1 Fànʔafɔbèle 18 - Cebaara Bible 2010

Elii n yɛlɛ bi sa wáami kwɔ́ɔlɔ kéele joo

¹ A làridɔɔnnɔ ga kwɔ́ɔ, a Yawe syɛ́ɛnri naa nan Elii na yɛɛdaanri wóli na, wi n jo: «Da syée mi sa miyɛɛ dɛ̀ɛn Akabi na mii si zěgi yaʔa kaa tuun tári na.»

² A Elii kári bi sa wiyɛɛ dɛ̀ɛn Akabi na. Kateegi si maa tɔ̀nɔ n gbàn n sɔ̀lɔ Samarii ni.

³ A Akabi tun a be Abidyasi yeri wi pye lè woro kpáagi fáli nyúngo na. Abidyasi si maa ni fɛ̀ɛgí Yawe na gbanʔama.

⁴ Lǎli ni Zyezabɛli da ni Yawe kanyaajoobèle kúu lè kpóobeele na, Abidyasi maa kanyaajoobéle dabata láa n sáà làriga togoye siin ní kpɔrigɔ kpɔrigɔ nyanbeweeye ni, ní i yaliiri, ní lǒgi kaangi be ma, ni be nyɔ́ɔyi wóo.

⁵ A Akabi Abidyasi pye: «Da syée mi sa tári nyaari mi sɔ̀lɔ pùnweegèle ní lòcooloyi tɛ́ɛyɛ ni. Dɔ̀ʔɔ́ wolo a nyàā taa yaà, koro si gi kaan wolo í syɔ́ɔnyi ní jòfanikàriyi yaʔa yi kòro sìi na, wolo màko a ní pye yaweeri kpóolo na í.»

⁶ A be tári lɛɛ peyɛɛ na koro ga pye bi di nyaari foro. A Akabi kári kologaa ni wi nibin, á Abidyasi kári gee ni wi nibin.

⁷ Amɛɛ Abidyasi pye kólogi na lè, a wi kɔ́ɔ̀ Elii wéle n nyaa wi i woro fàrá. Amɛɛ Abidyasi wi wéle n cán lè, a wi too n yɛ́ɛgi cíbele tári na níì jo: «Mɔ lé wii ni kàfɔlɔ Elii?»

⁸ A wi wi yari: «Mii wii. Da syée mi sa mɔ kafɔw pye: ‹Elii wi yaà wee.› »

⁹ A Abidyasi jo: «Kapeelìí félege mii kpéʔele, mɔ si mɔ falipyew le Akabi kɔ́yi ni wi lè mii, wi mii kpóo?

¹⁰ Amɛɛ Yawe mɔ Kolocɔlɔw nyɛ lè sìi na, syɛɛnfelegaa wàlá fàngaa o yaà beè lè mii kàfɔw ga tun pe sa mɔ caa í. Syɛɛnfelegaa ní fàngaa wòolo ga sáà jo mɔ o yaà í, wi n be kɔ́ri pe n kàli.

¹¹ Tɔ́ɔliw ni á mɔ si jo: ‹Da syée mi sa mɔ kàfɔw pye: Elii wi yaà wee.›

¹² Ki kàri pye lǎlee ni mii ga núngo mɔ taana lè n kári, Yawe Pǐli í mɔ láa kári tɛɛgaa ni, gee gi lè mii a gi cán í. Mii si ga sáà mɔ kéeli joo Akabi ma, wi ga pye wi ga baa mɔ nyaa í, wi a mii kpóo. Bi gi taa mɔ falipyew i fɛ̀ɛgí Yawe na nlaa yaà wi cárimi làla ni.

¹³ Lǎli ni Zyezabɛli da ni Yawe kanyaajoobèle kúu lè, gee mii kpéʔele lè, wàa ga gee bee joo mɔ ma ì ni kàfɔlɔ? Mii maa kanyaajoobéle dabata làriga togoye siin ní kpɔrigɔ kpɔrigɔ nyanbeweeye ni, ní i yaliiri, ní lǒgi kaangi be ma, ni be nyɔ́ɔyi wóo.

¹⁴ A mɔ si jo tɔ́ɔliw ni: ‹Da syée mi sa mɔ kàfɔw pye: Elii wi yaà wee.› Jo wi a mii kpóo.»

¹⁵ A Elii si jo: «Mii a tɔ̀nɔ́ gi joo mɔ ma àmɛɛ Yawe nyɛ lè sìi na wi lè Nyɛ̀ʔɛni kapɛɛnkpumɔnbéle Kafɔlɔ, woro wee falipyeo mii nyɛ lè, níjanʔa mii a tɔ̀nɔ́ sa niyɛɛ dɛ̀ɛn Akabi na.»

Elii n wiyɛɛ dɛ̀ɛn Akabi na

¹⁶ A Abidyasi kári n sáà Akabi fàra níì kéeli bee joo wi ma. A Akabi fala n kári n sáà Elii fàra.

¹⁷ Lǎli ni Akabi Elii wéle n nyaa lè, a wi jo: «Mɔ wi lé wee, mɔ wee wi wɔʔɔgi cáan lè Isirayɛli na?»

¹⁸ A Elii wi yari: «Mii ban wi wɔʔɔgi cáan Isirayɛli na í dɛ, mɔ ní mɔ tóow kpaʔa wòolo bɛɛ. Níì cán yele n Yawe kajoodɛɛngèle yaʔa, á mɔ miyɛɛ daʔa Baalibèle kpɔ̀ʔɔrɔlɔ na.

¹⁹ Tɔ́ɔliw ni tun be Isirayɛli ye myɛ yeri be kpóʔoro mii ma Karimɛli nyanbelegi na, n fàra Baali kanyaajoobèle saala siin ní togoye siin ní kpɔrigɔ, ní Asyera kanyaajoobèle saala siin na, poro bele be líi ní Zyezabɛli ní lè.»

Elii ní Baali kanyaajoobèle kéele, Karimɛli nyanbelegi na

²⁰ A Akabi tundunbéle tun Isirayɛli ye myɛ ma níì kanyaajoobèle kpóʔoro Karimɛli nyanbelegi na.

²¹ A Elii sɛ̀ʔɛrɛ syɛ́ɛnbèle myɛ ma níì jo: «Làlìí ni yele a láʔa nya fíige-màʔaw na kàbanyi siin na? Kapye Yawe wi nyɛ Kolocɔlɔw wodeleo, ki n yɛlɛ ye taʔa woro na, ki si ga pye Baali wii, ye taʔa woro na.» Syɛ́ɛnbèle ga yafyɛn joo wi ma í.

²² A Elii syɛ́ɛnbèle pye: Mii nibin wi kòro Yawe kanyaajoow, Baali kanyaajoobèle si i nyɛ saala siin ní togoye siin ní kpɔrigɔ.

²³ Ki n yɛlɛ be náapɛʔɛlɛ siin kaan wo ma poro si náapelaa nibin nyɛ́nɛ wòlo peyɛɛ wólo, pé li cɛnɛ bi taʔa kàjeri na, pe si a kɔ́ naà le di na í. Mii si náapelee sámaga bi taʔa kàjeri na, mii si a naà le di na í.

²⁴ Yele si yele kolocɔlɔw mɛ́ʔɛ yeri, mii si wɔ́ɔ Yawe mɛ́ɛgi yeri. Kolocɔlɔwee wi ga lóʔo lè níì náagi le, woro wi nyɛ Kolocɔlɔɔ. A syɛ́ɛnbèle myɛ jo: «Wo n fɔ̀lɔ gi na.»

²⁵ A Elii Baali kanyaajoobèle pye: «Ye náapelaa nibin nyɛ́nɛ ye wòlo, loro í pye yele wóli, yele si séli bi li sámaga níì cán yele ye nɛʔɛ, yé yele kolocɔlɔw mɛ́ʔɛ yeri, ye si a kɔ́ naà le í.»

²⁶ Náapelee be kaan be ma lè, a be li cò n sámaga, ní i Baali mɛ́ɛgi yiri n séli nyǐngi nyɔ́ɔ na fwɔɔ n taa a cángi baa tɛ́ɛn nyùngo ni, ní i gi nyuu níì jo: «Baali, lóʔo wolo ma.» Kàjáa joomɔ wàlá syɛɛnlurugoro ga taa í. Pe maa ni yóo ni yegi sáriga-wòlo-yafaangi yɛ́ʔɛ ma, gee pe da sámaga lè.

²⁷ Lǎli ni cángi tɛ́ɛn nyùngo ni lè, a Elii i wiyɛɛ nyɛ́nɛ be na níì jo: «Yaa yákpogèle wáa gbanʔama, níì cán kolocɔlɔwaa wii, yarigaa na wi a bye da sɔ̀ngí yaà, wàlá keelaa na wi nyɛ yaà, wàlá kùlo ni wi kári, koro ga jáa a wi ŋúnɔ wii, wi si a yìri.»

²⁸ A be i yákpogèle wáa gbanʔama, níì peyɛɛ ceri kɔnɔgi n màʔa ní ŋɔséebéle, ní tàbaabēle ní n yɛlɛ ní be kalɛɛli ní fwɔɔ a sìsyaanw i fóo ni tíri be na.

²⁹ Lǎli ni cángi baa kàri lè, a be i kérigèle nyaagi ni nyuu fwɔɔ n baa nan cângwɔɔgi nyɔ́ɔ sáriga làriwololo na. Kàjáa joomɔ wàlá syɛɛnlurugoro ga taa í wàlá a fɛ̀ɛwaa faala yarigaa tɛ̀ɛn í.

³⁰ Lǎli bee ni a Elii syɛ́ɛnbèle myɛ pye: «Ye nùuni naa mii na.» A syɛ́ɛnbèle myɛ nùuni wi na. Yawe sáriga-wòlo-yafaangi pe da jaa lè, a Elii níì gi faan.

³¹ Elii maa kàdɛnɛyɛ kɛɛ ní siin láa n yɛlɛ ní Zyakɔbi jáabèle nyɔ́ɔ ní, pe lè syɛɛnfeleyi kɛɛ ní siin. Woro wee má Yawe da gi joo lè níì jo: «Mɔ mɛ́ɛgi a pye Isirayɛli.»

³² A wi sáriga-wòlo-yafanʔa faan ní kàdɛnɛyi bee ní Yawe mɛ́ɛgi na, níì weʔe túgu n sáriga-wòlo-yafaangi màʔa. Lítiribéle toko ní kpɔrigɔ maa pye bi gbǎn jée gi ni.

³³ A wi kàjeri taani níì náapeli cɛnɛ n taʔa kàjeri na.

³⁴ Koro kàdoʔo ma a wi jo: «Ye lɔ̀ʔɔ kasànnyɛ̀nnɛ sicɛrɛ kóo ye wo sáriga-sórigow ní kàjeri na.» A wi be pye: «Ye gi pye tɔziin.» A be gi pye tɔziin. A wi níì be pye: «Ye gi pye tɔdaanri.» A be gi pye tɔdaanri.

³⁵ A lǒgi tɔ̀nɔ n fóo n sáriga-wòlo-yafaangi màʔa. A be wɔ́ɔ̀ wéegi nyìn lǒgi na.

³⁶ A sárigaw làriwololo ga nan, a kanyaajoow Elii sɛ̀ʔɛrɛ yaà níì jo: «Ee Yawe, mɔ wi lè Abirahami, ní Izaaki, ní Isirayɛli Kolocɔlɔw, ki n yɛlɛ pe gi cán níjanʔa bi cán mɔ wi nyɛ Kolocɔlɔɔ Isirayɛli ni, si wɔ́ɔ gi cán bi cán mii i nyɛ mɔ falipyeo, si ní gi cán bi cán mɔ wi jo mii í kérigèle naa myɛ kpéʔele níjanʔa.

³⁷ Ki n yɛlɛ mi lóʔo mii ma Yawe, lóʔo mii ma, koro ga pye syɛ́ɛnbèle naa í gi cán bi cán mɔ Yawe wi nyɛ Kolocɔlɔɔ, si gi cán mɔ wi poro fúnyi lúrugu ni kàragí.»

³⁸ Lǎli bee ni a Yawe náagi tìgi n sárigaw sórigo n fàra kàjeri, ní kàdɛnɛyi, ní támiigi na, ní wɔ́ɔ̀ wéegi lɔ̀ʔɔ sórigo n kwɔ́ɔ.

³⁹ Lǎli ni syɛ́ɛnbèle myɛ gee bee nyaa lè, a be too n be yɛ́ɛyi cíbele tári na níì jo: «Yawe wi nyɛ Kolocɔlɔɔ! Yawe wi nyɛ Kolocɔlɔɔ!»

⁴⁰ A Elii be pye: «Ye Baali kanyaajoobèle cò, ki ga yɛlɛ pe wàa nibin í fàn bi syɔɔ í.» A pe be cò. A Elii be pye a be tìgi ní be ní Kisyɔn lòcoologi ma, a wi sáà be kɔnɔgi yaà beè.

Zěgi n níì pan

⁴¹ A Elii Akabi pye: «Da syée mi sa lìi mí gbaa. Níì cán tǐnmi naa bi lè beè, zěgi gii.»

⁴² A Akabi kári bi sa lìi si gbaa, á Elii lúgu Karimɛli nyanbelegi ǹjoʔo ni ní sáà tìgi n tɛ́ɛn tári na níì yɛɛcɔɔli le wi yégunyi lariga ni.

⁴³ Níì wi falipye-nìgɔcariw pye: «Lúgu mi sa wéle sólomi lɔ́ʔɔ kàbaan na.» A woro lúgu n sáà wéle yaà níì wi pye: «Yafyɛn o naa í.» A Elii jo: «Ki kpéʔele tɔlɔyɔ kɔrɔsiin.»

⁴⁴ Tɔlɔyɔ kɔrɔsiin wógi na, a wi jo: «Fàfaanpile li yirigi lè sólomi lɔ́ʔɔ ni ni lúru. Li i nyɛ àmɛɛ syɔɔn kadaala nyɛ lè.» A Elii jo: «Lúgu mi sa Akabi pye: ‹Wòtorow pwɔɔ mi lúru mi tìgi, koro ga pye zěgi a kɔ́ mɔ yérige í.› »

⁴⁵ A fàfaanyi nyɛ̀ʔɛni wɔ́ɔ kàbanyi myɛ na, a káfalagi yìri, a zěkpɔʔɔ tɔ̀nɔ n too. A Akabi jée wi wòtorow ni n kári Zyizireyɛli ma.

⁴⁶ Yawe kɔ́gi si maa pye Elii na, a wi sɛntiiri tɛ́ʔɛ n wiyɛɛ bwɔɔ sárigèle ni ní i fé ni syée Akabi yɛ́ʔɛ ma fwɔɔ n sáà nan Zyizireyɛli tɛɛ̀jeeli na.