Uñedye' 5 - Tsimane

Juchaj Ananíassiꞌ judyeyaꞌ Safiras

¹ Chimeꞌdye muꞌyaꞌ yirity muntyiꞌ tịj muꞌ Ananías, Safira tịj p̂en muꞌ. Chimeꞌdye muꞌin in jiꞌmincaqui yiris jac muꞌin.

² Meꞌ muꞌin dyijyi in chet querec̣ha pạrejjeyaqui in ĉụiꞌdyety muꞌin, muꞌin na jutactyiꞌ Jenꞌtyiꞌ muꞌ, chet qui soꞌmacsi in. "Mush uts querec̣ha jacyaty", jéyacsi.

³ Muꞌ na Pedro yi jéte: —Ananías, ¿junꞌ meꞌ um jiꞌsiteꞌ Sọyoꞌ Satanás ĉojtyiꞌĉan u mi? Jeñej aty raꞌ tsanꞌ väñätuiꞌ Jenꞌsiꞌ Ạꞌedyeꞌ ĉúti um. Chet muꞌ querec̣ha jacyaty pạrejtaqui mi ĉụiꞌdyety miꞌin.

⁴ Mọꞌ jac ĉụiꞌsiꞌ jiquej mi. Aty jiꞌmincaquiyam querec̣hayaꞌ, muꞌ ĉụiꞌtyiꞌ mọmom. ¿Junꞌ meꞌ dyijyi ĉojtyiꞌĉan um? Jeñej aty vaj muntyiꞌ väñätutiĉaꞌ u ĉúti mi, jam na meꞌ, Jenꞌmun chimeꞌ väñätutem —yi jajiti Pedro.

⁵ Yédyeꞌĉandye mọmoꞌ jọꞌchaij säñi muꞌ Ananías. Räj muꞌin seꞌvaquity in jämꞌ muꞌin itŝij tyeij in noiꞌyi in.

⁶ Atsij muꞌin nanamuntyiꞌ in comonꞌbite aꞌ in chat qui nạ́te in.

⁷ Aty chibin hora meꞌ buꞌyiꞌ ĉụiꞌdye ayij p̂en muꞌ Ananíassiꞌ. Mọꞌĉan sitiꞌ mijam chịꞌ mọꞌ junꞌ chuc vämtyiꞌ mọꞌ.

⁸ Chat qui muꞌ Pedro jeꞌ: —¿Meꞌsiꞌcheꞌ jiꞌmincatiñeꞌ miꞌin mọꞌ jac yoj jitiĉaꞌdyemꞌ tsun u miꞌin? ¿Rụij caꞌ mọꞌ? —jeꞌ Pedro. Vorjete mọꞌ: —Anic meꞌsiꞌcheꞌ jiꞌmincaquiꞌ tsun.

⁹ Muꞌ qui Pedro vorjeꞌ: —¿Junꞌ caꞌ meꞌ miꞌin vaj cäts dyijyiꞌ miꞌin jịꞌĉojtiñeꞌ Ayoꞌsiꞌ Ạꞌedyeꞌ muꞌ? Mush tyuꞌ útsi in rudyuꞌjectety in vämtyiꞌvun mi, chimeꞌdye raꞌ mi chịmoꞌyaꞌdye ram jịjcaiꞌ —jeꞌ muꞌ Pedro.

¹⁰ Yédyeꞌĉandyemꞌ mụijyaꞌ tŝọiꞌ jọꞌchaiꞌ säñiꞌ. Siti muꞌin nanamuntyiꞌ in, sänaques dạquiqueꞌ in. Chịmoꞌyaꞌdye rudyuꞌjequeꞌ in, yóyaꞌdyemꞌ vämtyiꞌvun omꞌ rudyuꞌtac.

¹¹ Räj muꞌin anicjetety Jenꞌ in där muꞌin noiꞌyi in, räjtumdye yoctyiꞌ seꞌvaquity in.

Daiꞌ quiꞌ jịꞌcaveyacsi ferdyeꞌ

¹² Jutactyiꞌ Jenꞌtyiꞌ muꞌ daiꞌ quiꞌ jịꞌcaveyacsi Jenꞌsiꞌ ferdyeꞌ muꞌ muntyisyaꞌ vej muꞌin. Muꞌin anicjetety Jenꞌ in tsudyujñiti in Jenꞌsiꞌĉan acaꞌ in väc̣häjc̣häsve Salomónsiꞌ, muꞌĉan yiqui tsudyujñiti in.

¹³ Muꞌin na yoctyiꞌ in jam anicjetety Jesucristo in anic jämꞌyi ĉọcsi in muꞌin anicjetety Jesucristo in, jam qui namꞌ jịjcatacsi in ĉaĉaij na noiꞌyi in.

¹⁴ Pạrej qui namꞌ muntyiꞌ in yejĉoij sitacsi in, sonꞌ judyeyaꞌ p̂en in, dayi muꞌin in anicjetety Jesucristo in.

¹⁵ Muntyiꞌ in aty cạvepteyaꞌ ferdyeꞌ in Jenꞌsiꞌ muꞌ, chat qui jiꞌshupcacsi jorojyaꞌ in muꞌin areꞌreijtyiꞌ in, muꞌyaꞌ chudenꞌjeyacsi in yóyaꞌdyemꞌ raꞌ tyeij Pedro u, paj qui cajnacsi muꞌ Pedro onojnodyemꞌ muꞌsiꞌ muꞌincheꞌ tŝọiꞌ muꞌ, mọꞌ qui jiꞌchäcacsebanꞌ.

¹⁶ Chimeꞌdye yocsiꞌĉantyiꞌ bäꞌyedyeꞌ in, c̣hẹiꞌyas Jerusalén, muꞌĉantyiꞌ daiꞌ atsij in tucsi areꞌreijtyiꞌ in judyeyaꞌ sọyoꞌtumtyiꞌ in, muꞌ räj jiꞌchäcacseban.

Jịꞌñibeꞌcacsi in Pedro judyeyaꞌ Juan

¹⁷ Muꞌ tashchety cudyitity Jenꞌcheꞌ yojtumdyemꞌ penꞌdyeꞌ u muꞌ muꞌin Saduceo in, yoqui in ĉaĉaij na daiꞌ muntyiꞌ in jịjcatacsi in muꞌin jutactyiꞌ Jenꞌtyiꞌ in.

¹⁸ Mọꞌdyes qui muꞌin tapjeyacsi in jutactyiꞌ Jenꞌtyiꞌ muꞌ, ĉärꞌtaquisĉan ĉärꞌjeyacsi in.

¹⁹ Mọꞌdye tsedyedyeꞌ yirity anjer Ayoꞌtyiꞌ muꞌ atsij vanacjetyetacseban chụiꞌdyeꞌ ĉärꞌtaquissiꞌ. Jäcacseban judyeyaꞌ jéyacsi:

²⁰ —Tạij muꞌĉan Jenꞌsiꞌĉan acaꞌ jịjcajamꞌ, voroꞌtacsejamꞌ muꞌĉan, jéyacsejamꞌ muntyiꞌ in mọꞌ p̂eyacdyeꞌ mọꞌ mụiꞌsis majmi cạiꞌsiꞌ.

²¹ Jutactyiꞌ Jenꞌtyiꞌ muꞌ chiquepte p̂eyacdyeꞌ in. Aty nojno mạyedyeꞌ pamꞌdye Jenꞌsiꞌĉan acaꞌ siti in, tiyacchuti jịꞌchiyacsi muꞌĉan in. Muꞌin na ayoꞌ in jam chịj in. Muꞌ tashchety cudyitity Jenꞌcheꞌ judyeyaꞌ muꞌin nọ́taquity in, vajmuꞌyaꞌjeyacsi muꞌin tashcheꞌ buꞌyity judío in räjtumdye ayoꞌ in. Aty vajmuꞌyaij in, jutacsi tsanꞌ väc̣häꞌtyity in paj qui jäcacsi in muꞌin ĉärꞌtaquisĉantyiꞌ jutactyiꞌ Jenꞌtyiꞌ muꞌ.

²² Aty venjoij ĉärꞌtaquisĉan in, aty muꞌin itŝij muꞌĉan in. Caꞌñibun in jéyacseban ayoꞌ in:

²³ —Venjoij muꞌyaꞌ tsun ĉäꞌräiꞌ tsanꞌ jämꞌ mọꞌ dạquiqueꞌ tsun. Chụiꞌdyeꞌyaꞌ muꞌin väc̣häꞌtyity in ĉọjcacvaꞌjoij in. Aty tsanꞌ vanchuiꞌ chụiꞌdyeꞌ tsun, itŝij méquity atsvun muꞌĉan in —yi muꞌin úñity in jéyacseban in.

²⁴ Seꞌvacsebi p̂eyacdyeꞌ muꞌin, muꞌ ayoꞌ muꞌin yụꞌtactyiꞌ in ĉọjcaiꞌtyiꞌ in Jenꞌsiꞌ acaꞌ muꞌ judyeyaꞌ muꞌin tashchety cudyitity Jenꞌcheꞌ in anic muꞌin äjyi in, yi jítidyeij in: —¿Junꞌ buty meꞌ uts muntyiꞌ in?

²⁵ Vatyquej atsij yirity muntyiꞌ jéyacsi: —A na jiquej muꞌĉan in muꞌin ĉärꞌtactyiꞌ muntyiꞌ jiquej in, aty Jenꞌsiꞌĉan acaꞌ muꞌin in jịꞌchiyacsevaꞌjoij muntyiꞌ in —yi muꞌ jéyacsi.

²⁶ Mọꞌdyes qui muꞌin cavin shupqui in muꞌin yụꞌtactyiꞌ in ĉọjcaptety Jenꞌsiꞌ acaꞌ in ayoꞌtum muꞌin, chat qui jäcacsi in, jam qui namꞌ junꞌjeyacsi in ĉaĉaij na quijnacsi muntyiꞌ in, vátyequej raꞌ farajnacsi mijyaꞌ in.

²⁷ Jiꞌsitacsi qui ayoꞌyaꞌ in yụꞌtacsi muꞌinsiꞌyaꞌ vej in. Muꞌ tashchety cudyitity Jenꞌcheꞌ jéyacsi:

²⁸ —Tsun fercheꞌ jéyac miꞌin jam raꞌ yejĉoij damꞌdye jịꞌchiqueyacsi muntyiꞌ in muꞌsiꞌ p̂eyacdyeꞌ mọꞌ jịꞌchiyacsis miꞌin. Meꞌ tsanꞌ jéyac tsun, miꞌin qui namꞌ yejĉoij jịꞌchiqueyacsi räj Jerusalénĉantyiꞌ muntyiꞌ in jiꞌchäyitidyeꞌ miꞌin, judyeyaꞌ dyijyi miꞌin mạꞌjeꞌ tsunmun jiꞌmeꞌtiĉaꞌ miꞌin uts sänꞌdyeꞌ muntyis —jéyacsi ayoꞌ.

²⁹ Pedro yoctyiꞌtum jutactyiꞌ Jenꞌtyiꞌ muꞌ vorjeyacsi in: —Jemoñeꞌ tashi chiquete Jenꞌ tsun jäquiꞌve raꞌ muntyiꞌ in.

³⁰ Meꞌ tsanꞌ miꞌin jiꞌijatinte muꞌ Jesús jiquej judyeyaꞌ jiꞌpactinte croshcheꞌ jiquej miꞌin, Jenꞌ qui namꞌ vóshiꞌvuntyiꞌ jiquej tsun, muꞌ jajiꞌtsaꞌibun,

³¹ mạyedyeꞌcheꞌ jácabun, judyeyaꞌ jayuꞌbun tacve buꞌban Jenꞌyaꞌ muꞌ. Jenꞌ jayuꞌbun paj qui ayoꞌbuꞌyi muꞌ, judyeyaꞌ Jiꞌc̣honacsity Muntyiꞌ. Q̂uinꞌ chat muꞌ soꞌmisinꞌ ñịbeꞌjitidyes muꞌ paj qui tsun Israeltyiꞌ vóshiꞌ tsun tupuj camanꞌ dyijyebajshaꞌ juchajcheꞌ, judyeyaꞌ paj qui muꞌ Jenꞌ vayacjibusinꞌ juchaj tsun.

³² Tsun nash jéyacsity räj ọij q̂uinꞌ, chimeꞌdye meꞌ Jenꞌsiꞌ Ạꞌedyeꞌ muꞌ meꞌ jéyacsiꞌ ĉaĉaij na muꞌ Jenꞌ mọꞌ soꞌmacsi tyi chuc chiquetety in —jéyacsi muꞌ Pedro.

³³ Muꞌin ayoꞌ in aty seꞌvacsebi p̂eyacdyeꞌ in, jämꞌ muꞌin fạ́coij tyeij in, dyijyi in mạꞌjeꞌ meꞌĉandye tsanꞌ ijacsi in.

³⁴ Muꞌyaꞌ na yirity muꞌĉantyiꞌ ayoꞌ, fariseo muꞌ, Gamaliel tịj muꞌ. Muꞌ jịꞌchiyacsity yụꞌtacdyeꞌ chimeꞌ, muꞌ ạ̈räjjetety muntyiꞌ in. Sacyi muꞌ Gamaliel jéyacsi paj qui jiꞌshupcacsi chum in Jenꞌtyiꞌ jutactyiꞌ muꞌ.

³⁵ Yi jéyacsi ayoꞌ: —Chätidyeꞌ, miꞌin Israeltyiꞌ vóshiꞌ miꞌin, yụ raꞌ jéyac, areꞌĉa miꞌin junꞌjeyacsi miꞌin uts muntyiꞌ in.

³⁶ Jeshaꞌ jiquej shupqui yirity muntyiꞌ Teudas tịj muꞌ. Yi muꞌ, "yụ nash mujuꞌchaꞌ buꞌyity." Daiꞌ muntyiꞌ jịjcate in vạjpedyeꞌ quiꞌ cien rụiꞌcuꞌ in. Aty meꞌsiꞌ chat qui muꞌ ujate in, muꞌin na jịjcatety in räj paiꞌ jịjcaij in, meꞌquiꞌdye jadyic in.

³⁷ Chimeꞌdye meꞌsiꞌ yóquiꞌdyemꞌ sanꞌquejĉoij muntyiꞌ u in, shupqui muꞌ Judas, Galileaĉantyiꞌ muntyiꞌ. Muꞌ seꞌ jaꞌyacsi daiꞌ muntyiꞌ in jịjcate in. Meꞌjeyacdye muꞌ chimeꞌ ijac jiquej, muꞌin na cäc̣häꞌchutety in paiꞌ jịjcaij in, meꞌquiꞌdye jadyic in.

³⁸ Mọꞌdyes yụ raꞌ jéyac miꞌin, areꞌĉa uts q̂uinꞌtyity muntyiꞌ in, jam raꞌ meꞌtacsi miꞌin. Muntyis mọmoꞌ dyijyedyeꞌ jụijyaꞌ muꞌinsiꞌ in, jadyic raꞌ jam raꞌ yejĉoiꞌ.

³⁹ Jenꞌsiꞌ na raꞌ dyijyedyeꞌ jụijyaꞌ muꞌ, jam raꞌ junꞌ miꞌin tupuj jiꞌpenacsebi, areꞌĉa Jenꞌtum chuti miꞌin —jéyacsi muꞌ Gamaliel. Muꞌin ayoꞌ in jụjjepte p̂eyacdyeꞌ in.

⁴⁰ Jiꞌsitacseban in Jenꞌtyiꞌ jutactyiꞌ muꞌ, siꞌbacsi qui in judyeyaꞌ ferdyeꞌtum jéyacsi in paj qui jam cuvij voroꞌtacsi in Jesússiꞌ p̂eyacdyeꞌ muꞌ, chat qui q̂uinꞌdyemꞌ jiꞌc̣honacsi in.

⁴¹ Muꞌin na jutactyiꞌ Jenꞌtyiꞌ muꞌ jọban muꞌin in, farajjeyacsetaqui ayoꞌ in. Maꞌjodyeꞌtum jọban in ĉaĉaij na muꞌ Jenꞌ tsimꞌtacsi paj qui jịꞌĉojtyeꞌ in ñịbedyes Jesúsdyes.

⁴² Meꞌ tsanꞌ meꞌ jéyacsi in yejĉoij qui namꞌ voroꞌtacsi in jämꞌsiꞌ p̂eyacdyeꞌ Jesússiꞌ muꞌ. Räjĉan mạyedyeꞌ Jenꞌsiꞌĉan acaꞌ in judyeyaꞌ muntyisĉan acaꞌ in muꞌin jéyacsi in: "Jesús Jiꞌc̣honsinꞌtyiꞌ tsun", meꞌ jéyacsi muntyiꞌ in.