Uñedye' 7 - Tsimane

Ñutsjiti muꞌ Esteban

¹ Muꞌ tashcheꞌ cudyitity Jenꞌcheꞌ jéte Esteban: —¿Rụijsis buty jiꞌmeꞌtacdyeꞌ útssiꞌ in?

² Yi Esteban jéyacsi: —Chätidyeꞌ yụ judyeyaꞌ vojity yụ, seꞌvibutiĉamꞌ ọij p̂eyacdyeꞌ. Urucyaꞌ jiquej muꞌ mạijquedyeꞌtumtyiꞌ Jenꞌ jiꞌcaviti Abrahamyaꞌ, vóshiꞌvunyaꞌ jiquej tsun, yoquiꞌdyemꞌ Mesopotamiaĉan bäꞌyi jiquej u, jambiꞌdyemꞌ Haránve jịjcaij.

³ Yi jajiti jiquej: "Yacchuvaꞌ ĉụiꞌsiꞌ jac mi judyeyaꞌ chätidyeꞌ mi, yocsiꞌve jịjcava jac, yụ raꞌ jịꞌcaveyeye yụ", yi Jenꞌ jajiti Abraham.

⁴ Meꞌdye muꞌ Abraham sacti yacchuiꞌ mọꞌ bäꞌyedyeꞌ Caldea, Haránĉan qui jịjcaij muꞌĉan qui bäꞌyi. Aty säñiyaꞌ ĉụiꞌtyiꞌ jenꞌ muꞌ chat qui cuvij jajiti muꞌ Jenꞌ muꞌ Abraham paj qui úcheꞌ jijtuij bäꞌyi, yócheꞌdyemꞌ q̂uinꞌ bäꞌjaꞌ tsun u,

⁵ jambiꞌ qui namꞌ jasoꞌmiti jac ĉụiꞌdyes muꞌ, mijambiꞌ miquiꞌve jac jasoꞌmiti. P̂eyacdyeꞌdyemꞌ tashcheꞌ jayuꞌtyiyiti jajiti: "Yụ raꞌ soꞌmeyac ọij jac, mídyes raꞌ judyeyaꞌ chimeꞌ vóshidyes mi", jajiti muꞌ Jenꞌ. Muꞌ Jenꞌ yi jajiti itŝijdyemꞌ ạvaꞌ muꞌ Abrahamtyiꞌ.

⁶ Chimeꞌdye muꞌ Jenꞌ jajiti Abraham: "Muꞌin raꞌ vóshiꞌ mi yoctyisĉan raꞌ bäꞌyedyeꞌ bäꞌyi in, ñịbeꞌ raꞌ cạveꞌ muꞌĉan in, úñedyeꞌĉan raꞌ bäꞌyi in, men raꞌ ñịbeꞌtac muꞌĉan in, vạjpedyeꞌ quiꞌ cien yómodyeꞌ meꞌquiꞌ raꞌ muꞌĉan bäꞌyi in", jajiti Jenꞌ.

⁷ Chimeꞌdye yi muꞌ Jenꞌ: "Yụ raꞌ vaꞌtacdyeꞌ soꞌmacsi muꞌĉantyiꞌdye in muꞌin jiꞌunacsity in, chat qui raꞌ q̂uinꞌdyemꞌ yacchubanꞌ mọꞌ bäꞌyedyeꞌ in, úcheꞌ raꞌ jijtuban in, ọijcheꞌ jac, timaꞌquin raꞌ yụ in", yi Jenꞌ jajiti.

⁸ Meꞌ aty jayuꞌtyiyiti p̂eyacdyeꞌ Abraham, chat jajiti chimeꞌ paj qui seiꞌtac aꞌ muꞌin räj sonꞌ in, mọꞌ jịꞌĉocdyes p̂eyacdyeꞌ. Anicdye meꞌ muꞌ Isaac ạvaꞌ muꞌ, aty q̂uenꞌĉan mạyedyeꞌ tyiti muꞌ, meꞌdye muꞌ Abraham seiꞌtaqui ạvaꞌ muꞌ. Isaactyiꞌ qui ạvaꞌ muꞌ Jacob naꞌi, muꞌ qui seiꞌtaqui ạvaꞌ muꞌ, judyeyaꞌ muꞌ Jacob chimeꞌ seiꞌtaqui ạvaꞌ muꞌ, cäts yiriꞌtac päräꞌ jiyi in. Muꞌin nash tashcheꞌ buꞌyity vóshiꞌ in muꞌin yiriꞌtac päräꞌ jiyity ñuruꞌ in muꞌin Israeltyiꞌ vóshiꞌ in.

⁹ Muꞌin Jacobtyiꞌ ạvaꞌ muꞌ, vóshiꞌ tsun jiquej, muꞌin fạ́caquity vojity muꞌin José, úñedyeꞌĉan jiꞌmincate in, muꞌin qui yaꞌijtyiꞌ in Egiptoĉan cạte in, úñity buꞌyi muꞌĉan yụꞌte in. Jenꞌ qui namꞌ jañutyiti muꞌ,

¹⁰ meꞌ tsanꞌ där ñịbeꞌ cạveꞌ muꞌ, Jenꞌ qui namꞌ jajiꞌc̣hondyi ñịbedyesyaꞌ muꞌ judyeyaꞌ dyijyedyeꞌtum jayuꞌti. Meꞌ muꞌ Egiptoĉantyiꞌ ayoꞌ jämꞌjajiĉunꞌdyi muꞌ José. Mọꞌdyes qui muꞌ ayoꞌ jayuꞌti paj qui ĉọjcapte acaꞌ muꞌ judyeyaꞌ ayoꞌbuꞌyi Egiptoĉan, räj buꞌyiꞌ mọꞌ jac.

¹¹ Aty men räj buꞌyiꞌ vatyquej jac chiqueꞌ dáquis in, Egiptoĉantyiꞌ in judyeyaꞌ Canaánĉantyiꞌ chimeꞌ in, anic ñịbeꞌ cạveꞌ muꞌĉantyiꞌ in, räjtumdye vóshiꞌvun tsun jiquej jayejjotaqui chimeꞌ säcsedyeꞌ in.

¹² Aty chị́qui muꞌ Jacob mọꞌyaꞌ mọꞌ säcsedyeꞌ Egiptoĉan jiꞌmincaiꞌ in, chat qui muꞌĉan jutaqui ạvaꞌ muꞌ, muꞌin vóshiꞌ tsun, paj qui Egiptoĉan yaꞌiyequi in säcsedyeꞌ, mọꞌ nash tashches miꞌedyeꞌ muꞌin.

¹³ Aty päräꞌyis mọꞌĉan jịjcadyeꞌ muꞌin, José jịꞌchicaqui vojityyaꞌ muꞌ, muꞌdye ĉụiꞌtyiꞌ vojity muꞌin. Meꞌ muꞌ Faraón Egiptoĉantyiꞌ ayoꞌ chị́yete José tyity buty chätidyeꞌ muꞌ.

¹⁴ Chat qui José jiꞌvorvaqui jenꞌ muꞌ paj qui muꞌ Egiptoĉan jijtuij chimeꞌ, räjenꞌdye chätidyeꞌ muꞌ, paj qui muꞌĉan bäꞌyi in yävätidyeꞌ quiꞌtac ĉanamꞌ jiyi in muꞌin in.

¹⁵ Anicdye meꞌ, Egiptoĉan jijtuij in, muꞌĉan qui bäꞌyi in. Muꞌĉan muꞌ Jacob sänjan, judyeyaꞌ ạvaꞌ muꞌ chimeꞌ, muꞌin nash vóshiꞌ tsun.

¹⁶ Yocve cạcsebi aꞌvun muꞌin, Siquemve nạcsequi in yódyesdyemꞌ yaꞌijsiꞌ querec̣hayaꞌ Abrahamvun u, jiꞌmincayete in muꞌin Hamortyiꞌ ạvaꞌ in, Siquemĉantyiꞌ in.

¹⁷ Daiꞌ yómodyeꞌ jiyiꞌ, mọꞌ na tupudyeꞌ aty c̣hẹiꞌyaꞌ tyiti paj qui muꞌ Jenꞌ jịꞌcätseꞌ mọꞌ p̂eyacdyeꞌ jayuꞌtyiyitis Abraham jiquej, yi jäꞌmij jiquej muꞌ raꞌ jiꞌshupcacseban úñedyeꞌĉantyiꞌ. Dayi Egiptoĉan in Israeltyiꞌ vóshiꞌ in, judyeyaꞌ yoctyiꞌquejĉoij siti in Egiptoĉantyiꞌ ayoꞌ in.

¹⁸ Ĉụiꞌdye yoctyiꞌ siti ayoꞌbuꞌyi yirity ayoꞌ, muꞌ jam chịj junꞌ chuc muꞌ José jiquej.

¹⁹ Ayoꞌ väñädyeꞌyaꞌ meꞌbubusinꞌ vóshiꞌ tsun, jutacsi paj qui jiꞌshupcacsi jorojyaꞌ joijnoꞌ ạvaꞌ ĉụiꞌtyiꞌ muꞌin paj qui säñive in.

²⁰ Aty meꞌsiꞌ naꞌi muꞌ Moisés, dadamꞌ muꞌ mujuꞌchaꞌ jämꞌtyiꞌ joijnoꞌ. Jenꞌ muꞌ judyeyaꞌ tseꞌ muꞌ chibin chum ịvaj jiꞌp̂ante in ĉụiꞌsiꞌĉan acaꞌ muꞌin,

²¹ chat qui jäquiꞌve jorojyaꞌ yụꞌte. Mọꞌ qui ayos ạvaꞌ muꞌ jäcte ạvatute mọꞌ, jeñej ĉụiꞌtyiꞌ ạvaꞌ mọꞌ meꞌ jiꞌp̂ante.

²² Mọꞌdyes qui muꞌ Moisés jiꞌchäyiti räj Egiptoĉansiꞌ chị́dyeꞌ judyeyaꞌ dyijyedyeꞌ muꞌin. Aty ishoꞌyejoij muꞌ Moisés anic mujuꞌchaꞌ fer buꞌyi shupqui judyeyaꞌ jämꞌ voroꞌtacsi.

²³ Vạjpedyeꞌ quiꞌtac yómodyeꞌ tyiti muꞌ Moisés ĉụiꞌdye dyijyi muꞌ chat qui ĉọcsequi chätidyeꞌ muꞌ, muꞌin Israeltyiꞌ vóshiꞌ in.

²⁴ Yirity dạquicte muntyiꞌ Egiptoĉantyiꞌ, jạjiꞌñibeꞌcavaꞌbuti chätidyeꞌ muꞌ. Muꞌ qui Moisés ñutsjetaqui chätidyeꞌ muꞌ, chat qui ujati muꞌ Egiptoĉantyiꞌ muntyiꞌ.

²⁵ Muꞌ Moisés jeñety chị́yepte in yụꞌtacdyeꞌ muꞌ, meꞌ ĉọcsi chätidyeꞌ muꞌ, junꞌ chuc muꞌ Jenꞌ jayuꞌti paj qui muꞌ raꞌ jiꞌc̣honacsi, jam qui namꞌ junꞌ chị́yete muꞌin in.

²⁶ Nojno mạyedyeꞌ quivij ĉọcseĉan chätidyeꞌ muꞌ, dạcacsequi päräꞌ muꞌin vaj muꞌin chuvaꞌti in. Dyijyi tsanꞌ muꞌ mạꞌjeꞌ tsanꞌ jämꞌjibun yụꞌtacseban. Jéyacsi: "¿Junꞌ meꞌtidyeij u miꞌin? Jeñej qui jam chätidyeꞌ jítidyeij jụijyaꞌ miꞌin", jéyacsi.

²⁷ Muꞌ na chucsity tacjeĉunꞌte muꞌ Moisés, yi jéte: "¿Tyi caꞌ meꞌ yuꞌtyin mi paj qui ayoꞌbuꞌyi tsundyes mi? ¿Tyi caꞌ meꞌ yuꞌtyin mi paj qui jịꞌcäts yuꞌtiĉaꞌ tsun miꞌin?

²⁸ ¿Mạꞌjeꞌ buty ijatim yoj jetedyemꞌ munjaꞌ um ijatem muꞌ Egiptoĉantyiꞌ muntyiꞌ?" jéte.

²⁹ Moisés aty mọꞌ seꞌveꞌyaꞌ p̂eyacdyeꞌ chat qui muꞌ ĉaꞌjoij, yocsiꞌve jac jịjcaij muꞌ Madiánve, muꞌĉan qui bäꞌyi yoctyiꞌtum muntyiꞌ in. Muꞌĉan vämi, ạvaꞌyi qui muꞌĉan, päräꞌ ạvaꞌ muꞌ.

³⁰ Jiyiꞌ vạjpedyeꞌ quiꞌtac yómodyeꞌ muꞌĉan, chat yirity anjer jiꞌcaviti Moisésyaꞌ cäjyasĉan jac, c̣hẹiꞌyaꞌ muꞌ mụcuꞌ Sinaí, furquisyaꞌ son jiꞌcaviti.

³¹ Anic äjyi muꞌ Moisés cạveꞌ mọꞌ son. Ĉọ́queꞌ mọꞌ son, mạꞌjeꞌ tsanꞌ jämꞌ cạveꞌ. Vatyquej seꞌveꞌ mọꞌĉan yiꞌ p̂eyacdyeꞌ Ayoꞌsiꞌ tsun, meij jap̂iyiti yiꞌ jajiti:

³² "Yụ nash Jenꞌ vóshiꞌvuntyiꞌ mi, muꞌ Abrahamtyiꞌ, judyeyaꞌ muꞌ Isaactyiꞌ judyeyaꞌ Jacobtyiꞌ chimeꞌ", yi. Där noiꞌyi muꞌ Moisés, noc̣hoꞌc̣hoyequi mijam méquiꞌ cạvi.

³³ Muꞌ Ayoꞌ tsun yi jajiti: "Chacjeyaca yujches coꞌsis mi, tsäquiꞌ nash úyaꞌ mi.

³⁴ Anic cạvacsebi yụ ñịbedyes muꞌin yụ́tyiꞌ muntyiꞌ in Egiptoĉantyiꞌ in, chimeꞌ seꞌvacsebi yụ táredyeꞌ muꞌin. Meꞌdyes yụ chạban paj qui jiꞌc̣honacsi yụ. Mọꞌdyes yụ raꞌ jutebadyeye Egiptoĉan, muꞌĉan raꞌ ĉọcseĉan mi", jajiti Jenꞌ.

³⁵ Meꞌ tsanꞌ meꞌ muꞌ qui namꞌ Moisés vaꞌqueĉunꞌte jiquej in, jéte in: "¿Tyi caꞌ meꞌ yuꞌtyin mi paj qui ayoꞌbuꞌyi mi tsundyes? ¿Tyi caꞌ meꞌ yuꞌtyin mi paj qui jịꞌcäts yuꞌtiĉaꞌ tsun miꞌin?", jéte mọmoꞌ jiquej in. Muꞌ Moisés vaꞌcactyiꞌ muꞌinyaꞌ in, muꞌdye muꞌ Jenꞌ jutete paj qui ayoꞌbuꞌyi muꞌindyes in judyeyaꞌ paj qui jiꞌc̣honacsi muꞌ. Anjeryaꞌ muꞌ, muꞌ Jenꞌ jutete, muꞌ jiꞌcavitity furyisyaꞌ son.

³⁶ Muꞌdye Moisés jiꞌc̣honacsi vóshiꞌvun tsun jiꞌshupcacseban Egiptoĉantyiꞌ in, judyeyaꞌ jịꞌcaveyacsi ferdyeꞌ judyeyaꞌ därsiꞌ äjyedyes muꞌin. Egiptoĉan jịꞌcaveyacsi ferdyeꞌ muꞌ judyeyaꞌ Mar Jäijnäsĉan judyeyaꞌ cäjyasĉan jac chimeꞌ, vạjpedyeꞌ quiꞌtac yómodyeꞌ meꞌquiꞌ jịꞌcaveyacsi Jenꞌsiꞌ ferdyeꞌ muꞌ.

³⁷ Muꞌdye Moisés jéyacsi muꞌin Israeltyiꞌ vóshiꞌ in, yi muꞌ: "Jenꞌ raꞌ jutiyinac yirity chätidyeꞌ miꞌin jasoꞌmitity p̂eyacdyeꞌ muꞌ, jeñej yụ, meꞌ buꞌyi raꞌ muꞌ", jéyacsi.

³⁸ Muꞌdye muꞌ Moisés penꞌdyetucsi Israeltyiꞌ vóshiꞌ in cäjyasĉan jac, yóĉandyemꞌ yiriꞌyaꞌ bäꞌyi jiquej u in. Muꞌĉan anjer jap̂iyiti mụcuꞌcheꞌ Sinaícheꞌ, muꞌdye nash soꞌmac jam mọtsis p̂eyacdyeꞌ, paj qui muꞌ jiꞌjiyisinꞌ tsun mọꞌ p̂eyacdyeꞌ.

³⁹ Meꞌ tsanꞌ meꞌ muꞌin vóshiꞌvun tsun jam qui namꞌ méquiꞌ chiquete Moisés in, muꞌin memꞌ c̣hucjetyete chun in, mọmꞌ mạꞌjeꞌ in paj qui tsanꞌ camanꞌ caꞌñibun Egiptoĉan in.

⁴⁰ Mọꞌdyes qui muꞌin jéte in muꞌ Aarón: "Jämꞌtyiyitiĉamꞌ jämꞌtacdyeꞌ tsundyes, mọꞌin qui raꞌ cäc̣häꞌchucsi tsun, ĉaĉaij na jam chị́jaꞌ tsun junꞌ raꞌ meꞌ muꞌ Moisés tyäpi jiꞌshupsinꞌtyiꞌ tsun Egiptoĉan jiquej", jéte in.

⁴¹ Anicdye meꞌ jämꞌtyeꞌ jämꞌtacdyeꞌ in, jeñej buꞌyiꞌ vaca chat qui jiꞌcoꞌshayeꞌ cuꞌdyeꞌ in mọꞌdyesiꞌ jämꞌtacdyedyes muꞌin, judyeyaꞌ feshtaij in timaꞌcaqui in mọꞌ jämꞌtyeꞌsiꞌ in.

⁴² Mọꞌdyes muꞌ Jenꞌ pạrejti muꞌinyaꞌ yi: "Paj muꞌyaꞌ muꞌin in, paj meꞌ in ĉụiꞌ ĉúti ọ́rotaꞌcheꞌ in", yi Jenꞌ. Muꞌin p̂eyacsiꞌ mọꞌ sánacdyeꞌ jasoꞌmititysiꞌ p̂eyacdyeꞌ Jenꞌ, yiꞌ: "Yụ raꞌ jéyac miꞌin Israeltyiꞌ vóshiꞌ miꞌin: Jam nash yụ́dyes jiꞌcoꞌshayetiñeꞌ miꞌin cuꞌdyeꞌ jiquej, yóĉandyemꞌ cäjyasĉan jac o, vạjpedyeꞌ quiꞌtac yómodyeꞌ meꞌquiꞌ muꞌĉan miꞌin.

⁴³ Mijam yụ timaꞌquitiĉaꞌ miꞌin, jämꞌtacdyemꞌ timaꞌquetiñeꞌ miꞌin, mọꞌ Molec tịj mọꞌ judyeyaꞌ mọꞌ Refánsiꞌ jämꞌtacdyeꞌ chimeꞌ, ọ́rotaꞌ buꞌyis, mọꞌin jämꞌtacsis miꞌin, joꞌmes mọmoꞌ timaꞌquetiñeꞌ miꞌin, cäjsisĉan jac, p̂uc̣hiꞌc̣hiyevaꞌjoij jiquej miꞌin. Yụ raꞌ vaꞌquecyac yocsiꞌĉan bäꞌyedyeꞌ, fajve raꞌ Babilonia cạc raꞌ miꞌin", yiꞌ sánacdyeꞌ —jéyacsi Esteban.

⁴⁴ Jeshaꞌ, vóshiꞌvun tsun jiquej cäjyasĉan jac jämꞌtyeꞌ in acaꞌ Jenꞌsiꞌ muꞌ, mọꞌ tinates in, yódyeiꞌdyemꞌ muꞌ Jenꞌ jajiꞌcaviyiti u muꞌ Moisés, joꞌmeiꞌdye jämꞌtyeꞌ in mọꞌ acaꞌ, mọꞌ meꞌchutes sánacdyeꞌtumtyiꞌ mij.

⁴⁵ Jäquiꞌve muꞌ qui Josué ĉọjcacseban vóshiꞌvun tsun, yoquiꞌdyemꞌ Canaánĉan jịjcaij u in, jiꞌpenacsi muꞌĉan bäꞌyity in yoctyiꞌdye muntyiꞌ in. Muꞌdye Jenꞌ muꞌĉantyiꞌ jiꞌshupcacsi paj qui vóshiꞌvun tsun muꞌĉan bäꞌyi in. Mọꞌ chimeꞌ cạiꞌ in acaꞌ Jenꞌsiꞌ muꞌ, mọꞌ tinates in, jämꞌtyes vóshiꞌvun muꞌin jiquej, mọꞌĉan meꞌ buꞌyiꞌ daiꞌ yómodyeꞌ, aty men muꞌĉan timaꞌquete Jenꞌ in ĉụiꞌdye muꞌ ayoꞌbuꞌyi muꞌ David,

⁴⁶ muꞌ nash jamaꞌjotyitity Jenꞌ jiquej. Meꞌ tsanꞌ muꞌ cọdyete Jenꞌ, Jacobvuntyiꞌ Jenꞌ, yi jéte: "Yụ mạꞌjeꞌ jämꞌtyeyeye acadyes mi jämꞌsiꞌ", Jenꞌ qui namꞌ jam jụjyi.

⁴⁷ Muꞌ na Salomón jämꞌtyeyete acaꞌ.

⁴⁸ Meꞌ tsanꞌ muꞌ mujuꞌchaty Jenꞌ jam acaꞌveij, jam muꞌ joꞌmesveij yódyesdyemꞌ jämꞌtyes muntyiꞌ u in. Mọꞌ p̂eyeꞌ sánacdyeꞌ jasoꞌmititysiꞌ p̂eyacdyeꞌ Jenꞌ, yiꞌ:

⁴⁹ "Yi Ayoꞌ: mạyedyeꞌcheꞌ p̂utsquenꞌ buꞌyi yụ, mọꞌ na yuj yụ jaccheꞌ cach buꞌyiꞌ. ¿Junꞌjetiñeꞌdyemꞌ raꞌ jämꞌtyiyitiĉaꞌ acaꞌ yụ́dyes miꞌin, paj qui joꞌmeiꞌĉan jịꞌjutyiti yụ?

⁵⁰ Yụ́dye nash mọmoꞌ joꞌmes jämꞌtyeꞌ räj q̂uinꞌ cạvetiñes miꞌin mạyedyeꞌ judyeyaꞌ jac", yiꞌ sánacdyeꞌ —jéyacsi Esteban —.

⁵¹ Anic yäcäj ĉojtyiꞌ miꞌin judyeyaꞌ c̣huc chun miꞌin, mijam méquiꞌ anicjetinte Jenꞌ ĉojtyiꞌĉan miꞌin. Yejĉoij mọmoꞌ miꞌin fạ́queptinte Jenꞌsiꞌ Ạꞌedyeꞌ muꞌ jeñej vóshiꞌvun jiquej miꞌin, meꞌ dyijyedyeꞌ miꞌin.

⁵² Vóshiꞌvun miꞌin jịꞌñibeꞌcacsi in räjenꞌdye muꞌin jasoꞌmitity p̂eyacdyeꞌ Jenꞌ in, mijam yirity jiꞌshucte in. Chimeꞌdye muꞌin ijacsi in muꞌin jäꞌmiij p̂eijtety in muꞌ rụijtyity Jiꞌc̣honacsity Muntyiꞌ. Q̂uinꞌ aty atsij muꞌ, miꞌindye mọmoꞌ meꞌ jiꞌmeꞌtinte ayoꞌyaꞌ judyeyaꞌ qui jiꞌijatinte.

⁵³ Chimiꞌindye meꞌchuptinte Jenꞌsiꞌ yụꞌtacdyeꞌ muꞌ, mọꞌ jiꞌjiyacsis anjeryaꞌ jiquej. Meꞌ tsanꞌ meꞌ mijam qui namꞌ méquiꞌ chiqueptinte yụꞌtacdyeꞌ muꞌ —yi Esteban jéyacsi.

Ijate in muꞌ Esteban

⁵⁴ Seꞌveptemꞌ p̂eyacdyeꞌ in, fạ́coij tyeij in, jịꞌfajte Esteban in, querechjeyaqui modyin in fạ́coij in.

⁵⁵ Jenꞌsiꞌ Ạꞌedyeꞌ muꞌ játŝuti muꞌ Esteban, cạvi mạyedyeꞌcheꞌ muꞌ, nạijbite Jenꞌsiꞌ mạijquedyemꞌ. Jesús chimeꞌ nạijte rụiꞌcujcuij muꞌcheꞌ, tacve buꞌyi Jenꞌyaꞌ.

⁵⁶ Yi Esteban: —Vanacyiꞌ o mạyedyeꞌ meꞌ cạveꞌ yụ, muꞌcheꞌ muꞌ Anictyity Muntyiꞌ, tacve buꞌyi Jenꞌyaꞌ nạijte yụ —yi muꞌ p̂eyaqui.

⁵⁷ Dadamꞌ muꞌin rupejjecajcaiꞌ chun muꞌin, fersiꞌtum äjyedyeꞌ roiꞌjete in muꞌcheꞌ tŝọij in

⁵⁸ judyeyaꞌ jorojyaꞌ mọꞌ bäꞌyedyeꞌ jịjicayete in, chat qui farajñete mijyaꞌ in ijate in. Muꞌin farajñetety in jäcaqui fajchety quịꞌsiꞌ in, soꞌmete in yirity nanaty, muꞌ ĉọjcacsebi, Saulo tịj muꞌ.

⁵⁹ Aty farajñevaꞌte mijyaꞌ in muꞌ Esteban cọdyete Jenꞌ, jéte: —Jesús Ayoꞌ yụ, jụjjibutiꞌ ạꞌedyeꞌ yụ.

⁶⁰ Chat qui dyụtsyi muꞌ fer p̂eyaqui cọdyete Jenꞌ, jéte: —Yụ́tyiꞌ Ayoꞌ, jam raꞌ dyijtucsebim ọij juchaj muꞌin uts meꞌtyintyiꞌ yụ in. P̂eyacdyeꞌĉandye tiꞌyejoij säñi.