Uñedye' 18 - Tsimane

Pablo Corintoĉan

¹ Aty meꞌsiꞌ muꞌ Pablo shupqui Atenasĉantyiꞌ, roiꞌjeꞌ Corintoĉan jịjcaij.

² Muꞌĉan dạquicte judío, Aquila tịj muꞌ, Pontoĉan naꞌity muꞌ, Priscila tịj p̂en muꞌ. Jambiꞌ muꞌ men muꞌĉan bäꞌyi Corintoĉan in, Romaĉantyiꞌ muꞌ jiquej, Corintoĉan qui jijtuij in, ĉaĉaij na muꞌ mujuꞌchaty ayoꞌ Claudio jiꞌshupcacsi Romaĉantyiꞌ in räjenꞌdye muꞌin judío in. Pablo sóbacsi muꞌin in,

³ muꞌinyaꞌ dyäqui judyeyaꞌ muꞌintum yiriꞌyaꞌ carijtaqui in, ĉaĉaij na mọꞌdye carijtacdyeꞌ muꞌin, quịꞌsiꞌ acaꞌ jämꞌtety in.

⁴ Yósiꞌdyemꞌ mạyedyeꞌ jịꞌjutyitidyes o, meꞌsiꞌquiꞌdye muꞌ Pablo ĉọ́queꞌ siteꞌ vajmuꞌyaijĉan judío in. Voroꞌtacsi muꞌĉan muꞌ, vaj meij p̂iyiti muꞌintum in, mạꞌjeꞌ jụj jaꞌyacsi judío in judyeyaꞌ jam judío in.

⁵ Aty venchuijyaꞌ in muꞌ Silas judyeyaꞌ Timoteo, Macedoniavety in, Corintoĉan chaꞌshete Pablo in. Chat qui muꞌ Pablo farajjeꞌ carijtacdyeꞌ muꞌ, Jenꞌsiꞌ quimꞌ dyijtupte p̂eyacdyemꞌ. Dyijyi mạꞌjeꞌ jịꞌchiqueyacsi judío in, jéyacsi: "Jesús nash Jiꞌc̣honacsity Muntyiꞌ", yi muꞌ.

⁶ Muꞌin na judío in yacchuti fạ́quete in, ñiñete in. Mọꞌdyes qui muꞌ Pablo chischisjeyactaqui jac quịꞌsiꞌches muꞌ, jịꞌĉocdyes muꞌindyes in anic vaꞌcac bäꞌyi muꞌĉantyiꞌ in. Jéyacsi: —Ĉụiꞌsiꞌyaꞌ juchaj miꞌin tsäquiꞌsisĉandyety raꞌ miꞌin, jam yụ́siꞌ juchaj mọꞌ, jam mụiꞌ jéyac. Q̂uinꞌ chat muꞌin qui raꞌ voroꞌtacsi yụ muꞌin jam judío in —jéyacsi muꞌ Pablo.

⁷ Shuban muꞌĉan vajmuꞌyaijĉan judío in, yạjquicseban, yoctyiꞌ qui jajbuꞌyete, Ticio Justo tịj muꞌsiꞌ, muꞌsiꞌĉan qui acaꞌ dyäqui. Muꞌ dyijyity tsanꞌ Jenꞌcheꞌ, cäch buꞌyidye bäꞌyi vajmuꞌyaijĉan judío in.

⁸ Muꞌ Crispo tashcheꞌ buꞌyity muꞌ vajmuꞌyaijĉan in, muꞌ chimeꞌ aty anicjete Ayoꞌ räjtumdye chätidyeꞌ muꞌ. Chimeꞌdye daiꞌ Corintoĉantyiꞌ in seꞌvepte Jenꞌsiꞌ p̂eyacdyeꞌ in judyeyaꞌ anicjete in judyeyaꞌ jiꞌchojti in.

⁹ Yirisĉan tsedyedyes muꞌ Ayoꞌ jajiꞌcaviyiti jịꞌcavacdyeꞌ muꞌ Pablo, jajiti: —Jam raꞌ noiꞌyi mi, jam raꞌ peñi mi voroꞌtacsim, yejĉovamꞌ jéyacseva,

¹⁰ ĉaĉaij nash yụ penꞌdyetuye mi. Jam raꞌ tyi tupuj meꞌtyin mi, úĉan nash bäꞌyedyeꞌĉan daiꞌ muꞌyaꞌ tsimꞌtactyiꞌ muntyiꞌ yụ, muꞌin raꞌ chimeꞌ anicjin yụ in —jajiti Jenꞌ.

¹¹ Meꞌdyes qui Pablo taĉan Corintoĉan, yiris yómodyeꞌ choc muꞌĉan bäꞌyi, jịꞌchiyacsi muꞌĉantyiꞌ in Jenꞌsiꞌ p̂eyacdyeꞌ muꞌ.

¹² A na ayoꞌbuꞌyi muꞌ Galión Acayaĉan, chat muꞌin judío in vaj meꞌ dyijyi in tapjete in muꞌ Pablo judyeyaꞌ cạte in ayoꞌyaꞌ jiꞌmeꞌte in.

¹³ Jéte in muꞌ ayoꞌ: —Uts nash muntyiꞌ jụj jaꞌyacsity muntyiꞌ in paj qui yocve cạiꞌ cäc̣häꞌchucdyeꞌ Jenꞌcheꞌ in, mọꞌ na jam yiꞌ Romaĉantyis yụꞌtacdyeꞌ muꞌin —yi jéte in muꞌĉantyiꞌ ayoꞌ.

¹⁴ Pablo mạꞌjeꞌ tsanꞌ p̂eyaqui tyumꞌchuti qui ĉụiꞌ, muꞌ chum yi p̂eyaqui muꞌ ayoꞌ Galión jéyacsi judío in: —Mọꞌyaꞌ jụijyaꞌ juchaj anicsis utssiꞌ muntyis muꞌ, juchatupte ayos yụꞌtacdyeꞌ jụijyaꞌ muꞌ, tupuj raꞌ yụ dyichyedyeꞌtum seꞌveyac miꞌin judío miꞌin.

¹⁵ Jam nash meꞌ, yụ jam tupuj seꞌvebiyac miꞌin ọij jiꞌmeꞌtacdyeꞌ miꞌin, ĉaĉaij na ĉụiꞌsiꞌyaꞌ jiꞌchäyitidyeꞌ jiꞌmeꞌtinte miꞌin, judyeyaꞌ yụꞌtacdyeꞌyaꞌ miꞌin joꞌmesyaꞌ jiꞌmeꞌtinte miꞌin uts muntyiꞌ. Miꞌindye raꞌ jịꞌcäts yụꞌbibajtinte miꞌin, yụ raꞌ jam jiꞌsäsdyi miꞌinsiꞌĉan jedyeꞌ —jéyacsi muꞌ ayoꞌ.

¹⁶ Chat qui muꞌ jiꞌshupcacsi jorojyaꞌ vaꞌcacsequi.

¹⁷ Muꞌyaty qui tapjete in muꞌ Sóstenes, muꞌ tashcheꞌ buꞌyity vajmuꞌyaijĉan judío in. Ayosyaꞌdye vej muꞌ muꞌyaꞌdye chute in, muꞌ na Galión jam muꞌ jätäjjeyacsi, memꞌ cạvacsi.

Pablo caꞌñibun Antioquíaĉan, chat qui dyijyi chibinyis miꞌedyeꞌ muꞌ

¹⁸ Pablo taĉan chum Corintoĉan. Aty meꞌsiꞌ dyijyi Siriaĉan qui raꞌ jijtuban, penꞌdyetucsi mọꞌ Priscila judyeyaꞌ muꞌ Aquila. Vorjeyacsetaqui in anicjetety Jenꞌ in, chat qui miꞌeban in. Cencreaĉan quer jiꞌtäꞌtsimcabun muꞌ Pablo, mọꞌ jiꞌtäꞌtsitidyemꞌ jịꞌĉocdyes muꞌ Pablo aty yụꞌtyeꞌ p̂eyacdyeꞌ Jenꞌdyes, junꞌ chuc raꞌ muꞌ, mọꞌ yicdyeꞌ judíos muꞌin.

¹⁹ Chat qui p̂aiꞌjoij covambacheꞌ in Efesoĉan jịjcaban in. Aty muꞌĉan venjoban in yóĉandyemꞌ jiꞌyajcatiĉan u in mọꞌ Priscila judyeyaꞌ muꞌ Aquila. Muꞌĉan sitacsi Pablo vajmuꞌyaijĉan judío in, p̂eyeyacsi muꞌĉantyiꞌ judío in.

²⁰ Muꞌin cọdyete in mạꞌjeꞌ tsanꞌ paj qui muꞌ Pablo damꞌ muꞌĉan meꞌ buꞌyi, muꞌ na jam jụjyi.

²¹ Jéyacsetaqui muꞌ: —Jenꞌ yi jụijyaꞌ ĉọ́shadyeyac raꞌ quivij —jéyacsetaqui muꞌĉantyiꞌ in. Efesoĉan qui yacchuti, bijti marĉantyiꞌcheꞌ covamba, nobi mọꞌ mar,

²² Cesareave sojquiti. Muꞌyaꞌ qui p̂aiꞌjoij muꞌ Pablo, Jerusalénĉan tänꞌyequi, ĉọcsequi muꞌĉantyiꞌ anicjetety Jenꞌ in, Antioquíaĉan qui jịjcaij.

²³ Men muꞌĉan meꞌ buꞌyi. Muꞌĉantyiꞌ cuvij sacjebanꞌ, paiꞌ qui ĉọ́queꞌ bäꞌyedyeꞌ in Galaciaĉansiꞌ in judyeyaꞌ Frigiaĉansiꞌ in, meꞌ meꞌ jịꞌchiyacsi judyeyaꞌ jiꞌmaꞌyacsi muꞌin anicjetety Jenꞌ in.

Apolos voroꞌtacsi Efesoĉantyiꞌ in

²⁴ Meꞌdye atsij yirity judío Alejandríaĉantyiꞌ, Apolos tịj muꞌ, Efesoĉan jijtuij. Anic jämꞌ chịj muꞌ voroꞌyi Jenꞌsiꞌ p̂eyacdyeꞌ, anic jämꞌ chị́yepte Jenꞌsiꞌ sánacdyeꞌ muꞌ.

²⁵ Anic jämꞌ jịꞌchiyactyiꞌ Ayoꞌsiꞌ jiꞌchäyitidyeꞌ muꞌ, mọꞌ chị́yepte muꞌ. Anic fercheꞌ voroꞌtacsi Jenꞌsiꞌ p̂eyacdyeꞌ muꞌ, maꞌjodyeꞌtum muꞌ, rụij jéyacsi muntyiꞌ in. Meꞌ tsanꞌ meꞌ, jayej qui namꞌ muꞌ, mọmꞌ chị́yepte junꞌ quiꞌ chuc muꞌ Juansiꞌ jiꞌchäyitidyeꞌ muꞌ, muꞌ chojtacsity jiquej.

²⁶ Muꞌ anic jämꞌ voroꞌtacsi muꞌĉan vajmuꞌyaijĉan judío in, mijam méquiꞌ noiꞌyedyeꞌtum jéyacsi muꞌinsiꞌyaꞌ vej muꞌin. Priscila judyeyaꞌ muꞌ Aquila aty muꞌ seꞌvepte p̂eyacdyeꞌ Apolossiꞌ muꞌ, chat qui acaꞌĉan cạte in, dadamꞌ mujuꞌchaꞌ jịꞌchiqueyete Jenꞌsiꞌ majmi muꞌĉan in, mọꞌ p̂eijtes Jesús.

²⁷ Aty meꞌsiꞌ muꞌ Apolos yocsiꞌve qui raꞌ jịjcaij jac Acayave. Muꞌin Efesoĉantyiꞌ anicjetety Jenꞌ in jiꞌmaꞌyete in judyeyaꞌ soꞌmete sánacdyeꞌ in muꞌindyes raꞌ in anicjetety Jenꞌ in Acayaĉantyiꞌ in, paj qui jämꞌ tiĉunꞌte muꞌĉan in. Muꞌĉan qui roiꞌjeꞌ. Muꞌĉan shupquequi, nọ́tacsi muꞌin anicjetety Jenꞌ in, muꞌin aty ñịbeꞌjeyacsity Jenꞌ.

²⁸ Muntyisyaꞌ vej muꞌin fercheꞌ muꞌ Apolos voroꞌtacsi judío in anic jorojĉan jéyacsi muꞌ, muꞌ Jesús Jiꞌc̣honacsity Muntyiꞌ, yóyiꞌdyemꞌ sánacdyeꞌ Jenꞌsiꞌ u, meꞌ anic jịꞌchiqueyacsi muꞌ Apolos. Meꞌ tsanꞌ judío in fercheꞌ vorjete in, jam qui namꞌ tyi jiꞌpente in.