Uñedye' 17 - Tsimane

Tesalónicaĉantyiꞌ ñur tyeij in fạ́codyeꞌtum in

¹ Meꞌdye muꞌ Pablo judyeyaꞌ muꞌ Silas miꞌeban in. Cajñeꞌ in mọꞌ bäꞌyedyeꞌ Anfipolis judyeyaꞌ Apolonia, Tesalónica dạquiqueꞌ in, yóĉandyemꞌ vajmuꞌyaijĉan judío u in.

² Yósiꞌdyemꞌ mạyedyeꞌ jịꞌjutyitidyes o, meꞌsiꞌquiꞌdye siti muꞌĉan muꞌ Pablo ĉaĉaij na meꞌ yicdyeꞌ muꞌ. Chibin quiꞌ muꞌ Pablo siti muꞌĉan jéyacsi muꞌĉantyiꞌ in Jenꞌsiꞌ p̂eyacdyeꞌ muꞌ. Vorjiti judíotum in, jịꞌchiqueyacsi jedyeꞌ chuc cạiꞌ Jenꞌsiꞌ sánacdyeꞌ muꞌ.

³ Jéyacsi chimeꞌdye junꞌ chuc raꞌ säñi muꞌ Jiꞌc̣honacsity Muntyiꞌ judyeyaꞌ raꞌ vañinyeban. Jéyacsi: —Muꞌdye Jesús p̂eijtety yụ q̂uinꞌ, muꞌdye nash Jiꞌc̣honacsity Muntyiꞌ —yi jéyacsi muꞌ Pablo.

⁴ Pạrej judío jụjyi in chat qui muꞌin jịjcate Pablo in judyeyaꞌ Silas. Muꞌin na griego in dyijyity tsanꞌ Jenꞌcheꞌ in daiꞌ muꞌin chimeꞌ jụjyi in judyeyaꞌ daiꞌ chimeꞌdye p̂en jedyeꞌtumsiꞌ jụjyiꞌ in.

⁵ Muꞌin na judío jam jụjyity in cạvacsi in anic daiꞌ jịjcate Pablo in, mọꞌ jịꞌfajqueyete in muꞌ Pablo, chat qui quevacsi in pạrej toꞌoty muntyiꞌ in ac̣hiꞌyity in paj qui muꞌin äjyedyeꞌtum sac jaꞌyacsi bäꞌyedyeꞌĉantyiꞌ muntyiꞌ in. Chụiꞌ buꞌyi tŝọ́tyepte in acaꞌ muꞌ Jasónsiꞌ, ñutsjeĉunacsi muꞌĉantyiꞌ in, mạꞌjeꞌ tsanꞌ tap tŝọ́tacsi in muꞌ Pablo judyeyaꞌ muꞌ Silas, muꞌin raꞌ tsanꞌ yụꞌtacsi in muntyisyaꞌ vej muꞌin,

⁶ jam qui namꞌ dạcacsi in. Mọꞌdyes qui Jasóncheꞌ tŝọij in, chijämꞌ tapyejoij pạrej in anicjetetytum Jesucristo in, ayoꞌyaꞌ qui cạcsi in jiꞌmeꞌtacsi in. Väñädyeꞌtum jiꞌmeꞌtacsi jéyacsi in: —Uts atsijtyiꞌ muntyiꞌ in paiꞌ ĉọ́queꞌ bäꞌyedyeꞌ in, paiꞌ sac jaꞌyacsi muntyiꞌ in, q̂uinꞌ qui úĉan atsij in tsunsiꞌĉan bäꞌyedyeꞌ.

⁷ Uts Jasón jiꞌdyäcacsi ĉụiꞌsiꞌĉan acaꞌ muꞌ. Uts in jam méquiꞌ chiqueptety in ayoꞌsiꞌ yụꞌtacdyeꞌ mujuꞌchatysiꞌ, judyeyaꞌ yi in muꞌyaꞌ ca yoctyiꞌ ayoꞌ q̂uinꞌ, Jesús ca tịj muꞌ —yi jéyacsi ayoꞌ in.

⁸ P̂eyacdyeꞌyaꞌ muꞌin sac jaꞌyacsi muntyiꞌ in räjtumdye ayoꞌ muꞌin.

⁹ Chat qui muꞌin ayoꞌ in cọdyetacsi querec̣ha in Jasón judyeyaꞌ yoctyiꞌ anicjetety Jesucristo in. Aty soꞌmacsiyaꞌ in chat q̂uinꞌdyemꞌ jiꞌc̣honacsi in.

Pablo judyeyaꞌ Silas Bereaĉan in

¹⁰ Yómoij in muꞌin anicjetety Jenꞌ in jutete in muꞌ Pablo judyeyaꞌ muꞌ Silas paj qui Bereaĉan jịjcaij in. Venjoij muꞌĉan in, muꞌĉan chimeꞌ ĉọcsequi in vajmuꞌyaijĉan judío in.

¹¹ Muꞌin Bereaĉantyiꞌ judío in mujuꞌchaꞌ dyijyedyeꞌtumtyiꞌ in, fer mạꞌjeꞌ seꞌvepte in p̂eyacdyeꞌ muꞌ, jam jeñej muꞌin Tesalónicaĉantyiꞌ in. Räjĉan mạyedyeꞌ jiꞌchäyiti in Jenꞌsiꞌ sánacdyeꞌ muꞌ, mạꞌjeꞌ chị́yepte jiꞌchäyitidyeꞌ Pablos in, areꞌ rụijsis muꞌ, areꞌ jam.

¹² Daiꞌ jụjyi in, chimeꞌdye daiꞌ jedyeꞌtumsiꞌ p̂en griego in jụjyiꞌ in judyeyaꞌ daiꞌ sonꞌ griego in jụjyi chimeꞌ in.

¹³ Muꞌin na Tesalónicaĉantyiꞌ judío in chị́qui in junꞌ chuc muꞌ Pablo Bereaĉan voroꞌtacsi Jenꞌsiꞌ p̂eyacdyeꞌ muꞌ, muꞌĉan qui jijtuij in sac jaꞌyacsi muꞌĉantyiꞌ chimeꞌ in.

¹⁴ Muꞌin na anicjetety Jenꞌ in muꞌĉantyiꞌ in cavintum jutacsi in paj qui yocve cạte in muꞌ Pablo, sinve mar jiquicte in. Silasdyety Timoteotum Bereaĉan jiꞌyajcati in.

¹⁵ Muꞌin muntyiꞌ cạtety Pablo in Atenasĉan jiquicte in. Caꞌñibun muꞌin in, tubibajte Pablos p̂eyacdyeꞌ muꞌ Silasdyes judyeyaꞌ Timoteodyes, yiꞌ mọꞌ paj ca cavin chaꞌshete in Atenasĉan jijtuij in.

Pablo Atenasĉan

¹⁶ Pablo taĉan Atenasĉan bisacsevaꞌjoij. Anic yoqui ĉojtyiꞌĉan muꞌ ĉaĉaij na daiꞌ jämꞌtacdyeꞌ cạvacsebi, anic daiꞌ jämꞌtacdyeꞌ meꞌchuiꞌ in bäꞌyedyeꞌĉan muꞌin.

¹⁷ Chat qui muꞌ Pablo ĉọcsequi vajmuꞌyaijĉan judío in, muꞌĉan muꞌ Pablo jịꞌchiyacsi vaj meij jítidyeij in, judíotum in judyeyaꞌ muꞌintum in jam judío in dyijyity tsanꞌ Jenꞌcheꞌ in. Chimeꞌdye räjĉan mạyedyeꞌ prasayaꞌ muꞌ voroꞌti muꞌintum in jụꞌñity chuc rébetety in, Jenꞌsiꞌ p̂eyacdyeꞌ jéyacsi.

¹⁸ Chimeꞌdye muꞌyaꞌ muntyiꞌ in yoctyis jiꞌchäyitidyeꞌ cạiꞌtyiꞌ in, epicúreo in judyeyaꞌ estoico chimeꞌ in. Ñiñete muꞌin Pablo in, yi in: —¿Junꞌ buty meꞌ uts yi shapuijtyiꞌ muntyiꞌ? —yi in. Muꞌyaty in voryi in: —Anic yocvety p̂eijte jenꞌ in, jam úyaty in —yi in. Meꞌ yi in ĉaĉaij na muꞌ Pablo voroꞌtacsi Jesússiꞌ p̂eyacdyeꞌ muꞌ, junꞌ chuc vañinyeban muꞌ, dyisaꞌyiꞌ ĉọpte p̂eyacdyeꞌ in.

¹⁹ Muꞌĉan qui cạte in tsudyujñitidyeꞌĉan ayoꞌ in taĉan bäꞌyedyeꞌĉantyiꞌ in, "Areópago" jeꞌ in. Muꞌinsiꞌyaꞌ vej jéte in: —¿Jätäjyiꞌ toꞌ o mụiꞌsis jiꞌchäyitidyeꞌ tuiꞌsiꞌ u mi?

²⁰ Ĉaĉaij na anic yocsiꞌ p̂eyacdyeꞌ p̂eyeꞌ mi, jam tsun jämꞌdyeyaꞌ mọꞌ seꞌveꞌ. Jeshaꞌ jítiĉamꞌ jätäjyiꞌ toꞌ o —jéte in.

²¹ Muꞌin Atenasĉantyiꞌ in judyeyaꞌ räjtumdye yocvety in muꞌĉan bäꞌyity in, muꞌin meꞌ cạiꞌtyiꞌ yicdyeꞌ in, mọꞌ mọmoꞌ dyijtuiꞌ seꞌveꞌ in judyeyaꞌ p̂eyeꞌ in mụiꞌsis jiꞌchäyitidyeꞌ.

²² Chat qui muꞌ Pablo sacyi muꞌinsiꞌyaꞌ vej muꞌin Areópagoĉantyisyaꞌ in, jéyacsi: —Seꞌvibutiĉamꞌ p̂eyacdyeꞌ yụ Atenasĉantyiꞌ miꞌin. A nash cạveyac anic irijyi miꞌin jämꞌtacdyeꞌcheꞌ miꞌin.

²³ Anic daiꞌ ọ́ĉan cạvebiyac jämꞌtacdyeꞌ miꞌin. Chimeꞌdye yiris cạvebiyac jämꞌtacdyeꞌ miꞌin sánacdyeꞌtumsiꞌ, yiꞌ sánacdyeꞌ mọꞌ: "Ọij jämꞌtacdyeꞌ muꞌdyes muꞌ Jenꞌ jam chị́yejatysiꞌ", yiꞌ. Yụ raꞌ jéyac miꞌin junꞌ chuc muꞌ Jenꞌ. Muꞌ Jenꞌ jam chị́yetintety miꞌin, meꞌ tsanꞌ meꞌ, timaꞌquetinte qui namꞌ miꞌin, muꞌ nash muꞌ Jenꞌ yụ jiꞌjäqueyeyac.

²⁴ Muꞌ Jenꞌ jämꞌtyety ọij jac räjtumdye jedyeꞌ in, muꞌ nash anictyity Ayoꞌ tsun ĉọjcaiꞌtyiꞌ ọij jac judyeyaꞌ mạyedyeꞌ. Muꞌ jam joꞌmesĉan bäꞌyi acaꞌĉan jämꞌtyes muntyiꞌ in,

²⁵ mijam muꞌ yiris jedyeꞌ jemoñeꞌ paj qui soꞌmeja tsun. Muꞌ soꞌmisinꞌ jụ́tyes tsun, tsạꞌchusinꞌ tsun, meꞌ meꞌ soꞌmisinꞌ tsun jedyeꞌ chuc jemonjaꞌ tsun.

²⁶ Muꞌ jämꞌte tashchety muntyiꞌ, muꞌĉantyiꞌdye shupqui in, dayi räj jacchety muntyiꞌ q̂uinꞌ in, muꞌdye yi paj qui paiꞌ bäꞌyi úcheꞌ jaccheꞌ in, judyeyaꞌ yụꞌtyeyeyacsi tsạꞌsiꞌ, juñucsiꞌ chuc raꞌ yómodyeꞌ bäꞌyi in, chimeꞌdye junanaj chuc raꞌ bäꞌyi in, meꞌ meꞌ yụꞌtacsi Jenꞌ.

²⁷ Muꞌ yi paj chimeꞌ qui muntyiꞌ in quevte in jeñej tocoꞌ tocoꞌ quevacsi jedyeꞌ, vatyquej täjtete jụijyaꞌ in. Muꞌ qui namꞌ úyaꞌ c̣hẹiꞌyaꞌ tsunyaꞌ

²⁸ ĉaĉaij na muꞌdye yuꞌsinꞌ paj qui tsạꞌ buꞌjaꞌ, muꞌtum bäꞌjaꞌ úcheꞌ jaccheꞌ, soꞌmisinꞌ tsạꞌsiꞌ tsun. Mọꞌdye sáñeꞌ pạrej miꞌintyiꞌ chätidyeꞌ miꞌin, yiꞌ sánacdyeꞌ muꞌ: "Tsun nash Jenꞌtyiꞌ vóshiꞌ muꞌ", yiꞌ.

²⁹ Anicdye meꞌ Jenꞌtyiꞌ vóshiꞌ tsun, mọꞌdyes jam raꞌ cäj muꞌ dyijtuja Jenꞌ, muꞌ jam jeñej jämꞌtacdyeꞌ mijam muꞌ oro jämi, mijam plata mijam mij chimeꞌ. Muntyiꞌ in ĉụiꞌsiꞌyaꞌ dyijyedyeꞌ muꞌin jämꞌtyeꞌ jämꞌtacdyeꞌ muꞌin, muꞌ qui namꞌ Jenꞌ jam muꞌ joꞌmes.

³⁰ Jenꞌ jiquej jam vaꞌtacdyeꞌ soꞌmacsi muntyiꞌ in, muꞌin jam chị́yeptety p̂eyacdyeꞌ in, q̂uinꞌ qui namꞌ jam meꞌ, muꞌ fercheꞌ jéyacsi räj jacchety muntyiꞌ in paj qui camanꞌ dyijyi juchajcheꞌ muꞌin in,

³¹ ĉaĉaij na muꞌ aty yụꞌtyeꞌ tupudyeꞌ muꞌ junꞌsiꞌ chuc raꞌ jịꞌcäts yụꞌtacsi juchadyeꞌyaꞌ muntyiꞌ in. Jenꞌ jayuꞌti yirity muntyiꞌ, muꞌ raꞌ jịꞌcäts yụꞌtacsi räj, mijam raꞌ junꞌ cäj jéyacsi muntyiꞌ in. Muꞌ yụꞌtactyiꞌ muntyiꞌ Jenꞌtyiꞌ muꞌ, muꞌ säñity, Jenꞌ qui namꞌ jajiꞌtsaꞌibun muꞌ, mọꞌ jorojĉanjeyacsiꞌ räj muntyiꞌ in muꞌdye Jenꞌ meꞌ jayuꞌti —yi Pablo jéyacsi muꞌĉantyiꞌ in.

³² Muꞌin muꞌĉantyiꞌ in seꞌvepte Pablos p̂eyacdyeꞌ in, yi muꞌ junꞌ chuc vañinyeban muꞌ säñity, pạrej dyisacte in, pạrej na yi in: —Cuvij raꞌ atsijyaꞌ mi chat qui raꞌ seꞌvebiyac p̂eyacdyeꞌ mi —jéte in.

³³ Meꞌdye muꞌ shupqui farajjeyacsetaqui.

³⁴ Pạrej cäc̣häꞌchupte p̂eyacdyeꞌ in, muꞌin aty anicjete Jenꞌ in. Yirity Dionicio tịj muꞌ, muꞌ muꞌĉantyiꞌ ayoꞌ Areópagoĉantyiꞌ, yiris chimeꞌ p̂en, Dámaris tịj mọꞌ, mọꞌ chimeꞌ aty anicjete Jenꞌ, judyeyaꞌ yoctyiꞌ chimeꞌ in.