1 Fànʔafɔbèle 4 - Cebaara Bible 2010

Salomɔn n wi fǎngi sámaga

¹ Fànʔafɔw Salomɔn maa pye fànʔafɔlɔ Isirayɛli ye myɛ nyúngi na.

² Wi syɛɛnkpolobèle be nyɛ bele naa: Azariyahu, wi lè sáriga-wòlow Sadɔki jáaw.

³ Elihorɛfi ní Ahiya be lè Syisya jáabèle, poro pe da pye sɛ́bɛkanbèle. Zyozafati wi lè Ahiludi jáaw, woro si i nyɛ fǎngi kèlē sɛ́bɛtɛʔɛɔ.

⁴ Yehoyada jáaw Benayahu si i nyɛ kapɛɛnkpumɔnbèle kàfɔlɔ, á Sadɔki ní Abyatari pye sáriga-wòlobèle.

⁵ Natan jáaw Azariyahu wi da pye pirefebèle nyúngo na. Natan jáaw Zabudi wi da pye fǎngi kacɔɔnriɔ, ní fànʔafɔw tàannyɛnnɛ.

⁶ Ahisyari maa pye fànʔafɔw kpaʔa fáli nyúngo na. Abida jáaw Adonirami si i nyɛ pɔrɔtɔɔri fáli nyúngo na.

⁷ Pirefebéle kɛɛ ní siin maa pye Salomɔn ma Isirayɛli myɛw ni. Poro pe da ni fànʔafɔw ní wi kpáagi wòolo yaliire kéele cɔɔnri. Wàa o wàa maa ni di kéeli cɔɔnri yɛ́ɛli fúngo ni yeʔe nibin.

⁸ Pe mɛ́ɛyi yi nyɛ yee naa: Huri jáaw wi da pye Efirayimi nyanbeleyi kúlo ni.

⁹ Dekɛɛri jáaw si i nyɛ Makasi, ní Syaalibimi, ní Bɛti-Syemɛsyi, ní Elɔn, ní Bɛti-Hanan wów.

¹⁰ Hesɛdi jáaw si i nyɛ Arubɔti ni. Soko ní Hefɛɛri tári myɛ maa pye wi worò. Dɔɔri tɛ́nɛmi myɛ maa pye Abinadabi jáaw kɔ́lɔ na.

¹¹ Salomɔn pìíwee pe da ni yiri lè Tafati, woro wi da pye wi céw.

¹² Ahiludi jáaw Baana kɔ́lɔ na Taanaki, ní Megido, ní Bɛti-Syeyan myɛ da pye, Bɛti-Syeyan wi lè Saritan taana, Zyizireyɛli tìgimi ni, n séli Bɛti-Syeyan na fwɔɔ n kári n sáà nan Abɛli-Mehola na, ní níì kári fwɔɔ n sáà sɔ̀lɔ Yokineyami taana.

¹³ Gebɛɛri jáaw wi pye lè Aramɔti ni, ki lè Galaadi tári ni, Yayiiri wi pye lè Manase yòdaʔagaa woro kěyi yi lè Galaadi tári ni, yoro maa pye Gebɛɛri jáaw kɔ́lɔ na. Arigɔbi tɛ́nɛmi bi lè Basyan ni, poro maa wɔ́ɔ̀ pye wi kɔlɔ̀ na. Kèkpoloyo togoye taanri maa pye yaà, tòbēle maa pye yi na, á be kanyɛɛnrɛ yasɔʔɔyɔ le be kɔ̀riyi na.

¹⁴ Ahinadabi wi lè Ido jáaw, woro maa pye Mahanayimi tɛ́nɛmi ni.

¹⁵ Ahimaasi wi da pye Nɛfitalii tɛ́nɛmi wòolo wóo. Salomɔn jáaw wi pye lè Basimati, woro wi da wee bee láa.

¹⁶ Husyayi jáaw Baana wi da pye Azɛɛri ní Beyalɔti tɛ́nɛmi ni.

¹⁷ Paruwa jáaw Zyozafati wi da pye Isakari tɛ́nɛmi ni.

¹⁸ Ela jáaw Syimeyii si i nyɛ Bɛnzyamɛ tɛ́nɛmi ni.

¹⁹ Urii jáaw Gebɛɛri si i nyɛ Galaadi tári ni. Amɔri ye fànʔafɔw wi pye lè Sihɔn, woro tɛ́nɛmi, ní Basyan fànʔafɔw Ogi tɛ́nɛmi maa pye wi kɔlɔ̀ na. Pirefe nibin wi pye tári bee nyúngo na.

²⁰ Zyuda ní Isirayɛli ye maa nɛʔɛ àmɛɛ sólomi lɔ̀ʔɔ nyɔ́ɔ táminyɔɔ nɛʔɛ lè. Pe maa ni líi, ní i gbo, ní i fundaanra kpéʔele.