1 Fànʔafɔbèle 14 - Cebaara Bible 2010

Zyerobowami fǎngi kàdoʔo kéele

¹ Lǎli bee ni a Zyerobowami jáaw Abiya too yaama na.

² A Zyerobowami wi céw pye: Ki n yɛlɛ mi mɔ kánmi kàriga koro ga pye syɔɔn a kɔ́ gi cán bi cán mɔ i nyɛ Zyerobowami cɔ́ɔ í, mí kári Silo ma. Wéle, nɛɛ bee kanyaajoow Ahiya nyɛ, woro wee wi da gi joo mii kéeli na lè níì jo mii a ba pye syɛ́ɛnbèle naa fànʔafɔlɔ.

³ Búrubéle kɛɛ láa ní kàgbalaya ní n fàra sétɔɔlɔ na, mi kári wi ma. Gee ki a pye nànbili na lè, wi a sa gi joo mɔ ma.

⁴ A Zyerobowami céw gi kpéʔele kánmi bee na, níì yìri n kári Silo ma n sáà jée Ahiya kpáagi ni. Ahiya da níì gbàn ni nyaagi í, níì cán wi nyapiigèle da ní ni kàragí í lɛɛri báriga ni.

⁵ Yawe maa Ahiya pye: «Wéle, Zyerobowami céw wi wiyɛɛ làriga ní i maa wee bi ba mɔ yíbe wi pìíw kéele na wi yáa lè. Ki n yɛlɛ mi ba syɛ́ɛnri naa ní syɛ́ɛnri naa joo wi ma.»

⁶ Lǎli ni Ahiya wi tánʔami lóʔo lè wi làrijeeli ni kpaaweeli na, a wi wi pye: «Da jǐn naa Zyerobowami céw. Nyàʔá na mɔ mɔ kánmi kàriga n pye mɔ a jo mɔ i nyɛ cewaa nikwɔɔ? Pe n mii tun mɔ ma ní syɛɛngbanra ní.

⁷ Da syée mi sa Zyerobowami pye: ‹Yawe Isirayɛli ye Kolocɔlɔw n jo: Mii n mɔ kpɔ́ʔɔ syɛ́ɛnbèle nínge ni, mii n mɔ télege mɔ í pye mii syɛ́ɛnbèle Isirayɛli yɛɛ̀kiniw.

⁸ Mii n fǎngi nɛnɛ n syɔɔ Davidi kpáagi wòolo ma n kaan mɔ ma. Kàjáa mɔ ga pye àmɛɛ mii falipyew Davidi da pye lè í, woro wee wi da mii kajoodɛɛngèle kɔn lè, níì wiyɛɛ daʔa mii na ní wi fúngi myɛ ní, níì kòro ni gi kpéʔele, gee gi sín mii nyɛ́nɛ na lè.

⁹ Mɔ n kapeele pye n sɔ̀lɔ mɔ yɛ́ʔɛ ma wóbèle myɛ na. Mɔ n kári n sáà kolocɔlɔbèle pèle nikwɔɔlɔ sámaga miyɛɛ ma, ní tunmɔgbalara yasunyo jàngó bi mii fúngi tanʔa gbanʔama, níì mii wáa miyɛɛ kàdoʔo ma!

¹⁰ Koro na mii a kapeʔe yeri bi cáan Zyerobowami kpáagi wòolo na. Mii a Zyerobowami wóbèle myɛ kwɔ́ɔ yirige yaà àlí bele be lè pe o nyɛ yariga í, bele be nyɛ lè pulobèlē wàlá wɔ́rɔbéle Isirayɛli ni. Mii a Zyerobowami kpáagi wòolo pɛ́ɛ yirige yaà àmɛɛ syɔɔn gáà kànyaʔara koli lè tɛʔɛ ni, bi taa be kwɔ́ɔ péw.

¹¹ Zyerobowami kpaʔa wówee wi ga kùu kěgi ni lè, pɔ́nbèle a wi káa, wee si wi ga kùu sìnbirigi ni lè, nyɛ̀ʔɛni féjɛɛnrɛ ti a wi jɔ́ɔ, níì cán Yawe wi jo nya.›

¹² Mɔ si na, yìri maa syée mɔ kpaʔa ma. Mɔ ga tɛ́nɛ sa ni nyɔ̌nni cáan kěgi ni, pìíw a kùu.

¹³ Isirayɛli ye myɛw a kùu káyaagi kpéʔele wi kéeli na si wi tɔ́n, níì cán woro nibin wi nyɛ Zyerobowami kpáagi wòolo ni, wee pe a tɔ́n nyanga ni lè. Ncan woro nibin wi nyɛ Zyerobowami kpáagi wòolo ni, wee ni yacanga nyaa lè Yawe Isirayɛli ye Kolocɔlɔw yɛ́ʔɛ ma.

¹⁴ Yawe a fànʔafɔwaa télege wiyɛɛ ma Isirayɛli ye nyúngi na, wee wi a Zyerobowami kpáagi wòolo kálagi bi be kwɔ́ɔ yirige yaà lè cángi bee na. Cángi bee ban ki nan n kwɔ́ɔ gee ì? Nyàʔá? Lǎli naa tiimaa ni wii!

¹⁵ Yawe a Isirayɛli kpúmɔn, ki a pye wi na àmɛɛ nyɛ́nɛri nyɛ di fúugu lǒyi ni lè. Wi a Isirayɛli ye kɔ́n yirige tácǎnri naa ni wi da kaan be toolɛɛbèle ma lè si be cariga cábigi jeligɔgee na. Níì cán pe n Asyera yasungaangéle sámaga peyɛɛ ma n Yawe fúngi tanʔa gbanʔama.

¹⁶ Wi a Isirayɛli ye le keele ni kapeegèle kéele na, gele Zyerobowami kpéʔele lè, níì Isirayɛli ye kaan pe i ge kpéʔele.»

¹⁷ A Zyerobowami céw yìri n kári. A wi sáà nan Tiirisa na. Lǎli ni wi sa ni nangi kpaaweeli na lè a nànbili kùu.

¹⁸ A be wi tɔ́n, á Isirayɛli ye myɛw wi kùu káyaagi kpéʔele n yɛlɛ ní syɛ́ɛnri ní, dee Yawe da joo wi falipyew Ahiya nyɔ́ɔgi ni lè wi lè kanyaajoow.

¹⁹ Zyerobowami kasangèle ke lè àmɛɛ wi kapɛɛnni kpúmɔn n sɛ́ɛ lè, ní àmɛɛ wi pye fǎngi na n sɛ́ɛ lè, gee bee n sɛ́bɛ Cányi kèlē sɛ́bɛ ni wi lè Isirayɛli fànʔafɔbèle sɛ́bɛ.

²⁰ Lǎlee Zyerobowami kwɔ́ɔ fǎngi na lè, li n pye yɛ̀ʔɛlɛ toko ní siin á wi kùu n fàra wi toolɛɛbèle na, a wi jáaw Nadabi tɛ́ɛn fǎngi na wi sìndɛɛgi ni.

Zyuda fànʔafɔw Worobowami fǎngi kàdoʔo kéele

²¹ Salomɔn jáaw Worobowami wi da tɛ́ɛn fǎngi na Zyuda ye nyúngi na. Lǎli ni wi pye lè fànʔafɔlɔ yɛ̀ʔɛlɛ togoye siin ní nibin wi da taa, níì tɛ́ɛn fǎngi na yɛ̀ʔɛlɛ kɛɛ ní kɔrɔsiin Zyerusalɛmi ni, kěgee Yawe da nyɛ́nɛ n wòlo lè Isirayɛli syɛɛnfeleyi myɛ nínge ni bi woro mɛ́ɛgi taʔa gi na. Wi nɔ́ɔw mɛ́ʔɛ ki da pye Naama, wi pye lè Amɔn ye wów.

²² A Zyuda ye i gi kpéʔele gee gi pee Yawe nyɛ́nɛ na lè. A be wi yejaagi yìrige wi ma n sɔ̀lɔ gee na ki lè pe toolɛɛbèle da gi kpéʔele be kapeegèle báriga ni nyáana í.

²³ A be wɔ́ɔ̀ sáriga-wòlo-tɛ́ɛyɛ sámaga peyɛɛ ma níì yafaanya, ní Asyera yasungaangéle sámaga nyanbe-nyundɔnɔyi myɛ ǹjoyo ni, ní tiipiriyi myɛ láara ni.

²⁴ Alí kanɔnʔɔbyenànbēle n pye tári ni. Syɛɛnfeleyee Yawe nɛnɛ n yirige yaà lè Isirayɛli ye yɛ́ʔɛ ma, a be i yee bee kapeeye félege kpéʔele.

²⁵ A ki ga pye Worobowami fǎngi yɛ̀ʔɛlɛ kagunɔ na, a Ezyipiti fànʔafɔw Syisyaki pan Zyerusalɛmi kánmi na.

²⁶ A wi Yawe kpáagi lɔ́rɔ láa n fàra fànʔafɔw kpaʔa lɔ́rɔ na, wi maa ti myɛ láa. Tɛ́ɛw tunmɔzige-yariya Salomɔn da sámaga lè, a wi yoro myɛ láa.

²⁷ A fànʔafɔw Worobowami si kanyɛɛnrɛ tunmɔzige-yariyaa sámaga yi sìndɛɛgi ni, níì yi kàlifáa gáridibèle kàfɔɔlɔ ma be fànʔafɔ-gbaagi kpaaweele kɔ̀rɔsíi lè.

²⁸ A gi pye fànʔafɔw ga ni syée Yawe kpɔ̀ʔɔrɔli kpaʔa ma lǎlee faala ni lè, gáridibèle n yi láa, koro kàdoʔo ma pe n lúru n baa yi tɛ́ʔɛ yaà gáridibèle kpaafungo ni.

²⁹ Worobowami kasangèle, ní gee myɛ wi kpéʔele lè, gee bee n sɛ́bɛ Cányi kèlē sɛ́bɛ ni wi lè Zyuda fànʔafɔbèle sɛ́bɛ.

³⁰ Kapɛɛnnɛ n pye Worobowami ní Zyerobowami níngi ni làla o làla.

³¹ A Worobowami kùu n fàra wi toolɛɛbèle na, a be wi tɔ́n wi toolɛɛbèle taana Davidi kěgi ni. Wi nɔ́ɔw mɛ́ʔɛ ki da pye Naama, wi pye lè Amɔn ye wów. A wi jáaw Abiyami tɛ́ɛn fǎngi na wi sìndɛɛgi ni.