Uñedye' 2 - Tsimane

Ayidyeꞌ Jenꞌsiꞌ Ạꞌedyeꞌ muꞌ

¹ Chaꞌsheꞌ in feshta Pentecostés. Muꞌin anicjetety Jenꞌ in räj tsudyujñiti in yirisĉan acaꞌ.

² Vátyequej seꞌveꞌ in shäjäꞌjäiꞌ fer, jeñej fertyiꞌ tyiꞌmu, meꞌ mạꞌiꞌ, rimaj tŝọiꞌ yóĉandyemꞌ tsudyujñitiĉan u in.

³ Ĉụiꞌdye nạijtyeꞌ in méquiꞌ furuꞌruyacñiꞌ joꞌnoꞌchechej muꞌin.

⁴ Jenꞌsiꞌ Ạꞌedyeꞌ muꞌ räjdye muꞌin tŝọ́tacsiꞌ, chat qui tiyacchuiꞌ p̂eyaqui in yoctyisĉan p̂eyacdyeꞌ muꞌin jam chiqueꞌsiꞌ in, meꞌ meꞌ jiꞌp̂eyacacsiꞌ Jenꞌsiꞌ Ạꞌedyeꞌ muꞌ paj qui meꞌ p̂eyaqui in.

⁵ Chimeꞌdye muꞌĉan Jerusalénĉan pạrej muꞌyaꞌ judío in, cạiꞌtyiꞌ in ĉụiꞌsiꞌ jiꞌchäyitidyeꞌ muꞌin, paiꞌ paiꞌ jacches bäꞌyedyeꞌ atsij in, cạveteꞌtyiꞌ feshta in.

⁶ Seꞌvetemꞌ in mạꞌedyeꞌ, sijcajcacsi ĉọcsequi in anicjetety Jesús in. Anic äjyi muꞌin in seꞌvacsi in ĉụiꞌsiꞌĉaĉan p̂eyacdyeꞌ p̂eyaqui in ĉaĉaij na muꞌin anicjetety Jesús in yoctyisĉaĉan p̂eyacdyeꞌ p̂eyaqui in.

⁷ Anic äjjeyacsi muꞌin in, yi jítidyeij in: —¿Jam adac uts Galileaĉantyiꞌ in meꞌ p̂eyaqui q̂uinꞌ in?

⁸ ¿Junꞌ buty ĉaĉaij meꞌ p̂eyaqui yoctyisĉan p̂eyacdyeꞌ in? Meꞌ tsanꞌ yoc yoc muntyiꞌ tsun paiꞌ bäꞌjaty, ĉụiꞌsiꞌĉaĉan qui namꞌ p̂eyacdyeꞌ seꞌvejaꞌ tsun, meꞌ meꞌ p̂eyaqui uts q̂uinꞌ in.

⁹ Chimeꞌ q̂uinꞌ úyaꞌ tsun atsijaꞌtyiꞌ Partiaĉan, pạrej Mediaĉantyiꞌ tsun, judyeyaꞌ Elamĉantyiꞌ tsun, judyeyaꞌ Mesopotamiaĉantyiꞌ tsun, judyeyaꞌ ọijĉan Judeaĉantyiꞌ tsun, judyeyaꞌ Capadociaĉantyiꞌ tsun judyeyaꞌ Pontoĉantyiꞌ tsun judyeyaꞌ Asiaĉantyiꞌ atsijaꞌ tsun,

¹⁰ judyeyaꞌ Frigiaĉantyiꞌ tsun, judyeyaꞌ Panfiliaĉantyiꞌ tsun, judyeyaꞌ Egiptoĉantyiꞌ tsun, judyeyaꞌ Libiaĉantyiꞌ tsun, mọꞌ c̣hẹiꞌyaꞌ buꞌyis Cirene, judyeyaꞌ Romaĉantyiꞌ chimeꞌ tsun.

¹¹ Pạrej tacaꞌ judío naꞌejaꞌ tsun, judyeyaꞌ pạrej jụj jaꞌyisinꞌtyiꞌ Judíosyaꞌ jiꞌchäyitidyeꞌ muꞌin. Chimeꞌdye muꞌyaꞌ pạrej Cretaĉantyiꞌ tsun judyeyaꞌ Arabiaĉantyiꞌ chimeꞌ tsun. Meꞌ tsanꞌ paiꞌ bäꞌjaty tsun, ĉụiꞌsiꞌĉaĉan qui namꞌ p̂eyacdyeꞌ tsun seꞌvejaꞌ tsun Jenꞌsiꞌ p̂eyacdyeꞌ muꞌ, p̂eijbiteyaꞌ in därsiꞌ ferdyeꞌ Jenꞌsiꞌ muꞌ —yi in.

¹² Anic där äjyi in, itŝiꞌ dyijyedyeꞌ dạqueꞌ in, yi jítidyeij vajmun in: —¿Junꞌ buty meꞌ yi uts in?

¹³ Pạrej dyisaꞌyi ĉọcsi in, ĉaĉaij na yoctyisĉaĉan p̂eyacdyeꞌ p̂eyaqui in, mọꞌdyes meꞌ shuꞌqui ĉọcsi in.

Pedros voroꞌyedyeꞌ muꞌ

¹⁴ Chat qui muꞌ Pedro muꞌyaꞌdye sacyi, yoctyiꞌtum in, yiriꞌtac yirity jiyity jutactyiꞌ Jenꞌtyiꞌ muꞌ. Fer p̂eyaqui jéyacsi muntyiꞌ in: —Chätidyeꞌ judío tsun judyeyaꞌ miꞌin Jerusalénĉan bäꞌyity miꞌin, seꞌvibutiĉamꞌ jämꞌ ọij p̂eyacdyeꞌ yụ.

¹⁵ Uts seꞌvacsity miꞌin jam nash shuꞌquity in jam jeñej yi miꞌin, tacaꞌ pamꞌ q̂uinꞌ.

¹⁶ Ọij seꞌvacsebi p̂eyacdyeꞌ q̂uinꞌ miꞌin yoctyisĉaĉan p̂eyacdyeꞌ p̂eyaqui in, mọꞌ aty jịꞌcätseꞌ sánacdyeꞌ Joelsiꞌ muꞌ, muꞌ jasoꞌmitity p̂eyacdyeꞌ Jenꞌ jiquej. Yiꞌ sánacdyeꞌ:

¹⁷ "Yi Jenꞌ: Jadyiquisĉan raꞌ tupudyeꞌ yụ raꞌ juteꞌ Ạꞌedyeꞌ yụ, mọꞌ raꞌ räj tŝọcsiꞌ muntyiꞌ in. Vóshiꞌ raꞌ miꞌin sonꞌ in judyeyaꞌ p̂en in, yụ raꞌ soꞌmacsi muꞌin in paj qui jịꞌchiqueyacsi p̂eyacdyeꞌ yụs in. Chimeꞌdye raꞌ nanamuntyiꞌ in yụ raꞌ jịꞌcaveyacsi jịꞌcavacdyeꞌ muꞌin in, judyeyaꞌ raꞌ chimeꞌ yụ raꞌ soꞌmacsi ishoꞌmuntyiꞌ in taminꞌdyedyes muꞌin.

¹⁸ Mọꞌdye raꞌ tupudyeꞌ yụ raꞌ juteꞌ Ạꞌedyeꞌ yụ ọ́cheꞌ, mọꞌ raꞌ tŝọcsiꞌ úñity yụ judyeyaꞌ úñis yụ, paj qui muꞌin jịꞌchiqueyacsi in p̂eyacdyeꞌ yụ.

¹⁹ Chimeꞌdye yụ raꞌ jịꞌcaveꞌ jịꞌĉocdyes mạyedyeꞌches, judyeyaꞌ raꞌ chimeꞌ jịꞌcaveꞌ yụ jacchedyes ferdyeꞌ, chäsh judyeyaꞌ tŝij judyeyaꞌ tyimꞌdyes jịꞌsaꞌ, meꞌ meꞌ raꞌ jịꞌcaveꞌ yụ.

²⁰ Tyumꞌjoij raꞌ tsun, ịvaj raꞌ jeñej chäsh tyeiꞌ. Joꞌmes chum raꞌ tashcheꞌ räj cạ̈tsiꞌ jambiꞌdyemꞌ chaꞌshac mọꞌ mọjoꞌchas tupudyeꞌ Ayoꞌsiꞌ muꞌ.

²¹ Chat meꞌsiꞌ qui raꞌ tyi chuc cọdaquity Ayoꞌcheꞌ jụijyaꞌ in, muꞌin raꞌ c̣hoñi in", yiꞌ sánacdyeꞌ —jéyacsi Pedro.

²² Yejĉoij p̂eyaqui Pedro jéyacsi: —Seꞌvibutiĉamꞌ jämꞌ ọij p̂eyacdyeꞌ yụ, miꞌin Israeltyiꞌ vóshiꞌ miꞌin, muꞌ Jesús Nazaretĉantyiꞌ anic där soꞌmac ferdyeꞌ muꞌ. Daiꞌ quiꞌ muꞌ jiꞌcaviyinac ferdyeꞌ muꞌ, Jenꞌsiꞌtum ferdyeꞌ muꞌ carijtaqui miꞌinsiꞌyaꞌ vej, meꞌ muꞌ jiꞌcaviyinac junꞌ chuc muꞌ anictyity jutactyiꞌ Jenꞌtyiꞌ muꞌ.

²³ Muꞌ na Jenꞌ därsiꞌyaꞌ dyijyedyeꞌ muꞌ yi paj qui muꞌ Jesús jiꞌmeꞌtac miꞌinyaꞌ, chat qui miꞌin soꞌmacsi ac̣hiꞌyity muntyiꞌ in paj qui muꞌin pacte croshcheꞌ in, miꞌin qui meꞌ buꞌyi jiꞌijatinte muꞌ Jesús jiquej, meꞌ buꞌyiꞌ cạ̈tsiꞌ dyijyedyeꞌ Jenꞌsiꞌ muꞌ.

²⁴ Aty meꞌsiꞌ Jenꞌdye jajiꞌtsaꞌibun paj qui jam sänꞌdyeꞌĉan bäꞌyi, ĉaĉaij na mọꞌ sänꞌdyeꞌ jam junꞌ tapjajiti.

²⁵ Chimuꞌdye p̂eijte muꞌ Davidvun yiꞌ sánacdyeꞌ: "Räjĉan yụ́yaꞌ buꞌyi Ayoꞌ tsun, cạvevaꞌte yụ, mọꞌdyes jam raꞌ jedyeij noiꞌyi yụ, ĉaĉaij na tacve buꞌyi muꞌ yụ́tum.

²⁶ Mọꞌdyes maꞌjoij ĉojtyiꞌĉan yụ, maꞌjodyeꞌtum p̂eyaqui yụ, räjĉan raꞌ tsạꞌ buꞌyiꞌ aꞌ yụ.

²⁷ Mi raꞌ jam junꞌ farajjitim ruꞌdyeiꞌyaꞌ mi, mijam raꞌ farajjibutiꞌ aꞌ mi, mijam raꞌ jiꞌfocoyibutim muꞌĉan, ĉaĉaij nash yụ jutactyiꞌ ĉụiꞌtyiꞌ mi tsimꞌtactyiꞌ mi.

²⁸ Mi jiꞌchäyitim junꞌ chuc raꞌ míyaꞌ bäꞌyi yụ, mi raꞌ soꞌmitim maꞌjodyeꞌ aty penꞌdyetuyeyaꞌ yụ", yiꞌ sánacdyeꞌ.

²⁹ Chätidyeꞌ yụ jéyac, ọij sánacdyeꞌ jam David p̂eijte ĉaĉaij na muꞌ meij mọmoꞌ jịjcaijtyiꞌ, muꞌyaꞌ nạ́te in, meꞌdye q̂uinꞌ muꞌyaꞌ ruꞌdyuij muꞌ.

³⁰ Muꞌ David jasoꞌmitity p̂eyacdyeꞌ Jenꞌ jiquej, mọꞌdyes qui jayuꞌtyiyiti tsäquiꞌyis fersiꞌ p̂eyacdyeꞌ Jenꞌsiꞌ muꞌ, yiꞌ yirity raꞌ vóshiꞌ muꞌ ayoꞌbuꞌyi raꞌ, yojdyemꞌ ayoꞌbuꞌyi David u, meꞌdye raꞌ vóshiꞌ muꞌ chimeꞌ.

³¹ Mọꞌdyes muꞌ David jäꞌmij tashcheꞌ chị́yepte Jenꞌsiꞌ dyijyedyeꞌ muꞌ, junꞌ chuc vañinyeban raꞌ Jiꞌc̣honacsity Muntyiꞌ, mọꞌ sáñeꞌ muꞌ yiꞌ mijam ca raꞌ muꞌ taĉan toꞌĉan rudyuꞌ buꞌyi, mijam ca raꞌ jedyeiꞌ aꞌ muꞌ focoiꞌ muꞌ.

³² Meꞌdye muꞌ Jenꞌ jịꞌcätseꞌ ọij aty jịꞌtsaꞌebajteyaꞌ muꞌ Jesús jiquej. Tsun nash nạijbajte muꞌ Jesús aty vañinyebadaque, mọꞌdyes tsun jịꞌchiqueyacseban muntyiꞌ in.

³³ Q̂uinꞌ qui namꞌ aty mạyedyeꞌcheꞌ jácabun Jenꞌ muꞌ, tacve buꞌyi muꞌ Jenꞌ jayuꞌti. Jenꞌ jasoꞌmiti Jenꞌsiꞌ Ạꞌedyeꞌ yoj jajitidyemꞌ jiquej u, muꞌ qui Jesús jiꞌjiyisinꞌ tsun, aty q̂uinꞌ tsuncheꞌ tŝọiꞌ mọꞌ. Mọꞌ cạvetiñes miꞌin judyeyaꞌ seꞌvetiñes.

³⁴ Jam nash David mạyedyeꞌcheꞌ jịjcaij jam muꞌ ayoꞌbuꞌyi muꞌcheꞌ. Sánacdyeꞌchemꞌ p̂eijte muꞌ Jiꞌc̣honacsity Muntyiꞌ, yi muꞌ: "Jenꞌ jéte Ayoꞌ yụ: Tacve buꞌyi raꞌ bäꞌyi yụ́yam

³⁵ junꞌ quiꞌ chuc yụ jiꞌpenbiye fáquintyiꞌ in."

³⁶ Räj miꞌin Israeltyiꞌ vóshiꞌ miꞌin jemoñeꞌ jämꞌ chịj miꞌin ọij p̂eyacdyeꞌ: muꞌ Jesús jiꞌpactintety croshcheꞌ jiquej miꞌin, muꞌdye nash jayuꞌti Jenꞌ paj qui muꞌ Jiꞌc̣honsinꞌtyiꞌ tsun, paj qui ayoꞌbuꞌyi tsundyes, muꞌ nash anictyity ayoꞌ tsun —jéyacsi Pedro.

³⁷ Seꞌvepte in mọꞌ p̂eyacdyeꞌ jämꞌ areꞌjajiti ĉojtyiꞌĉan muꞌin, mọꞌdyes qui jéte in muꞌ Pedro judyeyaꞌ yoctyiꞌ jutactyiꞌ Jenꞌtyiꞌ muꞌ: —Chätidyeꞌ, ¿junꞌ qui bu raꞌ tsun q̂uinꞌ?

³⁸ Vorjeyacsi Pedro: —Dyijyejamꞌ juchajcheꞌ miꞌin, jiꞌchojtiĉamꞌ miꞌin Jesucristoscheꞌ tịj muꞌ chat qui raꞌ muꞌ Jenꞌ vayacjibunac juchaj miꞌin, judyeyaꞌ raꞌ soꞌminac Ạꞌedyeꞌ muꞌ.

³⁹ Miꞌindyes nash chimeꞌ ọij p̂eyacdyeꞌ yụꞌtyeꞌsiꞌ Jenꞌ jiquej, yiꞌ muꞌ, muꞌ ca raꞌ ñịbeꞌjinac miꞌin judyeyaꞌ yoctyiꞌdye muntyiꞌ chimeꞌ ñịbeꞌjeyacsi, meꞌ tsanꞌ moch buꞌyity muntyiꞌ in, muꞌindyes chimeꞌ p̂eyacdyeꞌ in, tyijtyi chuc fayactyiꞌ Jenꞌyaꞌ in —jéyacsi muꞌ Pedro.

⁴⁰ Dadamꞌ qui muꞌ cächjeyeyacsi fersiꞌ voroꞌyedyeꞌ muꞌ, jéyacsi: —Jụjyejamꞌ tyä, paj qui jam miꞌinmun damꞌjetiñeꞌ ac̣hiꞌyitytum muntyiꞌ q̂uinꞌ in —yi muꞌ Pedro jéyacsi.

⁴¹ Anicdye meꞌ, muꞌin in chiqueptety p̂eyacdyeꞌ in, jiꞌchojti qui in. Mọꞌdye mạyedyeꞌ anic shach vatyquej jụjjete Jenꞌ in, chibin quiꞌ mir anicyi in.

⁴² Räjĉan muꞌin jiꞌchäyitidyeꞌĉan jiꞌchäyiti muꞌin jutactyiꞌ Jenꞌtyiꞌ muꞌ jịꞌchiyacsi in. Vaj yiriꞌyaꞌ cọdaqui Jenꞌcheꞌ in judyeyaꞌ chimeꞌ yiriꞌyaꞌdye säcsi in, judyeyaꞌ vaj meij soꞌmitidyeij jedyeꞌ in, tyi chuc jayejjotaquity in muꞌin soꞌmacsi in jam quijatutyiti in.

Meꞌ bäꞌyi in anicjetety Jesucristo in

⁴³ Muꞌin jutactyiꞌ Jenꞌtyiꞌ in daiꞌ quiꞌ jịꞌcaveyacsi in Jenꞌsiꞌ ferdyeꞌ muꞌ, mọꞌdyes qui muꞌin in räj irijyi in, jorojyatymun chimeꞌ in jam anicjetety Jenꞌ in.

⁴⁴ Muꞌin anicjetety Jesucristo in vaj cäts dyijyi in ñịbeꞌjitidyeij jedyeꞌ in.

⁴⁵ Meꞌ jiꞌmincaqui ĉụiꞌsiꞌ jedyeꞌ in judyeyaꞌ jac muꞌin chat qui soꞌmacsi querec̣ha in muꞌĉantyiꞌ in jụꞌñity chuc jayejjotaquity jedyeꞌ in.

⁴⁶ Räjĉan mạyedyeꞌ vajmuꞌyaij in Jenꞌsiꞌĉan acaꞌ in, judyeyaꞌ chimeꞌ yiriꞌyaꞌ säcsi in ĉụiꞌsiꞌĉan acaꞌ muꞌin, maꞌjodyeꞌtum säcsi in. Vaj cäts dyijyi in, jämꞌjiti ĉojtyiꞌĉan in

⁴⁷ räjĉan timaꞌquete Jenꞌ in. Muꞌin na yoctyiꞌ muntyiꞌ in jorojyaty in jämꞌjeĉunacsi in muꞌin anicjetety Jenꞌ in. Räj mạyedyeꞌ jịjcaij cheꞌi muntyiꞌ jụjjetety Jenꞌ in, tyijtyi chuc jụj jaꞌyacsi muꞌ Jenꞌ.