Uñedye' 3 - Tsimane

Jiꞌchäĉajte in bureijtyiꞌ muntyiꞌ

¹ Yirisĉan mạyedyeꞌ muꞌ Pedro judyeyaꞌ muꞌ Juan Jenꞌsiꞌĉan acaꞌ jịjcaij in. Aty yómoꞌquiꞌve muntyiꞌ in muꞌĉan jịjcaij in ĉaĉaij na räjĉan meꞌquiꞌ tsun cọdajquiqui Jenꞌcheꞌ in.

² Muꞌyaꞌ yirity bureijtyiꞌ muntyiꞌ nạijte in, tạꞌcatydye naꞌi jam miꞌity. Räjĉan mạyedyeꞌ jiquicte in Jenꞌsiꞌĉan acaꞌ muꞌ, yụꞌte in chụiꞌdyeꞌyaꞌ, "Jäjämunsiꞌ" jeꞌ mọꞌ chụiꞌdyeꞌ in, muꞌyaꞌ cọdaqui querec̣ha.

³ Pedro judyeyaꞌ muꞌ Juan aty raꞌ tsanꞌ siti muꞌĉan in. Chat nạijtacsi muꞌ bureijtyiꞌ muntyiꞌ, cọdyetacsi tsanꞌ querec̣ha.

⁴ Jämꞌtute mọmoꞌ muꞌin cạvete in, muꞌ qui Pedro jéte: —Jämꞌtutiĉamꞌ cavitiĉamꞌ tsun.

⁵ Meꞌdye muꞌ jämꞌ vejtucsi jeñej aty raꞌ muꞌin jedyeꞌ soꞌmete u in, meꞌ muꞌ ĉúti.

⁶ Chat qui muꞌ Pedro yi jéte: —Mijam yirity meꞌchuteij ficha, mọꞌ meꞌchuiꞌsiꞌ yụ, mọꞌ ramꞌ soꞌmeye, Jesucristosyaꞌ ferdyeꞌ muꞌ, muꞌ Nazaretĉantyiꞌ, yụ jéye, sacyeva mi, miꞌeva —jajiti Pedro.

⁷ Chat qui chubite tacves un muꞌ, sacjete. Meꞌĉandye vatyquej chụiꞌyebanꞌ yuj muꞌ,

⁸ sac tyeij muꞌ muntyiꞌ miꞌi vatyquej. Muꞌmun qui siti Jenꞌsiꞌĉan acaꞌ muꞌ, roiꞌroiꞌquejĉoij maꞌjoban muꞌ timaꞌquete Jenꞌ.

⁹ Räj muꞌĉantyiꞌ in cạvete in aty miꞌi muꞌ judyeyaꞌ timaꞌquete Jenꞌ.

¹⁰ Anic där äjyi muꞌin in aty cạveteyaꞌ in ĉaĉaij na chị́yete in muꞌdye mọmoꞌ bureijtyiꞌ muntyiꞌ jiquej cọdaquity querec̣ha jiquej muꞌ, muꞌyaꞌ bäꞌvaꞌjoijtyiꞌ chụiꞌdyeꞌyaꞌ Jäjämunsiꞌyaꞌ.

Pedro voroꞌtacsi Jenꞌsiꞌĉan acaꞌ

¹¹ Muꞌ bureijtyiꞌ muntyiꞌ jiquej jam yacchucsi muꞌ Pedro judyeyaꞌ Juan. Ñur tyeij muntyiꞌ muꞌĉan in Jenꞌsiꞌĉan acaꞌ, mọꞌ väc̣häjc̣häsve acas Salomónsiꞌ jeꞌ in, yóĉandyemꞌ muꞌin jutactyiꞌ Jenꞌtyiꞌ u in, anic där äjyi muntyiꞌ in.

¹² Pedro cạvacsi jéyacsi: —Miꞌin Israeltyiꞌ vóshiꞌ miꞌin, ¿junꞌ meꞌ äjyi u miꞌin? ¿Jedyeꞌ jítiĉaꞌ caꞌ tsun äjjitiĉaꞌ miꞌin? Jeñej ĉụiꞌsiꞌyaꞌ ferdyeꞌ ĉútiĉaꞌ tsun miꞌin, areꞌ ĉụiꞌsiꞌyaꞌ jämꞌyedyeꞌ tsun meꞌ jiꞌchäĉajte tsun uts muntyiꞌ, ¿meꞌ buty ĉútiĉaꞌ tsun miꞌin?

¹³ Jam junꞌ meꞌ tsun. Muꞌdye Jenꞌ Abrahamtyiꞌ judyeyaꞌ Isaactyiꞌ judyeyaꞌ Jacobtyiꞌ chimeꞌ, räjtumdye vóshiꞌvuntyiꞌ tsun jiquej in, muꞌsiꞌyaꞌ ferdyeꞌ jiꞌchäĉajte tsun uts muntyiꞌ. Chimeꞌdye muꞌ Jenꞌ fer buꞌyi jayuꞌti muꞌ Jesús ĉụiꞌtyiꞌ Jutactyiꞌ muꞌ. Meꞌ tsanꞌ meꞌ muꞌ, miꞌin qui namꞌ jiꞌmeꞌtinte muꞌ Jesús ayoꞌyaꞌ jiquej. Muꞌ tsanꞌ Pilato dyijyi jiꞌc̣honte raꞌ tsanꞌ muꞌ miꞌin qui namꞌ jam jụjyi.

¹⁴ Meꞌ tsanꞌ rụijtyity, meꞌ tsanꞌ jämꞌyity, uts na meꞌjetinte vaꞌquectinte muꞌ. Mumꞌ cọdyetinte miꞌin paj qui muꞌ Pilato jiꞌc̣honte muꞌ ac̣hiꞌyity muntyiꞌ ijacsity jiquej.

¹⁵ Meꞌdyes jiꞌijatinte jiquej muꞌ tsạꞌchusinꞌtyiꞌ tsun. Jenꞌ qui namꞌ jajiꞌtsaꞌibun, tsun mọꞌ räj cạveꞌ ĉụiꞌsiꞌyaꞌ vej tsun paj qui tsun jéyacsi muntyiꞌ in.

¹⁶ Jesússiꞌyaꞌ ferdyeꞌ jiꞌchäĉajte tsun uts buꞌrety muntyiꞌ chị́yetintety miꞌin, q̂uinꞌ aty cạvetinte miꞌin junꞌ chuc chäĉän muꞌ, ĉaĉaij na anicyi Jesúscheꞌ tsun.

¹⁷ Vojity, yụ nash chị́yebiyac dyijyedyeꞌ miꞌin judyeyaꞌ ayos miꞌin chimeꞌ. Meꞌ tsanꞌ jiꞌijatinte jiquej muꞌ Jesús, jam qui namꞌ chịj miꞌin junꞌ buty mọꞌ cạiꞌ jiquej.

¹⁸ Urucyaꞌ jiquej jéyacsi Jenꞌ räj muꞌin jasoꞌmitity p̂eyacdyeꞌ muꞌ junꞌ chuc raꞌ ñịbeꞌ cạveꞌ muꞌ Jiꞌc̣honacsity Muntyiꞌ jutactyiꞌ raꞌ, ijac raꞌ muꞌ. Q̂uinꞌ chat aty cạ̈tsiꞌ Jesúsdyes ọij sánacdyeꞌ.

¹⁹ Q̂uinꞌ dyijyejamꞌ juchajcheꞌ, camanꞌyebajshamꞌ Jenꞌdyes paj qui vayacjibunac juchaj miꞌin, chat qui raꞌ muꞌ Ayoꞌ yuꞌtyiyinac tupudyeꞌ paj qui pacaj ĉojtyiꞌĉan miꞌin,

²⁰ muꞌ raꞌ jutiyinac Jesús, ĉaĉaij nash muꞌ Jiꞌc̣honacsity Muntyiꞌ tạꞌcaty tsimꞌtactyiꞌ Jenꞌyaꞌ jiquej muꞌ.

²¹ Jenꞌ dyijyi paj qui muꞌ Jesús taccheꞌ chum raꞌ mạyedyeꞌcheꞌ, junꞌsiꞌ chuc ayijbanꞌyaꞌ tupudyeꞌ paj qui muꞌ Jenꞌ jämꞌ yụꞌbanꞌ raꞌ räj, yoj yidyemꞌ jiquej u muꞌ Jenꞌ, jéyacsi muꞌin urucyaty jasoꞌmitity p̂eyacdyeꞌ muꞌ.

²² Moisés jiquej chimeꞌ p̂eijte Jesús jéyacsi vóshiꞌvun tsun jiquej, yi muꞌ: "Muꞌ Jenꞌ Ayoꞌ tsun jutiyinac raꞌ yirity chätidyeꞌ miꞌin, muꞌ raꞌ yụꞌtac jasoꞌmitity p̂eyacdyeꞌ Jenꞌ, yódyemꞌ yụ q̂uinꞌ u, meꞌdye raꞌ muꞌ chimeꞌ. Miꞌin raꞌ räj seꞌvebitinte p̂eyacdyeꞌ muꞌ mọꞌ jínacsiꞌ raꞌ miꞌin.

²³ Tyi chuc jam seꞌveptety p̂eyacdyeꞌ in, muꞌin raꞌ jorojyaꞌ vaꞌcac in judyeyaꞌ raꞌ ijac in", yi Moisés.

²⁴ Chimeꞌdye räj muꞌin jasoꞌmitity p̂eyacdyeꞌ Jenꞌ jiquej in, muꞌ Samuel judyeyaꞌ muꞌin jäquity in, räj mọꞌ p̂eyeꞌ in tupudyeꞌ q̂uinꞌ, junꞌsiꞌ chuc raꞌ cạ̈tsiꞌyaꞌ Jenꞌsiꞌ p̂eyacdyeꞌ muꞌ.

²⁵ Miꞌindyes nash ọij p̂eyacdyeꞌ soꞌmacsis muꞌin jasoꞌmitity p̂eyacdyeꞌ Jenꞌ jiquej in, chimeꞌdye miꞌindyes mọꞌ p̂eyacdyeꞌ yụꞌtyeyacsis Jenꞌ vóshiꞌvun tsun, jasoꞌmitis Abraham jiquej, yi muꞌ: "Vóshiꞌyaꞌdye raꞌ mi, yụ raꞌ ñịbeꞌjeyacsi jacchety muntyiꞌ in, yoc yoc in", yi muꞌ Jenꞌ.

²⁶ Jenꞌ jịꞌtsaꞌaĉan Ạvaꞌ muꞌ, tashcheꞌ jutiyinac miꞌin paj qui soꞌminac jämꞌyedyeꞌ ĉojtyiꞌĉandyes miꞌin paj qui räj miꞌin yacchutiñeꞌ juchaj miꞌin —jéyacsi muꞌ Pedro.