1 Fànʔafɔbèle 17 - Cebaara Bible 2010

Kanyaajoow Elii n wáami kéele joo

¹ Elii wi lè Tisyibe ye wów wi pye lè Galaadi tári wówaa, a woro Akabi pye: «Amɛɛ Yawe nyɛ lè sìi na, wi lè Isirayɛli ye Kolocɔlɔw, woro wee falipyeo mii nyɛ lè, mii a gi joo mɔ ma, kásaga wàlá zàʔá a taa yɛ́ɛgèle naa ni í, fwɔɔ bi taa mii í ba joo.»

Elii, Keriti lòcoologi nyɔ́ɔ na

² A Yawe syɛ́ɛnri naa nan Elii na wi n jo:

³ «Yiri nɛɛ naa maa syée canʔafolomɔ kabangi na, mi sa làra Keriti lòcoologi nyɔ́ɔ na ki lè Zyuridɛnw zìnmɛ na.

⁴ Mɔ a ra lòcoologi lɔ̀ʔɔ gbo. Mii n gi joo n gbàn kàanriyi ma yi sa ra yaliire kaangi mɔ ma yaà beè.»

⁵ A wi kári, ní sáà gi kpéʔele n yɛlɛ ní Yawe syɛ́ɛnri ní, ní sáà tɛ́ɛn Keriti lòcoologi nyɔ́ɔ na ki lè Zyuridɛnw zìnmɛ na.

⁶ A kàanriyi i syée ní búruw, ní káari ní, nyǐngi nyɔ́ɔ, ní cângwɔɔgi nyɔ́ɔ na n sa ni kaangi wi ma, wi si i lòcoologi lɔ̀ʔɔ gbo.

Elii i nyɛ Sarɛpita ye lɔgucew tɛ́ʔɛ ni

⁷ Kàjáa, a làlaa ga kwɔ́ɔ, a lòcoologi waʔa, níì cán zàʔá da níì too tári na í.

⁸ Lǎli bee ni a Yawe syɛ́ɛnri naa nan wi na wi n jo:

⁹ «Yìri maa syée Sarɛpita ma ki lè Siidɔn wógi, mi sa kòro yaà beè. Wéle, mii n gi joo n gbàn lɔgucewaa ma yaà beè wi sa ra mɔ kaangi mɔ í da líi.»

¹⁰ A wi yìri ni syée Sarɛpita ma. Lǎli ni wi sáà nan kěgi kpàánweele na lè, a wi lɔgucaa nyaa yaà wi i kàjemiire fàarí. A wi wi yeri níì jo: «Mii i mɔ nyɛ́ɛri, sa lɔ̀ʔɔ cɛɛri kóo yalele ni mi ba kaan mii ma mii í gbaa.»

¹¹ A wi i syée sa gi kóo. A wi níì wi yeri níì jo: «Mii i mɔ nyɛ́ɛri, búrucerige láa yaà maa maa mii ma.»

¹² A wi wi yari: «Amɛɛ Yawe mɔ Kolocɔlɔw nyɛ lè sìi na, yaliisɔʔɔgwɔɔlɔ faala o nyɛ mii ma í, míimɛ kɔ́bonyɛnnɛ li kòro yaà mii ma kòdɔɔlɔ ni n fàra sìnmɛ cɛɛri na kasànna ni. Wéle, mii i kàjemiiyi naa siin jóo bi jée sa bee bee sámaga mii ní mii pìíw ma, wo lìi, koro kàdoʔo ma wó kùu.»

¹³ A Elii wi pye: «Mɔ a kɔ́ ra fɛ̀ɛgí í, jée mi sa gi kpéʔele àmɛɛ mɔ gi joo lè. Kàjáa ki n yɛlɛ mɔ í sa séli gbɛnʔɛnɛ bi bi pàa sámaga mii ma kàgbalaga mi ba kaan mii ma, koro kàdoʔo ma mɔ a náa pàa sámaga mɔ ní mɔ piiw ma.

¹⁴ Níì cán Yawe Isirayɛli ye Kolocɔlɔw n jo: ‹Kòdoli míimɛ a tée kwɔ́ɔ í, kasǎnni sìnmɛ a wɔ́ɔ kwɔ́ɔ í, fwɔɔ bi taa ba nan cángi na, gee ni Yawe a zěgi yaʔa kaa tuun tári na lè.› »

¹⁵ A wi kári n sáà gi kpéʔele n yɛlɛ ní Elii syɛ́ɛnri ní. A wi yaliire taa ni líi n mɔn woro ní wi kpáagi wòolo ní n fàra Elii na.

¹⁶ Míimi ga kwɔ́ɔ kòdoli ni í, kasǎnni sìnmɛ ga wɔ́ɔ̀ kwɔ́ɔ í, n yɛlɛ ní syɛ́ɛnri ní Yawe da joo lè Elii nyɔ́ɔgi ni.

Elii n lɔgucew pyà nyán

¹⁷ Kérigèle bee kàdoʔo ma céw wi pye lè kpáagi fɔlɔ, a wi pìíw too yaama na, a wi yáami tɔ̀nɔ n gbàn a wi kùu.

¹⁸ A wi Elii pye: «Mɔ Kolocɔlɔɔ syɔ́ɔn, nyàʔá mii pye mɔ na? A mɔ pan lé mii ma bi ba mii sɔ̀ngí taa mii kolomi na si mii pìíw kpóo?»

¹⁹ A wi wi yari: «Mɔ piiw kaan naa.» A wi wi láʔa céw fìcibige na n lúgu ní wi ní kpaataʔagi na, gee ni wi da ni syɔ̀ɔ́n lè, ní sáà wi sínɛgɛ woro yasinɛgi na.

²⁰ Níì Yawe nyɛ́ɛri níì jo: «Yawe mii Kolocɔlɔw, mɔ si zǐn kapeʔe kpéʔele lé lɔgucew naa na wi lè mii jàtigiw bi wi pìíw kpóo?»

²¹ A wi tìgi n sínɛ n sánʔa pìíw na tɔlɔyɔ taanri níì Yawe nyɛ́ɛri níì jo: «Yawe mii Kolocɔlɔw, mii i mɔ nyɛ́ɛri, ki n yɛlɛ mi ní sìíw le pìíw naa ni.»

²² A Yawe Elii yákpoli lóʔo, a pìíw pìle níì lúru n jée wi ni, a wi níì pye sìi na.

²³ A Elii pìíw láa yaà kpaataʔagi ǹjoʔo ni n tìgi n jée ní wi ní táàma kpáagi ni n baa kaan wi nɔ́ɔw ma, níì jo: «Mɔ piiw wi wee sìi na.»

²⁴ A céw Elii pye: «Tɔ́ɔliw ni mii n náà gi cán ncan mɔ i nyɛ Kolocɔlɔɔ syɔ́ɔn, ní wɔ́ɔ̀ gi cán Yawe syɛ́ɛnri di yirigi mɔ nyɔ́ɔgi ni lè ti i nyɛ kányɛʔɛ.»