Uñedye' 23 - Tsimane

¹ Muꞌ Pablo anic vejtucsi cạvacsi muꞌin ayoꞌ in, chat jéyacsi: —Chätidyeꞌ, tạꞌcatydye nash yụ rụij ĉojtyiꞌĉan cạiꞌtyiꞌ yụ ọij dyijyedyeꞌ, rụij bäꞌyi yụ Jenꞌsiꞌyaꞌ vej muꞌ —yi muꞌ Pablo jéyacsi.

² Ananías, tashchety cudyitity Jenꞌcheꞌ muꞌ jéyacsi pạrej muꞌĉantyiꞌ in paj qui muꞌin in ĉatbite chụꞌ in muꞌ Pablosiꞌ.

³ Aty ĉatbiteyaꞌ in, yi qui muꞌ jéte Ananías: —Jenꞌdye raꞌ ĉatjin mi, anic ac̣hiꞌyity mi, jämꞌ yuꞌti tsanꞌ mi. Mi nash yụꞌtac paj qui yụꞌtacdyeꞌyaꞌ jịꞌcäts yuꞌbun yụ mi, meꞌ tsanꞌ meꞌ, mídye qui namꞌ jiꞌĉattim, meꞌ vaꞌquequeꞌ mi mọꞌ yụꞌtacdyeꞌ —yi Pablo jéte.

⁴ Muꞌĉantyiꞌ jéte in muꞌ Pablo: —Mi nash fạraꞌñete uts tashchety cudyitity Jenꞌcheꞌ —jéte in.

⁵ Voryi muꞌ Pablo: —Chätidyeꞌ, chataty otej jam tyuꞌ caꞌ ĉaĉaij chị́yete yụ muꞌ buty jiquej uts tashchety cudyitity Jenꞌcheꞌ, ĉaĉaij meꞌ yiꞌ sánacdyeꞌ "Jam raꞌ ñiñetinte ayoꞌ miꞌin", yiꞌ —yi jéyacsi muꞌ Pablo.

⁶ Pablo aty cạvacsi ayoꞌ in jam yedyety muꞌin in, chet muꞌin saduceo in judyeyaꞌ chet fariseo in. Mọꞌdyes qui yi muꞌ Pablo fer p̂eyaqui: —Chätidyeꞌ, yụ nash fariseo vóshiꞌ yụ yedyej fariseo in. Q̂uinꞌ mọꞌ jiꞌmeꞌtacdyeꞌ yụ ĉaĉaij na anicyi yụ vañinyeban raꞌ säñity in, yojdyemꞌ tsun fariseo anicyejaꞌyaꞌ tsun, mọꞌ jiꞌmeꞌtyiyin yụ in —yi Pablo jéyacsi.

⁷ Jéyacsi muꞌ Pablo chat qui muꞌin ayoꞌ in jiꞌfajquiyiti in p̂eyacdyeꞌ muꞌin, jam méquiꞌ cäts dyijyedyeꞌ muꞌin muꞌĉantyiꞌ in,

⁸ ĉaĉaij na muꞌin saduceo yi in jam vañinyeban säñity in, itŝij anjer ĉọcsi chimeꞌ in, judyeyaꞌ itŝiꞌ ạꞌedyeꞌ muntyis ĉọcsebi in, meꞌ buꞌyiꞌ jiꞌchäyitidyeꞌ muꞌin saduceos in, fariseo na in jam meꞌ in anicyi muꞌin in.

⁹ Mọꞌyaꞌ chutidyeij muꞌin ayoꞌ in dadamꞌ mujuꞌchaꞌ äjnaqui in. Sacyi pạrej fariseo in muꞌin jịꞌchiyacsity yụꞌtacdyeꞌ in, yi jéyacsi in: —Itŝiꞌ u méquis juchaj dạcbite tsun, vatyquej raꞌ jap̂iyiti yirity anjer, vatyquej yiris ạꞌedyeꞌ jasoꞌmiti —yi in.

¹⁰ Dadamꞌ fer äjnaqui in chuti p̂eyacdyeꞌyaꞌ muꞌin fariseo in judyeyaꞌ saduceo in. Muꞌ na väc̣häꞌtyitytyiꞌ ayoꞌ muꞌin dyijyi areꞌĉa tarꞌjete in uts Pablo, mọꞌdyes qui muꞌ jutacsi väc̣häꞌtyity in paj qui muꞌin jiꞌc̣honte Pablo in, jitishajte in jiꞌchäyitidyeꞌĉan väc̣häꞌtyitysiꞌ in.

¹¹ Mọꞌdye tsedyedyeꞌ muꞌ Ayoꞌ jiꞌcaviti Pabloyaꞌ, jajiti: —Sóñiꞌyeva Pablo, a nash jịꞌchiqueyacsi mi p̂eyacdyeꞌ yụ úĉantyiꞌ Jerusalénĉantyiꞌ in, meꞌ raꞌ chimeꞌ jéyacsi mi Romaĉantyiꞌ in yụ́siꞌ p̂eyacdyeꞌ —jajiti Jenꞌ.

Dyijyedyeꞌ muꞌin mạꞌjeꞌ ijate in muꞌ Pablo

¹² Nojno mạyedyeꞌ muꞌin pạrej judío in vaj cäts dyijyi in mạꞌjeꞌ ijate in muꞌ Pablo. Ĉụiꞌ yụꞌtyeꞌ in tsäquiꞌyis p̂eyacdyeꞌ muꞌin, jítidyeij in: "Mijam raꞌ säcsejaꞌ chijam raꞌ tyéjaꞌ ojñiꞌ junꞌ quiꞌ chuc muꞌ ijaja muꞌ Pablo, chat q̂uinꞌdyemꞌ raꞌ pacaj tsun", yi in.

¹³ Jiyidye muꞌin in vạjpedyeꞌ quiꞌtac rụiꞌcuꞌ in muꞌin meꞌ yity in.

¹⁴ Mọꞌdyes ĉọcsequi muꞌin tashcheꞌ cudyitity Jenꞌcheꞌ in judyeyaꞌ muꞌin tashcheꞌ buꞌyity judío in, jéyacsi in: —A nash yụꞌtyeꞌ yiris p̂eyacdyeꞌ tsun tsäquiꞌyis, yiꞌ mijam raꞌ damꞌjeꞌ jedyeꞌ tsun junꞌ quiꞌ chuc ijate tsun muꞌ Pablo.

¹⁵ Mọꞌdyes q̂uinꞌ miꞌin judyeyaꞌ yoctyiꞌ ayoꞌbuꞌyitytum in, cọdyemac muꞌ väc̣häꞌtyitytyiꞌ ayoꞌ muꞌin paj qui muꞌ yụꞌte miꞌinsiꞌyaꞌ vej muꞌ Pablo. Jémac ayoꞌ miꞌin: "Nojno mạyedyeꞌ tsun mạꞌjeꞌ jäjämꞌtum cọdyetyete p̂eyacdyeꞌ muꞌ Pablo", jémac. A na raꞌ tuteyaꞌ in tsun raꞌ bisĉunꞌte majmiyaꞌ, ijaĉunꞌte raꞌ tsun, judyeꞌdye raꞌ miꞌinyaꞌ shupqueti —jéyacsi in.

¹⁶ Muꞌ na tyúñeꞌ Pabloty, ạvaꞌ vojiꞌtyimꞌ, muꞌ seꞌvacsebi p̂eyacdyeꞌ muꞌin. Mọꞌdyes qui muꞌ muꞌĉan jịjcaij jiꞌchäyitidyeꞌĉan väc̣häꞌtyitysiꞌ in, jéyajquiqui tyúñeꞌ muꞌ.

¹⁷ Aty seꞌvepte p̂eyacdyeꞌ muꞌ, chat qui muꞌ Pablo fayete yirity ĉọjcacsity väc̣häꞌtyity, jéte: —Cạme uts nanaty ayoꞌyaꞌ paj qui muꞌ jéte yiris jedyeꞌ.

¹⁸ Meꞌdye muꞌ ĉọjcacsity väc̣häꞌtyity in jácati ayoꞌyaꞌ, jéte: —Uts ĉärꞌtactyiꞌ Pablo cudyin yụ, yụ uts tuyeye nanaty, muꞌ ca mạꞌjeꞌ jin mi yiris p̂eyacdyeꞌ —jéte.

¹⁹ Ayoꞌ tapjajibuti un muꞌ nanatysiꞌ, damꞌ mujuꞌveyaꞌ cạte, jéte: —¿Jedyeꞌ caꞌ mạꞌjeꞌ jítim?

²⁰ Vorjete muꞌ nanaty: —Muꞌin judíoty ayoꞌ muꞌin vaj cäts dyijyi in mi ca raꞌ cudyin in, paj qui nojno mạyedyeꞌ yụꞌte mi muꞌ Pablo muꞌinsiꞌyaꞌ vej in ayosyaꞌ muꞌin. Muꞌin ca raꞌ jin in: "Tsun raꞌ jäjämꞌtum cọdyetyete p̂eyacdyeꞌ muꞌ", jin ca raꞌ in.

²¹ Jam raꞌ jụjtacsi mi, yocve nash dyijyi muꞌin in. Muꞌyaꞌ nash vạjpedyeꞌ quiꞌtac muntyiꞌ in, meꞌ yuꞌtity in muꞌin raꞌ bisĉunꞌte in muꞌ Pablo ijaĉunꞌte ca raꞌ in, ĉaĉaij nash aty meꞌ yụꞌtyeꞌ p̂eyacdyeꞌ in tsäquiꞌyis muꞌin, mijam ca raꞌ damꞌjeꞌ jedyeꞌ in junꞌ quiꞌ chuc ca raꞌ ijate in muꞌ Pablo. Mọꞌdyety biseꞌ in paj qui jụjtacsebi mi cọdacdyeꞌ muꞌin —yi Pabloty tyúñemꞌ jéte muꞌ ayoꞌ.

²² Chat qui muꞌ ayoꞌ yi jéte muꞌ nanaty: —Jọban raꞌ mi, jam raꞌ méquiꞌ jịꞌchiqueyacsim yoctyiꞌ muntyiꞌ in ĉaĉaij na mi aty jítim —yi muꞌ ayoꞌ jéte muꞌ nanaty.

Yoctyiꞌyaꞌ ayoꞌ cạte in muꞌ Pablo Félixyaꞌ

²³ Väc̣häꞌtyitytyiꞌ ayoꞌ muꞌin fayacsi päräꞌ ĉọjcacsity väc̣häꞌtyity in, jéyacsi: —Jämꞌ yụꞌtacsejamꞌ väc̣häꞌtyity in paj qui miꞌi in, arajtacyaꞌ raꞌ tsedyedyeꞌ sacjetiñeꞌ miꞌin, Cesareaĉan raꞌ jịjcaij miꞌin. Päräꞌ quiꞌ cien raꞌ yujyaty väc̣häꞌtyity cạcsi miꞌin, judyeyaꞌ raꞌ yävätidyeꞌ quiꞌtac cavayochety väc̣häꞌtyity in, muꞌin na raꞌ coc̣hinotumtyiꞌ in, päräꞌ quiꞌ cien raꞌ muꞌin rụiꞌcuꞌ in.

²⁴ Chimeꞌdye jämꞌ yụꞌtyevac cavayo in Pablodyesiꞌ. Jämꞌ ĉọjcamac muꞌ Pablo, paj jam junꞌ jedyeij, soꞌmetinte raꞌ fertyiꞌ ayoꞌ Félix —jéyacsi väc̣häꞌtyity ayoꞌ.

²⁵ Chimeꞌdye soꞌmacsi sánacdyeꞌ Félixdyesiꞌ, yiꞌ:

²⁶ "Yụ nash Claudio Lisias, yụ sáñeꞌ ọij mídyes, mi nash mujuꞌchaty ayoꞌ tsun, yụ vorjeye.

²⁷ Chimeꞌdye jéye munjayaꞌĉan muꞌin judío in tapjete in muꞌ Pablo, mạꞌjeꞌ tsanꞌ ijate in. Chị́qui yụ muꞌ anictyity Romaĉantyiꞌ, mọꞌdyes qui yụ väc̣häꞌtyityyaꞌ jiꞌc̣honte yụ.

²⁸ Mạꞌjeꞌ yụ chịj jedyeꞌ buty jiꞌmeꞌtyeyete in muꞌin judío in, mọꞌdyes yụ cạte muꞌinsiꞌyaꞌ vej muꞌin, judíotyyaꞌ ayoꞌ in.

²⁹ Mọꞌ jiꞌmeꞌtacdyeꞌ muꞌ yocve ca cạiꞌ ĉụiꞌsiꞌ yụꞌtacdyeꞌ muꞌin, itŝiꞌ méquis juchaj muꞌ jiꞌijacdyes muꞌ, mijam ĉärꞌtacdyedyes chimeꞌ muꞌ.

³⁰ Ọij mạyedyeꞌ chịj yụ muꞌin judío in dyijyi in mạꞌjeꞌ ijate in, mọꞌdyes cavintum jutete yụ paj qui míyaꞌ jịjcaij muꞌ. Chimeꞌdye yụ jéyacsi judío in paj qui mísyaꞌ vej jiꞌmeꞌte in muꞌ Pablo, mọꞌyaꞌ juchaj jụijyamꞌ. Aty meꞌquiꞌdye yi yụ", yiꞌ sánacdyeꞌ Félixdyes sáñeꞌsiꞌ väc̣häꞌtyitytyiꞌ ayoꞌ.

³¹ Sacti qui muꞌin väc̣häꞌtyity in, yoj jeyacsidyemꞌ ayoꞌ u, cạte in muꞌ Pablo tsedyedyeꞌ Antípatrisĉan.

³² Nojno mạyedyeꞌ muꞌin yujyaty väc̣häꞌtyity in caꞌñibun in, Jerusalénĉan jijtuban in, acatuban in jiꞌchäyitidyeꞌĉan väc̣häꞌtyitysiꞌ muꞌin. Muꞌin na yoctyiꞌ cavayochety väc̣häꞌtyity in jiyi muꞌin in,

³³ Cesareaĉan jiquicte in muꞌ Pablo. Venjoij muꞌĉan in, chat qui muꞌ Pablo jutete in ayoꞌyaꞌ Félixyaꞌ, chimeꞌdye mọꞌ sánacdyeꞌ soꞌmete in.

³⁴ Muꞌ qui p̂eyeꞌ mọꞌ sánacdyeꞌ chat qui jéte muꞌ Pablo: —¿Jụꞌñisĉantyiꞌ adac bäꞌyedyeꞌ mi? —jéte. Pablo vorjete: —Ciliciaĉantyiꞌ nash yụ.

³⁵ Yi qui muꞌ ayoꞌ jéte: —Aty raꞌ atsijyaꞌ muꞌin in jiꞌmeꞌtyintyiꞌ in, chat raꞌ q̂uinꞌdyemꞌ seꞌvebiye ñutsjitidyem —yi ayoꞌ jajiti. Chat qui muꞌ jutacsi väc̣häꞌtyity in paj jiꞌsiste in ayosĉan acaꞌ muꞌ, Herodes jämꞌtyes jiquej, muꞌĉan tacjete in ĉọjcate qui in.