Uñedye' 14 - Tsimane

Muꞌ Pablo judyeyaꞌ Bernabé Iconioĉan in

¹ Iconiove venjoij in muꞌ Pablo judyeyaꞌ muꞌ Bernabé, muꞌĉan qui sitacsi in vajmuꞌyaijĉan judío in, voroꞌtacsi muꞌĉantyiꞌ in. Jämꞌ jiꞌseꞌveyacsi mọꞌ p̂eyacdyeꞌ in, mọꞌdyes qui daiꞌ anicjete Jesucristo in, judío in judyeyaꞌ jam judío in.

² Muꞌin judío in jam jụjjetety in, sac jaꞌyacsi in jam judío in, jịꞌfajcacsi in muꞌin anicjetety Jesucristo in.

³ Meꞌ tsanꞌ meꞌ in muꞌ Pablo judyeyaꞌ Bernabé taĉan mọmoꞌ muꞌĉan Iconioĉan in, mijam méquiꞌ noiꞌyedyeꞌtum voroꞌtacsi in Jenꞌsiꞌ p̂eyacdyeꞌ muꞌ p̂eijbite in ñịbeꞌjitidyes muꞌ. Jenꞌ soꞌmacsi ferdyedyes muꞌin paj qui jịꞌcaveyacsi muntyiꞌ in, jorojĉan jéyacsi in mọꞌ anicsis p̂eyacdyeꞌ Jenꞌsiꞌ muꞌ.

⁴ Muꞌin na bäꞌyedyeꞌĉantyiꞌ muntyiꞌ in jam muꞌinsiꞌ cäts dyijyedyeꞌ muꞌin, pạrej cäc̣häꞌchucsebi judíos dyijyedyeꞌ muꞌin, pạrej na yoctyiꞌ seꞌvacsi in muꞌin Jenꞌtyiꞌ jutactyiꞌ muꞌ.

⁵ Chat qui muꞌin judío in judyeyaꞌ jam judío in, räjtumdye ayoꞌ muꞌin dyijyi in mạꞌjeꞌ tsanꞌ jịꞌñibeꞌcacsi in, mọꞌjeyacsi farajnacsi mijyaꞌ in.

⁶ Muꞌ na Pablo judyeyaꞌ Bernabé chị́qui muꞌin in, chat qui ĉaꞌjoij in, yocsiꞌĉan jac jịjcaij in, Licaonia tịj mọꞌ. Listra judyeyaꞌ Derbe meꞌ tịj bäꞌyedyes mọꞌin, yóĉandyemꞌ jịjcaijĉan u in.

⁷ Muꞌĉan chimeꞌ voroꞌtacsi in mọꞌ jämꞌsiꞌ p̂eyacdyeꞌ Jenꞌsiꞌ muꞌ.

Listraĉantyiꞌ in farajñete mijyaꞌ in muꞌ Pablo

⁸ Chimeꞌdye muꞌyaꞌ yirity Listraĉantyiꞌ muntyiꞌ jam muꞌ junꞌ miꞌity, tạꞌcatydye naꞌity.

⁹ Muꞌĉan seꞌvevaꞌbite p̂eyacdyeꞌ Pablos muꞌ. Muꞌ Pablo jämꞌ vatyquej muꞌcheꞌ cạvi, chị́yepte muꞌ ĉojtyiꞌĉansiꞌ anicyedyeꞌ muꞌ, tupuj chäĉän muꞌ.

¹⁰ Mọꞌdyes muꞌ Pablo fer p̂eyaqui jajiti: —Sacyebada —jéte. Sac vatyquej muꞌ tyeban miꞌeban vatyquej.

¹¹ Muꞌin na muntyiꞌ in aty cạvete in junꞌ chuc muꞌ Pablo jiꞌchäĉajte muꞌ muntyiꞌ, äjyi in ĉụiꞌsiꞌĉan p̂eyacdyeꞌ yi jítidyeij in: —Uts nash jenꞌ in mạyedyeꞌchety jijtuijtyiꞌ in, muntyiꞌ yi in chạij in ĉushsinꞌ tsun in —yi in. Jeñej muꞌchety ĉọcsi muꞌin in, mọꞌdyes qui jämꞌtacdyeꞌsiꞌ tịj yụꞌtyeyacsi in.

¹² Muꞌ Bernabé jéte in Zeus, jéte in, muꞌ na Pablo jéte in Hermes jéte in, ĉaĉaij na muꞌ Pablo bächäiꞌtyiꞌ p̂eyacdyeꞌ.

¹³ Mọꞌyaꞌ sisdyeꞌyaꞌ bäꞌyedyeꞌ Zeussiꞌ acaꞌ mọꞌ jämꞌtacdyeꞌsiꞌ. Muꞌ cudyitity jämꞌtacdyeꞌcheꞌ atsij muꞌ cạcsi toro in, sháshatum. Muꞌ dyijyi tsanꞌ räjtumdye muntyiꞌ in mạꞌjeꞌ jiꞌcoꞌshayeꞌ tsanꞌ in Pablodyes judyeyaꞌ Bernabédyes.

¹⁴ Chị́qui muꞌin in där tári in, shẹiꞌjeyaqui quịꞌsiꞌ in, shuj tyeij in ĉọcsequi muntyiꞌ in. Fer p̂eyaqui jéyacsi in:

¹⁵ —¿Junꞌ dash meꞌ dyijyi miꞌin? Tsun nash muntyiꞌ mọmoꞌ yódyemꞌ miꞌin u. Mọꞌ nash tun tsun úyaꞌ Jenꞌsiꞌ p̂eyacdyeꞌ muꞌ paj qui farajjetiñeꞌ fibis dyijyedyeꞌ miꞌin jämꞌtacdyeꞌcheꞌ ĉúti miꞌin. Ĉútiĉamꞌ tyä Jenꞌcheꞌ miꞌin, muꞌ tsạꞌtyiꞌcheꞌ, muꞌ jämꞌtyety mạyedyeꞌ, jac, judyeyaꞌ mar, judyeyaꞌ räj jedyeꞌ chuc mọꞌyaꞌ mọꞌinsiꞌ in.

¹⁶ Urucyaꞌ jiquej muꞌ Jenꞌ dyichchucsi muntyiꞌ in ĉụiꞌsimꞌ dyijyedyeꞌ cạquity in.

¹⁷ Meꞌ tsanꞌ meꞌ in, Jenꞌ qui namꞌ ñịbeꞌjeyacsi muntyiꞌ in, mọꞌ jorojĉanjeyacsiꞌ muꞌyaꞌ muꞌ. Mọꞌdyes muꞌ soꞌminac añej judyeyaꞌ jämꞌsiꞌ sicdyeꞌ jibitidyes miꞌin, paj qui maꞌjodyeꞌtum bäꞌyi miꞌin —yi jéyacsi muntyiꞌ in Pablo judyeyaꞌ Bernabé.

¹⁸ Meꞌ tsanꞌ meꞌ jéyacsi in, anic ñịbeꞌtum dyäcjeĉunacsebi dyijyedyeꞌ muꞌin, damꞌdyety raꞌ jiꞌcoꞌshayeꞌ in Pablodyes judyeyaꞌ Bernabédyes.

¹⁹ Aty meꞌsiꞌ pạrej atsij judío in Antioquíaĉan bäꞌyity in judyeyaꞌ Iconioĉantyiꞌ in. Sac jaꞌyacsi muꞌĉantyiꞌ in paj qui fạ́quebajte in muꞌ Pablo, chat qui farajñete mijyaꞌ in jeñej aty säñi ĉọ́te in. Soijjete in vaꞌquecte jorojyaꞌ bäꞌyedyeꞌ in.

²⁰ Muꞌin na anicjetety Jesucristo in ñur tyeij ĉọcte in muꞌ Pablo. Sacyi muꞌ quivij sisan bäꞌyedyeꞌĉan muꞌ. Nojno mạyedyeꞌ muꞌ Pablo judyeyaꞌ Bernabé sacti in Derbeĉan jịjcaij in.

²¹ Muꞌĉan qui voroꞌtacsi in Jenꞌsiꞌ p̂eyacdyeꞌ muꞌ, daiꞌ jụj jaꞌyacsi in. Aty meꞌsiꞌ caꞌñibun in, Listraĉan qui jijtuban in judyeyaꞌ Iconioĉan chimeꞌ, dạquishan in Antioquía, Pisidiaĉansiꞌ.

²² Paiꞌ jiꞌmaꞌyacsi anicjetety Jesucristo in, judyeyaꞌ fer buꞌyi yụꞌtacsi in anicyedyeꞌyaꞌ muꞌin. Jéyacsi in: "Daiꞌ chum raꞌ jịꞌĉojtyejaꞌ ñịbedyes tsun, chat q̂uinꞌdyemꞌ raꞌ ayoꞌbuꞌyedyesĉan Jenꞌsiꞌ muꞌ bäꞌjaꞌ tsun."

²³ Chimeꞌdye paiꞌ bäꞌyedyeꞌ in muꞌ Pablo judyeyaꞌ muꞌ Bernabé yụꞌtacsi ĉọjcacsity in muꞌin anicjetety Jenꞌ in, Ayoty ñuruꞌtyity muꞌ. Aty raꞌ yụꞌtac in muꞌin yịñij Jenꞌsiꞌyaꞌ vej in, judyeyaꞌ cọdyete Jenꞌ in, muꞌcheꞌ ĉútity in, paj qui muꞌ ĉọjcacsi judyeyaꞌ nọ́tacsi muꞌin in.

Caꞌñibun in Antioquíaĉan Siriaĉansiꞌ jijtuban in

²⁴ Meꞌdye muꞌ Pablo judyeyaꞌ muꞌ Bernabé caꞌñibun cuvij in, Antioquíaĉan roiꞌjebanꞌ in. Sapaꞌjeꞌ in mọꞌ jac Pisidia judyeyaꞌ Panfilia,

²⁵ dạquishanꞌ in mọꞌ bäꞌyedyeꞌ Perge. Muꞌĉan voroꞌtacsi in Jenꞌsiꞌ p̂eyacdyeꞌ muꞌ chat qui Ataliaĉan jịjcaij in.

²⁶ Muꞌyaꞌ p̂aiꞌjoij in marĉantyiꞌcheꞌ covamba in, dạquishanꞌ Antioquía in, yóyaꞌdyemꞌ yacchutiyaꞌ jiquej u in. Muꞌyaꞌ cọdactaquiyaꞌ Jenꞌcheꞌ muꞌindyes in, sactiyaꞌ jiquej in, paj qui muꞌ Jenꞌ nọ́tacsi judyeyaꞌ ĉọjcacsebi miꞌedyeꞌ muꞌin. Q̂uinꞌ chat aty jiꞌmeꞌsiyaqui in carijtacdyeꞌ muꞌin mọꞌ soꞌmacsis Jenꞌ jiquej.

²⁷ Venchuban Antioquíaĉan in vajmuꞌyaꞌjeyacseban in muꞌĉantyiꞌ anicjetety Jesucristo in, jéyacseban in junꞌ chuc carijtacdyeꞌ muꞌin voroꞌtacsedyeꞌ, Jenꞌsiꞌtum ferdyeꞌ muꞌ carijtaqui in. Chimeꞌdye jéyacsi in junꞌ chuc muꞌin jam judío yụꞌtac Jenꞌyaꞌ in paj qui jụjjete Jesucristo chimeꞌ in, meꞌ yi jéyacseban in Pablo judyeyaꞌ Bernabé.

²⁸ Muꞌĉan men penꞌdyetucsi in muꞌin anicjetety Jenꞌ in.