1 Fànʔafɔbèle 12 - Cebaara Bible 2010

Sisyɛmi kpóʔoroli kéele

¹ A Worobowami kári Sisyɛmi ma níì cán Isirayɛli ye myɛ maa pan Sisyɛmi ma bi ba wi télege fànʔafɔlɔ.

² Lǎli ni Nɛbati jáaw Zyerobowami gi lóʔo lè wi maa sèʔê pye yaà Ezyipiti ni, beè wi da fàn fànʔafɔw Salomɔn na n kári lè. Ezyipiti ni Zyerobowami da pye wodɛ́ɛɔn ní.

³ A be tun a be sáà wi yeri n pan. A Zyerobowami ní Isirayɛli syɛ́ɛnmi myɛ kpóʔoro n kári Worobowami ma n sáà joo ní wi ní níì jo:

⁴ «Mɔ tóow maa wolo zúuw gbàn n baa sɔ̀lɔ. Tɔ́ɔliw ni kàa yirige wolo pɔrɔtɔɔri faligbanga ni mɔ tóow da taʔa wolo na lè ní zúulibegi wi da taʔa wolo na lè, wolo a ra báara mɔ ma.»

⁵ A wi be pye: «Yaa syée. Canya taanri ga sáà kwɔ́ɔ ye ní lúru naa mii ma.» A syɛ́ɛnmi kári.

⁶ A fànʔafɔw Worobowami lálii caa wolɛɛbèle ma pe da ni kòró wi tóow Salomɔn taana lè wi sìíw làla ni, níì jo: «Nyàʔá yele caa mii í ba joo syɛ́ɛnbèle bee ma?»

⁷ A be wi pye: «Mɔ ga miyɛɛ bye syɛ́ɛnbèle naa fálipyeo níjanʔa, ni báara be ma, níì syɛɛnlurugori joo be ma wojanra ní, pe a kòro mɔ falipyebèlē làla o làla.»

⁸ Kàjáa láliiw wolɛɛbèle kaan Worobowami ma lè wi ga wi córo í, níì wi pìinyɛnbèle nyaa n joo, bele be pínɛ n lɛɛ ní wi ní lè, poro bele be kòró wi taana lè.

⁹ Wi n be pye: «Syɛɛnlurugodìí yele caa mii í ba kaan syɛ́ɛnbèle bee ma pe baa syɛ́ɛnri naa joo mii ma lè níì jo: ‹Zúuw túgoro faʔa, wee mɔ tóow taʔa wolo na lè?› »

¹⁰ Bele be pye lè wi pìinyɛnbèle, poro bele be pínɛ n lɛɛ ní wi ní lè, a poro wi yari: «Syɛ́ɛnbèle bee pe baa syɛ́ɛnri naa joo mɔ ma lè níì jo: ‹Mɔ tóow n wolo zúuw túgoro líbe, ti faʔa wolo na!› Ki joo be ma kánmi naa na mí be pye: ‹Mii kabepili n kpɔ́ʔɔ n sɔ̀lɔ mii tóow sémɛɛnnɛ na.

¹¹ Tɔ́ɔliw ni mii tóow maa zúuw túgoro líbe yele na mii si a ní kàa fàra yele zúuw líbele na. Mii tóow maa ni yele kpúmɔn ni kàragí ní sapiigèlē ní, kàjáa náabéle ní mii a ra yele kpúmɔn da kàragí.› »

¹² A ki ga pye candaanri wógi na, a Zyerobowami ní syɛ́ɛnbèle myɛ pan Worobowami ma n yɛlɛ ní gee ní fànʔafɔw da joo lè níì jo: «Canya taanri ga sáà kwɔ́ɔ ye ní lúru naa mii ma.»

¹³ A fànʔafɔw baa syɛɛnlurugori kaan syɛ́ɛnbèle ma ní fungbanga ní, láliiw wolɛɛbèle da kaan wi ma lè, wi ga wi córo í.

¹⁴ Wi maa joo ní be ní kánmi naa na n yɛlɛ ní nìgɔcaribèle syɛ́ɛnrɛ ní níì jo: «Mii tóow n yele zúuw túgoro líbe, mii si a ní kàa fàra yele zúuw líbele na. Mii tóow maa ni yele kpúmɔn ní sapiigèlē ní, kàjáa náabéle ní mii a ra yele kpúmɔn.»

¹⁵ Kánmi bee na fànʔafɔw ga lóʔo syɛ́ɛnbèle ma í. Níì cán Yawe wi da kéeli bee kàriga nya koro ga pye Yawe syɛ́ɛnri í foro, dee wi da joo lè Nɛbati jáaw Zyerobowami ma Ahiya nyɔ́ɔgi ni, wi lè Silo ye wów.

Fǎngi wàlila kéele

¹⁶ Lǎli ni Isirayɛli ye myɛw gi nyaa lè fànʔafɔw ga lóʔo poro ma í, a be fànʔafɔw yari: «Lɛɛlìí li nyɛ wolo ma Davidi ni? Kɔrigɔ faala o nyɛ wolo ma Izayi jáaw ni í. Yele Isirayɛli ye, yaa syée ye kpaaya ma! Tɔ́ɔliw ni Davidi da cáan maa yìrigí ní mɔ kpáagi ní.» A Isirayɛli ye kári be kpaaya ma.

¹⁷ Isirayɛli syɛ́ɛnbèle be pye lè wodɛ́ɛnbéle ní Zyuda kěyi ni, Worobowami maa pye poro yagana fànʔafɔw.

¹⁸ Lǎli bee ni a fànʔafɔw Worobowami Adorami tun wi da ni pɔ́rɔtɔɔbèle fáli saanri ni wéle lè, a Isirayɛli ye myɛw sáà wi wábagi n kpóo ní kàdɛnɛri ní. A gi pye ŋàʔanaga a fànʔafɔw Worobowami jée wòtorowaa ni n fàn n kári Zyerusalɛmi ma.

¹⁹ Kánmi bee na Isirayɛli ye Davidi kpáagi wòolo cée fwɔɔ n taa n baa nan níjanʔa na.

²⁰ Lǎli ni Isirayɛli ye myɛw gi lóʔo lè Zyerobowami n lúru n pan, a be tun a be wi yeri a pe baa kpóʔoro ní baa wi télege fànʔafɔlɔ Isirayɛli ye myɛ nyúngi na. Wàa faala ga níì taʔa Davidi kpáagi wòolo na kapye Zyuda syɛɛnfelegi ban í.

²¹ A Worobowami ga baa nan Zyerusalɛmi na, a wi Zyuda kpáagi wòolo myɛ, ní Bɛnzyamɛ syɛɛnfelegi wòolo kpóʔoro, a be pye kapɛɛnkpumɔn-jàbɔɔlɔ, sirakamayɛ kpanjɛrɛ jàngó bi kári sa kapɛɛnni kpúmɔn ní Isirayɛli kpáagi wòolo ní si ní fǎngi lúrugo gi pye Worobowami wóʔo, wi lè Salomɔn jáaw.

²² Kàjáa a Kolocɔlɔɔ syɛ́ɛnri nan Syemayeya na wi lè Kolocɔlɔɔ syɔ́ɔnw wi n jo:

²³ «Ki joo Salomɔn jáaw Worobowami ma wi lè Zyuda fànʔafɔw, ní Zyuda kpáagi wòolo myɛ, ní Bɛnzyamɛ wóbèle ma n fàra syɛɛnsanbèle na, mí be pye:

²⁴ Yawe n jo: ‹Yele a kɔ́ kári yaà í. Yele a kɔ́ sa kapɛɛnnɛ kpúmɔn ní yele senyɛnbèle Isirayɛli ye ní í. Ki n yɛlɛ ye myɛ nibin nibin í lúru bàā syée ye kpaaya ma. Níì cán mii má kéeli bee yìri.› » A be yére Yawe syɛ́ɛnri ni níì lúru n kári àmɛɛ Yawe da gi joo lè.

²⁵ A Zyerobowami Sisyɛmi faan Efirayimi nyanbeleyi kúlo ni níì tɛ́ɛn gi ni. Koro kàdoʔo ma a wi yiri yaà beè n sáà Penuwɛli faan.

Zyerobowami kapeeli

²⁶ A Zyerobowami gi joo wiyɛɛ fúngi ni níì jo: «Tɔ́ɔliw ni ki ga kòro nya fǎngi a ní gbǎn lúru Davidi kpáagi wòolo ma.

²⁷ Syɛ́ɛnbèle naa ga ni syée Zyerusalɛmi ma n sa ni sárigaw wóo Yawe kpáagi ni, syɛ́ɛnbèle naa fúnyo a ní tɔ̀nɔ́ lúru taʔa be kàfɔw Worobowami na wi lè Zyuda fànʔafɔw. Pe si a mii kpóo si lúru peyɛɛ gaan Worobowami ma wi lè Zyuda fànʔafɔw.»

²⁸ A fànʔafɔw ga pèle nyaa n joo ní be ní n kwɔ́ɔ a wi tɛɛ̀ náapiiye siin sámaga níì syɛ́ɛnbèle pye: «Yele n kɔ́ɔ̀ kári n yɛlɛ nya Zyerusalɛmi ma! Yele Isirayɛli ye, yele kolocɔlɔbèle be nyɛ bele naa, poro bele be yele yirige Ezyipiti tári ni lè.»

²⁹ A wi kàa tɛ́ʔɛ Betɛli ni níì gee tɛ́ʔɛ Dan ni.

³⁰ A gee bee pye kapeebyere sábabu. Syɛ́ɛnbèle maa ni syée náapiiyi bee kàa ma fwɔɔ Dan ma.

³¹ A Zyerobowami sáriga-wòlo-tɛ́ɛyɛ kpaʔa faan níì sáriga-wòlobēle nyɛ́nɛ n wòlo syɛ́ɛnbèle myɛ ni bele be lè pe da pye Levii yòdaʔaya í.

³² A Zyerobowami fɛ́tii canʔa tɛ́ʔɛ ki pye yɛ́ɛli yeye kɔrɔtaanri wóʔo canya kɛɛ ní kagunɔ wógi na. A fɛ́tiiw bee pye wee félege pe da ni kpéʔele Zyuda ni lè. A wi lúgu sáriga-wòlo-yafaangi na. A wi gi kpéʔele kánmi bee na Betɛli ni n sáriga wòlo náapiiyi ma yee wi sámaga lè. A wi sáriga-wòlo-tɛ́ɛyi sáriga-wòlobēle télege Betɛli ni, yee wi da sámaga lè.

Betɛli kpɔ̀ʔɔrɔli tɛ́ʔɛ dángala kéele

³³ A Zyerobowami lúgu sáriga-wòlo-yafaangi na wi da sámaga lè Betɛli ni yɛ́ɛli yeye kɔrɔtaanri wóʔo canya kɛɛ ní kagunɔ wógi na, yégi bee wi tiimaw da kɔ̀rirɔ n nyɛ́nɛ n wòlo lè. A wi fɛ́tii kpéʔele Isirayɛli yòdaʔayi ma, níì lúgu sáriga-wòlo-yafaangi na bi nùndaanna yárira sórigo.