1 Fànʔafɔbèle 15 - Cebaara Bible 2010

Abiyami n pye Zyuda fànʔafɔw

¹ Lǎli ni Nɛbati jáaw Zyerobowami taa lè yɛ̀ʔɛlɛ kɛɛ ní kɔrɔtaanri fǎngi na, a Abiyami tɛ́ɛn fǎngi na Zyuda ye nyúngi na.

² Yɛ̀ʔɛlɛ taanri wi taa fǎngi na Zyerusalɛmi ni. Wi nɔ́ɔw mɛ́ʔɛ ki da pye Maaka wi pye lè Abisyalɔmi jáaw.

³ A wi wiyɛɛ gaan kapeegèle myɛ ma gele wi tóow da kpéʔele naa wi yɛʔɛ̀ ma lè. Yawe wi Kolocɔlɔw kéele da pye wi fúngi ni n foro àmɛɛ wi toolɛɛgi Davidi fúngi da pye lè í.

⁴ Koro ní ki myɛ ní Davidi kéeli na Yawe wi Kolocɔlɔw fàndulugo yaʔa gi kòro wi ma Zyerusalɛmi ni, àmɛɛ wi wi jaawaa yìrige lè, a woro tɛ́ɛn fǎngi na wi kàdoʔo ma níì Zyerusalɛmi yaʔa a wi báriga n kòro beè.

⁵ Níì cán gee gi sín Yawe yɛ́ʔɛ ma lè koro Davidi da ni kpéʔele. Gee myɛ wi da joo n gbàn wi ma lè, wi sìíw canya myɛ ni wi ga tèé wàli n láʔa gi na í kapye Hɛti ye Urii kéeli ni ban í.

⁶ Kapɛɛnnɛ maa pye Worobowami ní Zyerobowami níngi ni Worobowami sìíw canya myɛ ni.

⁷ Abiyami kasangèle, ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ. Kapɛɛnnɛ n pye Abiyami ní Zyerobowami níngi ni.

⁸ A Abiyami kùu n fàra wi toolɛɛbèle na, a be wi tɔ́n Davidi kěgi ni, á wi jáaw Aza tɛ́ɛn fǎngi na wi sìndɛɛgi ni.

Aza n pye Zyuda fànʔafɔw

⁹ Isirayɛli fànʔafɔw Zyerobowami fǎngi yɛ̀ʔɛlɛ toko wólo na, Aza tɛ́ɛn fǎngi na n pye Zyuda fànʔafɔw.

¹⁰ Yɛ̀ʔɛlɛ togoye siin ní nibin wi taa fǎngi na Zyerusalɛmi ni. Wi nɔɔlɛɛgi mɛ́ʔɛ ki da pye Maaka. Céw bee maa pye Abisyalɔmi jáa.

¹¹ A Aza i gi kpéʔele gee gi sín Yawe nyɛ́nɛ na lè àmɛɛ wi toolɛɛgi Davidi da pye lè.

¹² A wi yasunyi kanɔnʔɔbyenànbēle nɛnɛ n yirige tári ni. Yasunyee wi toolɛɛbèle da sámaga lè, níì yoro myɛ yirige yaà.

¹³ Alí wi n wi nɔɔlɛɛgi Maaka yìrige fǎngi na wi pye lè fànʔafɔw nɔ́ɔ, níì cán wi maa yasungo sámaga Asyera wóʔo. A Aza wi yasungi kpúmɔn n cáan ní sáà gi sórigo Sedurɔn gòrógoroweegi ni.

¹⁴ Kàjáa sáriga-wòlo-tɛ́ɛyi da kálagi n núngo yaà í, àlí n gi yaʔa Aza fúngi maa sín n foro Yawe yɛ́ʔɛ ma wi sìíw canya myɛ ni.

¹⁵ Yáriree wi tóow da yaʔa kɔlɔ̀ na Kolocɔlɔɔ ma lè, ní dee woro tiimaa da yaʔa kɔlɔ̀ na Kolocɔlɔɔ ma lè, ti lè wálifiiw, ní tɛ́ɛw, n fàra yariraa nikwɔɔ na, a wi toro láa n sáà tɛ́ʔɛ Yawe kpáagi ni.

¹⁶ Kapɛɛnni maa pye Aza ní Isirayɛli fànʔafɔw Bayesya níngi ni be sìíw làla myɛ ni.

¹⁷ A Isirayɛli fànʔafɔw Bayesya kári Zyuda kánmi na. A wi sáà Arama faan koro ga pye bi Zyuda fànʔafɔw Aza wóbèle yérige, pe a kɔ́ ra yirigi sáā jǐn í.

¹⁸ A Aza wálifiiw myɛ ní tɛ́ɛw myɛ láa wi da kòro lè Yawe kpáagi lɔ́rɔ tɛɛkɔngɔ, ní fànʔafɔw kpaʔa lɔ́rɔ tɛɛkɔngɔ ni n le wi falipyebèle kɔ́yɔ ni, níì be tun Sirii fànʔafɔw Bɛn-Hadadi ma, wi pye lè Tabirimɔn jáaw, Tabirimɔn wi pye lè Ezyɔn jáaw, wi si i nyɛ wodɛ́ɛɔn ní Damasi ni, níì jo be sa wi pye:

¹⁹ «Joogaanna n yɛlɛ li pye mii ní mɔ níngi ni àmɛɛ joogaanna da pye lè mii tóow ní mɔ tóow nínge ni. Wéle, mii n wálifiiw ní tɛ́ɛw naa tórigo mɔ ma kpɔʔɔrɔ. Kári mi sa mɔ joogaanni kálagi li nyɛ lè mɔ ní Isirayɛli fànʔafɔw Bayesya níngi ni, koro ga pye wi yìri wi léeli mii na.»

²⁰ A Bɛn-Hadadi lóʔo fànʔafɔw Aza ma, níì wi sùlasiibèle kàfɔɔlɔ tórigo Isirayɛli kěyi kánma na. A be Iyɔn, ní Dan, ní Abɛli-Bɛti-Maaka jáa, Kinerɛti tɛ́nɛmi myɛw, n fàra Nɛfitalii tári myɛ na.

²¹ Lǎli ni Bayesya gi lóʔo lè, a wi Arama faanni yaʔa ní sáà kòro Tiirisa ni.

²² Lǎli bee ni a fànʔafɔw Aza Zyuda ye myɛw yeri, wi ga pe wàa yaʔa í, pe sa kàdɛnɛri ní tíiri tugo, dee ní Bayesya da ni faanni kpéʔele lè. A fànʔafɔw Aza sáà di tɛ́ʔɛ n Geba faan ki lè Bɛnzyamɛ wógi, n fàra Misipa na.

²³ Aza kasangèle myɛ, ní wi sànbalimi myɛ n fàra gee myɛ na wi kpéʔele lè, ní kěyee wi faan lè, gee bee myɛ n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ. Lǎli ni wi baa lɛɛ lè, a tɔ́lɔyi i wi yáa.

²⁴ A Aza kùu n fàra wi toolɛɛbèle na. A be wi tɔ́n wi toolɛɛbèle taana Davidi kěgi ni wi lè wi toolɛɛgi. A wi jáaw Zyozafati tɛ́ɛn fǎngi na wi sìndɛɛgi ni.

Nadabi n pye Isirayɛli fànʔafɔw

²⁵ Zyuda fànʔafɔw Aza fǎngi yɛɛziin wólo na, Zyerobowami jáaw Nadabi tɛ́ɛn fǎngi na Isirayɛli ye nyúngi na. Yɛ̀ʔɛlɛ siin wi kwɔ́ɔ fǎngi na Isirayɛli ye nyúngi na.

²⁶ A wi i gi kpéʔele gee gi pee Yawe nyɛ́nɛ na lè, ní i táanri wi tóow kôdanʔaga ni n wiyɛɛ gaan kapeeli ma, lee wi da Isirayɛli ye kɔ́ri pe i kpéʔele lè.

²⁷ Bayesya wi pye lè Ahiya jáaw, ní i nyɛ Isakari kpáagi wówaa, a woro nyɔɔ kúun wi na. A Bayesya wi kpúmɔn n kpóo Gibetɔn ni, ki da pye lè Filisitini ye wóʔo, lǎli ni Nadabi ní Isirayɛli ye myɛw da sáà tɛ́ɛn Gibetɔn taana lè kapɛɛnni kánma na.

²⁸ Zyuda fànʔafɔw Aza fǎngi yɛɛdaanri wólo na Bayesya wi kpóo, níì tɛ́ɛn fǎngi na wi sìndɛɛgi ni.

²⁹ Lǎli ni wi pye lè fànʔafɔlɔ, a wi Zyerobowami kpáagi wòolo myɛ kpóo, wi ga pe wàa faala yaʔa a wi syɔɔ í n yɛlɛ ní syɛ́ɛnri ní, dee Yawe da joo wi falipyew Ahiya nyɔ́ɔgi ni lè wi lè Silo ye wów,

³⁰ kapeegèle kéele na, gele Zyerobowami da kpéʔele lè níì Isirayɛli ye kɔ́ri pe i ge kpéʔele n Yawe Isirayɛli ye Kolocɔlɔw fúngo tanʔa kánmi bee na.

³¹ Nadabi kasangèle, ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

³² Kapɛɛnni maa pye Aza ní Isirayɛli fànʔafɔw Bayesya níngi ni be sìíw làla myɛ ni.

Bayesya n pye Isirayɛli fànʔafɔw

³³ Zyuda fànʔafɔw Aza fǎngi yɛɛdaanri wólo na Ahiya jáaw Bayesya tɛ́ɛn fǎngi na Isirayɛli myɛw nyúngo na Tiirisa ni. Yɛ̀ʔɛlɛ toko ní sicɛrɛ wi kwɔ́ɔ fǎngi na.

³⁴ A wi i gi kpéʔele, gee gi pee Yawe nyɛ́nɛ na lè, ní i táanri Zyerobowami kôdanʔagi ni n wiyɛɛ gaan kapeeli ma, lee wi da Isirayɛli ye kɔ́ri pe i kpéʔele lè.