Uñedye' 9 - Tsimane

Jụjjete Jenꞌ muꞌ Saulo

^1-2 Saulo yejĉoij meꞌtacsi muꞌin cäc̣häꞌchutety Ayoꞌ in, anic fer c̣hojvacsi, muꞌ mạꞌjeꞌ räj ijacsi. Chat qui muꞌ Saulo dyijyi yocsiꞌĉan raꞌ jịjcaij bäꞌyedyeꞌ Damascoĉan, quevacsequi muntyiꞌ in muꞌĉan muꞌin cäc̣häꞌchuptety in mọꞌ mụiꞌsis majmi Ayoꞌsiꞌ muꞌ, sonꞌ in judyeyaꞌ p̂en in. Jerusalénĉan raꞌ cạcsi, muꞌĉan qui raꞌ ĉärꞌtacsi, mọꞌ dyijyedyeꞌ muꞌ Saulosiꞌ. Mọꞌdyes muꞌ Saulo jäꞌmij ĉọcte muꞌ tashcheꞌ cudyitity Jenꞌcheꞌ, cọdyete yiris ferdyeꞌtumsiꞌ paper, mọꞌ raꞌ jịꞌcaveyacsi muꞌin tashcheꞌ buꞌyity vajmuꞌyaijĉan in Damascoĉan, paj qui muꞌin soꞌmete in jụjjetety Jesucristo in, junaꞌ ĉụiꞌ in.

³ Meꞌdye muꞌ sacjeꞌ muꞌ Saulo penꞌdyeꞌtum, Damascove jịjcaij in. Aty c̣hẹiꞌyaꞌ tyiti in mọꞌ bäꞌyedyeꞌ Damasco, vatyquej ayij mạyedyeꞌches mạijyis, mạijjajiti muꞌ Saulo, anic fer játŝuti.

⁴ Mụijyaꞌ tŝọij Saulo, chat qui seꞌveꞌ yiris p̂eyacdyeꞌ yi jajiti: —Saulo, Saulo, ¿junꞌ dash meꞌti mi? —jéte.

⁵ Vorjete Saulo: —¿Tyi ĉaĉaij mi u? Vorjajiti yi: —Yụ u Jesús, yojdyetydyemꞌ meꞌtety um.

⁶ Vañinyebada, tạij bäꞌyedyeꞌĉan jịjcava, muꞌĉan raꞌ jin in junꞌ chuc raꞌ mi —yi jéte Saulo.

⁷ Muꞌin na penꞌdyeꞌ muꞌ tyumumuj tyeij ĉojtyiꞌ muꞌin, meꞌ tsanꞌ seꞌveꞌ p̂eyacdyeꞌ in jam qui namꞌ muntyiꞌ nạijte muꞌyaꞌ in.

⁸ Sacyeban mụijyaty Saulo. Doijroyeban tsanꞌ aty jam junꞌ naijbun. Muꞌin qui penꞌdyeꞌ muꞌ un chupte in Damascoĉan cạte in.

⁹ Chibin mạyedyeꞌ muꞌĉan meꞌ buꞌyi, yejĉoij jam naijbun mijam méquiꞌ säcsi mijam tyeij chimeꞌ.

¹⁰ Muꞌyaꞌ Damascoĉantyiꞌ anicjetety Jenꞌ Ananías tịj muꞌ. Muꞌ Ayoꞌ tsun muꞌyaꞌ jịꞌcavacdyeꞌĉan jiꞌcaviti, jafaijti: —Ananías —jajiti. Vorjete Ananías: —Utsdye u yụ.

¹¹ Ayoꞌ jajiti: —Tạij muꞌve jịjcava mọꞌ caye Chụiꞌsis jeꞌsiꞌ in, muꞌĉan raꞌ quequevcapte mi Judassiꞌ acaꞌ muꞌ. A raꞌ dạcbiteyam jéyacsi ram: "¿Úĉan tyuꞌ u dyäqui muꞌ Saulo, Tarsoĉantyiꞌ muntyiꞌ?" jéyacseva. Mush tyuꞌ muꞌ cudyivaꞌquin yụ q̂uinꞌ,

¹² judyeyaꞌ chimeꞌ jịꞌcavacdyeꞌ soꞌmete yụ, muꞌ cavin mi Ananías, mi ca raꞌ ĉọcte judyeyaꞌ ca raꞌ tocoꞌjectem paj qui quivij naijbunve muꞌ, mọꞌdyes muꞌ bisin mi —jajiti Ayoꞌ.

¹³ Ananías vorjete: —Junꞌ a vuꞌ, anic daiꞌ muntyiꞌ jin yụ in muꞌ muntyiꞌ där jịꞌñibeꞌcacsi mítyiꞌ muntyiꞌ in, Jerusalénĉan bäꞌyity in.

¹⁴ Mọꞌdye mọmoꞌ dyijyedyeꞌ tuiꞌ atsij úyaꞌ q̂uinꞌ, tuiꞌ ca yiris ferdyeꞌtumsiꞌ paper, mọꞌ soꞌmetes in muꞌin tashchety cudyitity Jenꞌcheꞌ in, yiꞌ ca mọꞌ muꞌ tupuj tapjeyacsi räj muꞌin ĉútity mícheꞌ in —yi Ananías jéte Ayoꞌ tsun.

¹⁵ Vorjajiti Ayoꞌ tsun: —Tạij ĉọcme mọmoꞌ ĉaĉaij na yụ tsimꞌte uts muntyiꞌ muꞌ raꞌ voroꞌtacsi muꞌin Israeltyiꞌ vóshiꞌ in judyeyaꞌ muꞌin yoctyiꞌ muntyiꞌ jam judío in judyeyaꞌ jacchety ayoꞌ chimeꞌ in, muꞌ raꞌ p̂iyin yụ, räj raꞌ jéyacsi muntyiꞌ in.

¹⁶ Yụ raꞌ jịꞌcaveyete paj där ñịbeꞌ cạveꞌ muꞌ yụ́dyes —yi Ayoꞌ jajiti Ananías.

¹⁷ Meꞌdye muꞌ sacjeꞌ Ananías ĉọcte muꞌ Saulo siste, dạquicte muꞌĉan, chat qui un yụꞌtaqui muꞌcheꞌ jéte: —Vojity Saulo, muꞌ Ayoꞌ tsun muꞌdye Jesús, muꞌ jiꞌcavitity majmiyaꞌ míyaꞌ, muꞌ nash jutin yụ paj qui naijbun quivij mi judyeyaꞌ paj qui chimeꞌ Jenꞌsiꞌ Ạꞌedyemꞌ jiꞌtŝun mi —yi Ananías jéte.

¹⁸ Meꞌĉandye jọꞌchaiꞌ jeꞌñes p̂áp̂anꞌ vejĉansiꞌ muꞌ, chat quivij naijbun muꞌ Saulo. Sacyeban judyeyaꞌ jiꞌchojti qui muꞌ.

¹⁹ Chat q̂uinꞌdyemꞌ säcseban muꞌ judyeyaꞌ qui jiĉun. Taĉan chum muꞌĉan Damascoĉan meꞌ buꞌyi, juñucsiꞌ mạyedyeꞌ penꞌdyetucsi muꞌin jụjjetety Jenꞌ in.

Saulo voroꞌtacsi Damascoĉan

²⁰ Saulo chụiꞌ vatyquej jiꞌtyeꞌ voroꞌtacdyemꞌ vajmuꞌyaijĉan judío in, p̂eijte muꞌ Jesús jéyacsi muꞌ Jenꞌtyiꞌ Ạvaꞌ muꞌ.

²¹ Muꞌin seꞌvetety in anic muꞌin räj äjjete in. Yi jítidyeij in: —¿Jam adac utsdye mọmoꞌ jiquej jịꞌñibeꞌcacsity muꞌin ĉútity Jesúscheꞌ in Jerusalénĉan bäꞌyity in? ¿Jam adac muꞌ atsij úĉan tapjeyacsity raꞌ? Mạꞌjeꞌ Jerusalénĉan cạcsi muꞌĉan qui raꞌ jiꞌmeꞌtacsi muꞌinyaꞌ tashchetyyaꞌ cudyitity Jenꞌcheꞌ in. ¿Junꞌ buty meꞌ q̂uinꞌ voroꞌtacsi muꞌ? —yi in.

²² Dadamꞌ ferdyeꞌtum Saulo voroꞌtacsi, mijam ọyaꞌyaiꞌ p̂eyacdyemꞌ, jéyacsi muꞌ Jesús Jiꞌc̣honacsity Muntyiꞌ. Muꞌ jiꞌpenacsebi p̂eyacdyeꞌ muꞌin Damascoĉantyiꞌ judío in, aty jam tupuj vorjete in.

Saulo ĉaꞌjoyacsi judío in

²³ Aty muꞌ daiꞌ mạyedyeꞌ meꞌ voroꞌtacsi muꞌ Saulo, muꞌin qui judío in dyijyi in mạꞌjeꞌ ijate in.

²⁴ Muꞌin ĉọjcabiꞌ in bäꞌyedyes chụiꞌdyeꞌ mọꞌ, mạij judyeyaꞌ tsedyedyeꞌ meꞌ bisvaꞌbajte in, mạꞌjeꞌ tsanꞌ ñutsjeĉunꞌte Saulo in, meꞌjete ca raꞌ in. Muꞌ na Saulo chị́yacsebi muꞌ dyijyedyeꞌ muꞌin,

²⁵ mọꞌdyes qui muꞌin anicjetety Jesucristo in jiꞌc̣honte in. Yiris tsedyedyes muꞌin bäꞌyedyescheꞌ naꞌru bojvi in jiꞌbaquitsbajte in därtyiꞌĉan canasto, jorojyaꞌ jịjijcayebajte in, meꞌ buꞌyi jiꞌc̣honte in.

Saulo voroꞌtacsequi Jerusalénĉan

²⁶ Aty venjoijyaꞌ Jerusalénĉan muꞌ Saulo, mạꞌjeꞌ tsanꞌ yiriꞌyaꞌ penꞌdyetucsi muꞌin anicjetety Jesucristo in, muꞌin qui namꞌ jam jụjjete in ĉaĉaij na muꞌin quijñete in, jeñej jam jụjjetety Jesucristo ĉọ́te in.

²⁷ Chat qui muꞌ Bernabé cạte muꞌ Saulo, jịꞌcavete muꞌinyaꞌ in jutactyiꞌyaꞌ Jenꞌtyiꞌ muꞌ. Yi muꞌ Bernabé jéyacsi: "Uts Saulo cạvise muꞌ Ayoꞌ Jesús majmiyaꞌ judyeyaꞌ muꞌ Ayoꞌ jap̂iyitaque judyeyaꞌ qui Damascoĉan voroꞌtacsaque Saulo, p̂eijte muꞌ Jesús, jam damꞌ noiꞌyedyeꞌtum jéyacsi", yi muꞌ Bernabé jéyacsi jutactyiꞌ Jenꞌtyiꞌ muꞌ.

²⁸ Meꞌ buꞌyi jụjte in chat qui jiꞌyajcati taĉan muꞌintum in voroꞌtacsi, mijam méquiꞌ noiꞌyedyeꞌtum jéyacsi Ayoꞌsiꞌ p̂eyacdyeꞌ muꞌ.

²⁹ Muꞌdye voroꞌtacsi muꞌin judío in, muꞌin p̂eyaquity in griegosĉan p̂eyacdyeꞌ, muꞌin na dyijyi in mạꞌjeꞌ ijate in muꞌ Saulo.

³⁰ Anicjetety Jesucristo in chị́qui in yocve qui muꞌin cạte in Cesareaĉan. Aty muꞌĉan venjoij in jutete qui in paj qui Tarsoĉan jịjcaij.

³¹ Aty meꞌsiꞌ muꞌin anicjetety Jesucristo in jämꞌ bäꞌyi in, aty jam jedyeij in, muꞌin Judeaĉantyiꞌ in judyeyaꞌ Galileaĉantyiꞌ in judyeyaꞌ Samariaĉantyiꞌ chimeꞌ in, aty jam jịꞌñibeꞌcac in. Yejĉoij p̂añi Jenꞌdyes in judyeyaꞌ yejĉoij cheꞌejĉoij in muꞌin jụjjetety Jesús in ĉaĉaij na Jenꞌsiꞌ Ạꞌedyeꞌ räjĉan nọ́tacsiꞌ. Räjdye irijyi Ayoꞌcheꞌ in muꞌin in.

Chäĉän Eneas

³² Pedro paiꞌ räj ĉọcsequi muꞌin anicjetety Jesucristo in. Räj Lidave jịjcaij ĉọcsequi muꞌvety in.

³³ Dạquicte muꞌĉan puñichjoijtyiꞌ muntyiꞌ, Eneas tịj muꞌ. Q̂uenꞌĉan yómodyeꞌ chụduj buꞌyi jubijĉan muꞌ, meꞌquiꞌ jịꞌĉojtyeꞌ puñichjodyeꞌ muꞌ.

³⁴ Pedro yi jéte: —Eneas, Jesucristo aty jiꞌchäĉun mi, vañinyebada, tsuptaĉada jubij mi —jajiti. P̂eyacdyeꞌĉandye chäĉän muꞌ, vañinyeban vatyquej.

³⁵ Räj Lidaĉan bäꞌyity in judyeyaꞌ Sarónĉantyiꞌ chimeꞌ in cạvete in chäĉädaque, cächyejoij muꞌin chimeꞌ jụjjete Ayoꞌ in.

Tsạꞌebanꞌ Dorcas

³⁶ Yiris p̂en Jopeĉan bäꞌyiꞌsiꞌ, anicjetes Jesucristo, Tabita tịj mọꞌ, griegosĉan p̂eyacdyeꞌ Dorcas. Ọij p̂en anic ñịbeꞌyis räjĉan nọ́tacsiꞌ tyi chuc jayejjotaquity jedyeꞌ in.

³⁷ Chat japacjoiꞌ mọꞌ Dorcas aty meꞌsiꞌ tac tyeiꞌ säñiꞌ. C̣hiconꞌjetaque in chat qui chudenꞌtyeꞌ in cheꞌvescheꞌ vavdyeꞌ mọꞌ.

³⁸ Mọꞌ bäꞌyedyeꞌ Jope c̣hẹiꞌyaꞌ buꞌyiꞌ mọꞌtum yocsiꞌ bäꞌyedyeꞌ Lida, yóĉandyemꞌ dyäqui Pedro u. Chị́qui muꞌĉan muꞌ Pedro Lidaĉan, chat qui muꞌin Jopeĉantyiꞌ in anicjetety Jesucristo in jutacsi päräꞌ muntyiꞌ in paj qui jäcte in. Ventyecte in jéte in: "Q̂uinꞌdye ca raꞌ Jopeĉan jịjcaij mi", jéte in.

³⁹ Meꞌdye muꞌ Pedro cäc̣henꞌyejoij jịjcacseban Jopeĉan jịjcaij in. Venjoij in cheꞌvescheꞌ vavdyeꞌ jiꞌbojvete in, yócheꞌdyemꞌ mọꞌ Dorcasvun jiquej o. Mọꞌcheꞌdye mọꞌin muñemunsiꞌ p̂en in, tárevaꞌqueꞌ in Dorcasvun. Jịꞌcaveyete in muꞌ quịꞌsiꞌ dyebetactety jiquej tsạꞌdyemꞌ.

⁴⁰ Pedro jiꞌshupcacsi räj mọꞌin, chat qui dyụtsyi muꞌ cọdaqui Jenꞌcheꞌ. Chat qui cạvi, jeꞌ mọꞌ p̂envun: —Tabita, vañinyebada. P̂eyacdyeꞌĉandyemꞌ doijrojyebanꞌ cạvete muꞌ Pedro p̂utsquenꞌyebanꞌ qui.

⁴¹ Tapjebiꞌ qui un mọꞌ, sacjebanꞌ fayacseban qui jorojyas muñemunsiꞌ p̂en in judyeyaꞌ jụjjetety Jenꞌ in. Pedro jịꞌcaveyacseban aty mọꞌ tsạꞌebadaque.

⁴² Räj Jopeĉan bäꞌyity in chị́qui in junꞌ chuc muꞌ, mọꞌdyes qui muꞌin chimeꞌ cächyeĉojĉoij muꞌĉan jụjjete Ayoꞌ in.

⁴³ Muꞌ na Pedro muꞌĉan daiꞌ mạyedyeꞌ Jopeĉan, jajbuꞌyete yirity carijtyeꞌtyiꞌ shoꞌpaꞌ, Simón tịj muꞌ muꞌyaꞌ dyäqui muꞌ Pedro.