Uñedye' 16 - Tsimane

Timoteo jịjcate muꞌ Pablo judyeyaꞌ muꞌ Silas

¹ Pablo Silastumdye dạquiqueꞌ in mọꞌ bäꞌyedyeꞌ Derbe. Quivij sacjeꞌ in, Listraĉan venjoij in. Yirity muꞌĉan dạquicte muntyiꞌ in anicjetety Jesucristo, Timoteo tịj muꞌ. Tseꞌ na muꞌ judío, anicjetes Jesucristo, jenꞌ namꞌ griego muꞌ.

² Muꞌin na Listraĉantyiꞌ anicjetety Jesucristo in judyeyaꞌ Iconioĉantyiꞌ chimeꞌ in, räj muꞌin chị́yete in, jämꞌyity cạvete in muꞌ Timoteo.

³ Pablo mạꞌjeꞌ cạte muꞌ Timoteo, mọꞌdyes qui muꞌ tashcheꞌ jäꞌmiij jiꞌseiꞌbite aꞌ muꞌ paj qui jam jätäjyi in muꞌĉantyiꞌ judío in cạveteyaꞌ in cäc̣häꞌchucsi. Muꞌin chịj in jenꞌ muꞌ griego, jam muꞌ seiꞌtactyiꞌ aꞌ.

⁴ Aty meꞌsiꞌ sacti in. Junꞌ junꞌ chuc bäꞌyedyeꞌ meꞌ meꞌ ĉọ́queꞌ in, jéyacsi muꞌĉantyiꞌ in anicjetety Jesucristo in mọꞌ p̂eyacdyeꞌ yụꞌtyes jiquej in muꞌin Jerusalénĉantyiꞌ in jutactyiꞌ Jenꞌtyiꞌ muꞌ judyeyaꞌ muꞌin ĉọjcacsity anicjetety Jenꞌ in. Muꞌin jéyacsi paj qui chiqueꞌ in mọꞌ p̂eyacdyeꞌ.

⁵ Mọꞌdyes muꞌin anicjetety Jenꞌ in dadamꞌ fer buꞌyi anicyedyeꞌyaꞌ muꞌin, chimeꞌdye yejĉoij dayi in muꞌin jụjjetety Jenꞌ in.

Jenꞌ jafaijti Pablo Macedoniave voroꞌtacsi

⁶ Pablo penꞌdyeꞌtumdye quivij miꞌeban in sapaꞌjeꞌ in mọꞌ jac Frigia judyeyaꞌ Galacia. Muꞌĉandyety jam voroꞌtacsi in Asiaĉan, Jenꞌsiꞌ qui namꞌ Ạꞌedyeꞌ muꞌ nọ́csiꞌ paj qui jam muꞌĉan voroꞌtacsi in.

⁷ Ventyequeꞌ in mọꞌ jac Misia, mạꞌjeꞌ tsanꞌ mujuꞌveyaꞌ jịjcaij ĉúti in Bitiniave, mọꞌ qui namꞌ Jesússiꞌ Ạꞌedyeꞌ muꞌ quivij nọ́csiꞌ.

⁸ Misiaĉan sapaꞌjeꞌ in, dạquiqueꞌ in mọꞌ bäꞌyedyeꞌ Troas.

⁹ Muꞌĉan muꞌ Pablo tsedyedyeꞌ muꞌ Jenꞌ jajiꞌcaviyiti jịꞌcavacdyeꞌ muꞌ, muꞌĉan cạvete yirity Macedoniaĉantyiꞌ muntyiꞌ rụiꞌcujcuj nạijte, fercheꞌ jacudyiti, yi muꞌ jajiti: "Atsiva úĉan Macedoniaĉan, ñútyitiĉamꞌ tsun", yi muꞌ muntyiꞌ jịꞌcavacdyeꞌĉan.

¹⁰ Aty mọꞌ jịꞌcavacdyeꞌ cạveꞌ, meꞌdye qui jämꞌchubun tsun, Macedoniaĉan qui jịjcaij tsun ĉaĉaij na aty ĉúti tsun muꞌ Jenꞌ aty jin tsun paj qui muꞌĉan voroꞌtacsi tsun mọꞌ jämꞌsiꞌ p̂eyacdyeꞌ Jenꞌsiꞌ muꞌ.

Pablo judyeyaꞌ Silas Filipoĉan in

¹¹ Troasyaꞌ muꞌyaꞌ p̂aiꞌjoij tsun marĉantyiꞌcheꞌ covamba. Tacti tsun, muꞌyaꞌ venjoij tsun poc̣hoꞌyaꞌ Samotraciayaꞌ. Nojno qui mạyedyeꞌ dạquiqueꞌ tsun mọꞌ bäꞌyedyeꞌ Neápolis, muꞌyaꞌ qui sojquiti tsun.

¹² Muꞌyaꞌ qui majmicheꞌ jeꞌ tsun Filipoĉan jịjcaij tsun. Anic chị́yacsi bäꞌyedyeꞌ mọꞌ Filipo, Macedoniaĉansiꞌ, mọꞌ muꞌĉan bäꞌyi daiꞌ Romaĉantyiꞌ in, Romaĉantyiꞌ ayoꞌ muꞌ ayoꞌbuꞌyi muꞌĉan. Daiꞌ mạyedyeꞌ muꞌĉan Filipoĉan bäꞌyi tsun.

¹³ Mọꞌ mạyedyeꞌ jịꞌjutyitidyes muꞌĉan shupqui tsun bäꞌyedyeꞌĉantyiꞌ, cojiroyaꞌ qui jịjcaij tsun ĉaĉaij na seꞌveꞌ tsun p̂eyacdyeꞌ muꞌve ca cọdaqui Jenꞌcheꞌ judío in. Muꞌve damꞌ p̂utsquenꞌyi tsun jéyacsi tsun Jenꞌsiꞌ p̂eyacdyeꞌ mọꞌyas p̂en in tsudyujñitidyeꞌyas in.

¹⁴ Yiris mọꞌyas p̂en Tiatiraĉansiꞌ mọꞌ, Lidia tịj mọꞌ, mọꞌ jiꞌmincates quịꞌsiꞌ yaꞌijtyiꞌ jäijnäty, mọꞌ mọꞌsiꞌ carijtacdyeꞌ mọꞌ, timaꞌquetes Jenꞌ mọꞌ. Jenꞌ vanacjajibutiꞌ ĉojtyiꞌ mọꞌ paj qui dadamꞌ jämꞌ seꞌvepte Pablos p̂eyacdyeꞌ muꞌ, jụjyiꞌ mọꞌ.

¹⁵ Chat qui jiꞌchojtiꞌ mọꞌ judyeyaꞌ chimeꞌ chätidyeꞌ mọꞌ. Mọꞌ qui jin tsun, yiꞌ: —Jedac miꞌin chäyitiĉaꞌ yụ miꞌin jụjjetes Ayoꞌ tsun, meꞌ cavitiĉaꞌ yụ miꞌin, atsijamꞌ yụ́siꞌĉan acaꞌ, muꞌĉan raꞌ dyäqui miꞌin —yiꞌ jin tsun. Fercheꞌ jin tsun chijämꞌ jụj jaꞌyin tsun.

¹⁶ Yirisĉan mạyedyeꞌ muꞌve jịjcaij tsun cọdajquiqui Jenꞌcheꞌ tsun, rébeꞌ tsun yiris nanas sọyoꞌtumsiꞌ, mọꞌ chịꞌ junꞌ chuc raꞌ jiyiꞌ jábiyaꞌ. Mọꞌ úñiꞌ muꞌincheꞌ in, anic jiꞌquerec̣hayacsiꞌ aꞌtumtyiꞌ in. Muꞌin cọdyetacsi querec̣ha muntyiꞌ in paj qui mọꞌ jéyacsiꞌ junꞌ chuc raꞌ jiyiꞌ jábiyaꞌ.

¹⁷ Tayenꞌ tŝọiꞌ jiꞌcäc̣häꞌñitiꞌ tsunyaꞌ, fer p̂ep̂eyacjoiꞌ yiꞌ: —Uts nash úñity Jenꞌtyiꞌ muꞌ, muꞌ mujuꞌchaty Jenꞌ, muꞌin jiꞌchäquiyinac in junꞌ chuc tupuj c̣hoñi miꞌin —yiꞌ mọꞌ nanas jéyacsiꞌ muntyiꞌ in.

¹⁸ Daiꞌ mạyedyeꞌ yiꞌ mọꞌ. Chijämꞌ shọijtyeꞌ muꞌ Pablo, camanꞌyi, jeꞌ mọꞌĉansiꞌ sọyoꞌ: —Jesucristoscheꞌ tịj muꞌ yụ jéye: meijyebada ọ́ĉan nanasĉan —jeꞌ muꞌ Pablo. Yédyeꞌĉandye mọmoꞌ meꞌĉandye meijyebanꞌ mọꞌ sọyoꞌ nanasĉansiꞌ.

¹⁹ Muꞌin na aꞌtumtyiꞌ nanas ĉọjcaiꞌtyiꞌ in, aty chịj in aty raꞌ jam quivij querec̣hayeban in mọꞌyaꞌ nanasyaꞌ, mọꞌdyes qui muꞌin tapjeyacsi in muꞌ Pablo judyeyaꞌ muꞌ Silas, cạcsi in prasayaꞌ bäꞌyedyesyaꞌ, muꞌyaꞌ jiꞌmeꞌtacsi ayoꞌyaꞌ in,

²⁰ Romaĉantyiꞌyaꞌ ayoꞌ. Jiꞌmeꞌtacdyeꞌĉan muꞌin jéyacsi in: —Uts judío in úĉantyiꞌ sac jaꞌyin tsun in bäꞌyedyeꞌĉantyiꞌ tsun.

²¹ Anic yocsiꞌ jiꞌchäyitidyeꞌ tuiꞌ in. Tsun na Romaĉantyiꞌ mijam cäc̣häꞌchucsebijaꞌ yicdyeꞌ muꞌin —yi in.

²² Muꞌĉantyiꞌ muntyiꞌ in cächyi muꞌin jiꞌtacsi in. Muꞌin na ayoꞌ in coch jiꞌtacsebi quịꞌsiꞌ in judyeyaꞌ qui siꞌbacdyeꞌ soꞌmacsi in.

²³ Fersiꞌ chum siꞌbacdyeꞌ cạiꞌ in, jäquiꞌve qui ĉärꞌtacsi in. Muꞌin ayoꞌ in jéte in muꞌ ĉọjcacsity ĉärꞌtactyiꞌ in paj qui jämꞌ ĉọjcacsi.

²⁴ Anicdye meꞌ muꞌ jiꞌsitacsi tätscäiꞌches ĉärꞌtacdyeꞌ, mọꞌĉan qui yocsiꞌ cạiꞌ in yujches quepyis.

²⁵ Aty menyaꞌ muꞌ Pablo Silastumdye cọdaqui Jenꞌcheꞌ in jimaqui in. Muꞌin na yoctyiꞌ ĉärꞌtactyiꞌ in seꞌvacvaꞌjoij in.

²⁶ Meꞌĉandye fer bubaquiꞌ jac, anic fer sijsijyiꞌ mọꞌ acaꞌ ĉärꞌtacsiꞌ. Ĉụiꞌdye vatyquej vanacyiꞌ chụiꞌdyeꞌ in, daj vatyquej tyeiꞌ cadena saꞌbas muꞌin ĉärꞌtactyis in.

²⁷ Muꞌ na ĉọjcacsity muꞌĉantyiꞌ in tsạꞌi muꞌ, cạveꞌ acas chụiꞌdyemꞌ aty mọꞌin räj vavancacaꞌ in, jeñej muꞌ räj jọban ĉọcsi muꞌĉan ĉärꞌtactyiꞌ in. Yiristum sanjeyaqui coc̣hino muꞌ, muꞌyaꞌdye raꞌ tsanꞌ ijati.

²⁸ Muꞌ na Pablo fer p̂eyaqui jéte: —Jam raꞌ meꞌjiti ĉụiꞌ ijatim, taĉandye nash räj úĉan tsun —yi jéte.

²⁹ Muꞌ na ĉọjcaquity cọdaqui mạijyis paj qui tuiꞌ in, chat qui muꞌĉan noc̣hoꞌc̣hodyeꞌtum siti dyụtsyi muꞌinsiꞌyaꞌ vej muꞌin Pablosiꞌyaꞌ judyeyaꞌ Silassiꞌyaꞌ.

³⁰ Muꞌ qui jiꞌshupcacsi jéyacsi: —Jítiĉamꞌ yụ, ¿junꞌ buty raꞌ yụ paj qui c̣hoñiꞌ yụ? —jéyacsi.

³¹ Vorjete in: —Anicjeme muꞌ Jesús Ayoꞌ tsun, chat qui raꞌ c̣hoñi mi räjtumdye chätidyeꞌ mi —jéte in.

³² Chat qui jéte in Ayoꞌsiꞌ p̂eyacdyeꞌ muꞌ räjtumdye chätidyeꞌ muꞌ.

³³ Mọꞌdye hora tsedyedyeꞌ muꞌ ĉọjcacsity favacsebiban siꞌbacdyeꞌ muꞌin chat qui jiꞌchojti muꞌ räjtumdye chätidyeꞌ muꞌ.

³⁴ Jiꞌsitacsi qui ĉụiꞌsiꞌĉan acaꞌ muꞌ judyeyaꞌ jiꞌsäcsacsi. Anic där maꞌjoij muꞌ räjtumdye chätidyeꞌ muꞌ ĉaĉaij na aty anicjete Jenꞌ in.

³⁵ Nojno mạyedyeꞌ muꞌin bäꞌyedyeꞌĉantyiꞌ ayoꞌ in jutaqui in nọ́taquity muꞌin, ĉọcte in muꞌ ĉọjcacsity muꞌin ĉärꞌtactyiꞌ in jéte in: "Jiꞌc̣honacseva muꞌin muntyiꞌ in."

³⁶ Meꞌdye muꞌ ĉọjcacsity jéte muꞌ Pablo: —Ayoꞌ jutiyin yụ in p̂eyacdyeꞌ muꞌin, yi in paj qui jiꞌc̣honyac yụ, q̂uinꞌ raꞌ chat tupuj jọban miꞌin, aty pacaj miꞌin —jéte.

³⁷ Muꞌ na Pablo jéyacsi muꞌin nọ́taquity ayoty in: —Jam raꞌ meꞌ, paj tsanꞌ anictyity Romaĉantyiꞌ tsun, meꞌ tsanꞌ jambiꞌ jin tsun: "¿jedyeꞌ caꞌ juchaj miꞌin?" ayoꞌ qui namꞌ siꞌbin tsun in muntyisyaꞌ vej muꞌin judyeyaꞌ ĉärꞌtyin tsun in, mọꞌ jam tupuj meꞌtac Romaĉantyiꞌ in. Q̂uinꞌ chat ayoꞌ in mạꞌjeꞌ jiꞌc̣hoñin tsun in paj qui caminve jọban tsun. Jam meꞌ jụjyi tsun. Jemoñeꞌ muꞌindye ayoꞌ atsij in paj qui jiꞌshupjun tsun in —jéyacsi Pablo muꞌin nọ́taquity in.

³⁸ Muꞌin nọ́taquity caꞌñibun in jéyacseban ayoꞌ in. Aty chị́qui in muꞌin na jiquej anictyity Romaĉantyiꞌ in, anic noiꞌyi muꞌin ayoꞌ in, ĉaĉaij na jam chiqueꞌ in Romaĉantyis yụꞌtacdyeꞌ muꞌin.

³⁹ Muꞌyaꞌ jịjcaij in ĉọcsequi in muꞌ Pablo judyeyaꞌ muꞌ Silas, jéyacsi in: "Jämꞌ otej miꞌin, jam raꞌ dyijtubutiĉaꞌ juchaj miꞌin." Cavintum vatyquej jiꞌshupcacseban in ĉärꞌtaquisĉantyiꞌ in, judyeyaꞌ qui cọdacsi in paj qui yocve jịjcaij in farajjeꞌ in mọꞌ bäꞌyedyeꞌ.

⁴⁰ Meꞌdye shuban in ĉärꞌtaquisĉantyiꞌ in, Lidiasĉan qui acaꞌ jịjcaban in, ĉọcseĉan in anicjetety Jenꞌ in. Voroꞌtacseban quivij in maꞌjoij yụꞌtacsetaqui Jenꞌdyes in, chat qui q̂uinꞌdyemꞌ jọban in.