Uñedye' 24 - Tsimane

Pablo ñutsjiti Félixyaꞌ

¹ Ĉanamꞌ mạyedyeꞌ tyitiꞌ, atsij muꞌ Ananías tashchety cudyitity Jenꞌcheꞌ, Cesareaĉan shupqueti muꞌ, penꞌdyetucsi pạrej tashcheꞌ buꞌyity judío in judyeyaꞌ yirity ñutsjeyacsity ayoꞌyaꞌ, Tértulo tịj muꞌ. Jiꞌcaviti muꞌin in ayoꞌyaꞌ jiꞌmeꞌte raꞌ in muꞌ Pablo.

² Aty muꞌyaꞌ muꞌ tute in Pablo, chat muꞌ Tértulo tiyacchuiꞌ p̂eyaqui jiꞌmeꞌte muꞌ Pablo ayoꞌyaꞌ. Muꞌ Tértulo p̂eyacdyeꞌ soꞌmete jéte: —Tsuntyiꞌ ayoꞌ, yoshoropaij anic mi jämꞌ ayoꞌbuꞌyi, meꞌdyes tsun q̂uinꞌ jämꞌ bäꞌyi mísĉan ayoꞌbuꞌyedyeꞌ. Anic dyijyedyeꞌtum ayoꞌbuꞌyi mi tsundyes, jam pụyuꞌ carijtacdyeꞌ mi úĉan tsunsiꞌĉan jac q̂uinꞌ.

³ Meꞌdyes tsun räjĉan junaꞌ ĉụiꞌ bäꞌyi tsun maꞌjotyebiyac ayoꞌbuꞌyedyem mọꞌdyes yoshoropaij jéyac tsun, mi nash fer buꞌyity.

⁴ Jam yụ mạꞌjeꞌ jiꞌnoꞌbeye p̂eyacdyeꞌyaꞌ, meꞌ tsanꞌ meꞌ yụ qui namꞌ jéye paj qui jam shọijbutiĉaꞌ mi p̂eyacdyeꞌ tsun, damꞌ seꞌvibutiĉaꞌ ọij p̂eyacdyeꞌ tsun.

⁵ Tsun nash dạcte uts Pablo anic ac̣hiꞌyity muntyiꞌ, paiꞌ ĉọ́queꞌ bäꞌyedyeꞌ, sac jaꞌyacsi judío in. Muꞌ nash tashcheꞌ buꞌyity ñuruꞌtyity in muꞌin jéyacsity in Nazareno in, meꞌ jéyacsi in.

^6-7 Jam mọꞌ mọmoꞌ, chimeꞌ mạꞌjeꞌ ac̣hiꞌbite Jenꞌsiꞌ acaꞌ muꞌ meꞌdyes qui tsun tapjete jiquej.

⁸ Meꞌdye raꞌ mi tupuj cọdyetyete p̂eyacdyeꞌ muꞌ, mọꞌyaꞌ raꞌ chịj mi anicsis ọij p̂eyacdyeꞌ yụ jiꞌmeꞌtes q̂uinꞌ —yi muꞌ Tértulo jéte ayoꞌ.

⁹ Muꞌĉantyiꞌ judío seꞌvaquity in chiyidye muꞌin jiꞌmeꞌte in: "Anic rụijsis p̂eyacdyeꞌ mọꞌ", jéte in muꞌ ayoꞌ Félix.

¹⁰ Cheꞌjeyaqui ayoꞌ un muꞌ, mọꞌ jịꞌĉocdyes aty p̂eyaqui raꞌ muꞌ Pablo ñutsjiti ĉụiꞌ. Yi muꞌ Pablo jéte ayoꞌ: —Anic jämꞌ ñutsjiti yụ mísiꞌyaꞌ vej, ĉaĉaij na daiꞌ yómodyeꞌ ayoꞌbuꞌyi mi úĉan tsunsiꞌĉan bäꞌyedyeꞌ.

¹¹ Jambiꞌ men, yiriꞌtac päräꞌ jiyiꞌdyemꞌ mạyedyeꞌ Jerusalénĉan venchuij yụ, timaꞌqueshte Jenꞌ muꞌĉan yụ. Mạꞌjeꞌ jụijyaꞌ mi jéyacseva uts in meꞌ raꞌ chat tupuj chịj mi anicsis mọꞌ p̂eyacdyeꞌ.

¹² Mijam méquiꞌ daquin yụ in joꞌmesyaꞌ chuti p̂eyacdyeꞌyaꞌ yụ muntyiꞌtum in, mijam sac jaꞌyacsi muntyiꞌ yụ, mijam Jenꞌsiꞌĉan acaꞌ muꞌ, mijam vajmuꞌyaijĉan judío in mijam junaꞌ ĉụiꞌ bäꞌyedyeꞌĉan mijam damꞌ jéyacsi muntyiꞌ yụ.

¹³ Útsi muntyiꞌ in jiꞌmeꞌtyintyiꞌ yụ in, jam raꞌ junꞌ buꞌyi jịꞌĉoiꞌ in junꞌ chuc anicsis ọij jiꞌmeꞌtacdyeꞌ yụ́dyes.

¹⁴ Ọij jam junꞌ ticameꞌ yụ, yụ nash cäc̣häꞌchuptety Jesússiꞌ majmi muꞌ, uts na in jeñej cäjsis jiꞌchäyitidyeꞌ ĉọiꞌ in. Yụ qui namꞌ Jenꞌ timaꞌquetety, muꞌdye mọmoꞌ Jenꞌ vóshiꞌvuntyiꞌ tsun jiquej, muꞌ timaꞌquete yụ, ĉaĉaij na yụ anicjepteij yụꞌtacdyeꞌ Jenꞌsiꞌ muꞌ, räjtumdye sánacdyeꞌ muꞌin jasoꞌmititysiꞌ p̂eyacdyeꞌ Jenꞌ jiquej in.

¹⁵ Vaj cäts yụ utstum in anicyi tsun Jenꞌ raꞌ vañinjeyacseban muꞌin säñity in, rụijtyity in judyeyaꞌ jam rụijtyity in.

¹⁶ Yụꞌtaqui ferdyeꞌ yụ paj qui jam cäj ĉojtyiꞌĉan yụ Jenꞌsiꞌyaꞌ vej muꞌ judyeyaꞌ muntyisyaꞌ vej muꞌin.

¹⁷ Aty juñucsiꞌ yómodyeꞌ meꞌmeyejoij nati yocve yụ, vátyequej munjayaꞌĉan q̂uinꞌdyemꞌ caꞌñibun Jerusalénĉan jijtuban yụ, dyijyi yụ mạꞌjeꞌ jitishte yụ muꞌ dyimꞌtety querec̣ha yụ chätidyedyety yụ judíodyety in, judyeyaꞌ chimeꞌ dyijyi yụ mạꞌjeꞌ jiꞌcoꞌshayeꞌ Jenꞌdyes yụ.

¹⁸ Meꞌdye muꞌĉan daquin yụ in Jenꞌsiꞌĉan acaꞌ muꞌ, aty ĉụiꞌ jämꞌ yuꞌti yụ tsunsiꞌyaꞌ yicdyeꞌ judíosyaꞌ tsun, itŝij méquity muntyiꞌ in mijam äjnaqui in.

¹⁹ Meꞌdye Asiaĉantyiꞌ mọmoꞌ judío in, muꞌin mọmoꞌ cavin yụ in muꞌĉan Jenꞌsiꞌĉan acaꞌ muꞌ. Muꞌin jemoñeꞌ atsij in paj qui jiꞌmeꞌtyin yụ in mísyaꞌ vej, jedac anic mọꞌyaꞌ cäjsis yụ.

²⁰ Chimeꞌdye uts q̂uinꞌ atsijtyiꞌ in paj muꞌin jiꞌchäquiyin in juchaj yụ, meꞌ jụijyaꞌ dạcbun yụ in juchaj yụ, yoquiꞌdyemꞌ jiꞌcavitiyaꞌ jiquej yụ tashchetyyaꞌ ayoꞌ Jerusalénĉantyiꞌyaꞌ. Mijam méquiꞌ juchaj dạcbun yụ in jiquej.

²¹ Mọꞌ mọmoꞌ yi yụ muꞌinsiꞌyaꞌ vej in jéyacsi yụ: "Q̂uinꞌ mọꞌ jiꞌmeꞌtacdyeꞌ yụ ĉaĉaij na anicyi yụ vañinyeban raꞌ muꞌin säñity in mọꞌ jiꞌmeꞌtyiyin yụ in", meꞌ jéyacsi yụ jiquej —yi Pablo jéte muꞌ ayoꞌ Félix.

²² Muꞌ Félix jämꞌ tsanꞌ chị́yepte Jesússiꞌ majmi. Muꞌ jiꞌtätseꞌ mọꞌ tsudyujñitidyeꞌ, yi muꞌ: —Aty raꞌ atsijyaꞌ úyaꞌ muꞌ väc̣häꞌtyitytyiꞌ ayoꞌ Lisias, paj qui chịj yụ anic rụij, chat q̂uinꞌdyemꞌ raꞌ yụ jịꞌcäts yụꞌte muꞌ Pablo jiꞌmeꞌtacdyeꞌyaꞌ —jéyacsi muꞌ ayoꞌ Félix.

²³ Chat jéte muꞌ ĉọjcacsity väc̣häꞌtyity in paj qui yejĉoij ĉärꞌ buꞌyi muꞌ Pablo. Meꞌ tsanꞌ meꞌ yi muꞌ paj jịꞌjutyejcate in judyeyaꞌ muꞌindye mọmoꞌ jiꞌsisbite in penꞌdyeꞌ muꞌ Pabloty paj qui muꞌin nọ́tyete in jedyeꞌ jedyeꞌ chuc jemoñeꞌ muꞌ, meꞌ meꞌ soꞌmete in.

Pablo p̂eyaqui Félixtum judyeyaꞌ p̂en muꞌ

²⁴ Aty juñucsiꞌ mạyedyeꞌ atsijban cuvij muꞌ ayoꞌ Félix p̂entum muꞌ, Drusila, judío mọꞌ. Muꞌ Félix jiꞌvorvete muꞌ Pablo, tute in judyeyaꞌ seꞌvepte p̂eyacdyeꞌ muꞌ, muꞌ p̂eyeꞌ anicyedyeꞌ Jesucristocheꞌ.

²⁵ Yejĉoij p̂eyaqui Pablo jéyacsi: "Jemoñeꞌ rụij bäꞌyi miꞌin judyeyaꞌ ĉujcatiĉamꞌ." Chimeꞌdye jéyacsi: "Yirisĉan raꞌ mạyedyeꞌ Jenꞌ raꞌ jịꞌcäts yuꞌbusinꞌ juchadyeꞌ tsun", jéte. Muꞌ Félix aty seꞌvepteyaꞌ p̂eyacdyeꞌ muꞌ, anic noiꞌyi, chat qui jéte Pablo: —Tupuj jọban mi, junꞌsiꞌ raꞌ ĉụiꞌ mạꞌjeꞌyaꞌ yụ quivij raꞌ jiꞌvorveye mọꞌyaꞌ tupudyeꞌ jụijyaꞌ yụ —jéte.

²⁶ Jämꞌdyeyaꞌ muꞌ Félix jiꞌvorvete muꞌ Pablo paj qui muꞌtum p̂eyaqui, ĉaĉaij na muꞌ dyijyi vatyquej raꞌ jasoꞌmiti querec̣ha c̣honꞌdyedyety muꞌ.

²⁷ Päräꞌ yómodyeꞌ meꞌquiꞌ ĉärꞌ buꞌyi muꞌĉan muꞌ Pablo. Muꞌ Félix jam junꞌ ĉụiꞌ mọmoꞌ jiꞌc̣honte ĉaĉaij na muꞌ mạꞌjeꞌ paj qui maꞌjotac räjĉan judíoyaꞌ in. Chäjämꞌ shuban muꞌ Félix, chat qui siti muꞌ Porcio Festo, muꞌ qui muꞌĉan ayoꞌbuꞌyi. Muꞌ chimeꞌ jam junꞌ farajjete muꞌ Pablo yejĉoij ĉäꞌräij ĉärꞌtaquisĉan.