1 Fànʔafɔbèle 16 - Cebaara Bible 2010

¹ A Yawe syɛ́ɛnri nan Hananii jáaw Zyehu na kánmi naa na Bayesya kánmi na, wi n jo:

² «Mii n mɔ yìrige n yirige támiigi ni n mɔ kpɔ́ʔɔ, níì mɔ kpéʔele mii syɛ́ɛnbèle Isirayɛli ye kùndigiw, á mɔ ba ni táanri Zyerobowami kôdanʔagi ni níì mii syɛ́ɛnbèle Isirayɛli ye lége kapeegèle ni n mii fúngi tanʔa gbanʔama ní be kapeegèle ní,

³ koro na mii a mɔ Bayesya ní mɔ kpáagi wòolo pɛ́ɛ yirige yaà péw bi mɔ kpáagi pye Nɛbati jáaw Zyerobowami kpáagi pyeganma na.

⁴ Bayesya kpaʔa wówee wi ga kùu kěgi ni lè, pɔ́nbèle a wi káa, wee si wi ga kùu sìnbirigi ni lè, nyɛ̀ʔɛni féjɛɛnrɛ ti a wi jɔ́ɔ.»

⁵ Bayesya kasangèle, ní gee wi kpéʔele lè n fàra wi sànbalimi na, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

⁶ A Bayesya kùu n fàra wi toolɛɛbèle na, a be wi tɔ́n Tiirisa ni, á wi jáaw Ela tɛ́ɛn fǎngi na wi sìndɛɛgi ni.

⁷ Yawe syɛ́ɛnri si maa nan Bayesya ní wi kpáagi wòlo na, dee wi da joo lè Hananii jáaw kanyaajoow Zyehu nyɔ́ɔgi ni, gee myɛ kéele na wi da kpéʔele a gi pee Yawe nyɛ́nɛ na lè n wi fúngi tanʔa gbanʔama ní wi kɔ́yi kapyele ní, ní baa pye àmɛɛ Zyerobowami kpáagi wòolo nyɛ lè, ní àmɛɛ wi wɔ́ɔ̀ kpáagi bee wòolo kpúmɔn n kpóo lè.

Ela n pye Isirayɛli fànʔafɔw

⁸ Zyuda fànʔafɔw Aza fǎngi yɛ̀ʔɛlɛ toko ní kɔrɔni wóli na Bayesya jáaw Ela tɛ́ɛn fǎngi na Isirayɛli ye nyúngi na Tiirisa ni. Yɛ̀ʔɛlɛ siin wi kwɔ́ɔ fǎngi na.

⁹ Wi falipyew Zimirii wi pye lè wòtorobèle tíla kùndigi, a woro nyɔɔ kúun wi na. Ela maa pye Tiirisa ni, ni gbo Arisa kpáagi ni n pye àmɛɛ singbaadiɔn nyɛ lè, Arisa wi pye lè fànʔafɔw kpaʔa falipyebèlē nyúngo na Tiirisa ni,

¹⁰ a Zimirii sáà jée kpáagi ni wi kurugo n wi kpúmɔn n kpóo níì tɛ́ɛn fǎngi na wi sìndɛɛgi ni Zyuda fànʔafɔw Aza fǎngi yɛ̀ʔɛlɛ toko ní kɔrɔsiin wóli na.

¹¹ Lǎli ni wi tɛ́nɛ̀ pye lè fànʔafɔlɔ níì tɛ́ɛn wi fàngoli na, a wi Bayesya kpáagi wòolo myɛ kpúmɔn n kpóo, àlí bele be lè pe o nyɛ yariga í wi ga pe wàa yaʔa í, wi sogumɔ wóo yoo, wi tàanyɛnnɛ yoo.

¹² A Zimirii Bayesya kpáagi wòolo myɛ kpóo kpóobeele ni n yɛlɛ ní Yawe syɛ́ɛnri ní wi da joo lè Bayesya kánmi na kanyaajoow Zyehu nyɔ́ɔgi ni,

¹³ Bayesya ní wi jáaw Ela kapeegèle myɛ kéele na, gele pe da kpéʔele lè, níì Isirayɛli ye kɔ́ri n wáa ge na pe i kpéʔele jàngó bi Yawe Isirayɛli ye Kolocɔlɔw fúngo tanʔa.

¹⁴ Ela kasangèle ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

Zimirii n pye Isirayɛli fànʔafɔw

¹⁵ Zyuda fànʔafɔw Aza fǎngi yɛ̀ʔɛlɛ toko ní kɔrɔsiin wóli na Zimirii tɛ́ɛn fǎngi na Tiirisa ni, canya kɔrɔsiin. Koro n gi taa syɛ́ɛnbèle maa pye wodɛ́ɛnbéle ní Gibetɔn taana kapɛɛnni kánma na, gi pye lè Filisitini ye wógi.

¹⁶ Syɛ́ɛnbèle be pye lè wodɛ́ɛnbéle ní, àmɛɛ poro gi lóʔo lè pe i gi nyuu níì jo: «Zimirii n nyɔɔkuunro kpéʔele, àlí wi n caà fànʔafɔw kpóo.» A Isirayɛli ye myɛw fala n Omirii télege Isirayɛli fànʔafɔw tɛɛkòrogi ni cángi bee, wi pye lè kapɛɛnkpumɔnbèle kàfɔlɔ.

¹⁷ Omirii ní Isirayɛli ye myɛ be pye ní wi ní lè a be yìri Gibetɔn ma n sáà tɛ́ɛn Tiirisa taana kapɛɛnni kánma na.

¹⁸ Lǎli ni Zimirii gi nyaa lè pe n fànʔa taa kěgi na, a wi fàn n jée fànʔafɔ-gbaagi fúngo ni, níì fànʔafɔ-gbaagi sórigo n cáan wiyɛɛ na.

¹⁹ Kapeegèle kéele na wi kùu gele wi da ni kpéʔele lè àmɛɛ wi da ni gi kpéʔele, gee gi pee Yawe nyɛ́nɛ na lè, ní i táanri Zyerobowami kôdanʔagi ni, níì wiyɛɛ gaan kapeeli ma, lee Zyerobowami da kpéʔele lè níì Isirayɛli ye kɔ́ri n wáa li na pe i kpéʔele.

²⁰ Zimirii kasangèle ní nyɔɔkuunri wi kpéʔele lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

²¹ Lǎli bee ni a Isirayɛli syɛ́ɛnbèle tíla tɛɛyɛ siin. Syɛ́ɛnbèle tílagaa maa taʔa Tibinii na, wi lè Ginati jáaw, bi wi kpéʔele poro fànʔafɔw, á tílagee taʔa Omirii na.

²² Syɛ́ɛnbèle bele pe da taʔa Omirii na lè, a poro fànʔa taa bele na pe da taʔa Ginati jáaw Tibinii na lè. A Tibinii kùu, á Omirii tɛ́ɛn fǎngi na.

Omirii n pye Isirayɛli fànʔafɔw

²³ Zyuda fànʔafɔw Aza fǎngi yɛ̀ʔɛlɛ toko ní kpɔrigɔ ní nibin wóli na Omirii tɛ́ɛn fǎngi na, Isirayɛli ye nyúngi na. Yɛ̀ʔɛlɛ kɛɛ ní siin wi kwɔ́ɔ fǎngi na. Yɛ̀ʔɛlɛ kɔrɔni wi kwɔ́ɔ fǎngi na Tiirisa ni.

²⁴ Koro kàdoʔo ma a wi Samarii nyanbelegi syɔɔ Syemɛɛri ma wálifiio támabéle selebingéle taanri na, níì kàʔa faan nyanbelegi na níì mɛ́ʔɛ le kěgi na wi faan lè ni gi yiri Samarii, Syemɛɛri mɛ́ɛgi na wi da sélì pye lè nyanbelegi fɔ́lɔ.

²⁵ A Omirii i gi kpéʔele gee gi pee Yawe nyɛ́nɛ na lè. Wi kapyegèle maa pee n sɔ̀lɔ bele myɛ wòʔolo na be pye naa wi yɛʔɛ̀ ma lè.

²⁶ A wi i táanri Nɛbati jáaw Zyerobowami kôdanʔagi myɛ ni, níì wiyɛɛ gaan kapeeli ma, lee na wi da Isirayɛli ye kɔ́ri n wáa pe i kpéʔele lè, n Yawe Isirayɛli ye Kolocɔlɔw fúngo tanʔa gbanʔama ní be yasunyi ní, yi lè gbanzan yáriyi.

²⁷ Omirii kasangèle, ní gee wi kpéʔele lè, n fàra sànbalimi na wi tɛ́ʔɛ n wiyɛɛ dɛ̀ɛn lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

²⁸ A Omirii kùu n fàra wi toolɛɛbèle na, a be wi tɔ́n Samarii ni, á wi jáaw Akabi tɛ́ɛn fǎngi na wi sìndɛɛgi ni.

Akabi n pye Isirayɛli fànʔafɔw

²⁹ Zyuda fànʔafɔw Aza fǎngi yɛ̀ʔɛlɛ toko ní kpɔrigɔ ní kɔrɔtaanri wóli na Omirii jáaw Akabi tɛ́ɛn fǎngi na, Isirayɛli ye nyúngi na. Yɛ̀ʔɛlɛ toko ní siin Omirii jáaw Akabi kwɔ́ɔ fǎngi na Isirayɛli ye nyúngi na Samarii ni.

³⁰ A Omirii jáaw Akabi i gi kpéʔele gee gi pee Yawe nyɛ́nɛ na lè n sɔ̀lɔ bele myɛ na be pye naa wi yɛʔɛ̀ ma lè.

³¹ N wiyɛɛ gaan Nɛbati jáaw Zyerobowami kapeegèle ma a koro cɛ́rɛ n sɔ̀lɔ wi nyɛnɛ na, a wi Siidɔn ye fànʔafɔw Etibaali jáaw Zyezabɛli láa wi cɔɔ̀ ní i syée n sa ni Baali kpɔ̀ʔɔrɔ́ ní i tíri ni tuun wi yɛʔɛ̀ ma.

³² A wi sáriga-wòlo-yafanʔa faan Baali ma, Baali kpɔ̀ʔɔrɔli kpaʔa ni wi faan lè Samarii ni.

³³ A Akabi wɔ́ɔ̀ Asyera yasungaanni sámaga. Akabi n tɔ̀nɔ n Yawe Isirayɛli ye Kolocɔlɔw fúngo tanʔa gbanʔama n sɔ̀lɔ Isirayɛli fànʔafɔbèle myɛ na be pye naa wi yɛʔɛ̀ ma lè.

³⁴ Woro lǎli ni Betɛli ye Hiyɛli ní baa Zyeriko faan. Lǎli ni wi gi kàpɔɔnw le lè, a wi bɔ̀nɔ wi jaalɛɛw Abiirami ni. Lǎli ni wi gi kɔ̀riyi le lè, a wi bɔ̀nɔ wi kàdotɔnw Segubi ni n yɛlɛ ní syɛ́ɛnri ní Yawe da joo lè Nun jáaw Zyozuwe nyɔ́ɔgi ni.