Uñedye' 21 - Tsimane

Pablo Jerusalénĉan jịjcaij

¹ Muꞌcheꞌ farajjeyacsetaqui tsun muꞌin ĉọjcacsity in, bijti tsun marĉantyiꞌcheꞌ covamba, chụiꞌ buꞌyi tsun venjoij muꞌyaꞌ tsun Cosyaꞌ. Nojno mạyedyeꞌ Rodasve jịjcaij tsun, yejĉoij miꞌi tsun chaꞌsheꞌ yocsiꞌ tsun bäꞌyedyeꞌ Patara, muꞌyaꞌ sojquiti tsun.

² Muꞌyaꞌ yirity dạcte covamba tsun, Feniciaĉan raꞌ jịjcaijtyiꞌ. Muꞌcheꞌ qui bijti tsun, tacti tsun, miꞌi tsun.

³ Cajñeꞌ tsun mọꞌ därsiꞌ poc̣hoꞌ Chipre, q̂uimvetaque buꞌyiꞌ mọꞌ. Yejĉoij miꞌi tsun dạquiqueꞌ tsun mọꞌ jac Siria. Muꞌ na covamba jemoñeꞌ yạjquiꞌ jedyeꞌ Tiroyaꞌ, mọꞌdyes qui sojquiti tsun.

⁴ Muꞌĉan dạcacsi tsun anicjetety Jenꞌ in, muꞌinyaꞌ dyäqui tsun yävätidyeꞌ mạyedyeꞌ muꞌintum tsun. Jenꞌsiꞌ Ạꞌedyeꞌ muꞌ soꞌmacsiꞌ p̂eyacdyeꞌ, muꞌin qui jịꞌchiqueyete in muꞌ Pablo. Jéte in paj qui jam Jerusalénĉan jịjcaij muꞌ, ĉaĉaij na muꞌĉan raꞌ jịꞌñibeꞌcate in.

⁵ Aty yävätidyeꞌ mạyedyeꞌ jiyi qui tsun. Muꞌĉantyiꞌ anicjetety Jenꞌ in, judyeyaꞌ p̂en muꞌin judyeyaꞌ ạvaꞌ mọꞌin, muꞌin penꞌdyetun tsun in jorojyaꞌ bäꞌyedyeꞌ meꞌdye jámancheꞌ venjoij in. Muꞌcheꞌ qui dyụtsyi tsun yiriꞌyaꞌ cọdaqui Jenꞌcheꞌ tsun.

⁶ Chat qui vorjeyacsetaqui tsun, bijbun tsun marĉantyiꞌcheꞌ covamba. Muꞌĉantyiꞌ in caꞌñibun qui in acaꞌyaꞌ jịjcaban in.

⁷ Muꞌyaꞌ qui tacti tsun Tiroyaꞌ quivij miꞌi tsun. Dạquiqueꞌ tsun Tolemaida, muꞌyaꞌ qui sojquiti tsun. Muꞌĉan ĉọcsequi tsun anicjetety Jenꞌ in, yiriꞌ ĉọshi muꞌĉan tsun.

⁸ Nojno mạyedyeꞌ quivij sacti tsun, miꞌi tsun Cesareayaꞌ venjoij tsun. Muꞌĉan ĉọcte Felipe tsun, muꞌsiꞌĉan acaꞌ dyäqui tsun. Muꞌ cạyacsity Jenꞌsiꞌ p̂eyacdyeꞌ muꞌ, muꞌ nash chimeꞌ yirity muꞌin yävätidyeꞌyity nọ́taquity in, yụꞌtactyiꞌ jiquej muꞌin jutactyiꞌ Jenꞌtyiꞌ muꞌ.

⁹ Mọꞌyaꞌ vạjpedyeꞌ ạvaꞌ Felipes muꞌ yedyes p̂en in, muñemunsiꞌdyemꞌ in, mọꞌin jasoꞌmitis p̂eyacdyeꞌ Jenꞌ in.

¹⁰ Aty juñucsiꞌ mạyedyeꞌ muꞌĉan bäꞌyi tsun, atsij yirity Judeaĉantyiꞌ muntyiꞌ, muꞌ jasoꞌmitity p̂eyacdyeꞌ Jenꞌ, Agabo tịj muꞌ.

¹¹ Aty venjoij muꞌ, muꞌ jäcbite ñutuꞌtacdyeꞌ Pablos, c̣họcoꞌtaqui ĉụiꞌsiꞌ un muꞌ judyeyaꞌ yuj muꞌ, chat qui yi muꞌ: —Yiꞌ Jenꞌsiꞌ Ạꞌedyemꞌ, meꞌ raꞌ muꞌin Jerusalénĉantyiꞌ judío in c̣họcoꞌte in muꞌ aꞌtumtyiꞌ ọij ñutuꞌtacdyeꞌ, chat qui raꞌ jiꞌmeꞌte in ayoꞌyaꞌ muꞌin jam judío in —yi Agabo jéyacsi.

¹² Seꞌvepte p̂eyacdyeꞌ tsun, chat qui tsun räjtumdye muꞌĉantyiꞌ tsun fercheꞌ tsanꞌ jéte tsun muꞌ Pablo paj qui jam Jerusalénĉan jịjcaij.

¹³ Muꞌ na jam méquiꞌ jụjjin tsun, jin mọmoꞌ tsun: —¿Junꞌ ĉaĉaij yụ táritiĉaꞌ u miꞌin? Mạꞌjeꞌ jiꞌtaritiĉaꞌ ĉojtyiꞌĉan yụ miꞌin. Meꞌ raꞌ tsanꞌ Jerusalénĉan ĉärꞌtyin yụ in Jesúsdyes, meꞌ raꞌ tsanꞌ ijan yụ in Jesúsdyes Ayoꞌ tsun, jam yụ otejjiti, muꞌĉan ramꞌ jịjcaij yụ —yi mọmoꞌ jin tsun.

¹⁴ Jam junꞌ chäquin tsun mọꞌdyes qui farajjete tsun, tsun na yi mọmoꞌ: —Paj muꞌyaꞌ, paj Jenꞌ yi junꞌ chuc muꞌ —yi tsun.

¹⁵ Aty meꞌsiꞌ jämꞌchuti qui tsun majmicheꞌ qui roiꞌjeꞌ tsun Jerusalénĉan jịjcaij tsun.

¹⁶ Pạrej penꞌdyetun tsun in Cesareaĉantyiꞌ anicjetety Jenꞌ in. Venjoij tsun Jerusalénĉan, jiꞌdyäquin tsun Masonsiꞌĉan acaꞌ muꞌ. Muꞌ Mason Chipreĉantyiꞌ muntyiꞌ, aty men anicjete Jenꞌ muꞌ.

Pablo ĉọcte muꞌ Santiago

¹⁷ Meꞌ Jerusalénĉan venjoij tsun. Muꞌin anicjetety Jenꞌ in anic jämꞌ tiĉuñin tsun in.

¹⁸ Nojno mạyedyeꞌ chat qui tsun ĉọcte muꞌ Santiago muꞌtumdye Pablotum tsun, muꞌĉan chimeꞌ räj muꞌin ĉọjcacsity anicjetety Jenꞌ in.

¹⁹ Muꞌ Pablo vorjeyacsi chat qui jéyacsi räj junꞌ chuc Jenꞌsiꞌyaꞌ ferdyeꞌ muꞌ voroꞌtacsi muꞌin jam judío in, jụj jaꞌyacsi.

²⁰ Seꞌvepte in Pablos p̂eyacdyeꞌ räj timaꞌquete Jenꞌ in. Meꞌ tsanꞌ meꞌ jéte qui namꞌ in muꞌ Pablo: —Chịj mi vojity, anic aty daiꞌ judío in anicjetety Jesucristo in, chäjämꞌ junꞌtum joij mir in. Meꞌ tsanꞌ meꞌ, yejĉoij qui namꞌ fer dyijtuiꞌ in mọꞌ yụꞌtacdyeꞌ yódyesdyemꞌ jasoꞌmitis Moisés jiquej u.

²¹ Muꞌin seꞌvibun in jiꞌchäyitidyeꞌ mi, pạrej yi in: "Uts Pablo anic vaꞌve jiꞌchäyibusinꞌ chätidyeꞌ tsun yocve bäꞌyity judío in. Muꞌ jéyacsi paj qui farajjeꞌ in mọꞌ yụꞌtacdyeꞌ sáñeꞌsiꞌ muꞌ Moisés, judyeyaꞌ yicdyeꞌ tsun chimeꞌ. Chimeꞌdye yi muꞌ paj qui jam seiꞌtac aꞌ muꞌ ạvaꞌsiꞌ tsun", meꞌ yi judío in p̂iyin in.

²² Mọꞌdyes ¿junꞌ qui bu raꞌ tsun? Ĉaĉaij na muꞌin judío in seꞌveꞌ raꞌ in aty atsij mi úyaꞌ, areꞌĉa fáquin in.

²³ Damꞌdye jämꞌ meꞌ raꞌ mi, paj qui chäyin in mi cäc̣häꞌchuptety yụꞌtacdyeꞌ sáñeꞌsiꞌ Moisés jiquej. Úyaꞌ vạjpedyeꞌ muntyiꞌ in aty yụꞌtyety p̂eyacdyeꞌ Jenꞌdyes in.

²⁴ Aty chaꞌsheꞌ raꞌ tupudyeꞌ muꞌin paj qui jịꞌcäts yụꞌtaqui p̂eyacdyeꞌ muꞌin. Tupuj mímun chimeꞌ ĉụiꞌ jämꞌ yuꞌti mi judíosyaꞌ yicdyeꞌ tsun, tupuj mi yaꞌityeꞌ muꞌindyes in, chat qui raꞌ täꞌtsac in, jịꞌĉocdyes p̂eyacdyeꞌ muꞌin. Meꞌdye raꞌ seꞌveꞌ muꞌin judío in chịj raꞌ in väñädyeꞌyaꞌ mi p̂iyin in, chịj raꞌ in mi chimeꞌ chiqueꞌtyiꞌ mọꞌ yụꞌtacdyeꞌ.

²⁵ Muꞌin na jam judío in anicjetety Jesucristo in, jam muꞌin meꞌ in, aty jéyacsi tsun paj qui jam mọꞌ chiqueꞌ in. Mọꞌ mọmoꞌ jéyacsi tsun: "Jam raꞌ jebetiñeꞌ miꞌin säcsedyeꞌ jämꞌtacdyeꞌyaꞌ jadyiquis, mijam raꞌ jebetiñeꞌ miꞌin chäsh, mijam chäshtumsiꞌ shush chimeꞌ." Chimeꞌdye jéyacsi tsun: "Jam raꞌ voꞌvoij miꞌin", meꞌ meꞌ jéyacsi tsun muꞌin jam judío in —jéte in muꞌ Pablo.

Jenꞌsiꞌĉan acaꞌ tapjete in muꞌ Pablo

²⁶ Jụjyi muꞌ Pablo. Nojno mạyedyeꞌ muꞌ Pablo cạcsi muꞌin vạjpedyeꞌyity muntyiꞌ in. Chat qui muꞌintum ĉụiꞌ jämꞌ yuꞌti judíosyaꞌ yicdyeꞌ muꞌin. Siti muꞌ Jenꞌsiꞌĉan acaꞌ, jecte muꞌĉantyiꞌ cudyitity Jenꞌcheꞌ in jụꞌñis chuc raꞌ mạyedyeꞌ cạ̈tsiꞌ raꞌ mọꞌ tupudyeꞌ p̂eyacdyedyes yụꞌtyeꞌ in Jenꞌdyes jiquej muꞌin vạjpedyeꞌ muntyiꞌ in. Mọꞌ raꞌ mạyedyeꞌ cäts mọꞌtutum in jiꞌcoꞌshayacdyedyes Jenꞌdyes in.

²⁷ Aty raꞌ c̣hẹiꞌyaꞌ chaꞌsheꞌ in mọꞌ yävätidyeꞌ mạyedyeꞌ, pạrej muꞌin Asiaĉantyiꞌ judío in muꞌĉan cạvete in muꞌ Pablo Jenꞌsiꞌĉan acaꞌ. Yiristum muꞌĉan sac jaꞌyacsi muntyiꞌ in, meꞌĉandye siscajcate in muꞌ Pablo,

²⁸ äjyedyeꞌtum p̂eyaqui yi in: —Chätidyeꞌ tsun Israeltyiꞌ vóshiꞌ miꞌin, cavin atsijamꞌ, úyaꞌ u uts cäj jịꞌchiyacsity muntyiꞌ in, paiꞌ ĉọ́quety bäꞌyedyeꞌ, jịꞌchiyacsity räj muntyiꞌ in paj qui fáquisinꞌ tsun judío tsun, judyeyaꞌ jéyacsi chimeꞌ fibis mọꞌ yụꞌtacdyeꞌ judyeyaꞌ Jenꞌsiꞌ acaꞌ muꞌ. Dadamꞌ muꞌ q̂uinꞌ jiꞌsitacsi úĉan pạrej jam judío in, ac̣hiꞌbite ọij jämꞌsiꞌ acaꞌ Jenꞌsiꞌ muꞌ —yi judío in.

²⁹ Meꞌ yi in ĉaĉaij na bäꞌyedyeꞌĉan nạijte in muꞌ Pablo japenꞌdyetuti muꞌ Trófimo, muꞌ Efesoĉantyiꞌ muntyiꞌ jam judío muꞌ. Jeñej joꞌmeij ĉọ́te in siti muꞌ Jenꞌsiꞌĉan acaꞌ muꞌ, jeñej jiꞌsiste muꞌ Pablo ĉọ́te in.

³⁰ Meꞌdyes räräꞌejoij äjnaqui in räj buꞌyi muꞌĉantyiꞌ in, meꞌĉandye siscajcapte in Jenꞌsiꞌ acaꞌ muꞌ. Tap tŝọ́tyete in muꞌ Pablo soij cạte in, jiꞌshupjajte in muꞌĉantyiꞌ chat qui ĉärꞌjetyete chụiꞌdyeꞌ in.

³¹ Meꞌĉandye raꞌ tsanꞌ ijate in muꞌ Pablo. Cavintum muꞌ ĉọcte in muꞌ ayoꞌ väc̣häꞌtyitytyiꞌ, Romaĉantyiꞌ muꞌ. Jéte in: "Räjenꞌdye sacjeꞌ äjnaqui in úĉantyiꞌ bäꞌyedyeꞌĉantyiꞌ in", jéte in.

³² Muꞌyaꞌdye fayacsi väc̣häꞌtyity in, räjtumdye ĉọjcaquity in, shujmun tyeij in yóĉandyemꞌ shach muntyiꞌ in. Aty nạijtacsiyaꞌ in muꞌin väc̣häꞌtyity in ayoꞌtum muꞌin, farajjetacte in muꞌ Pablo.

³³ Ayoꞌ muꞌ ĉọcte Pablo jutacsi qui väc̣häꞌtyity in paj qui muꞌ tapjete in, päräꞌyaꞌ sapte cadenayaꞌ in. Yi muꞌ ayoꞌ jéyacsi muntyiꞌ in: "¿Jụꞌñity caꞌ uts muntyiꞌ? ¿Jedyeꞌ caꞌ juchaj muꞌ?" jéyacsi.

³⁴ Muꞌin na muntyiꞌ in äjnacdyeꞌtum paiꞌ paiꞌ p̂eyaqui in, jam junꞌ cäts p̂eyacdyeꞌ muꞌin, mọꞌdyes muꞌ ayoꞌ väc̣häꞌtyitytyiꞌ jam junꞌ chịj muꞌ jedyeꞌ chuc mọꞌ jiyiꞌ muꞌdyes. Chat qui muꞌ ayoꞌ jutacsi paj qui muꞌĉan cạte in muꞌ Pablo jiꞌchäyitidyeꞌĉan väc̣häꞌtyitysiꞌ in.

³⁵ Muꞌin na muntyiꞌ in cäꞌc̣häijdye in, yejĉoij mạꞌjeꞌ tapjete in muꞌ Pablo, jämꞌ tsäquiꞌ tyeij fạ́coij muꞌin in. Muꞌin väc̣häꞌtyity in chaꞌsheꞌ in mọꞌ bojvaquis acas, vemeꞌ cạte in bijbicheꞌ, meꞌ ñutsjetyete in.

³⁶ Muntyiꞌ in fer p̂eyaqui yi in: —¡Ujamac útsi! —yi in.

Pablo p̂eyacdyeꞌyaꞌ ñutsjiti muntyisyaꞌ vej muꞌin

³⁷ Aty raꞌ tsanꞌ jiꞌsiste in jiꞌchäyitidyeꞌĉan väc̣häꞌtyitysiꞌ in, chat qui muꞌ Pablo jéte muꞌ ayoꞌ: —Mạꞌjeꞌ jéye yiris jedyeꞌ —jéte. Väc̣häꞌtyitytyiꞌ ayoꞌ vorjete: —¿Chịj adac mi p̂eyaqui griegosĉan p̂eyacdyeꞌ?

³⁸ ¿Jam adac mi Egiptoĉantyiꞌ muntyiꞌ jiquej, muꞌ sac jaꞌyacsity muntyiꞌ in paj chuti ayoꞌtum in? Junꞌtum jụj jaꞌyacsi muntyiꞌ in, vạjpedyeꞌ mir in, yedyej muꞌin ijacsity in, cäjyasĉan jac cạcsity jiquej. ¿Jam mi u? —jéte muꞌ ayoꞌ.

³⁹ Vorjete Pablo: —Jam u yụ, yụ nash judío, Tarsoĉan naꞌityiꞌ yụ, mọꞌ Ciliciaĉansiꞌ bäꞌyedyeꞌ, mọꞌ anic chị́yac bäꞌyedyeꞌ yụ. Yụ cọdyeye mi mạꞌjeꞌ yụ voroꞌtacsi uts muntyiꞌ in —jéte.

⁴⁰ Jụjyi muꞌ. Meꞌdye muꞌ Pablo bojvaquischeꞌ buꞌyi, cheꞌjeyaqui un muꞌ paj qui c̣huꞌc̣huij muntyiꞌ in. Tyäpäꞌ in chat tiyacchuiꞌ p̂eyaqui muꞌ Pablo, ĉụiꞌsiꞌĉan p̂eyacdyeꞌ judíosĉan p̂eyaqui hebreosĉan.