1 Fànʔafɔbèle 6 - Cebaara Bible 2010

Kolocɔlɔɔ kpɔ̀ʔɔrɔli kpaʔa faanna kéele

¹ Isirayɛli ye yiri lè Ezyipiti tári ni, a yɛ̀ʔɛlɛ saala siin ní togoye sicɛrɛ ga kwɔ́ɔ, a Salomɔn séli Yawe kpɔ̀ʔɔrɔli kpaʔa faanna na. Salomɔn tɛ́ɛn lè fǎngi na, ki yɛ̀ʔɛlɛ sicɛrɛ wóli li pye lee bee. Fáliw bee n séli Ziivi yégi ni ki lè yɛ́ɛli yeziin wóʔo.

² Kpáagee fànʔafɔw Salomɔn faan Yawe ma lè, ki tɔnɔganmi maa pye mɛ́tiribéle toko ní kpɔrigɔ, ki yɛ́ɛgi kpɔ́ʔɔganma si i nyɛ kɛɛ, ki ǹjoʔomaw tɔnɔganma si i nyɛ mɛ́tiribéle kɛɛ ní kagunɔ.

³ Kpɔ̀ʔɔrɔli kpaʔa nìkpanʔa tɔnɔganma maa pye mɛ́tiribéle kɛɛ n yɛlɛ ní kpáagi yɛ́ʔɛ kpɔ́ʔɔganma ní. Ki fúngi si i nyɛ mɛ́tiribéle kagunɔ.

⁴ A wi tunmɔrɔ cɔɔ̀ fɛ̀nɛtiribéle sámaga kpáagi na.

⁵ A wi kpaataʔaya faan kpáagi lɛʔɛlɛ ni n táriga gúngi na, Yoro yee yi da kpɔ̀ʔɔrɔli kpaʔa ní tɛɛcǎngi gúnyo màʔa lè, níì funyaa pye n gi màʔa n kpàra.

⁶ Táàma kpaataʔagi yɛ́ʔɛ kpɔ́ʔɔganma maa pye mɛ́tiribéle siin ní tíla, níngi wóʔo si i nyɛ mɛ́tiribéle taanri, ǹjoʔo ma wógi si i nyɛ mɛ́tiribéle taanri ní tíla. Níì cán wi maa kpáagi kàdoʔo ma gúngo kpóʔoro kiyɛɛ na tɔlɔyɔ siin, koro ga pye kpaapari-tíiri a kɔ́ ba jée kpáagi gúngo ni í.

⁷ Kpáagi làrivaanna ni, pe maa ni gi faanri ní kàdɛnɛrɛ ní, dee di pye lè wodangwɔɔrɔ ní. Koro na kpáagi faan n baa kwɔ́ɔ, marito tìnmɛ, wàlá kpanaga, wàlá tunmɔrɔ yálaa faala tinmɛ ga lóʔo gi na í.

⁸ Níngi kpaataʔaga kpaafunyo tɛɛ̀jeele maa pye kpáagi kàliige kabangi na. Tɛɛ̀lúgugéle na pe da ni lúru ni jǐn níngi kpaataʔaga ni n sa ni jǐn taanri wógi ni.

⁹ A Salomɔn ga kwɔ́ɔ kpáagi faanna na, a wi gi tɔ́n ní tiikpakpaaya, ní sɛdiri tíingéle ní.

¹⁰ A wi kpaataʔaya faan n kpáagi màʔa, yi myɛ nibin nibin ǹjoyo tɔnɔganma maa pye mɛ́tiribéle siin ní tílabéle, níì sɛ́diri tíire tɛ́ʔɛ n yi táriga kpáagi na.

¹¹ A Yawe syɛ́ɛnri nan Salomɔn na kánmi naa na, wi n jo:

¹² «Kpáagi naa mɔ faanri lè gee, mɔ ga ni táanri mii làlwaw kèlē na, mɔ ga ni mii kajoogèle kpéʔele, mɔ ga mii kajoodɛɛngèle sámaga n cò ní i ke myɛ kpéʔele, syɛ́ɛnree mii joo mɔ tóow Davidi ma lè, mii a di foro mɔ ma.

¹³ Mii a ba tɛ́ɛn Isirayɛli ye níngi ni. Mii a tée mii syɛ́ɛnbèle yaʔa í, pe lè Isirayɛli ye.»

Kolocɔlɔɔ kpɔ̀ʔɔrɔli kpaafungo yaferede

¹⁴ Lǎli ni Salomɔn kwɔ́ɔ kpáagi faanna na lè,

¹⁵ a wi kpaafunyo sámaga fungo ma ní sɛdiri tiikpakpaaya ní n séli kpaadaali na fwɔɔ n sáà sígi kpaatiingèle na. Kánmi bee na wi fungomaw tɔ́n ní tiire ní, níì kpaadaali tɔ́n ní siipirɛ tiikpakpaaya ní.

¹⁶ A wi kpáagi fúngo sámaga mɛ́tiribéle kɛɛ ní sɛdiri tíire ní n séli kpaadaali na n sáà nan ǹjoʔoma gunbiigi láʔala na. Kánmi bee na wi fungomaw sámaga bi gi pye tɛɛcànga, gee ki a pye lè tɛɛcàndelegi.

¹⁷ Mɛ́tiribèle toko be pye lè yɛʔɛmaw, poro be pye kpáagi, gee bee n jo kpɔ̀ʔɔrɔli kpaʔa.

¹⁸ Pe maa sɛdiri tíire tan kolokɛnti niwiriye, ní fílɛɛriwee wi cabara lè, woro niwiriye n sámaga kpáagi fúngo myɛ na. Sɛdiri tíiri maa tɛ́ɛyi myɛ tɔ́n, kàdɛnɛgaa faala da ni nyaagi í.

¹⁹ A Salomɔn tɛɛcànga sámaga kpáagi nínge ni koro ga pye bi Yawe joogaanni kásu tɛ́ʔɛ yaà beè.

²⁰ Tɛɛcǎngi tɔnɔganma bi pye lè mɛ́tiribéle kɛɛ, a gi yɛ́ɛgi kpɔ́ʔɔganmi i nyɛ mɛ́tiribéle kɛɛ, a gi ǹjogi tɔnɔganma i nyɛ mɛ́tiribéle kɛɛ, á wi tɛɛteleo taʔa gi tɛ́ɛyi myɛ na, wi maa sɛdiri tíire sáriga-wòlo-yafanʔa sámaga ki yɛʔɛ̀ ma.

²¹ A Salomɔn tɛɛteleo tɛ́ʔɛ n kpáagi fungomaw tɔ́n, níì tɛɛ̀ nyɔ̀ʔɔdirigéle pala pala tɛɛcǎngi kpaaweele na.

²² Kánmi bee na wi da kpáagi tɛ́ɛyɛ myɛ tɔ́n ní tɛ́ɛw ní, gee bee n jo kpáagi wobogo myɛw. Wi maa wɔ́ɔ̀ sáriga-wòlo-yafaangi tɛ́ɛyɛ myɛ tɔ́n ní tɛɛ̀ ní, gee gi pye tɛɛcǎngi yɛ́ʔɛ ma lè.

²³ A wi sìnbirigi olivye tíire tɛ́ʔɛ n syerubɛnbéle niwiriye tan n tɛ́ʔɛ tɛɛcǎngi ni. Pe tɔnɔganma maa pye mɛ́tiribéle kagunɔ kagunɔ.

²⁴ Syerubɛnwaa fókanʔa nibin tɔnɔganma n pye mɛ́tiribéle siin ní tíla, a siin wógi i nyɛ mɛ́tiribéle siin ní tíla. Bi séli fókaangee láʔala na bi sa nan gee wólo na, koro maa pye mɛ́tiribéle kagunɔ.

²⁵ Syerubɛn siin wów wóyo maa wɔ́ɔ̀ pye mɛ́tiribéle kagunɔ. Syerubɛnbèle siin tímanama ní be sámagaganmi maa pye sèjira.

²⁶ Syerubɛnseliw tɔnɔganma maa pye mɛ́tiribéle kagunɔ, a syerubɛn siin wów wɔ́ɔ̀ pye nya.

²⁷ A Salomɔn syerubɛnbèle tɛ́ʔɛ kpáagi nínge ni yaà fungo ma. A be syerubɛnbèle fókaanya sánʔa. Syerubɛn séliw fókaangaa maa sáà sígi gungaa na fungo ma, a syerubɛn siin wów fókaangee sáà sígi gúngee na fungo ma, á be fókaanyi siin baa sígi yiyɛɛ na kpáagi nínge ni.

²⁸ Salomɔn maa tɛɛ̀ tɛ́ʔɛ n syerubɛnbèle tɛ́ɛyɛ myɛ tɔ́n.

²⁹ Wi maa be pye a be syerubɛnbéle, ní sɛʔɛwara, ní fílɛɛriw wi cabara lè, woro niwiriye kánʔana n wòlo kpáagi gunbiiye myɛ na fungo ma ní kàdoʔo ma.

³⁰ A wi tɛɛ̀ taʔa kpáagi kpaadaala myɛ na n fûnzeligi pínɛ siin wógi ni.

³¹ A wi kɔ̀ripiiye siin kɔrigɔ sámaga ní sìnbirigi olivye tíire ní n le tɛɛcǎngi kpaaweele na. Njogi tiipariga, ní kɔ̀riteligi maa gunbiigi tílaya kagunɔ wóʔo láa.

³² Kɔ̀ripiiyi siin maa pye sìnbirigi olivye tíire wóyo, á wi be pye a be syerubɛnbéle, ní sɛʔɛwara, ní fílɛɛricabaraɔ niwiriye kánʔana n wòlo yi na, níì tɛɛ̀ tɛ́ʔɛ n yi tɛ́ɛyi myɛ tɔ́n, níì tɛɛwaa taʔa syerubɛnbèle ní sɛʔɛwari tɛ́ɛyɛ myɛ na.

³³ Kánmi bee na wi kpɔ̀ʔɔrɔli kpaʔa kpaaweele kɔritelige sámaga ní sìnbirigi olivye tíiraa ní. Ki yɛ́ɛgi kpɔ́ʔɔganma maa gunbiigi tílaya sicɛrɛ wóʔo láa, siipirɛ tíire kɔripiiye siin si i nyɛ gi na.

³⁴ Kɔripiiseligi n pye tiikpakpaaya siin, yee yi kàragí lè, a kɔ̀ripiisiin wógi pye tiikpakpaaya siin, yee yi kàragí lè.

³⁵ A wi be pye a be syerubɛnbéle, ní sɛʔɛwara, ní fílɛɛricabaraɔ niwiriye kánʔana n wòlo yi na. Níì tɛɛ̀ taʔa yi tɛ́ɛyi myɛ na, n fàra yi niwiriyi na be kánʔana n wòlo lè.

³⁶ A wi fungoma kàcooli faan n sùlu ní kàdɛnɛgboloyo kóloyo taanri ní n fàra sɛdiri tíingéle kólogo nibin na.

³⁷ Yawe kpáagi kapɔɔn n le yɛɛsicɛrɛ wóli na Ziivi yégi ni.

³⁸ A ki ga pye yɛ̀ʔɛlɛ kɛɛ ní nibin wóli na Buli yégi ni, gi lè yɛ́ɛli yeye kɔrɔtaanri wóʔo, a kpáagi tɛ́ɛyɛ myɛ ní gi kánmi myɛ faan n kwɔ́ɔ. Yɛ̀ʔɛlɛ kɔrɔsiin Salomɔn pye gi faanni na.