Uñedye' 15 - Tsimane

Vajmuꞌyadyeꞌ Jerusalénĉansiꞌ

¹ Pạrej atsij Judeaĉantyiꞌ muntyiꞌ in Antioquíaĉan jijtuij in. Muꞌin jụjjeptety tsanꞌ in Jenꞌsiꞌ p̂eyacdyeꞌ muꞌ, meꞌ tsanꞌ meꞌ cächjepte qui namꞌ in jiꞌchäyitidyeꞌ muꞌ. Yi in: "Jam seiꞌtactyiꞌ aꞌ jụijyaꞌ miꞌin, yoj yiꞌdyemꞌ yụꞌtacdyeꞌ Moiséssiꞌ jasoꞌmitis Jenꞌ jiquej u, jam raꞌ junꞌ c̣hoñi miꞌin," yi in.

² Muꞌ na Pablo judyeyaꞌ muꞌ Bernabé cäjsis dạcacsebi jiꞌchäyitidyeꞌ muꞌin, mọꞌdyes qui fer chuti p̂eyacdyeꞌyaꞌ muꞌin. Chäjämꞌ dyijyi in jutacsi raꞌ muntyiꞌ in paj qui Jerusalénĉan jịjcaij in, cạvacsequi muꞌin muꞌĉantyiꞌ jutactyiꞌ Jenꞌtyiꞌ muꞌ judyeyaꞌ muꞌin ĉọjcacsity in anicjetety Jenꞌ in, paj qui jéyacsequi in junꞌ chuc mọꞌ seiꞌtacdyeꞌ p̂eyes yụꞌtacdyeꞌ. Muꞌĉantyiꞌ anicjetety Jenꞌ in tsimꞌtacsi in muꞌ Pablo judyeyaꞌ muꞌ Bernabé judyeyaꞌ yoctyiꞌ in, muꞌĉantyiꞌ chimeꞌ in paj qui muꞌin Jerusalénĉan jịjcaij in.

³ Anicdye meꞌ sacti in Jerusalénĉan roiꞌjeꞌ in, Antioquíaĉantyiꞌ anicjetety Jenꞌ in jutacsi in. Sapaꞌjeꞌ in mọꞌ jac Fenicia judyeyaꞌ Samaria, jéyacsi muꞌĉantyiꞌ in anicjetety Jesucristo in junꞌ chuc muꞌin jam judío in chimeꞌdye camanꞌ jụjjete Ayoꞌ in. Muꞌin seꞌvacsebity p̂eyacdyeꞌ muꞌin anic maꞌjotacsebi in.

⁴ Chat qui muꞌ Pablo judyeyaꞌ Bernabé Jerusalénĉan venjoij in, judyeyaꞌ muꞌin jutactyiꞌ Jenꞌtyiꞌ muꞌ judyeyaꞌ muꞌin anicjetety Jenꞌ in räjtumdye ĉọjcacsity muꞌin, anic jämꞌ tiĉunacsi in muꞌ Pablo judyeyaꞌ muꞌ Bernabé. Jéyacsi muꞌin in junꞌ chuc voroꞌtacdyeꞌ muꞌin Jenꞌsiꞌyaꞌ ferdyeꞌ muꞌ.

⁵ Muꞌin na fariseo in aty jụjjetety tsanꞌ Jesús in, pạrej muꞌin yocve dyijyi in, sacyi in chat qui yi jéyacsi in: —Jemoñeꞌ jéyacsejaꞌ muꞌin anicjetety Jesucristo in jam judío in, paj qui chimeꞌ seiꞌtac aꞌ muꞌin judyeyaꞌ paj qui chiquepte in räj mọꞌ Jenꞌsiꞌ yụꞌtacdyeꞌ muꞌ jasoꞌmitis Moisés jiquej —yi muꞌin in.

⁶ Mọꞌdyes muꞌin jutactyiꞌ Jenꞌtyiꞌ muꞌ judyeyaꞌ muꞌin ĉọjcacsity anicjetety Jenꞌ in vajmuꞌyaij in p̂iyitidyeij in junꞌ chuc raꞌ mọꞌ.

⁷ Men mọꞌ p̂eijvaꞌqueꞌ in chijämꞌ muꞌ sacyi Pedro jéyacsi: —Vojity, aty chịj miꞌin porojma jiquej muꞌ Jenꞌ tsimꞌtyin yụ miꞌinĉantyiꞌ judyeyaꞌ yuꞌtyin yụ paj qui yụ voroꞌtacsity muꞌin jam judío in. Jéyacsi raꞌ yụ mọꞌ jämꞌsiꞌ p̂eyacdyeꞌ muꞌ paj qui muꞌin chimeꞌ anicjeꞌ in.

⁸ Muꞌ na Jenꞌ chị́yacsebity ĉojtyiꞌ muntyity in, muꞌ jorojĉan jísinꞌ muꞌ jụjjeyacsi muꞌin jam judío in, mọꞌ aty chị́yejaꞌ tsun ĉaĉaij na muꞌin in aty jịꞌtŝocsi Jenꞌsiꞌ Ạꞌedyemꞌ, jeñej tsun tashcheꞌ soꞌmisinꞌ jiquej.

⁹ Jenꞌ vaj cäts cavisinꞌ muntyiꞌ tsun, paj tsanꞌ judío tsun, paj tsanꞌ jam judío tsun chimeꞌ, Jenꞌ c̣hiconꞌjeyacsebi ĉojtyiꞌ muꞌin anicyedyeꞌyaꞌ muꞌin.

¹⁰ ¿Junꞌ meꞌ mạꞌjeꞌ miꞌin jịꞌĉojtinte muꞌ Jenꞌ? Anic cäj cạtiñeꞌ dyijyedyeꞌ miꞌin jam rụij, mạꞌjeꞌ jéyacsi miꞌin muꞌin jam judío in paj qui chiqueꞌ in mọꞌ yụꞌtacdyeꞌ Jenꞌsiꞌ muꞌ, jeñej javquis vemejas, meꞌ buꞌyiꞌ mọꞌ ĉaĉaij na carij chicac mọꞌ. Meꞌdye q̂uinꞌ tsun jam junꞌ tupuj chiquejaꞌ tsun mọꞌ, mijam vóshiꞌvun tsun tupuj chiqueꞌ in jiquej.

¹¹ Jam raꞌ meꞌ, aty chị́jaꞌ tsun Jesucristosyaꞌ ñịbeꞌjitidyes muꞌ c̣honjaꞌ tsun, meꞌdye muꞌin jam judío chimeꞌdye in —jéyacsi Pedro muꞌĉantyiꞌ in.

¹² Muꞌin tsudyujñitity in tyäpäꞌ jiꞌtacsi, jämꞌ seꞌvaqui in. Muꞌ qui Pablo judyeyaꞌ muꞌ Bernabé jéyacsi in junꞌ chuc muꞌ Jenꞌ soꞌmacsi ferdyeꞌ paj qui jịꞌcaveyacsi muꞌin jam judío in.

¹³ Aty ijaij p̂eyaqui in, Santiago qui p̂eyaqui jéyacsi: —Chätidyeꞌ seꞌvibutiĉamꞌ jämꞌ ọij p̂eyacdyeꞌ yụ:

¹⁴ Uts Simón aty jísinꞌ muꞌ Jenꞌ aty tiyacchuiꞌ ñịbeꞌjeyacsi muꞌin jam judío in, tsimꞌtacsi pạrej muꞌin in judyeyaꞌ pạrej yụꞌtacsi ĉụiꞌtyidyety muntyiꞌ muꞌ.

¹⁵ Mọꞌdye p̂eyeꞌ sánacdyeꞌ jasoꞌmititysiꞌ p̂eyacdyeꞌ Jenꞌ jiquej in, yiꞌ:

¹⁶ "Yi Ayoꞌ, jábiyaꞌ raꞌ atsijban yụ cuvij raꞌ jämꞌ yụꞌbibajte yụ ac̣hiꞌjoiꞌsiꞌ acaꞌ Davidsiꞌ muꞌ. Meꞌ tsanꞌ aty jọꞌchabanꞌsiꞌ muꞌ, yụ raꞌ cuvij chijoꞌmejtebanꞌ mọꞌ acaꞌ.

¹⁷ Meꞌdye raꞌ yoctyiꞌ chimeꞌ muntyiꞌ in, jam judío in tupuj raꞌ yụ́cheꞌ cudyiti in, jụꞌñity chuc tsimꞌtactyiꞌ yụ in.

¹⁸ Meꞌ yi muꞌ Ayoꞌ, tạꞌcatydye muꞌ jịꞌchicaqui ọij p̂eyacdyeꞌ", yiꞌ sánacdyeꞌ.

¹⁹ Mọꞌdyes jämꞌ ĉúti yụ damꞌdye jämꞌ jam meꞌtacsejaꞌ muꞌin jam judío in camanꞌyity in anicjetety Jenꞌ in, mijam raꞌ jéyacsejaꞌ paj qui chiqueꞌ in mọꞌ yụꞌtacdyeꞌ.

²⁰ Damꞌdye jämꞌ jéyacsejaꞌ mọmoꞌ paj qui jam jebeiꞌ in jämꞌtacdyeꞌyaꞌ jadyiquis säcsedyeꞌ, mọꞌ ac̣hiꞌtyeꞌ mọꞌ säcsedyeꞌ, mijam raꞌ jebeiꞌ in chäsh mijam chäshtumsiꞌ shush chimeꞌ. Chimeꞌdye raꞌ jéyacsejaꞌ paj qui jam voꞌvoij in, mọꞌ ramꞌ jéyacsi muꞌin jam judío in,

²¹ paj qui jam jịꞌfajcacsi in muꞌin judío in, ĉaĉaij na tạꞌcatydye muꞌin judío in räjĉan p̂eyeꞌ in mọꞌ yụꞌtacdyeꞌ jasoꞌmitis Moisés jiquej muꞌ Jenꞌ. Paiꞌ vajmuꞌyaijĉan in räjĉan mạyedyeꞌ jịꞌjutyitidyesĉan mọꞌ p̂eyeꞌ in —jéyacsi muꞌ Santiago.

Sánacdyeꞌ jam judíodyes in anicjetety Jesucristo in

²² Jutactyiꞌ Jenꞌtyiꞌ muꞌ judyeyaꞌ muꞌin anicjetety Jesucristo in räjtumdye ĉọjcacsity muꞌin jụjyi in. Mọꞌdyes pạrej muꞌĉan tsimꞌtacsi in paj qui jịjcatacsi in muꞌ Pablo judyeyaꞌ muꞌ Bernabé, aty caꞌñibunyaꞌ Jerusalénĉantyiꞌ in, Antioquíaĉan jijtuban in. Chat qui tsimꞌtacsi in Judas, Barsabás yocsiꞌ tịj muꞌ, judyeyaꞌ Silas. Pärenꞌdye muꞌin in anic jämꞌyity ĉọcsi in muꞌin anicjetety Jenꞌ in.

²³ Mọꞌdyes qui meꞌ sáñeꞌ in, yiꞌ sánacdyeꞌ: "Vojity, tsun nash jutactyiꞌ Jenꞌtyiꞌ muꞌ judyeyaꞌ tsun ĉọjcacsity anicjetety Jenꞌ in, tsun vojity buꞌyi miꞌintum vorjeyac miꞌin jam judío miꞌin, räj muꞌĉan bäꞌyity miꞌin Antioquíaĉantyiꞌ miꞌin judyeyaꞌ Siriaĉantyiꞌ miꞌin judyeyaꞌ Ciliciaĉantyiꞌ chimeꞌ miꞌin.

²⁴ Aty seꞌvaqui tsun pạrej úĉantyiꞌ chätidyeꞌ tsun muꞌĉan jịjcaij in ĉucnac in meꞌtyinac in. Meꞌ tsanꞌ jam jutacsi tsun muꞌin in, ĉụiꞌ qui namꞌ muꞌĉan jịjcaij in, cäj jiꞌchäyinac in anic jiꞌyoquinac in.

²⁵ Mọꞌdyes tsun vajmuꞌyaij úyaꞌ tsun, vaj cäts dyijyi tsun chat qui raꞌ jutacsi miꞌinyaꞌ tsun pạrej muntyiꞌ in, muꞌin raꞌ cavicnac in penꞌdyetucsi raꞌ in muꞌ Pablo judyeyaꞌ muꞌ Bernabé, muꞌin mạꞌjeyacsity chätidyeꞌ tsun.

²⁶ Muꞌin carijtaquity Jesucristodyes in muꞌdyes Ayodyes tsun, meꞌ tsanꞌ c̣hojvacĉan bäꞌyi in, jam qui namꞌ méquiꞌ otejjiti in, jẹjcaiꞌ mọmoꞌ carijtaqui Jenꞌdyes in.

²⁷ Tsun raꞌ jutacsi Judas judyeyaꞌ Silas, muꞌin raꞌ jínac in junꞌ chuc tsunsiꞌ dyijyedyeꞌ, mọꞌ sáñes q̂uinꞌ tsun.

²⁸ Tsun vaj cäts dyijyi Jenꞌsiꞌtum Ạꞌedyeꞌ muꞌ, tsun raꞌ jéyac miꞌin jemoñeꞌ jam chiquetiñeꞌ räj mọꞌ carijsis yụꞌtacdyeꞌ, ọij ramꞌ chiquetiñeꞌ miꞌin:

²⁹ jam raꞌ jebetiñeꞌ miꞌin jämꞌtacdyeꞌyaꞌ jadyiquis säcsedyeꞌ, mijam raꞌ jebetiñeꞌ miꞌin mọꞌ chäsh, mijam chäshtumsiꞌ shush, chimeꞌdye jam raꞌ voꞌvoij miꞌin, ọij ramꞌ chiquetiñeꞌ miꞌin paj qui jämꞌ bäꞌyi miꞌin. Aty meꞌquiꞌdye", yiꞌ sánacdyeꞌ.

³⁰ Sacjeꞌ in muꞌin p̂eyacdyeꞌ cạiꞌtyiꞌ in, Antioquíaĉan jịjcaij in. Venjoij in, vajmuꞌyaꞌjeyacsi in anicjetety Jenꞌ in judyeyaꞌ soꞌmacsi in mọꞌ sánacdyeꞌ.

³¹ Muꞌĉantyiꞌ in p̂eyeꞌ in, anic maꞌjotyeꞌ in mọꞌ p̂eyacdyeꞌ jiꞌmaꞌyacsis.

³² Chimeꞌdye muꞌ Judas judyeyaꞌ muꞌ Silas muꞌin nash jasoꞌmitity p̂eyacdyeꞌ Jenꞌ chimeꞌ in. Muꞌin chimeꞌ voroꞌtacsi in, menyaij p̂eyaqui in jiĉun yụꞌtacsi in paj qui fer buꞌyi bäꞌyi in.

^33-34 Daiꞌ mạyedyeꞌ muꞌĉan meꞌ bäꞌyi in. Aty meꞌquiꞌ meꞌ buꞌyi muꞌĉan in chat qui quivij chimuꞌve jịjcaban in Jerusalénve. Muꞌin Antioquíaĉantyiꞌ in jutacseban in: "Ạnijyeban ĉa miꞌin", jéyacsi in. Meꞌdye caꞌñibun in cạvacseti in muꞌin jutacsity jiquej in.

³⁵ Muꞌ na Pablo judyeyaꞌ Bernabé taĉan muꞌin in Antioquíaĉan in. Yejĉoij muꞌin voroꞌtacsi in Ayoꞌsiꞌ p̂eyacdyeꞌ muꞌ judyeyaꞌ jịꞌchiyacsi muntyiꞌ in, penꞌdyetucsi daiꞌ yoctyiꞌ voroꞌtacsity in.

Päräꞌyis miꞌedyeꞌ Pablos

³⁶ Aty men yi muꞌ Pablo jéte Bernabé: —Damꞌdye jämꞌ caꞌñibujshaꞌ quivij ĉọcseĉajshaꞌ yóvevejdyemꞌ jadyiĉaꞌ jiquej u, Jenꞌsiꞌ p̂eyacdyeꞌ voroꞌtacseĉaꞌ jiquej tsun, jeshaꞌ cạvacseĉajshaꞌ tsun quivij junꞌ chuc bäꞌyi in muꞌĉaĉantyiꞌ in anicjetety Jenꞌ in —yi Pablo jéte Bernabé.

³⁷ Muꞌ Bernabé mạꞌjeꞌ tsanꞌ cạte muꞌ Juan, Marcos yocsiꞌ tịj muꞌ.

³⁸ Muꞌ na Pablo jam muꞌ jämꞌ ĉọiꞌ paj qui cạte muꞌ, ĉaĉaij na muꞌ farajjeyacsetaqui jiquej Panfiliaĉan, jam muꞌ yejĉoij cäc̣häꞌchucsi.

³⁹ Jam qui cäts dyijyi in, chuti in p̂eyacdyeꞌyaꞌ muꞌin, chat qui meꞌĉandye pạrejti in. Bernabé cạte muꞌ Marcos, Chipreĉan jịjcaij in.

⁴⁰ Muꞌ na Pablo tsimꞌte muꞌ Silas, muꞌtum qui muꞌ. Muꞌin Antioquíaĉantyiꞌ anicjetety Jenꞌ in cọdaqui Jenꞌcheꞌ in muꞌindyes in, paj qui ñịbeꞌjitidyesyaꞌ muꞌ nọ́tacsi judyeyaꞌ ĉọjcacsebi miꞌedyeꞌ muꞌin. Chat qui sacti in,

⁴¹ sapaꞌjeꞌ in Siriaĉan judyeyaꞌ Ciliciaĉan, paiꞌ jịꞌchiyacsi muꞌ Pablo muꞌĉantyiꞌ anicjetety Jenꞌ in paj qui fer buꞌyi bäꞌyi in Jenꞌdyes.