Uñedye' 28 - Tsimane

Pablo Maltaĉan

¹ Pacaj c̣hoñi räj tsun chat q̂uinꞌdyemꞌ chị́qui tsun mọꞌ buty jiquej poc̣hoꞌ tịj mọꞌ jacsiꞌ Malta.

² Muꞌĉan bäꞌyity in anic jämꞌjin tsun in, jiꞌjäꞌnaqui tŝij in, judyeyaꞌ fayin tsun in paj qui jufibun tsun ĉaĉaij na añetyi tsun anic jätacñi tsun.

³ Nọ́taqui chimeꞌ Pablo tŝijtuij damꞌ, aty muꞌ cänꞌtyeꞌ mọꞌ tŝij, muꞌĉan buty jiquej muꞌ nas. Ĉụiꞌdye shupqui muꞌĉantyiꞌ aty mọꞌ japacyejoiꞌyaꞌ tŝij, caravꞌyetŝọij vatyquej Pablocheꞌ täyenꞌ tŝọij unchemꞌ.

⁴ Muꞌĉan bäꞌyity in aty meꞌ cạvete in, yi jítidyeij in: —Areꞌ uts ijacsity muntyiꞌ, meꞌ tsanꞌ c̣hoñi muꞌ ojñiꞌĉan, muꞌ qui namꞌ jenꞌ yócheꞌdyemꞌ ĉútiĉaꞌcheꞌ tsun u, muꞌ raꞌ jam junꞌ c̣honchute, säñi raꞌ muꞌ —yi jítidyeij in.

⁵ Nipjeyaqui un muꞌ Pablo, tŝijĉan jịꞌtŝote muꞌ nas, mijam junꞌjajiti muꞌ.

⁶ Muꞌin na muntyiꞌ in jämꞌ muꞌin chivejyi cạvete in, junꞌjajiti a ĉa, junꞌ a ĉa jajiꞌñäpdyij, junꞌ a ĉa säñi, yi in. Meꞌ tsanꞌ biste in, muꞌ qui namꞌ jam jụñiꞌñiij, mọꞌdyes qui yocve dyijyi in: "jenꞌ na jiquej uts muntyiꞌ", yi in.

⁷ Muꞌĉantyiꞌ ayoꞌ tịj muꞌ Publio, muꞌ aꞌ mọꞌ jacsiꞌ c̣hẹiꞌyaꞌ muꞌ jáman yóyaꞌdyemꞌ c̣hoñi jiquej u tsun. Jämꞌ muꞌ tiĉuñin tsun judyeyaꞌ jiꞌdyäquin tsun, chibin mạyedyeꞌ muꞌyaꞌ tsun jämꞌ ĉujcan tsun.

⁸ Muꞌ na Publioty jenꞌ muꞌ jubijĉan muꞌ chụjduij, jänjändyeꞌtumsiꞌ väs játŝuti. Siste muꞌ Pablo cọdyete Jenꞌ muꞌdyes judyeyaꞌ yụꞌtaqui un muꞌ, jiꞌjiijbite mọꞌ japacjodyeꞌ.

⁹ Chị́qui yoctyiꞌ in muꞌin qui atsij in muꞌĉantyiꞌ japacjoijtyiꞌ räj in, muꞌ qui jiꞌchäcacseban.

¹⁰ Daiꞌ muꞌin jedyeꞌ ñịbeꞌjin tsun in, judyeyaꞌ aty raꞌ yạjquicsebanyaꞌ tsun, muꞌĉantyiꞌ in ñịbeꞌjin tsun in räj jedyeꞌ chuc miꞌedyedyes jemoñeꞌ tsun.

Pablo venjoij Romaĉan

¹¹ Chibin ịvaj muꞌĉan bäꞌyi tsun Maltaĉan, chat quivijyi bijti tsun marĉantyiꞌcheꞌ covamba Alejandríayaty. Muꞌ covamba cạiꞌ tịj jämꞌtacdyeꞌ muntyis muꞌin, Cástor judyeyaꞌ Pólus. Muꞌ covamba chimeꞌ jiꞌjiyety tupudyeꞌ tsịvuꞌvudyes muꞌyaꞌ Maltayaꞌ.

¹² Chat qui tacti muꞌyaꞌ tsun, miꞌi tsun, dạquiqueꞌ tsun mọꞌ bäꞌyedyeꞌ Siracusa, muꞌyaꞌ sojquiti tsun, chibin mạyedyeꞌ muꞌyaꞌ dyäqui tsun.

¹³ Cuvij miꞌi tsun, cuvij chịꞌve tyeij tsun chaꞌsheꞌ tsun mọꞌ bäꞌyedyeꞌ Regio, muꞌyaꞌ sojquiti tsun. Nojno mạyedyeꞌ quivij fujuꞌjuyeban tyiꞌmu jätisve, quivij tacti tsun päräꞌ mạyedyeꞌ miꞌi tsun, venjoij tsun Puteoliyaꞌ, muꞌyaꞌ qui sojquiti tsun.

¹⁴ Muꞌĉan pạrej anicjetety Jenꞌ in muꞌyaꞌ fayin tsun in paj qui muꞌyaꞌ dyäqui tsun, yävätidyeꞌ mạyedyeꞌ muꞌĉan bäꞌyi tsun. Cuvij miꞌi tsun, Romaĉan jịjcaij tsun, majmicheꞌ qui tyeij tsun.

¹⁵ Romaĉantyiꞌ anicjetety Jenꞌ in aty muꞌin chị́qui in aty tsun majmiyaꞌ tyiti. Pạrej muꞌin in jiꞌrebin tsun in, muꞌyaꞌ rébin tsun in mọꞌ bäꞌyedyeꞌyaꞌ: Apios Jiꞌmincaquiyaꞌ, tịj mọꞌ, jeꞌ in. Pạrej jäquiꞌ atsij in muꞌyaꞌ rébin tsun in mọꞌ bäꞌyedyeꞌ. Chibin Dyäquedyes, tịj mọꞌ, jeꞌ in. Pablo aty cạvacsi muꞌin anicyity Jenꞌcheꞌ in, chat qui muꞌ yoshoropaij jéte Jenꞌ, jiĉun ĉojtyiꞌĉan muꞌ.

¹⁶ Meꞌdye Romaĉan venjoij tsun. Muꞌĉan quivij ĉärꞌte in muꞌ Pablo, pạrej qui namꞌ jiꞌbäꞌyete in, yocsiꞌ acaꞌ, väc̣häꞌtyitytum jaĉujcatity.

Pablo jéyacsi Romaĉantyiꞌ judío in

¹⁷ Chibin mạyedyeꞌ atsvun muꞌ, chat qui muꞌ Pablo jiꞌvorvacsi muꞌĉantyiꞌ judíoty ayoꞌ muꞌin. Muꞌyaꞌ vajmuꞌyaij in, chat qui yi muꞌ Pablo jéyacsi: —Chätidyeꞌ, yụ raꞌ jéyac, meꞌ tsanꞌ jam juchatucsi yụ chätidyeꞌ judío tsun, meꞌ tsanꞌ jam vaꞌcacsebi yụ yicdyeꞌ vóshiꞌvunsiꞌ tsun jiquej, muꞌin qui namꞌ Jerusalénĉantyiꞌ judío in tapjin yụ in, ĉärꞌtyin yụ in, judyeyaꞌ jiꞌmeꞌtyin yụ in Romaĉantyiꞌyaꞌ ayoꞌ in.

¹⁸ Aty meꞌsiꞌ cudyityin p̂eyacdyeꞌ yụ in, mạꞌjeꞌ tsanꞌ jiꞌc̣hoñin yụ in ĉaĉaij na itŝiꞌ juchaj yụ jiꞌijacdyes yụ.

¹⁹ Muꞌin na muꞌĉantyiꞌ judío in jam jụjyi in paj qui jiꞌc̣honac yụ, mọꞌdyes qui yụ cọdyete muꞌ ayoꞌ paj qui úĉan Romaĉan jutin yụ paj qui muꞌ mujuꞌchaty ayoꞌ úĉantyiꞌ jịꞌcäts yuꞌtyin yụ. Yụ jam méquiꞌ jiꞌmeꞌtacsi chätidyeꞌ yụ judío in ayoꞌyaꞌ in.

²⁰ Mọꞌdyes yụ jiꞌvorveyac miꞌin, mạꞌjeꞌ cạveyac miꞌin judyeyaꞌ mạꞌjeꞌ p̂eyaqui yụ miꞌintum. Ĉärꞌtyin yụ in ĉaĉaij na yụ ọij mọmoꞌ anicjeꞌ mọꞌ p̂eyacdyeꞌ p̂eijtes Jiꞌc̣honsinꞌtyiꞌ tsun Israeltyiꞌ vóshiꞌ tsun, muꞌ bisjaty tsun —jéyacsi muꞌ Pablo.

²¹ Muꞌĉantyiꞌ ayoꞌ judíoty vorjete in: —Tsun na úyaꞌ bäꞌyity jam méquiꞌ seꞌvebiyac juchaj mi, mijam muꞌin Judeaĉantyiꞌ judío in jam jutiyin tsun in paperches jiꞌmeꞌtacdyeꞌ mi, mijam muꞌĉantyiꞌ in atsijtyiꞌ úyaꞌ in jam tuiꞌ in jiꞌmeꞌtacdyeꞌ mi.

²² Tsun mạꞌjeꞌ seꞌvebiyac dyijyedyeꞌ mi ĉaĉaij na räj paiꞌ bäꞌyity in ñäñibun in mítyiꞌ ñuruꞌtyity in —jéte in muꞌ Pablo.

²³ Mọꞌdyes qui muꞌin yụꞌtyeꞌ in yiris mạyedyeꞌ paj qui seꞌvepte in Pablos p̂eyacdyeꞌ muꞌ. Chaꞌsheꞌ mọꞌ mạyedyeꞌ in, daiꞌ atsij muntyiꞌ in yóĉandyemꞌ ĉäꞌräij Pablo u. Dyutsenꞌ mạyedyeꞌ voroꞌtacsi muꞌ Jenꞌsiꞌ p̂eyacdyeꞌ muꞌ, p̂eijbite muꞌ ayoꞌbuꞌyidyes raꞌ Jenꞌsiꞌ muꞌ. Jịꞌchiqueyacsi yụꞌtacdyeꞌ jasoꞌmitis Moisés jiquej judyeyaꞌ muꞌinsiꞌ sánacdyeꞌ muꞌin jasoꞌmititysiꞌ p̂eyacdyeꞌ Jenꞌ jiquej in. Mọꞌ mạꞌjeꞌ tsanꞌ jịꞌchiqueyacsi jätäjyiꞌ chuc mọꞌ sánacdyeꞌ, p̂eijte muꞌ Jesús Jiꞌc̣honacsity Muntyiꞌ.

²⁴ Pạrej anicjepte p̂eyacdyeꞌ in, yoctyiꞌ na jam anicyi in,

²⁵ mijam cäts dyijyedyeꞌ muꞌin. Mọꞌdyes qui aty raꞌ jọbanyaꞌ in, muꞌ Pablo quivij jéyacsi: —Anic rụij shupquiꞌ mọꞌ p̂eyacdyeꞌ jasoꞌmitis Isaías jiquej Jenꞌsiꞌ Ạꞌedyeꞌ muꞌ, vóshiꞌvundyes miꞌin mọꞌ p̂eyacdyeꞌ, yiꞌ jajiti muꞌ Isaías:

²⁶ "Tạij jéyacseca muntyiꞌ in: Meꞌ raꞌ tsanꞌ yejĉoij seꞌvaqui miꞌin, jam qui na ramꞌ chicacsi miꞌin, jedyeꞌ chuc cạiꞌ mọꞌ p̂eyacdyeꞌ, meꞌ raꞌ tsanꞌ yejĉoij cạvi miꞌin, jam qui na ramꞌ naijti miꞌin.

²⁷ Ĉaĉaij na anic yäcäj ĉojtyiꞌ muꞌin, judyeyaꞌ tyucjeꞌ chun in judyeyaꞌ quibanꞌjeꞌ vej in. Mijam méquiꞌ mạꞌjeꞌ caꞌñibun yụ́dyes in paj qui naijti in, tupuj qui seꞌvaqui in judyeyaꞌ tupuj qui chicacsi in ĉojtyiꞌĉan, paj qui yụ jiꞌc̣honacsi", yiꞌ sánacdyeꞌ.

^28-29 Ọij cạ̈tsiꞌ miꞌindyes. Yụ fercheꞌ jéyac miꞌin aty äcäijjeptinte Jenꞌsiꞌ p̂eyacdyeꞌ muꞌ mọꞌ c̣honꞌdyedyes, q̂uinꞌ chat raꞌ jéyacsi yụ muꞌin jam judío in, muꞌin raꞌ chat jam meꞌ in, seꞌveꞌ raꞌ in —jéyacsi muꞌ Pablo.

³⁰ Päräꞌ yómodyeꞌ meꞌquiꞌ muꞌĉan ĉärꞌ buꞌyi Pablo, mọꞌ yaꞌityejijcaiꞌsiꞌ acaꞌ, muꞌĉan bäꞌyi, tiĉunacsi tyi chuc ĉọctety in.

³¹ Yejĉoij voroꞌtacsi mọꞌ p̂eyacdyeꞌ p̂eijbite ayoꞌbuꞌyidyes raꞌ Jenꞌsiꞌ muꞌ, jam tyi meꞌte in mijam noiꞌyedyeꞌtum jéyacsi muꞌ, jorojĉan jéyacsi junꞌ chuc muꞌ Jesucristo Ayoꞌ tsun.