fáli féleye myɛ kpéʔele. A wi kári fànʔafɔw Salomɔn ma n sáà wi fáliw myɛ kpéʔele.

Kanyɛɛnri gàángéle kéele

¹⁵ A wi kanyɛɛnrɛ gàángéle siin sámaga, li làa nibin tɔnɔganma n pye mɛ́tiribéle kpanjɛrɛ, li màʔa-mí-kpàraw si i nyɛ mɛɛnnɛ mɛ́tiribéle kɔrɔni.

¹⁶ A wi kanyɛɛnrɛ gbàla n tɛ́ʔɛ n yataʔaya siin faan n taʔa gàángèle ǹjoyo ni. Yataʔagi wozelige njoʔo tɔnɔganma maa pye mɛ́tiribéle siin ní tíla, a yataʔasiin wógi ǹjoʔo tɔnɔganma pye mɛ́tiribéle siin ní tíla.

¹⁷ A wi cɔ̀ɔwaa félege, ní mɛɛpiire nyɔʔɔdirigéle sámaga yataʔayi kéele na yi pye lè gàángèle ǹjoyo ni. Kɔrɔsiin n pye yataʔazeligi kéele na, a kɔrɔsiin pye yataʔasiin wógi kéele na.

¹⁸ A wi girenadi niwiriye koloyo siin pye cɔ̀ɔwaa nibin na n wi màʔa n kpàra, yataʔagi gi pye gàánni ǹjoʔo ni lè bi koro tɔ́n, a wi koro wonijangi kpéʔele gàánsiin wóli na.

¹⁹ Yataʔayi yi pye lè gàángèle ǹjoyo ni ge pye lè nìkpaangi ni, yi maa fílɛɛri wíri yi tɔnɔganmi si i nyɛ mɛ́tiribéle siin-ziin.

²⁰ Yataʔayi yi pye gàángèle siin njoyo ni lè girenadi niwiriye sirakele maa yi màʔa n kpàra ǹjogi ni n sígi tɛɛkpɔnʔɔnɔgi na cɔ̀ɔ́w màʔama na, a girenadi niwiriye sirakele kólogo wɔ́ɔ̀ yataʔasiin wógi màʔa n kpàra.

²¹ A wi gàángèle yérige kpɔ̀ʔɔrɔli kpaʔa nìkpanʔa yɛ́ʔɛ ma. Wi maa gàánnaa yérige kàliige ma, ní i loro yiri Yakɛn, níì gàánnee yérige kàmɔnɔ ma ní i loro yiri Bowazi.

²² Nyàáfyɛɛnrɛ niwiriye maa pye gàángèle ǹjoyo ni. Kánmi bee na gàángèle fáli kpéʔele n kwɔ́ɔ.

Kanyɛɛnri pɛɛkpɔʔɔ kéele

²³ A wi kanyɛɛnraa gbàla n tɛ́ʔɛ n pɛɛkpɔʔɔ faan. Ki nyɔ́ɔgi kpɔ́ʔɔganma maa pye mɛ́tiribéle kagunɔ. Ki maa pye círiri, ki ǹjoʔo ma tɔnɔganmi si i nyɛ mɛ́tiribéle siin ní tíla, ki màʔa-mí-kpàraw si i nyɛ mɛɛnnɛ mɛ́tiribéle kɛɛ ní kagunɔ.

²⁴ Pe maa kolokɛnti niwiriye pye ki nyɔɔwari láara ni n gi màʔa. Mɛ́tirinyɛnnɛ o mɛ́tirinyɛnnɛ maa pye kolokɛntibéle toko n pɛ́ɛgi màʔa. Yi n pye kolokɛnti kóloyo siin, á pe be sámaga n pínɛ ní pɛ́ɛgi ní.

²⁵ Pe maa gi taʔa kanyɛɛnrɛ náapɛʔɛlɛ kɛɛ ní siin na. Taanri maa yɛ́ɛyi wáa solomɔkulo kàbangi na, á taanri yɛ́ɛyi wáa canʔajeemɛ kabangi na, á kèle taanri yɛ́ɛyi wáa wòrogulo kàbangi na, á gele taanri yɛ́ɛyi wáa canʔafolomɔ kabangi na, á pɛ́ɛgi tɛ́ɛn ge na, á ge kadooyi wáa keyɛɛ ma.

²⁶ Ki nyɔɔwari líbeganma maa pye kadaala yɛ́ʔɛ kpɔ́ʔɔganma. Ki nyɔ́ɔgi maa càli àmɛɛ tásaʔa wóʔo nyɛ lè, níì pye àmɛɛ fílɛɛri nyɛ lè. Lítiribéle sirakamayɛ sicɛrɛ félege pe da ni gi nyìngí.

Yataʔayi yi lè kanyɛɛnri wóyo

²⁷ A wi yataʔaya kɛɛ sámaga kanyɛɛnrɛ wóyo. Yataʔayi myɛ nibin nibin tɔnɔganma maa pye mɛ́tiribéle siin-ziin, a yi yɛ́ɛyi kpóloganmi i nyɛ mɛ́tiribéle siin-ziin, yi ǹjogi tɔnɔganma si i nyɛ mɛ́tiribéle nibin nibin ní tíla.

²⁸ Wéle, kánmee na yataʔayi bee sámagaganma da pye lè. Yi maa sámaga wovabi-fabiya ní, á yafabi-fabiyi jée tɛɛsɔʔɔlɔyi ni.

²⁹ Pe maa càarabēle, ní náapɛʔɛlɛ, ní syerubɛnbéle niwiriye sámaga yafabi-fabiyi na yi da jée yiyɛɛ ni lè tɛɛsɔʔɔlɔyi ni. Càarabèle ní náapegèle ge pye lè yasɔʔɔlɔyi na, fèrere maa pye ni yaagi ke ǹjoʔo ma, ní táàma.

³⁰ Yataʔayi myɛ nibin nibin maa pye ní kanyɛɛnrɛ sàkoyo sicɛrɛ-jɛrɛ ní n fàra yáriyee na be sàkoyi le lè. Yacoyo n pye jɛ̀ɛ́ngèle sicɛrɛ na, yacoyi n pye tunmɔgbalara wóyo, pɛ́ɛgi láara ferere yárira maʔama na.

³¹ Weʔe maa pye pɛ́ɛgi na gi fungo ma, gee tɔnɔganma pi da pye lè mɛ́tiri tíla n wáa ǹjoʔo ma. Wéegi bee maa pye círiri n yɛlɛ ní fáliw bee félege pyeganma ní. Ki yɛ́ɛgi kpɔ́ʔɔganma maa pye santimɛtiribéle togoye taanri ní kpɔrigɔ ní kagunɔ. Pe maa wɔ́ɔ̀ nyɔ́nɔgɔrɔ kánʔana n wòlo wéegi bee nyɔ́ɔ na. Yafabi-fabiyi lɛ̀ʔɛgēle tɔnɔganma maa pye sèjira, yi da pye círiri í.

³² Sàkoyi sicɛrɛ maa pye yafabi-fabiyi láara ni. Yáriyee na sàkoyi nyɛ lè, pe maa yoro táriga yataʔagi na. Sàkogo o sàkogo ǹjoʔoma tɔnɔganmi maa pye santimɛtiribéle togoye taanri ní kpɔrigɔ ní kagunɔ.

³³ Sàkoyi maa pye àmɛɛ wòtoro sàkoyo nyɛ lè. Yi lakisibèle, ní yi zándiibèle, ní yi ɛrɛnyɔnbèle, ní yi mayobèle myɛ maa sámaga ní tunmɔgbalara ní.

³⁴ Yacoyo n pye yataʔaga o yataʔaga jɛ̀ɛ́ngéle sicɛrɛ na, yee yi sámaga n pínɛ ní yataʔagi ní lè.

³⁵ Tɛɛgaa maa pye yaà círiri yataʔagi ǹjoʔo ma, gee ǹjoʔoma tɔnɔganma bi pye lè santimɛtiribéle toko ní kagunɔ. Pe maa yataʔagi ǹjoʔoma tɛɛsɔʔɔlɔgéle, ní gi yafabi-fabiyi báara n pínɛ.

³⁶ A wi syerubɛnbéle niwiriye ní càarabēle, ní sɛʔɛwara niwiriye kánʔana n wòlo tɛɛsɔʔɔlɔgèle yafabi-fabigèlē, ní yafabi-fabiyee na n yɛlɛ ní lariwaayi kánma ní, n fàra fèrere na dee wi tɛ́ʔɛ n gi màʔa lè.

³⁷ Kánmi bee na wi yataʔayi kɛɛ sámaga ní tunmɔgbalari wonijanra ní, a yi tímanaganmi ní yi kánmi pye sèjira.

³⁸ A wi kanyɛɛnrɛ pɛ́ɛyɛ kɛɛ sámaga. Lítiribéle saala kɔrɔtaanri-daanri pe da ni pɛ́ɛyi myɛ nibin nibin nyìngí. Pɛ́ɛyi myɛ maa pye mɛ́tiribéle siin-ziin. Yataʔayi kɛɛ ni kàa o kàa maa pye ní gi pɛʔɛ̀!

³⁹ A wi yataʔaya kagunɔ tɛ́ʔɛ kpáagi kàliige ma níì yataʔayaa kagunɔ tɛ́ʔɛ kpáagi kàmɔnɔ ma. Wi si maa pɛɛkpɔɔgi tɛ́ʔɛ kpáagi kàliige ma canʔafolomɔ worogulo kàbangi na.

Kanyɛɛnri ní tɛ́ɛw yárira tɛɛnnɛ kéele

⁴⁰ A Hirami pɛ́ɛyi ní cɔ́ɔngi yakoliyo sámaga n fàra nyari-nyarili pɛ́ɛgéle na. A Hirami fáliw myɛ kpéʔele n kwɔ́ɔ, wee fànʔafɔw Salomɔn da jo wi kpéʔele lè Yawe kpáagi ni. Woro wi nyɛ wee naa:

⁴¹ Gàángèle siin ní ǹjogi yataʔaya siin yi pye lè gàángèle ǹjoyo ni, ní cɔ̀ɔ́bèle siin be pye lè jàngó bi ǹjogi yataʔaya tɛɛcabaraya siin tɔ́n gàángèle ǹjoyo ni.

⁴² Ní girenadiw niwiriye saala siinw wi lè cɔ̀ɔ́bèle siin kéele na. Girenadiw niwiriye kóloyo siin-ziin maa pye cɔ̀ɔ́bèle myɛ nibin nibin kéele na, bele pe da pye lè gàángèle ǹjoyo yataʔaya tɛɛcabaraya tɔ́nnɔ kéele na,

⁴³ ní yataʔayi kɛɛ, ní pɛ́ɛyi kɛɛ yi pye lè yataʔayi na,

⁴⁴ ní pɛɛkpɔɔgi ní, n fàra náapegèle kɛɛ ní siin na ge pye lè pɛɛkpɔɔgi láara ni,

⁴⁵ ní nɛ̀ʔɛdaʔayi ní, n fàra cɔ́ɔngi yakoliyo, ní nyari-nyarili pɛ́ɛgéle na. A Hirami yáriri bee myɛ kpéʔele n kwɔ́ɔ ní kanyɛɛnrɛ ní, dee di wɔlɔgɔ lè, dee fànʔafɔw Salomɔn da jo wi kpéʔele lè Yawe kpáagi ni.

⁴⁶ Zyuridɛnw tɛɛfiige na fànʔafɔw da be pye a be di gbàla tágunw tɛ́ʔɛ ni Sukɔti ní Saritan níngi ni.

⁴⁷ A Salomɔn sáà gi yaʔa a yáriri bee myɛ sámaga kanyɛɛnri cúlo nyɔ́ɔ sìnjoro ni àmɛɛ ti da nɛʔɛ n sɔ̀lɔ lè.

⁴⁸ A Salomɔn wɔ́ɔ̀ Yawe kpáagi fúngo yáriree myɛ sámaga Yawe kpáagi kéele na, ti lè tɛ́ɛw sáriga-wòlo-yafanʔa ní tɛ́ɛw tàbali, wee na pe da ni búruw taari, wee be kaan Kolocɔlɔɔ ma lè,

⁴⁹ ní tɛɛtelew fètindaʔagèlē, kèle kagunɔ n pye kàliige ma, gele kagunɔ si i nyɛ kàmɔnɔ ma tɛɛcàndelegi yɛ́ʔɛ ma n fàra tɛɛ̀ yáriree na di lè fílɛɛriw niwiriye, ní fètingèle, ní fètinle-yáriri,

⁵⁰ ní tásaayi, ní ŋɔ́gèle, ní nyari-nyarili pɛ́ɛgéle, ní yagbaagèle, ní nùndaanni yasorigoro yalegéle, toro myɛ n pye tɛɛteleo wóro n fàra kpáagi fungoma kɔ̀riyɔ tɛɛ̀ sarinyɛɛribéle na, yoro yee yi pye lè tɛɛcàndelegi tɛɛ̀jeele na, ní kpáagi gi pye lè kpɔ̀ʔɔrɔli kpaʔa tɛɛ̀jeele na, koro kɔ̀riyi wòolo.

⁵¹ Kánmi bee na fáliw myɛ kwɔ́ɔ, wee fànʔafɔw Salomɔn da ni kpéʔele Yawe kpáagi kéele na lè. A Salomɔn pan ní yáriri ní, dee wi tóow Davidi da kaan Kolocɔlɔɔ ma lè n baa tɛ́ʔɛ Yawe kpáagi ni, lɔ́ri tɛɛkɔngɔ ni, ti pye lè wálifiiw, ní tɛ́ɛw n fàra yasanri na.