Uñedye' 20 - Tsimane

Pablo Macedoniaĉan judyeyaꞌ Greciaĉan

¹ Aty tyäpiyaꞌ Efesoĉantyiꞌ muntyiꞌ in, chat qui muꞌ Pablo fayacsi muꞌin anicjetety Jenꞌ in, voroꞌtacsi paj qui jiĉun ĉojtyiꞌĉan muꞌin. Aty meꞌsiꞌ vorjeyacsetaqui muꞌ Pablo, roiꞌjeꞌ Macedoniaĉan qui jịjcaij.

² Paiꞌ ĉọcsequi muꞌĉantyiꞌ anicjetety Jenꞌ in, daiꞌ jiꞌchäyitidyeꞌ soꞌmacsi paj qui fer buꞌyi bäꞌyi in, chäjämꞌ venjoij Greciaĉan.

³ Chibin ịvaj muꞌĉan muꞌ Pablo meꞌ buꞌyi. Dyijyi qui mạꞌjeꞌ tsanꞌ Siriaĉan raꞌ jịjcaij covambacheꞌ. A qui namꞌ chị́qui muꞌin judío in, muꞌin dyijyi in mạꞌjeꞌ qui ijate in. Ĉujcati, yocve qui roiꞌjeꞌ muꞌ, quivij Macedonia sapaꞌjeꞌ muꞌ.

⁴ Daiꞌ pạrej muꞌyaꞌ chimeꞌ penꞌdyetutety Pablo in, yujyaꞌ roiꞌjeꞌ Pablotumdye in: muꞌ Bereaĉantyiꞌ muntyiꞌ, Sópater tịj muꞌ, Pirroty ạvaꞌ muꞌ, judyeyaꞌ muꞌ Aristarco judyeyaꞌ muꞌ Segundo, Tesalónicaĉantyiꞌ muntyiꞌ muꞌ, judyeyaꞌ muꞌ Gayo, Derbeĉantyiꞌ muntyiꞌ, judyeyaꞌ muꞌ Timoteo, judyeyaꞌ Tiquico Trófimotumdye, Asiaĉantyiꞌ muꞌin in, meꞌ meꞌ muꞌin shupquequi in Filiposĉan.

⁵ Muꞌin penꞌdyeꞌ muꞌ Pablotyiꞌ tashi muꞌin in Troasĉan jịjcaij in, muꞌĉan raꞌ bisin tsun in.

⁶ Tsun na taĉan Filiposĉan, cạveꞌ tsun mọꞌ feshta jam jiꞌdujraquistumtyiꞌ pan. Aty meꞌsiꞌ chat jiyi tsun bijti qui tsun marĉantyiꞌcheꞌ covamba, tacti tsun nobi tsun. Aty ĉanamꞌ mạyedyeꞌ miꞌi tsun chat venjoij muꞌĉan tsun Troasĉan, muꞌĉan chaꞌshacsi tsun muꞌin in Pabloty penꞌdyeꞌ muꞌ. Yävätidyeꞌ mạyedyeꞌ muꞌĉan tsun yiriꞌyaꞌ Troasĉan.

Pablo Troasĉan

⁷ Tashches mạyedyeꞌ simanas vajmuꞌyaij tsun paj qui jebeiꞌ tsun jiꞌdyijvitidyes säcsedyeꞌ. Pablo jịꞌchiyacsi muꞌĉantyiꞌ anicjetety Jenꞌ in. Meñi p̂eyaqui, meꞌdye chaꞌsheꞌ menyaꞌ in yejĉoij jịꞌchiyacsi, ĉaĉaij na raꞌ nojno aty jọban tsun.

⁸ Cheꞌves acas vavdyeꞌ muꞌcheꞌ tsudyujñiti tsun, daiꞌ muꞌĉan mạijyity in.

⁹ Muꞌĉan yirity nanaty, Eutico tịj muꞌ, cạvedyeꞌyaꞌ bäꞌvaꞌjoij muꞌ. Anic qui na men jịꞌchiyacsi muꞌ Pablo, chäjämꞌ muꞌ Eutico ĉushtyiti, säñejjeꞌ ĉọshi, chäjämꞌ vets tyeij muꞌchety chibinyischeꞌ cächtacdyeꞌ acas mọꞌ, naij tŝọij mụijyaꞌ.

¹⁰ Chạij muꞌ Pablo c̣hobenꞌjebajte muꞌ säñity, jéyacsi muꞌin anicjetety Jenꞌ in: —Jam raꞌ táretinte miꞌin uts nanaty, atyuꞌ u tsạꞌeban —yi jéyacsi.

¹¹ Pablo quivij chimuꞌcheꞌ jịjcaban bojban chat qui säcsi in, jiꞌdyijvitidyes säcsedyeꞌ jebeiꞌ in. Ijaij in chat quivij jeꞌ muꞌ Pablo voroꞌtacsi meꞌdye nạijjoiꞌ, chat q̂uinꞌdyemꞌ jọban muꞌ Pablo.

¹² Muꞌ na jọꞌchaijtyiꞌ nanaty tsạꞌ muꞌ cạbajte in acaꞌyaꞌ, meꞌĉandye muntyiꞌ jiꞌjiyaqui táris in.

Yacchuiꞌ Troas in Miletoĉan qui jịjcaij in

¹³ Tashi tsun bijbun covambacheꞌ, Asove roiꞌjeꞌ tsun, ĉaĉaij na meꞌ jin tsun Pablo. Muꞌ na dyijyi majmicheꞌ tyeij raꞌ,

¹⁴ chaꞌshin tsun Asoyaꞌ, muꞌyaꞌ q̂uinꞌdyemꞌ bijti. Mitileneyaꞌ qui jịjcaij tsun, muꞌyaꞌ venjoij tsun.

¹⁵ Quivij muꞌyaꞌ tacti tsun, nojno mạyedyeꞌ cajñeꞌ tsun mọꞌ poc̣hoꞌ Quío tịj mọꞌ. Jẹjcaiꞌ mọmoꞌ miꞌi tsun, nojno mạyedyeꞌ Samosyaꞌ sojquiti tsun. Quivij miꞌi tsun nojno mạyedyeꞌ Miletoyaꞌ venjoij tsun, muꞌyaꞌ sojquiti tsun.

¹⁶ Pablo dyijyi ñụiꞌmuñi chum Efesoyaꞌ ĉaĉaij na cavinyi muꞌ, jam mạꞌjeꞌ menyequi Asiaĉan, mạꞌjeꞌ cavintum Jerusalénĉan jịjcaij muꞌ, mọꞌĉan raꞌ vatyquej cạveꞌ mọꞌ feshta Pentecostés tupuj jụijyaꞌ muꞌ.

Pablo voroꞌtacsi ĉọjcacsity anicjetety Jenꞌ in Efesoĉantyiꞌ in

¹⁷ Miletoĉan venjoij tsun. Aty muꞌĉan tsun muꞌ Pablo juteꞌ yiris p̂eyacdyeꞌ yiꞌ paj qui atsij in muꞌin ĉọjcacsity anicjetety Jenꞌ in Efesoĉantyiꞌ in.

¹⁸ Meꞌdye atsij muꞌin in, chat qui muꞌ Pablo soꞌmacsi p̂eyacdyeꞌ jéyacsi: —Chätidyeꞌ, cavitiĉaꞌ yụ miꞌin junꞌ chuc bäꞌyi yụ miꞌintum jiquej atsijyaꞌ yụ úĉan Asiaĉan, junꞌ quiꞌ chuc jọban yụ.

¹⁹ Räjĉan úñi yụ Ayodyes, mijam vaꞌbunyedyeꞌtum yụ, tári muntyidyes yụ. Judío meꞌtyin yụ in ñịbedyes soꞌmin yụ in, ac̣hiꞌ dyijyi in mạꞌjeꞌ jịꞌñibeꞌcan yụ in meꞌ ĉúti in.

²⁰ Meꞌ tsanꞌ meꞌ, yụ qui namꞌ yejĉoij jịꞌchiyeyac miꞌin Jenꞌsiꞌ p̂eyacdyeꞌ muꞌ, jam méquiꞌ jumjetyeyac p̂eyacdyeꞌ yódyesdyemꞌ jemontiñes u miꞌin. Yụ jịꞌchiyeyac vajmuꞌyaijĉan miꞌin judyeyaꞌ ĉụiꞌsiꞌĉan acaꞌ miꞌin.

²¹ Voroꞌtacsi yụ räj muntyiꞌ in, muꞌin judío in judyeyaꞌ jam judío in, fercheꞌ yụ jéyacsi paj qui camanꞌ dyijyeban in juchajcheꞌ muꞌin Jenꞌsiꞌyaꞌ vej muꞌ, paj qui anicjete Jesús in Ayoꞌ tsun.

²² Q̂uinꞌ chat raꞌ Jerusalénĉan jịjcaij yụ ĉaĉaij na meꞌ jin yụ Jenꞌsiꞌ Ạꞌedyeꞌ muꞌ, jam qui namꞌ chịj yụ junꞌjin chuc raꞌ muꞌĉan yụ in.

²³ Ọij mọmoꞌ jiꞌchäquiyin yụ Jenꞌsiꞌ Ạꞌedyeꞌ muꞌ, paiꞌ junaꞌ chuc bäꞌyedyeꞌ ĉọ́queꞌ yụ, muꞌĉaĉan muꞌin jasoꞌmitity p̂eyacdyeꞌ Jenꞌ in jin yụ in yụ ca raꞌ jịꞌĉojtyeꞌ ñịbedyes judyeyaꞌ ca raꞌ ĉärꞌtyin yụ in chimeꞌ.

²⁴ Yụ na jam méquiꞌ otejjiti paj junꞌjin ĉụiꞌ mọmoꞌ yụ in, vátyequej raꞌ ijan jụijyaꞌ yụ in, mọmꞌ dyijtuiꞌ yụ mạꞌjeꞌ maꞌjodyeꞌtum chiquepte yụ p̂eyacdyeꞌ muꞌ, junꞌ chuc yuꞌtyin yụ muꞌ Jesús Ayoꞌ tsun, yụ mạꞌjeꞌ ijaij yụ carijtacdyeꞌ soꞌminsiꞌ yụ. Meꞌ yuꞌtyin yụ paj qui yụ jéyacsi jämꞌsiꞌ p̂eyacdyeꞌ mọꞌ p̂eijbite ñịbeꞌjitidyes Jenꞌsiꞌ muꞌ.

²⁵ Paiꞌ voroꞌtyeyac miꞌin Jenꞌsiꞌ p̂eyacdyeꞌ muꞌ, p̂eijbite yụ ayoꞌbuꞌyidyeꞌ raꞌ Jenꞌsiꞌ muꞌ. Q̂uinꞌ chat aty chịj yụ jadyic raꞌ cavibudyiĉaꞌ yụ miꞌin, meꞌquiꞌdye raꞌ caꞌñibun yụ.

²⁶ Yụ raꞌ q̂uinꞌ fercheꞌ jéyac miꞌin vatyquej muꞌyaꞌ tacaꞌ tŝijĉandyety jụijyaꞌ miꞌin, mọꞌ jam yụ́siꞌ juchaj,

²⁷ ĉaĉaij na yụ jịꞌchiqueyeyac räj Jenꞌsiꞌ dyijyedyeꞌ muꞌ, mijam damꞌ jumjetyeyac miꞌin.

²⁸ Miꞌin qui namꞌ jemoñeꞌ ĉujcati miꞌin, ĉọjcacsejamꞌ chimeꞌ muꞌin anicjetety Jenꞌ in, ĉaĉaij na Jenꞌsiꞌ Ạꞌedyeꞌ muꞌ meꞌ yuꞌnac paj qui ĉọjcacsi miꞌin muꞌ Jenꞌtyiꞌ ñuruꞌtyity muꞌ, muꞌin yaꞌitactyiꞌ muꞌ ĉụiꞌsiꞌyaꞌ chäsh muꞌ.

²⁹ Aty chịj yụ, aty raꞌ yacchuyacyaꞌ yụ, jäquiꞌve raꞌ shupqui in cäjsis p̂eyacdyeꞌ tuiꞌtyiꞌ in, muꞌin raꞌ jam ạ̈räjyi anicjetetytum Jenꞌ in, jeñej tsäquiꞌyis vajedyedyeꞌ jam ạ̈räjyiꞌ cuꞌdyeꞌtum, meꞌ buꞌyi raꞌ shupqui in.

³⁰ Chimeꞌdye muꞌĉantyiꞌdye raꞌ miꞌin pạrej raꞌ shupqui miꞌin, cäjsis qui raꞌ p̂eyacdyeꞌ jịꞌchiyacseban miꞌin, quevacseban raꞌ miꞌin tyi chuc cäc̣häꞌchunactyiꞌ in aꞌc̣hisyaꞌ p̂eyacdyeꞌ.

³¹ Jemoñeꞌ jämꞌ ĉujcati miꞌin jämꞌ raꞌ dyijtubajtiñeꞌ miꞌin jiꞌchäyitidyeꞌ yụs jiquej, ĉaĉaij na chibin yómodyeꞌ, mạij judyeyaꞌ tsedyedyeꞌ, meꞌquiꞌ jịꞌchiyeyac yụ räj miꞌin jiquej, táristum yụ jịꞌchiyeyac.

³² Q̂uinꞌ chätidyeꞌ, yụ cọdyete Jenꞌ miꞌindyes paj qui muꞌ ĉujcanac miꞌin. Mọꞌ p̂eyacdyeꞌ muꞌsiꞌ p̂eijbites ñịbeꞌjitidyes muꞌ, mọꞌ tupuj ĉujcabunac miꞌin. Mọꞌ tupuj soꞌminac ferdyeꞌ ĉojtyiꞌĉan miꞌin paj qui fer buꞌyi bäꞌyi miꞌin judyeyaꞌ raꞌ ñịbeꞌjinac miꞌin mạyedyeꞌches bijodyeꞌ, yojdyemꞌ räj ñịbeꞌjeyaqui u tsimꞌtactyiꞌ muꞌ.

^33-34 Miꞌin jämꞌ chäyitiĉaꞌ miꞌin junꞌ chuc yụ jam méquiꞌ mạꞌjetyeyac jedyeꞌ miꞌin jiquej, mijam querec̣ha mijam quịꞌsiꞌ. Yụ ĉụiꞌsiꞌyaꞌ carijtacdyeꞌ tsạꞌ buꞌyi yụ räjtumdye penꞌdyeꞌ yụ, jedyeꞌ chuc jemoñeꞌ tsun ĉụiꞌ mọmoꞌ yaꞌij yụ.

³⁵ Räjĉan meꞌ yi yụ paj qui chịj miꞌin chimeꞌ jemoñeꞌ meꞌ carijtaĉaꞌ paj qui tupuj nọ́tacsejaꞌ muꞌin jayejjotaquity jedyeꞌ in. Meꞌ raꞌ dyijtupja Jesússiꞌ p̂eyacdyeꞌ muꞌ Ayoꞌ tsun, yi: "Tyi chuc ñịbeꞌjeyacsity jedyeꞌ, muꞌ raꞌ mujuꞌchaꞌ maꞌjodyeꞌtum, uyaꞌyaꞌ maꞌjodyeꞌtum tyi chuc ñịbeꞌjeyac muntyiꞌyaꞌ in", yi Jesús jiquej —jéyacsi muꞌ Pablo.

³⁶ Aty jiꞌmeꞌsiyaqui muꞌ Pablo, chat qui dyụtsyi muꞌ räjtumdye ĉọjcacsity anicjetety Jenꞌ in, cọdyete qui Jenꞌ in muꞌintum in.

³⁷ Räj tári in c̣hobenꞌjete muꞌ Pablo in judyeyaꞌ pụꞌsete in.

³⁸ Dadamꞌ tárete in ĉaĉaij na yi jéyacsi: "jadyic raꞌ cavitiĉaꞌ yụ miꞌin", yi muꞌ. Chat qui penꞌdyetute in sinve jịjcaij in, jịꞌĉojcayebajte in.