Uñedye' 12 - Tsimane

Ujacdyeꞌ muꞌ Santiago judyeyaꞌ ĉärꞌtacdyeꞌ muꞌ Pedros

¹ Aty meꞌsiꞌ muꞌ ayoꞌ Herodes Romaĉantyiꞌ tiyacchuiꞌ jịꞌñibeꞌcacsi pạrej muꞌin anicjetety Jenꞌ in.

² Coc̣hinoyaꞌ jiꞌijate muꞌ Santiago, Juantyiꞌ vojity muꞌ.

³ Chị́qui muꞌ ayoꞌ mọꞌ anic maꞌjotyeꞌ in muꞌin judío in, mọꞌdyes qui Pedromun tapyejoij, feshtaĉan jam jiꞌdujraquistumtyiꞌ pan, mọꞌĉan tapjete in,

⁴ ĉärꞌtaquisĉan qui tacjete in. Yedyej väc̣häꞌtyity ĉọjcate in, yiriꞌtac jäbän jiyi rụiꞌcuꞌ in, vạjpedyeꞌ ñuruꞌ yụꞌtac in. Vạjpedyeꞌ väc̣häꞌtyity in yirity ñuruꞌ jịjcaij in. Dyijyi tsanꞌ muꞌ ayoꞌ: "Jiyiꞌyaꞌ raꞌ feshta chat qui raꞌ muntyisyaꞌ vej muꞌin yụꞌtyeyete vaꞌtacdyes p̂eyacdyeꞌ in", yi muꞌ ayoꞌ.

⁵ Muꞌ na taĉan ĉäꞌräij, jämꞌ ĉọjcate in. Muꞌin na anicjetety Jenꞌ in yejĉoij fercheꞌ cọdyete Jenꞌ in muꞌdyes.

Jenꞌ jajiꞌc̣hondyi muꞌ Pedro

⁶ Dyijyi tsanꞌ muꞌ ayoꞌ nojno raꞌ mạyedyeꞌ muꞌ raꞌ jayuꞌtyiyiti Pedro vaꞌtacdyes p̂eyacdyeꞌ muntyisyaꞌ vej muꞌin. Mọꞌdye tsedyedyeꞌ muꞌ Pedro chidyiꞌĉanyaꞌ yụꞌte in väc̣häꞌtyitytum, muꞌintum ĉọshi, úvemun muꞌin väc̣häꞌtyity yụꞌtac in, päräꞌ buꞌyiꞌ cadena sasaꞌbabaꞌ muꞌ. Yoctyiꞌ na chụiꞌdyeꞌyaꞌ ĉọjcaqui in.

⁷ Rụiꞌcujcuj vatyquej jiꞌcaviti yirity anjer muꞌyaꞌ Ayoꞌtyiꞌ muꞌ, mạij tŝọiꞌ mọꞌĉan ĉärꞌtaquisĉan. Anjer tocoꞌjajiti Pedro jajiꞌtsaꞌibun. Jajiti: —¡Tsạꞌeva, cavinyeva sacyeva! P̂eyacdyeꞌĉandye daj tyeiꞌ mọꞌ cadena unyas muꞌ.

⁸ Jajiti anjer: —Cäbuda judyeyaꞌ yujches chimeꞌ mi quịĉada. Aty meꞌ cäbun muꞌ Pedro, muꞌ qui anjer jajiti: —Jämꞌchuĉada p̂urꞌtyity chimeꞌ mi, cabuꞌtyum cäc̣häꞌchutiꞌ.

⁹ Pedro cäc̣häꞌchute muꞌ anjer, meꞌ tsanꞌ itŝiꞌ dyijyedyeꞌ muꞌ, jeñej tamiñity, meꞌ ĉúti vatyquej raꞌ jam anictyity anjer meꞌ ĉúti muꞌ.

¹⁰ Meꞌdye miꞌi in cajñebanꞌ in tashches ĉọjcacdyeꞌ väc̣häꞌtyitysiꞌ in, yoctyiꞌ qui mujuꞌveyaꞌ cajñebajte in, meꞌdye chụiꞌdyeꞌyaꞌ venjoban in, fiyero na mọꞌ chụiꞌdyeꞌ. Ĉụiꞌ vatyquej vanacyiꞌ mọꞌ chụiꞌdyeꞌ, shupjan in, jorojyaꞌ jijtuban in, caye qui cäc̣häꞌchubanꞌ in. Aty mujuꞌveyaꞌ in jayajcabun muꞌyaꞌ muꞌ anjer, jọban muꞌ.

¹¹ Chat q̂uinꞌdyemꞌ ĉúbun muꞌ Pedro, yi ĉojtyiꞌĉan muꞌ: "Q̂uinꞌ chat aty ĉúti yụ muꞌdye Ayoꞌ jutiyin yụ anjer muꞌ, muꞌ qui jiꞌc̣hoñin yụ Herodesyaꞌ paj qui jam jịꞌñibeꞌcan yụ, paj qui jam cạ̈tsiꞌ dyijyedyeꞌ judíos muꞌin, mạꞌjeꞌ tsanꞌ meꞌjin yụ in junꞌ chuc mạꞌjeꞌ muꞌin in."

¹² Meꞌ dyijyeban muꞌ Pedro Maríasĉan qui acaꞌ jịjcaij muꞌ, mọꞌ tseꞌ muꞌ Juansimꞌ, Marcos yocsiꞌ tịj muꞌ. Acaꞌĉan mọꞌ daiꞌ muꞌĉan tsudyujñiti in cọdaqui Jenꞌcheꞌ in.

¹³ Ventacsequi muꞌ Pedro, täjñeꞌ jorojyas chụiꞌdyeꞌ, paj qui vanacjeyete in. Yiris nanas, Rode tịj mọꞌ, ĉọ́queꞌ chụiꞌdyeꞌ, tyi muꞌyaꞌ täjnacvaꞌjoij u.

¹⁴ Chị́yepte mọꞌ p̂eyacdyeꞌ Pedros, judyeꞌdye vanacjeyete chụiꞌdyeꞌ, shuj tyebanꞌ maꞌjodyeꞌtum jéyacseshanꞌ: "Muꞌyaꞌ nash chụiꞌdyeꞌyaꞌ muꞌ Pedro", jéyacsiꞌ.

¹⁵ Muꞌin na jam anicyi in, jeꞌ in: —Anic där shapuiꞌsim —jeꞌ in. Mọꞌ na yejĉoiꞌ jéyacsiꞌ: "¡Muꞌdye nash muꞌyaꞌ!" Muꞌin na yi vorjeꞌ in: —Jam nash Pedro, Pedroty u anjer muꞌ —yi in.

¹⁶ Muꞌ na Pedro yejĉoij täjnacsebi chụiꞌdyeꞌ. Ĉụiꞌdye vanacjeyete in. Cạvete in muꞌdye na jiquej, fer äjyi in.

¹⁷ Cheꞌjeyaqui un muꞌ paj qui c̣huꞌc̣huij in, chat jéyacsi junꞌ chuc muꞌ Jenꞌ jajiꞌc̣hondyi ĉärꞌtaquisĉan jiquej. Chimeꞌdye jéyacsi: —Meꞌ raꞌ jétinte muꞌ Santiago räjtumdye anicjetety Jenꞌ in. Shuban chat qui yocve jịjcaij.

¹⁸ Aty nạijjoiꞌyaꞌ muꞌin ĉärꞌtaquisĉantyiꞌ väc̣häꞌtyity in där noiꞌyi in, itŝiꞌ dyijyedyeꞌ tyeiꞌ muꞌin, mijam méquiꞌ chịj in junꞌ buty jiquej Pedro.

¹⁹ Muꞌ na ayoꞌ Herodes jutacsi tsanꞌ paj qui quevjajte in muꞌ Pedro, mijam qui junꞌ dạcajte in, meꞌdyes qui muꞌ cọdyetacsi p̂eyacdyeꞌ muꞌin väc̣häꞌtyity in, chat qui muꞌ jiꞌijacsi räjdye in. Aty meꞌsiꞌ muꞌ Herodes yạjquiꞌ muꞌ mọꞌ Judea, Cesareaĉan qui jịjcaij, muꞌĉan qui bäꞌyi muꞌ.

Sänꞌdyeꞌ Herodessiꞌ

²⁰ Herodes jiquej anic fạ́cacsi Tiroĉantyiꞌ muntyiꞌ in judyeyaꞌ Sidónĉantyiꞌ chimeꞌ in. Pärenꞌ bäꞌyedyeꞌ in dyijyi in mạꞌjeꞌ cạvecte ayoꞌ in paj qui quivij jämꞌjibun muꞌtum in, ĉaĉaij na taĉan yaꞌij säcsedyeꞌ jiquej in Herodessiꞌĉan jac. Tashcheꞌ chum yi in paj qui muꞌ Blasto jämꞌjeyacsi judyeyaꞌ maꞌjotacsi, muꞌ ayoꞌtyiꞌ nọ́taquity, muꞌ qui raꞌ jiꞌmaꞌjotacsi Herodesyaꞌ.

²¹ Meꞌdye muꞌ Herodes yụꞌtyeꞌ tupudyeꞌ, mọꞌ raꞌ mạyedyeꞌ muꞌ raꞌ cạvacsi muntyiꞌ in. Chaꞌsheꞌ in mọꞌ mạyedyeꞌ, chat qui muꞌ Herodes ayotyĉan quịꞌsiꞌ cäbun, ayoscheꞌ qui bäꞌyaquis bäꞌyi muꞌinsiꞌyaꞌ vej in, chat qui p̂eyacdyeꞌ soꞌmacsi muntyiꞌ in.

²² Muꞌin na muntyiꞌ in yi in: —Uts p̂eyaquity q̂uinꞌ jam nash muꞌ muntyiꞌ, jenꞌ nash muꞌ —yi in.

²³ Meꞌĉandye yirity anjer Ayoꞌtyiꞌ játŝuti chat qui muꞌ fersiꞌ japacjodyeꞌ javaꞌtyiyiti, ĉaĉaij na muꞌ jam dyäcjeĉunacsebi timaꞌcacdyeꞌ muꞌin timaꞌquetety in, jam muꞌ jéyacsi: "Jenꞌ timaꞌquemac." Mọꞌdyes qui muꞌ játŝuti mótoiꞌ räj buꞌyi aꞌĉan muꞌ, muꞌdye jaꞌujati.

²⁴ Mọꞌ na Jenꞌsiꞌ p̂eyacdyeꞌ muꞌ yejĉoiꞌ jiꞌtseꞌeꞌ in, paiꞌ seꞌveꞌ in, cächjicacati anicjete in.

²⁵ Meꞌdye muꞌ Bernabé judyeyaꞌ muꞌ Saulo ujaij in carijtacdyeꞌ muꞌin, mọꞌ dyimacdyeꞌ soꞌmacsi in muꞌin Jerusalénĉantyiꞌ anicjetety Jenꞌ in, chat qui caꞌñibun, in, cạte in muꞌ Juan, Marcos yocsiꞌ tịj muꞌ.