1 Fànʔafɔbèle 20 - Cebaara Bible 2010

Sirii fànʔafɔw n tɛ́ɛn Samarii taana kapɛɛnni kanma na

¹ Bɛn-Hadadi wi lè Sirii fànʔafɔw, wi maa wi kapɛɛnkpumɔnbèle myɛ kpóʔoro. Fànʔafɔɔlɔ toko ní kpɔrigɔ ní siin maa pye ní wi ní, n fàra syɔɔnyɔ ní kapɛɛnkpumɔn-wòtorobéle na. A wi pan n baa tɛ́ɛn Samarii taana kapɛɛnni kánma na níì too gi na.

² A wi tundunbéle tun kěgi ni Akabi ma wi lè Isirayɛli fànʔafɔw

³ níì jo be sa wi pye: «Bɛn-Hadadi n jo: ‹Mɔ wálifiiw ní mɔ tɛ́ɛw i nyɛ mii wóo, mɔ cébèle, ní mɔ pìíbèle be nyɔɔ lè gbanʔama, pe i nyɛ mii wòolo.› »

⁴ A Isirayɛli fànʔafɔw wi yari: «Bi yɛlɛ ní mɔ syɛ́ɛnri ní, ni kàfɔlɔ, mɔ wi lè fànʔafɔw, mii ní mii kɔ́lɔ yáriri myɛ i nyɛ mɔ wóro.»

⁵ A tundunbèle níì pan n baa jo: «Bɛn-Hadadi n jo: ‹Mii maa tun pe sa mɔ pye: Mɔ wálifiiw, ní mɔ tɛ́ɛw, ní mɔ cébèle, ní mɔ piibèle le mii kɔ́gi ni.

⁶ Awá mii si a mii falipyebèle tórigo yaà mɔ ma nyɛ̀ʔɛna níbeena nyɔʔɔmɔ na. Pe a sa mɔ kpáagi fuguri bi fàra mɔ falipyebèle kpaaya na. Yariga o yariga gi nyɛ mɔ nyɛ́nɛ na lè yacanga, pe a kɔlɔ̀ taʔa gi na bi láa.› »

⁷ A Isirayɛli fànʔafɔw tári wólɛɛbéle myɛ yeri ní baa jo: «Ki n yɛlɛ ye gi sɛʔɛ ye wéle, yé gi cán nǎnw naa i wolo caa ní kapeʔe ní. Níì cán wi n tun pe ba mii pye mii í mii cébèle, ní mii pìíbèle, ní mii wálifiiw, ní mii tɛ́ɛw kaan woro ma. Mii si da cée wi ma gi na í.»

⁸ A wolɛɛbèle myɛ ní syɛ́ɛnbèle myɛ Akabi pye: «Mɔ a kɔ́ lóʔo wi ma í, mɔ a kɔ́ fɔ̀lɔ wi syɛ́ɛnri na í.»

⁹ Koro na wi Bɛn-Hadadi tundunbèle pye: «Ye sa mii kàfɔw fànʔafɔw pye: ‹Gee mɔ da séli tun n jo mɔ falipyew í kpéʔele mɔ ma lè mii a koro myɛ kpéʔele. Gee si mɔ joo mii ma lè gee, mii a gbǎn gi kpéʔele í.› » A tundunbèle kári n sáà syɛɛnlurugori joo wi ma.

¹⁰ A Bɛn-Hadadi tun be sa Akabi pye: «Syɛ́ɛnbèle myɛ be nyɛ mii kurugo lè, Samarii támiigi ga gbàn n caà bele bee kadaʔala nyìn, wɔʔɔgee gi pee lè ki n yɛlɛ kolocɔlɔbèle í koro taʔa mii na bi ní kàa fàra gi na.»

¹¹ A Isirayɛli fànʔafɔw si syɛɛnlurugori naa kaan níì jo: «Ye sa wi pye: ‹Wee wi kapɛɛnkpumɔn-yáriri lee bi kári kapɛɛnni séʔe ma lè, ki ga yɛlɛ waa wiyɛɛ gbɔ́ʔɔgi mɔ a jo wee wi ba ni di téeri lè woro wii í.› »

¹² Lǎli ni Bɛn-Hadadi syɛ́ɛnri bee lóʔo lè, wi maa pye gbaali na ní fànʔafɔbèle bele ní fànikpaayi láara ni. A wi wi falipyebèle pye: «Ye ye tɛ́ɛyi láa!» A be sáà yére be tɛ́ɛyi ni kěgi taana.

Fànʔafɔw Akabi n be jáa

¹³ Lǎli bee ni a kanyaajoowaa si pan Akabi ma wi lè Isirayɛli fànʔafɔw ní baa jo: «Yawe n jo: ‹A mɔ syɛɛnnɛʔɛmi naa myɛ nyaa lé? Mii a bi le mɔ kɔ́yi ni níjanʔa, koro ga pye mɔ í gi cán bi cán mii wi nyɛ Yawe.› »

¹⁴ A Akabi jo: «Wìí báriga ni?» A wi wi yari: «Yawe n jo: ‹Nìgɔcaribèle kɔ́yɔ ni, bele tɛ́nɛmi kùndigibéle nyɛ́nɛ n wòlo lè.› » A Akabi jo: «Wìí syɔ́ɔn si wi a kapɛɛnni séli?» A wi wi yari: «Mɔ wii.»

¹⁵ A Akabi nìgɔcaribèle sɛʔɛ bele tɛ́nɛmi kùndigibéle nyɛ́nɛ n wòlo lè, a be pye sirakele ní toko ní kpɔrigɔ ní siin. Bele bee kàdoʔo ma a wi syɛ́ɛnbèle myɛ sɛʔɛ, gee bee n jo Isirayɛli ye myɛw a be pye nànbēle selebingéle taanri ní saala kagunɔ.

¹⁶ A be yiri kapɛɛnni kánma na cânvulɛɛli na. Bɛn-Hadadi si maa ni gbo n pye àmɛɛ singbaadiɔn nyɛ lè fànikpaayi láara ni woro ní fànʔafɔbèle toko ní kpɔrigɔ ní siin pe da pan ba wi dɛ̀ɛmɛ lè.

¹⁷ Bele tɛ́nɛmi kùndigibéle da nyɛ́nɛ n wòlo lè a poro yiri wozelibèle. A Bɛn-Hadadi tun jàngó bi kàa cán gi ni. A pe baa syɛ́ɛnri naa joo wi ma níì jo: «Nǎnbèle pèle be yiri yaà Samarii ni.»

¹⁸ A wi jo: «Kapye bɛ̀ɛlɛ kéele na be yiri, ye be cò woweebèlē ní, ki si ga pye kapɛɛnnɛ kánma na be yiri, ye sèʔé ye be cò woweebèlē ní.»

¹⁹ Bele tɛ́nɛmi kùndigibéle da nyɛ́nɛ n wòlo lè a poro yiri a kapɛɛnkpumɔnbèle taʔa be na.

²⁰ A be myɛ nibin nibin nànbēle nibin nibin kpóo. A Sirii ye i fé, á Isirayɛli ye taʔa be na ni nɛnɛ. A Sirii fànʔafɔw Bɛn-Hadadi lúgu syɔnʔɔ na n fàn n syɔɔ woro ní syɔɔnfǎnbèle pèle ní.

²¹ A Isirayɛli fànʔafɔw yiri n sáà syɔ́ɔnyi ní kapɛɛnkpumɔn-wòtorobèle kálagi, níì syɛɛnnɛʔɛmɛ kpóo Sirii ye ni.

²² A kanyaajoow nùuni Isirayɛli fànʔafɔw na n sáà wi pye: «Da syée, nìrimɛ le mí gi cán gee mɔ yɛlɛ bi kpéʔele lè. Níì cán yɛɛláa ma Sirii fànʔafɔw a ní pan mɔ kánmi na.»

Akabi n níì be jáa

²³ A Sirii fànʔafɔw falipyebèlē wi pye: «Pe kolocɔlɔw i nyɛ nyanbeleyi kolocɔlɔɔ, koro na be wolo jáa. Wo kapɛɛnni kpúmɔn ní be ní jǐnlɔgi ni, wó gi wéle kapye wolo a tɔ̀nɔ́ be jáa í.

²⁴ Ki n yɛlɛ mi ní gee naa kpéʔele, koro gi nyɛ mɔ í fànʔafɔbèle bele yìrige be tɛ́ɛyi ni si pirefebéle télege télege be sìndɛɛgi ni.

²⁵ Kapɛɛnkpumɔnbèle kabiga ni mɔ bɔ̀nɔ lè, ki n yɛlɛ mɔ í ní gi felege sámaga, syɔ́ɔnyi í pye sèjira, kapɛɛnkpumɔn-wòtorobèle í pye sèjira. Wolo a sa kapɛɛnni kpúmɔn ní be ní tɛɛfiigi na. Wó gi wéle kapye wolo a tɔ̀nɔ́ be jáa í.» A wi lóʔo be ma níì gi kpéʔele kánmi bee na.

²⁶ A yɛ́ɛlee ga yìri, a Bɛn-Hadadi Sirii ye sɛʔɛ níì kári Afɛki ma bi sa kapɛɛnni kpúmɔn ní Isirayɛli ye ní.

²⁷ A be wɔ́ɔ̀ Isirayɛli ye sɛʔɛ, níì yaliire kaan be ma, á be kári pe sa peyɛɛ vàra. A Isirayɛli ye sáà tɛ́ɛn pe zǐnmi na, níì pye àmɛɛ sikaala gboopiigéle siin nyɛ lè, á Sirii ye si tári myɛ nyìn.

²⁸ A Kolocɔlɔɔ syɔ́ɔnw pan n baa Isirayɛli fànʔafɔw pye: «Yawe n jo: ‹Sirii ye n jo: Yawe i nyɛ nyanbeleyi kolocɔlɔɔ, wi o nyɛ jǐnlɔyɔ kolocɔlɔɔ í. Mii a syɛɛnnɛʔɛmi bee myɛ le mɔ kɔ́yi ni, koro ga pye yele a gi cán bi cán mii wi nyɛ Yawe.› »

²⁹ A be tɛ́ɛn n yɛ́ɛyi le peyɛɛ ni n taa canya kɔrɔsiin. Canya kɔrɔsiin wógi na a be kapɛɛnni yìrige. A Isirayɛli ye kpóo Sirii ye ni nànbēle tɔlɔyɔ fɔɔlɔ sirakamayɛ kagunɔ canʔa nibin.

³⁰ Bele pe da kòro lè, a poro fàn n sáà jée Afɛki kěgi ni, a tǒw too pe nǎnbèle sirakama ní selebingéle taanri ní saala kagunɔ na pe da kòro lè. Bɛn-Hadadi si maa taa n fàn n syɔɔ n sáà nan kěgi na, ní sa ni làrá ni máari kpaafunyi ni.

Akabi n Sirii fànʔafɔw yaʔa sìi na

³¹ A wi falipyebèle wi pye: «Wéle, wolo n gi lóʔo Isirayɛli kpáagi fànʔafɔɔlɔ tɔ̀nɔ́ i nyɛ funjànya fànʔafɔɔlɔ, koro na wolo a gɔ̀nvaʔaya tɛ́ʔɛ bi woyɛɛ bwɔɔ sárigèle ni, si mɛ́ɛngéle le wolo yátiiyi ni bi yiri kári Isirayɛli fànʔafɔw ma. Dɔ̀ʔɔ́ wi a mɔ yaʔa sìi na.»

³² A be gɔ̀nvaʔayi tɛ́ʔɛ n peyɛɛ mígele sárigèle ni níì mɛ́ɛngèle le peyɛɛ yátiiyi ni níì pan Isirayɛli fànʔafɔw ma n baa jo: «Mɔ falipyew Bɛn-Hadadi n jo: ‹Mii yaʔa sìi na.› » A Akabi jo: «A wi sèʔé i yaà lé sìi na? Wi i nyɛ mii senyɛnnɛ̀.»

³³ A nǎnbèle bee fala n jooganma taa níì sígi tɛ́ɛli bee na níì syɛ́ɛnri nyáma n syɔɔ wi ma níì jo: «Bɛn-Hadadi i nyɛ mɔ senyɛnnɛ!» A wi jo: «Yaa syée ye sa wi kɔ́ri yaa maa.» A Bɛn-Hadadi yiri n kári wi ma. A Akabi be pye a be wi lúrugo fànʔafɔ-wòtorow ni.

³⁴ A Bɛn-Hadadi wi pye: «Kěyee mii tóow da syɔɔ mɔ tóow ma lè, mii a yi lúrugo kaan mɔ ma. Tɛɛ̀páraya a pye mɔ ma Damasi ni àmɛɛ yàa da pye mii tóow ma Samarii ni lè.» A Akabi níì syɛ́ɛnri láa n gi joo níì jo: «Mii a mɔ yaʔa mɔ í lúru da syée si joogaanna kpéʔele ní mɔ ní.» A wi joogaanna kpéʔele ní wi ní níì wi yaʔa a wi lúru n kári.

Kolocɔlɔɔ n Akabi fànjɛrɛri kéele kútii ceri

³⁵ A Yawe gi tɛ̀ɛn kanyaajoobèle gboolo wówaa na, a wi gi joo wi kanyaajoonyɛnwaa ma níì jo: «Ki n yɛlɛ mi mii kpúmɔn!» Kàjáa nǎnw bee ga fɔ̀lɔ n wi kpúmɔn í.

³⁶ A wi si wi pye: «Amɛɛ gi nyɛ lè mɔ ga Yawe jóomi lóʔo í, mɔ ga núngo mii taana lǎli ni lè, càaraw a sa too mɔ na.» Lǎli ni wi zǐn núngo wi taana lè, a càaraw sáà too wi na n wi kpóo.

³⁷ A wi níì nànwaa nikwɔɔ nyaa, a wi jo: «Mii kpúmɔn.» A nǎnw bee wi kpúmɔn wi n wi kpúmɔn n kpàli.

³⁸ A kanyaajoow kári n sáà yére fànʔafɔw kozɔ̀lɔgɔ na. Wi si maa wiyɛɛ yɛ́ɛgi pwɔɔ n tɔ́n ní fànikologo ní.

³⁹ Lǎli ni fànʔafɔw ba ni sɔ̀lɔ́ lè, a wi yákpoli wáa wi kurugo níì jo: «Mɔ falipyew wi lè mii, mii maa pye yaà kapɛɛnni séʔe ni, wéle, a nànwaa wàli n pan mii ma ní nànwaa ní n baa jo: ‹Da nǎnw naa kɔ̀rɔsíi. Mii ga baa fɔ̀n wi ni, mɔ siiw a jée wi sìíw lariga ni, koro ga jáa mɔ a wálifiio támabéle selebinnɛ ní saala kagunɔ sàra.›

⁴⁰ N mɔ falipyew yaʔa fáliw na wi i fíigi ni máari, a nǎnw kwɔ́ɔ gi ni.» A Isirayɛli fànʔafɔw wi pye: «Mɔ kútiiw wi nyɛ woro, mɔ tiimaa n wi ceri n kwɔ́ɔ.»

⁴¹ A kanyaajoow fala n fànikologi láʔa wiyɛɛ yɛ́ɛgi na. A Isirayɛli fànʔafɔw wi wéle n cán ncan kanyaajooo wii.

⁴² Lǎli bee ni a wi fànʔafɔw pye: «Yawe n jo: ‹Amɛɛ mɔ nǎnw yaʔa a wi yiri mii kɔ́gi ni n kári lè woro wee mii da jo wi n yɛlɛ bi kálagi lè péw, mɔ siiw wi a jée wi sìíw lariga ni, mɔ syɛ́ɛnbèle si wɔ́ɔ jée wi wóbèle lariga ni.› »

⁴³ A Isirayɛli fànʔafɔw lúru n kári wi kpaʔa ma funjurugoro, ní fundanʔara na Samarii ma.