1 Fànʔafɔbèle 10 - Cebaara Bible 2010

Saba fànʔafɔjew n pan ba Salomɔn wéle

¹ A Saba fànʔafɔjew ga Salomɔn mɛ́ɛkpɔɔgi kéele lóʔo Yawe mɛ́ɛgi kéele na, a wi pan wi ma ba wi sɛʔɛ wéle ní kàseegéle ní.

² A wi baa nan Zyerusalɛmi na ní syɛɛnnɛʔɛmɛ ní, bee pi da pye ní wi ní lè, n fàra fàlibaaya na, yee yi da nùndaanna yárira, ní tɛɛ̀ saʔa, ní lɔgbanra kadɛɛngèlē tugo lè. A wi pan Salomɔn ma. Kérigèle myɛ ke da pye wi fúngi ni lè, a wi ge joo wi ma.

³ A Salomɔn wi yíbeyi myɛ lúrugo wi ma. Yafyɛn da làra fànʔafɔw na, gee gi lè wi da pye bi gbǎn gi fílige tɛ̀ɛn wi na í.

⁴ A Saba fànʔafɔjew Salomɔn sícilimi myɛ nyaa, n fàra fànʔafɔ-gbaagi na wi da faan wiyɛɛ kéeli na lè,

⁵ ní wi tɛɛlìigi yaliire, ní wi syɛɛnkpolobèle tɛɛ̀syɔɔnyɔ, ní bele be báara wi ma lè poro fáliw ní bee yaleri, ní wi yagbaagi kaanfɔɔlɔ, ní sáriga-sórigow wi da ni wóo Yawe kpáagi ni lè, a gee bee wi nyínima.

⁶ A wi fànʔafɔw pye: «Gee mii da lóʔo mɔ nyɔɔsyɛɛnri, ní mɔ sícilimi kéele na n mii yaʔa yaà mii tári ni lè, ki maa pye kányɛʔɛ.

⁷ Mii da tága syɛ́ɛnri bee na í, fwɔɔ n taa a mii pan nɛɛ̀ naa a mii nyapiigèle baa nyaa. Wéle, àlí pe da caà gbàn n gi tílaw joo mii ma í. Mɔ sícilimi ní mɔ taali ní mɔ mɛ́ɛgi kpɔ́ʔɔlɔ n sɔ̀lɔ gee na mii da lóʔo lè.

⁸ Mɔ syɛ́ɛnbèle i nyɛ dùba pìibēle, mɔ falipyebèle be yèré mɔ yɛ́ʔɛ ma ni mɔ sícilimi syɛ́ɛnrɛ lúro lè, pe i nyɛ dùba pìibēle.

⁹ Yawe wi lè mɔ Kolocɔlɔw, wi n yɛlɛ waa wi kpɔ̀ʔɔrɔ́, woro wee wi nyɔɔ mɔ na lè níì mɔ télege Isirayɛli fàngoli na. Amɛɛ Isirayɛli ye kéeli Yawe dɛ́nɛ lè làla o làla, koro na wi mɔ télege fànʔafɔlɔ jàngó mɔ í da kányɛɛgi ní sínni kèlē kpéʔele.»

¹⁰ A wi tɛɛ̀ tɔ́nibéle taanri ní tíla félege kaan fànʔafɔw ma, n fàra nùndaanna yárira saʔa, ní lɔgbanra kadɛɛngèlē na. Nùndaanni yárira Saba fànʔafɔjew baa kaan fànʔafɔw Salomɔn ma lè, ti felege ga níì pan í.

¹¹ Hirami bàtobèle pe da yìri ní tɛ́ɛw ní Ofiiri ma n pan lè, pe maa wɔ́ɔ̀ yìri yaà Ofiiri ma n pan ní tiicanra saʔa ní, n fàra lɔgbanra kadɛɛngèlē na.

¹² A fànʔafɔw tiipɔɔlɔ sámaga ní tiicanri ní Yawe kpáagi, ní fànʔafɔw kpaʔa kéele na, n fàra kɔ̀ríbéle ní dǎngbogéle na, ŋùuvɔbèle ma. Tiicanri bee tàa félege ga níì pan í, syɔɔn ga níì di felege nyaa í, fwɔɔ n baa nan níjanʔa na.

¹³ Yariga o yariga Saba fànʔafɔjew da ni caa lè, gee wi nyɛ́ɛri lè a fànʔafɔw Salomɔn di kaan wi ma, ní wɔ́ɔ̀ kpɔʔɔraa kaan wi ma n fàra dee na n yɛlɛ ní fànʔafɔlɔ kánma ní àmɛɛ woro Salomɔn nyɛ lè. Koro kàdoʔo ma a wi lúru n kári wi tári ma, woro ní wi falipyebèle ní.

Salomɔn lɔ́ri kéele

¹⁴ Tɛ́ɛw wi da ni maa Salomɔn ma lè yɛɛlɛ o yɛɛlɛ wi n pye tɛɛ̀ tɔ́nibéle toko félege,

¹⁵ n náà fàra wee na wi da ni taagi bele má pe wi caa kàbanyaa na ni maa lè, ní jàgiwáabèle be syée ni syoo tátɛɛyaa ma lè poro wów n fàra fànʔafɔbèle bele wóo na be pwɔɔ peyɛɛ na lè, ní tári kakarigabēle wogaaɔn.

¹⁶ A fànʔafɔw Salomɔn tunmɔzige-yakpoloyo sirakele sámaga ní tɛɛ̀ ní, wee be kpúmɔn lè. Yi myɛ nibin nibin maa sámaga ní tɛɛ̀ cúlobéle kɔrɔni kɔrɔni ní,

¹⁷ ní tunmɔzige-yapiigéle sirakele ní dabata, gele wi sámaga ní tɛɛ̀ ní wee be kpúmɔn lè. Tɛɛ̀ cúlobéle nibin nibin ní tíla wi da tɛ́ʔɛ n ke myɛ nibin nibin sámaga. A fànʔafɔw ge tɛ́ʔɛ Liban-kɔ́ligi-kpaʔa ni.

¹⁸ A fànʔafɔw sogànʔana fangorikpɔʔɔ sámaga, níì tɛɛteleo tɛ́ʔɛ n gi tɛ́ɛyi myɛ tɔ́n.

¹⁹ Tɔdaʔagéle kɔrɔni na pe da ni lúru fàngoli bee na. Fàngoli kàdoʔoma tɛɛsalaga maa pye círiri. Kɔdaʔaya maa pye fàngoli kàbanya siin na. Càarabēle siin maa pye a pe be tan n yérige kɔdaʔayi lɛ̀ʔɛgēle ni.

²⁰ Càarabēle kɛɛ ní siin si i nyɛ wodan-yérigebéle ní tɛɛ̀lúgugèle kɔrɔni kabanya siin na. Li felege da sámaga fàngaa faala ni í.

²¹ Fànʔafɔw Salomɔn yagbaagèle myɛ maa pye tɛɛ̀ wòʔolo. Liban-kɔ́ligi-kpaʔa yayigelere myɛ maa pye tɛɛcàndeleo wóro, ki kàa faala da pye wálifiio wóʔo í. Wálifiiw da ni córo Salomɔn lǎli ni í,

²² níì cán Tarisiisi bàtobèle maa pye Salomɔn ma ní Hirami bàtobèle ní, sólomi lɔ̀ʔɔ ni. Yɛ̀ʔɛlɛ taanri o yɛ̀ʔɛlɛ taanri ga kwɔ́ɔ, Tarisiisi bàtobèle n pan ní tɛ́ɛw ní, n fàra wálifiiw, ní sogǎngèle, ní kòtunbéle, ní féjɛɛnyaa félege na.

²³ Fànʔafɔw Salomɔn maa sɔ̀lɔ tári fànʔafɔzanbèlē myɛ na, lɔ́ri, ní sícilimi kàbaan na.

²⁴ Sícilimi Kolocɔlɔɔ da le Salomɔn fúngi ni lè, syɛ́ɛnbèle maa ni caa bi wi nyaa si wi sícilimi syɛ́ɛnrɛ lóʔo.

²⁵ Pe myɛ nibin nibin maa ni maa ní be kpɔ́ʔɔri ní, ti lè wálifiiw yárira, ní tɛ́ɛw yárira, n fàra yaleri, ní kapɛɛnkpumɔn-yáriri, ní nùndaanni yárira, ní syɔ́ɔnyi, ní jòfanikàriyi na. Kánmi bee na ki da ni kpéʔele yɛɛlɛ o yɛɛlɛ.

²⁶ A Salomɔn wòtorobéle ní syɔɔnfànbēle kpóʔoro. Wòtorobéle saala kɔrɔsiin maa pye wi ma n fàra syɔɔnfànbēle selebingéle kɔrɔni na. A wi di tórigo n màʔa kěyee ma wi sámaga wòtorobèle mɛ́ʔɛ na lè, níì wozanri yaʔa Zyerusalɛmi ni fànʔafɔw taana.

²⁷ A fànʔafɔw pye sábabu á wálifiiw nɛʔɛ Zyerusalɛmi ni n pye àmɛɛ kadɛnɛrɛ nyɛ lè a sɛdiri tíiri wɔ́ɔ̀ nɛʔɛ n pye àmɛɛ sikomɔri tíiri nyɛ lè tɛɛfiigi na.

²⁸ Ezyipiti ní Silisii má pe da ni yìrigí ní Salomɔn syɔ́ɔnyi ní. Fànʔafɔw jàgiwáabéle kabigaa ki da ni syée n sa ni yi kpóʔoro ni syoo nyɔɔnijanga na ni maa.

²⁹ Bi wòtoro syɔɔ Ezyipiti ma bi pan, wi lɔ́ri n pye wálifiio támabéle saala taanri, syɔnʔɔ nibin lɔ́rɔ si i nyɛ támabéle togoye kɔrɔsiin ní kpɔrigɔ. Pe maa wɔ́ɔ ni maa ní di ní Hɛti ye fànʔafɔbèle myɛ ma n fàra Sirii fànʔafɔbèle na.