1 Fànʔafɔbèle 21 - Cebaara Bible 2010

Fànʔafɔw Akabi n Nabɔti yaʔa a be kpóo

¹ Kérigèle bee pyele kadoʔo ma, gee gi kpéʔele lè, koro gi nyɛ gee naa: Ɛrɛzɛn seʔe maa pye Zyizireyɛli ye Nabɔti ma Zyizireyɛli ni, Samarii fànʔafɔw Akabi fànʔafɔ-gbaagi taana.

² A Akabi si kɔ́ɔ̀ gi joo Nabɔti ma kánmi naa na níì jo: «Mɔ ɛrɛzɛn ségi kaan mii ma, mii a gi pye cɛnʔɛ yárira tɛɛ̀falaga, níì cán ki n nùuni mii kpáagi na. Mii a ɛrɛzɛn ségaa kaan mɔ ma ki sìndɛɛgi ni, gee gi nyɔɔ n sɔ̀lɔ lè wàlá ki ga mɔ dɛ́nɛ mii a gi lɔ́ri kaan mɔ ma wálifiio na.»

³ A Nabɔti si Akabi yari: «Bi mii tóolɛɛbèle kɔ́rigɔ kaan mɔ ma, Yawe í mii syɔɔ gee bee pyele na.»

⁴ A Akabi lúru n jée wi kpáagi ni funjurugoro, ní fundanʔara na, syɛ́ɛnri bee kéele na, dee Zyizireyɛli ye Nabɔti joo wi ma lè níì jo: «Mii a mii tóolɛɛbèle kɔ́rigɔ kaan mɔ ma í.» A wi sínɛ wi yasinɛgi na níì yɛ́ɛgi wáa n pari wi ga yafyɛn lìi í.

⁵ A wi céw Zyezabɛli pan wi ma n baa wi pye: «Nyàʔá gi mɔ fúngi curugo mɔ si ga fɔ̀lɔ bi lìi í?»

⁶ A wi wi yari: «Mii n joo ní Zyizireyɛli ye Nabɔti ní níì wi pye: ‹Mɔ ɛrɛzɛn ségi kaan mii ma wálifiio na wàlá ki ga mɔ dɛ́nɛ mii a ɛrɛzɛn ségaa kaan mɔ ma ki sìndɛɛgi ni.› A wi si jo: ‹Mii a mii ɛrɛzɛn ségi kaan mɔ ma í.› »

⁷ Lǎli bee ni a wi céw Zyezabɛli wi pye: «Mɔ ban wi nyɛ fǎngi na tɔ́ɔliw ni Isirayɛli ye nyúnyi na kányɛʔɛ na ì? Yìri mi lìi, máā fundaanra kpéʔele. Mii a Zyizireyɛli ye Nabɔti ɛrɛzɛn ségi kaan mɔ ma.»

⁸ A wi fala n sɛ́bɛbéle sɛ́bɛ Akabi mɛ́ɛgi na, níì Akabi fɛ̀ɛ́w taʔa be na níì sɛ́bɛbèle bee tórigo wolɛɛbèle, ní kútiijoobèle ma be pye ní Nabɔti ní lè wi kěgi ni.

⁹ Syɛ́ɛnri naa wi da sɛ́bɛ sɛ́bɛbèle ni níì jo: «Ye súnlere kéele jáari, yé Nabɔti télege syɛ́ɛnbèle nyúngo na.

¹⁰ Yé nifaʔaya siin télege yi yɛ́ɛyi le wi ni yoro í séera kpéʔele wi kánmi na si jo: ‹Mɔ n syɛɛnpeere joo n wáa Kolocɔlɔɔ ní fànʔafɔw na.› Koro kàdoʔo ma ye yiri ní wi ní kàfugo ma ye sa wi wábagi ní kàdɛnɛri ní wi kùu.»

¹¹ Nabɔti kěgi syɛ̀ɛnnɛ, ní wolɛɛbèle, ní kútiijoobèle be pye kěgi ni lè, a poro gi kpéʔele n yɛlɛ ní gee ní Zyezabɛli da tun a be sáà joo be ma lè àmɛɛ ki da sɛ́bɛ sɛ́bɛbèle ni wi da tórigo be ma lè.

¹² A be súnlere kéele jáari níì Nabɔti télege syɛ́ɛnbèle nyúngo na.

¹³ A nifaʔayi siin baa tɛ́ɛn n yɛ́ɛyi le Nabɔti ni, a nifaʔayi bee séeraw naa kpéʔele syɛ́ɛnbèle yɛ́ʔɛ ma Nabɔti kánmi na níì jo: «Nabɔti n syɛɛnpeere joo n wáa Kolocɔlɔɔ, ní fànʔafɔw na.» A be wi cò n yiri kěgi kàdoʔo ma n sáà wábagi ní kàdɛnɛri ní, a wi kùu.

¹⁴ A be tun a be sáà Zyezabɛli pye: «Wo n Nabɔti wábagi ní kàdɛnɛri ní, wi n kùu.»

¹⁵ Lǎli ni Zyezabɛli gi lóʔo lè pe n Nabɔti wábagi n kpóo, a wi Akabi pye: «Yìri mi sa Zyizireyɛli ye Nabɔti ɛrɛzɛn ségi kpéʔele mɔ wóʔo woro wee wi da cée lè níì jo woro a gi kaan mɔ ma si wáli syɔɔ í, níì cán Nabɔti ní o nyɛ sìi na í, wi n kùu.»

¹⁶ Amɛɛ Akabi gi lóʔo lè Nabɔti n kùu, a wi yìri n tìgi Zyizireyɛli ye Nabɔti ɛrɛzɛn ségi ma sa gi kpéʔele wi woʔò.

Kolocɔlɔɔ n Akabi ní Zyezabɛli tánʔaganbeemi kútii ceri

¹⁷ Lǎli bee ni a Yawe syɛ́ɛnri naa nan Tisyibe ye Elii na, wi n jo:

¹⁸ «Yìri mi tìgi mi sa Isirayɛli fànʔafɔw fàra, wi lè Samarii ni, wi i yaà wee Nabɔti ɛrɛzɛn ségi ni, beè wi tìgi lè sa gi kpéʔele wi woʔò.

¹⁹ Mɔ a syɛ́ɛnri naa joo wi ma si wi pye: ‹Yawe n jo: Mɔ í syɔɔn kpóo lé si wi yárigi kpéʔele mɔ wóʔo?› Mí ní wi pye: ‹Yawe n jo: Tɛ́ɛgee tiimaa ni pɔ́nbèle Nabɔti sìsyaanw laala lè, nɛɛ̀ bee pɔ́nbèle a wɔ́ɔ mɔ tiimaa sìsyaanw laala.› »

²⁰ A Akabi baa Elii pye: «Mii nigoow, a mɔ mii caa lé n nyaa?» A wi wi yari: «Ɛɛn, mii n mɔ caa n nyaa. Níì cán mɔ n miyɛɛ pára n gi kpéʔele, gee gi pee Yawe nyɛ́nɛ na lè.

²¹ Wéle, mii a wɔʔɔgɔ yeri bi cáan mɔ na, mii a mɔ pɛ́ɛ láʔa yaà, bele be nyɛ lè mɔ Akabi wóbèle, àlí poro bele be lè pe o nyɛ yarigaa í, mii a be kwɔ́ɔ yirige yaà, bele be nyɛ lè púlobèle wàlá wɔ́rɔbéle Isirayɛli ni.

²² Mii a mɔ kpáagi pye Nɛbati jáaw Zyerobowami kpáagi pyeganma na, ní Ahiya jáaw Bayesya kpáagi pyeganma na. Níì cán mɔ n mii fúngi tanʔa gbanʔama, níì Isirayɛli ye ŋɔrigɔ n lége kapeele ni.»

²³ A Yawe wɔ́ɔ̀ gi joo Zyezabɛli kéeli na níì jo: «Pɔ́nbèle pe a Zyezabɛli káa Zyizireyɛli tǒw taana.

²⁴ Akabi kpaʔa wówee wi ga kùu kěgi ni lè, pɔ́nbèle pe a wi káa, wee si ga kùu sìnbirigi ni lè, nyɛ̀ʔɛni féjɛɛnrɛ ti a wi jɔ́ɔ.»

²⁵ Syɔɔn faala ga níì taa n wiyɛɛ pára àmɛɛ Akabi pye ni gi kpéʔele, gee gi pee Yawe nyɛ́nɛ na lè í. Wi céw Zyezabɛli si wi da wi lége gee bee ni.

²⁶ Wi n kapeekpɔʔɔ kpéʔele, gee gi pee n sɔ̀lɔ lè koro gi nyɛ wi n wiyɛɛ daʔa yasunyi na n yɛlɛ ní Amɔri ye kapyeri myɛ ní, poro bele Yawe da nɛnɛ n yirige yaà lè níì Isirayɛli ye télege.

Akabi n wiyɛɛ jɛ́rɛ wi nàʔaganmi kéele na

²⁷ Lǎli ni Akabi Elii syɛ́ɛnri lóʔo lè, a wi wiyɛɛ búroyi sulugu, níì gɔ̀nvaʔaga le wiyɛɛ na burogo, níì súnw le, ní i sìnɛ́ ní gɔ̀nvaʔagi bee ní, ní i táanri yɛrirɛ.

²⁸ A Yawe syɛ́ɛnri naa nan Tisyibe ye Elii na, wi n jo:

²⁹ «A mɔ gi nyaa lé kánmee na Akabi wiyɛɛ jɛ́rɛ mii yɛ́ʔɛ ma lè? Amɛɛ si wi wiyɛɛ jɛ́rɛ mii yɛ́ʔɛ ma lè mii a wɔʔɔgi yeri cáan wi na wi sìíw làla ni í, kàjáa wi jáaw sìi làla ni ki a ba pye.»