1 Fànʔafɔbèle 19 - Cebaara Bible 2010

Elii bárigaw n kwɔ́ɔ

¹ Gee myɛ Elii kpéʔele lè, a Akabi sáà koro joo n tɛ̀ɛn Zyezabɛli na, ní àmɛɛ wi ŋɔséew tɛ́ʔɛ n kanyaajoobèle myɛ kpóo lè.

² A Zyezabɛli tunduɔn tun Elii ma wi sa wi pye: «Kánmee na mɔ bele sìi pye lè, bi láa nɛɛ ní nyɛ̀ʔɛna níbeena nyɔʔɔmɔ na, mii ga pye mii ga mɔ sìíw pye pe wów pyeganma na í, wɔʔɔgee gi pee lè, ki n yɛlɛ kolocɔlɔbèle í gee bee taʔa mii na bi ní kàa fàra gi na.»

³ A Elii ga gee bee nyaa, a wi yìri n kári bi wi sìíw syɔɔ. A wi sáà nan Bɛɛri-Syeba na ki lè Zyuda wógi, níì wi falipye-nìgɔcariw yaʔa beè.

⁴ Woro si na, wi maa kári fìími tára ni n canʔa nibin tánʔana kpéʔele, ní sáà tɛ́ɛn zyenɛ tiipiige láara ni ní i wiyɛɛ kùúw nyɛ́ɛri níì jo: «Ki n sɔ̀lɔ ki dǎnw na! Tɔ́ɔliw ni Yawe mii sìíw kwɔ́ɔ nya. Níì cán mii ga pɔ́rɔ n sɔ̀lɔ mii tóolɛɛbèle na í.»

⁵ Koro kàdoʔo ma a wi sínɛ ni ŋúnɔ Zyenɛ tiipiige láara ni. Wéle a nyɛ̀ʔɛni tundunwaa pan n baa tánga wi na níì jo: «Yìri mi lìi.»

⁶ A wi wéle n kàgbalaga nyaa wi nyúngi ma, gee be fwɔ́ɔ kàdɛnɛvuuyo na lè, n fàra lɔ̀ʔɔ nìngún na. A wi lìi níì gbaa ní níì sínɛ.

⁷ A Yawe nyɛ̀ʔɛni tunduɔn níì pan tɔziin n baa tánga wi na níì jo: «Yìri mi lìi. Níì cán mɔ a tánʔadɔɔnnɔ tánʔa.»

⁸ A wi yìri n lìi níì gbaa. Fǎngee yaliiri bee le wi ni lè, a wi canya togoye siin ní yébiliye togoye siin tánʔa fwɔɔ n sáà nan Kolocɔlɔɔ nyanbelegi na ki lè Horebi.

Kolocɔlɔɔ n níì lòmaana le Elii ni

⁹ Wi nan lè Horebi na, a wi jée fálaweʔe ni n syɔ́ɔn yaà beè. A Yawe syɛ́ɛnri naa nan wi na wi n jo: «Elii, nyàʔá mɔ pingi nɛɛ naa?»

¹⁰ A wi jo: «Kayaʔa gi tɔ̀nɔ́ nyɛ mii ni Yawe kéeli na, wi lè Nyɛ̀ʔɛni Kapɛɛnkpumɔnbéle Kolocɔlɔɔ. Níì cán Isirayɛli ye n mɔ joogaanni yaʔa, níì mɔ sáriga-wòlo-yafaanyi jabagi, níì mɔ kanyaajoobèle kpóo ní ŋɔséew ní. Mii nibin wi kòro, pe si ní i caa bi mii sìíw kwɔ́ɔ.»

¹¹ A Yawe jo: «Yiri mi yére nyanbelegi na Yawe yɛ́ʔɛ ma.» Wéle, a Yawe kàri ni sɔ̀lɔ́. Káfalakpɔɔ-bìngaʔa maa ni nyanbeleyi yabala, ní i fálayi tɔ́nʔɔnɔ Yawe yɛ́ʔɛ ma. Yawe si da pye káfalagi ni í. A káfalagi ga sɔ̀lɔ, a koro pye tári cɛ̀lɛlɛ. Yawe si da pye tári cɛ̀lɛlɛ ni í.

¹² Tári cɛ̀lɛlɛ kàdoʔo ma, a naà pye. Yawe si da pye náagi ni í. A náagi ga kwɔ́ɔ, a koro pye yákpobile jóomɔ.

¹³ A Elii ga li lóʔo, a wi wi burogbɔɔgi tɛ́ʔɛ n wi yɛɛcɔɔli tɔ́n níì yiri n yére fálaweegi nyɔ́ɔ na. A yákpolaa wi pye: «Elii, nyàʔá mɔ pingi nɛɛ naa?»

¹⁴ A wi jo: «Kayaʔa gi tɔ̀nɔ́ nyɛ mii ni Yawe kéeli na wi lè Nyɛ̀ʔɛni Kapɛɛnkpumɔnbéle Kolocɔlɔɔ. Níì cán Isirayɛli ye n mɔ joogaanni yaʔa, níì mɔ sáriga-wòlo-yafaanyi jabagi, níì mɔ kanyaajoobèle kpóo ní ŋɔsée ní. Mii nibin wi kòro, pé si ní i caa bi mii sìíw kwɔ́ɔ.»

¹⁵ A Yawe wi pye: «Da syée mi sa mɔ kólogi láa mi lúru maa syée fìími tára ma fwɔɔ mi sa nan Damasi na. Mɔ ga sáà nan yaà, mi kàlifaali sìnmɛ wo Hazayɛli na mi wi kpéʔele Sirii fànʔafɔw.

¹⁶ Mi kàlifaali sìnmɛ wo Nimisyii Zyehu na mi wi kpéʔele Isirayɛli fànʔafɔw. Mí kàlifaali sìnmi wo Elize na wi lè Abɛli-Mehola ye Syafati jáaw mi wi kpéʔele kanyaajooo mɔ sindɛɛgi ni.

¹⁷ Ki a pye wee wi ga syɔɔ lè Hazayɛli ŋɔséew ma, Zyehu a wi kpóo. Wee si wi ga syɔɔ lè Zyehu ŋɔséew ma, Elize a wi kpóo.

¹⁸ Kàjáa mii a nànbēle selebingéle taanri ní saala kagunɔ yaʔa Isirayɛli ni poro bele myɛ be nyɛ lè pe ga yégunri cáan Baali yɛ́ʔɛ ma í wàlá n wi syɔɔnri syɔɔnri ní nyɔ́ɔyi ní í.»

Elii n Elize nyɛ́nɛ n wòlo wi pye woro sìndɛɛgi ni

¹⁹ A Elii yiri yaà beè n kári n sáà Elize nyaa wi lè Syafati jáaw. Wi maa pye ni fála ní nìye pɛ́ɛribéle kɛɛ ní siin ní, woro si i nyɛ kɛɛ ní siin wów kurugo. A Elii sa ni sɔ̀lɔ́ wi taana níì wi burogbɔɔgi wáa wi na.

²⁰ A Elize wi nìfalayi yaʔa níì fàn n kári Elii kurugo n sáà jo: «Ki yaʔa mii í sa mii tóow ní mii nɔ́ɔw syɔɔnri syɔɔnri, koro kàdoʔo ma mii a ba taʔa mɔ na.» A Elii wi yari: «Da syée máā maa. Nyàʔá mii pye mɔ na?»

²¹ Wi núngo Elii taana lè a wi lúru n baa nìpɛ́ɛriwaa cò n wòlo sáriga, níì nǐyi yabaarara tíire tɛ́ʔɛ n yi káari sɔʔɔ n kaan syɛ́ɛnbèle ma a be káa. Koro kàdoʔo ma a wi yiri n taʔa Elii na ni báara wi ma.